Stretpela Tingting Long Skul

MAN i save tru long wokim piksa, em inap wokim piksa bilong samting stret tru olsem yumi lukim long ai. Ol samting i stap long paslain em i wokim klia tru na i stap olsem bikpela samting long ai bilong yumi, winim samting i stap baksait long en insait long piksa. I wankain liklik long ol samting long laip bilong yumi​—sampela samting i bikpela samting moa, winim ol narapela.

Krais Jisas i tok: “Ol manmeri i save, ol i stap rabis tru long ol samting bilong God, em ol i ken amamas. Ol dispela manmeri bai i kisim ol gutpela samting bilong kingdom bilong heven.” (Matyu 5:3) Olsem na ol samting bilong God i mas i stap nambawan samting, na i winim ol samting bilong skin.

Orait, olsem wanem long skul? Kristen i no ting skul em i samting nating. Nogat. Yumi mas skul liklik bambai yumi inap mekim wok Baibel i givim long yumi, em aposel Pol i kolim: “Sapos wanpela man i no lukautim ol wanblut tru bilong em yet na ol arapela wanlain tu, orait dispela man i lusim pinis bilip bilong em, na em i man nogut tru. Ol haiden yet i no save mekim dispela kain pasin nogut.” (1 Timoti 5:8) Na Jisas i tok lain bilong em i mas kamapim ol disaipel na ‘lainim ol long bihainim olgeta tok bilong em.’ Bilong mekim dispela wok, yumi mas ‘kisim save’ na skulim gut ol narapela.​—Matyu 28:​19, 20; Jon 17:3; Aposel 17:11; 1 Timoti 4:13.

Tasol yumi mas kisim stretpela tingting long skul. Nogut yumi tingting tasol long kisim bikpela save na ol pepa na setifiket, na bai yumi inap kisim biknem. Sapos skul i kamap nambawan bikpela samting long yu, yu no inap i stap amamas. Tru, em inap helpim yu long samting bilong skin inap liklik taim. Tasol olsem saveman King Solomon i tok: “Mi tingting olsem, i gat sampela man i bin skul gut long wok na i gat gutpela save na tingting, na ol i bin wok hat na kisim planti samting. Na bihain ol i dai na ol arapela man i kisim nating ol dispela samting bilong ol.”​—Saveman 2:​21.

Ol Witnes Bilong Jehova i laikim skul, tasol ol i no tingting long kisim nating save. Ol i laik kisim gutpela skul bambai ol inap mekim gut wok bilong God na lukautim ol yet long ol samting bilong skin. Ol i no kisim pe long wok bilong God ol i mekim, olsem na planti ol i mas mekim wok mani bilong lukautim ol yet. Dispela inap givim hatwok moa long ol Witnes Bilong Jehova i save mekim wok bilong God long olgeta de, em ol i kolim ol olsem ol painia. Ol i mas lusim planti aua long mekim wok bilong God, tasol ol i mas mekim wok mani tu bambai ol inap kisim liklik mani bilong lukautim ol yet na famili tu sapos ol i marit.a​—Sindaun 10:4.

Sampela Witnes Bilong Jehova i skelim gut ol samting na ol i kisim sampela skul moa. Tasol ol i was gut bambai skul i no kamap nambawan bikpela samting long laip bilong ol. Wanem samting i helpim ol long mekim olsem? Wanpela yangpela man bilong Brasil, nem bilong em John, em i tok: “Sampela samting i bin helpim mi, em olsem: Maski i gat wok bilong skul mi mas mekim long apinun, mi no lusim ol miting Kristen. Na mi bin tokaut klia long ol wanskul olsem mi wanpela Witnes Bilong Jehova.”

Eric, em tu bilong Brasil, em i bin kisim sampela skul moa, tasol taim em i skul na rot i op, em i bin autim bilip bilong em long ol narapela. Em i tok: “Mi tingim skul em i hap mi mas autim tok long en. Mi bin mekim Baibel-stadi wantaim sampela tisa na wanskul, na nau faipela ol i baptais pinis, na tupela i elda.”

Richard i skul moa bilong kisim setifiket bilong wokim plan bilong haus samting. Em i tok: “Skul i helpim mi long kisim wok bilong lukautim mi yet na meri bilong mi, na em i opim rot long mi. Taim mi raun long wok bilong sanapim kwik ol Haus Kingdom, mi toktok wantaim ol brata i bosim wok na mi kisim save olsem ol i sot long man bilong wokim plan bilong wokim haus.b Nau mi mekim gutpela wok long save mi bin kisim long skul bilong helpim dispela wok. Na tu, mitupela meri bilong mi i gat tingting long kisim wok long nambawan ofis long Bruklin o long intenesenel konstraksen bilong ol Witnes Bilong Jehova.”

Tasol planti Witnes Bilong Jehova i winim hatwok bilong lukautim ol yet na famili bilong ol, maski ol i no kisim sampela skul moa. Mary i tok: “Mi save klinim haus bilong ol man tupela de long olgeta wik na kisim liklik mani bilong lukautim mi yet. Long dispela rot narapela kain pasin i kamap​—mi kisim bikpela mani moa long olgeta wan wan aua, winim ol man mi wok long ol. Tasol mi no tingim wok mani i bikpela samting; em bilong helpim mi bambai mi inap mekim wok painia, na mi amamas long dispela.”

Steve tu i amamas olsem, em i tok: “Taim mi kirap mekim wok painia, sampela i tokim mi: ‘Bai yu mekim wanem sapos yu marit na yu gat pikinini? Bai yu inap kisim pe inap long lukautim ol?’ Tasol mi bin mekim kain kain wok na mi kisim save pinis long mekim planti kain wok. Nau mi marit pinis na mi mas lukautim meri bilong mi, na mi kisim bikpela pe moa winim sampela wanwok long ples wok, em ol i bin winim bikpela skul koles.”

Sampela papa i no bilip na ol i tok, ol yangpela pikinini bilong ol i mas kisim sampela skul moa, Baibel i givim namba long ol long tok olsem. Tasol sapos kain samting olsem i kamap, ol yangpela i ken tingim tok bilong Matyu 6:33 na kisim skul em inap helpim ol long mekim gutpela wok moa long wok bilong Jehova o long mekim wok painia taim ol i skul.

Gutpela Skul Tru

Olgeta Witnes Bilong Jehova, maski ol i bin skul o ol i no bin skul, i gat wanpela samting ol i wanbel long en. Olgeta i save Baibel, em Tok Bilong God, em i as bilong nambawan gutpela skul long nau. Jon 17:3 i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” Maski wanem kain skul o hamas skul Kristen i kisim, bikpela samting em olsem: Em i mas kisim save long Jehova na Pikinini bilong em Jisas.

Ol Kristen bilong pastaim i bin mekim olsem. Manain i bin “skul wantaim namba wan gavman Herot,” tasol em i stap long kongrigesen bilong Antiok na wok wantaim ol profet na tisa bilong kongrigesen. (Aposel 13:1) Pol tu i kisim bikpela skul wankain olsem man i skul long yunivesiti long nau. Tasol taim em i kamap Kristen, em i kisim stretpela tingting long bikpela skul em i bin kisim; em i no tingim dispela i nambawan samting. Em i no mekim wok long save bilong em bilong antap long ol narapela; em i bin skul long pasin na lo na stori bilong ol lain man, na em i mekim wok long dispela save bilong em bilong autim tok long ol kain kain man.​—Aposel 16:​37-40; 22:3; 25:​11, 12; 1 Korin 9:​19-23; Filipai 1:7.

Ol Kristen bilong pastaim ol i no kisim nem olsem ol man bilong skul. Planti ol “i no bin skul,” ol i “man nating tasol”; ol i no bin go long skul bilong ol saveman Juda. Tasol i no olsem ol i no bin kisim save. Ol dispela man na meri ol inap tru long autim bilip bilong ol​—na dispela i kamapim klia olsem ol i bin lain na kisim save.​—Aposel 4:13.

Olsem na olgeta Kristen i tingim gut skul. Tasol ol i wok strong long “skelim gut olgeta pasin na kisim ol pasin i gutpela tru.” Ol i kisim stretpela tingting long skul na olgeta narapela wok.​—Filipai 1:​9, 10.

[Ol Futnot]

[Blok long pes 7]

Em i Wok Strong na Kisim Gutnem

Matthew em i wanpela Witnes Bilong Jehova na wanpela yia paslain long taim em i pinis long haiskul, em i tingting strong long em bai mekim wanem wok bilong lukautim em yet long ol samting bilong skin na em i ken mekim wok painia wantaim. Matthew wantaim papamama i beten na tingting gut na ol i pilim olsem sapos em i kisim sampela skul moa, dispela bai helpim em long mekim dispela wok em i laik mekim. Olsem na em i putim nem bilong kisim helpim long baim bikpela skul. Bilong helpim Matthew, man i gat wok long helpim ol sumatin long skul, em i raitim pas long lain i mas orait long baim skul bilong Matthew. Em i tok:

“Inap tupela yia na hap, mi amamas long i stap pren bilong Mat na man bilong givim tingting long em. I stap bilong Mat i gat strongpela as . . . Em i gat bilip na em i bilip strong, na dispela i bosim sindaun bilong em wantaim ol narapela man na olgeta samting em i mekim.

“Inap sampela yia pinis, Matthew i bin lain long mekim wok bilong God. Em i mekim wok bilong lotu, tasol em i no kisim pe. Pasin sori tasol i kirapim em long mekim dispela wok. Mat em i yangpela man i no tingim em yet; em i save tingim ol narapela man na mekim gut long ol. Sapos yupela i orait long baim skul bilong em, dispela bai helpim dispela man bilong bilip na bai em inap skul moa na mekim yet dispela wok volantia bilong em.

“Bilong mekim dispela wok volantia na helpim ol man, Mat i bin lusim planti aua long go long haus bilong ol man na autim tok long Sarere Sande, na long apinun taim skul i pinis, na taim em i malolo long skul long taim bilong bikpela san. Em i save helpim ol man i stap long hap bilong em, na em i save wok wantaim kain kain man. Mat i kamapim klia olsem em inap i go pas na em i gat save long skulim ol yangpela wantaim ol lapun long Baibel. . . . Em inap kirapim bel bilong ol man na helpim ol long kamap gutpela man. Ol tisa i tok, insait long klas-rum em i save strongim ol narapela long mekim gutpela pasin. Em i go pas long taim klas i toktok long wanpela samting, na em i save tumas long paitim tok. . . .

“Mat em i wanpela yangpela man i gat gutpela pasin tru na mi amamas long givim tingting long em. Ol narapela i save laikim em; ol wanskul na ol tisa i litimapim nem bilong em. Em i strong tru long holimpas ol lo.”

[Ol Piksa long pes 9]

Ol Witnes Bilong Jehova i laikim skul bilong helpim ol long mekim gutpela wok moa long wok bilong God