Baibel i Tok Wanem?

“Bilong Wanem God i Kisim Pikinini Bilong Mi?”

TAIM wanpela pikinini i dai, papamama i save bel hevi tru. Maski ol narapela i mekim gutpela tok long ol, dispela i no inap daunim bel hevi bilong ol. Tasol sapos wanpela pikinini bilong yu i bin i dai na yu wok long tingting planti olsem i gat wanem as na God i kisim dispela pikinini, orait, nogut yu bel hevi nating long wanpela tingting kranki. Yu mas save long tok i tru, olsem: God i no kisim pikinini bilong yu.

Tasol planti manmeri i gat narapela tingting. Olsem wanpela meri, pikinini man bilong em i gat 17 krismas na em i dai long sik kensa. Meri i bel hevi tru na em i lukluk long pikinini i stap long bokis bilong planim man, na meri i tokim wanpela i stap klostu: “God i laikim Tomi i stap wantaim Em long heven.” Dispela meri i wanpela Katolik na inap planti yia pinis em i bin i go long lotu na lain long dispela bilip. Inap longtaim pinis, ol Talatala tu ol i bilip olsem God i gat asua long ol pikinini i dai. Jon Kalvin, em wanpela Talatala i bin wok long stretim sampela pasin na bilip bilong lotu, tasol taim pikinini man bilong em i gat tupela wik na i dai, em i bel hevi tru na i tok: ‘Bikpela i bin mekim nogut tru long mipela na liklik pikinini bilong mipela i dai.’

Wanpela stori nating bilong ol Juda i stori long wanpela tisa bilong lotu; taim em i go long wanpela hap, tupela pikinini man bilong em i dai, em mama bilong ol i bin karim tupela wantaim. Taim em i kam bek na i laik lukim tupela pikinini hia, meri bilong em i tok: ‘Sapos wanpela man i givim tupela naispela ston i dia tumas long yu na tokim yu, yu ken holim pastaim na amamas long en, orait, taim dispela man i laik kisim bek tupela naispela ston bilong em, bai yu kros na tok yu no laik?’ Man i tok: ‘Nogat tru!’ Orait, nau meri i soim tupela pikinini long em, em tupela i dai pinis, na meri i tok: ‘God i laik kisim bek tupela naispela ston bilong em i dia tumas.’

I No Mekim Gut Bel Bilong Man na i No Stret Wantaim Tok Bilong Baibel

Olsem wanem? Yu ting Man bilong wokim yumi em i wanpela man nogut i save kirap nating na kilim i dai sampela pikinini, maski em i save papamama bilong ol bai i bel hevi tru? Nogat. God bilong Baibel i no save mekim olsem. 1 Jon 4:8 i tok: “God yet em i as bilong dispela pasin bilong laikim ol arapela.” Baibel i no tok God i gat pasin bilong laikim ol arapela, nogat; em i tok, God i as bilong pasin bilong laikim ol arapela. Dispela pasin i nambawan tru, na em i insait long olgeta pasin bilong God na long olgeta samting em i mekim, olsem na i stret yumi ken tok dispela pasin i makim God yet. Olsem na em i no wanpela God i save kilim i dai ol pikinini ‘long wanem em i laik kisim bek ol naispela ston bilong em i dia tumas,’ nogat.

God i laikim tru ol pikinini. Krais Jisas tu i laikim tru ol na em i mekim gut long ol wan wan pikinini, na dispela pasin sori em i mekim long ol i wankain stret long pasin bilong Papa bilong em. Wanpela taim Jisas i holim wanpela liklik pikinini na em i lainim ol disaipel long ol i mas kamap olsem wanpela liklik pikinini na daunim ol yet. (Matyu 18:​1-4; Mak 9:36) Inap planti handet yia paslain long dispela, Jehova i bin skulim lain bilong em long tingim ol pikinini bilong ol i olsem wanpela gutpela samting tru, na ol i mas skulim na stretim na lukautim gut ol. (Lo 6:​6, 7; Buk Song 127:​3-5) God i laik bai famili olgeta i stap laip wantaim; em i no laik bai i dai i brukim ol famili.

“Orait, Bilong Wanem Pikinini Bilong Mi i Dai?”

Planti man i ting olsem: God i gat olgeta strong, olsem na em i mas bosim olgeta samting i kamap long graun, na i dai bilong ol pikinini tu. Tasol dispela tingting i no stret. Taim wanpela bagarap i kilim i dai 10-pela pikinini bilong Jop wantaim, em i ting Jehova i kamapim dispela hevi long em. Jop i no save, wanpela bikpela birua bilong God, em Satan, i as bilong dispela bikpela bagarap i painim ol pikinini bilong em, na Satan i mekim bambai Jop i bel hevi nogut tru na pundaun long bilip na lusim Man bilong wokim em.​—Jop 1:​6-12.

Long nau tu, planti man i no save Satan i gat bikpela strong. Baibel i kamapim klia olsem, Satan yet i bosim ol pasin nogut bilong dispela graun​—Jehova i no bosim. 1 Jon 5:19 i tok: “Graun olgeta em i stap aninit long strong bilong Satan.” Em nau, Jehova i no gat asua long ol hevi i kamap long graun. Em i no kisim pikinini bilong yu, nogat.

Tasol olsem wanem? Satan i kisim pikinini bilong yu? Nogat, i no olsem. Bipo long Iden, namba wan man i bikhet long God na em i putim em yet i go aninit long strong bilong Satan. Olsem na laip i stap oltaim i tekewe long em, na skin bilong em i no gutpela olgeta olsem bilong pastaim, na ol lain pikinini bilong em tu i lus long dispela gutpela samting. (Rom 5:12) Long dispela as yumi stap namel long ol man i birua long God. Baibel i tok, “taim nogut i save painim yumi olgeta,” na yumi no save wanem taim wanpela bikpela hevi o bagarap samting bai painim yumi. (Saveman 9:11) Satan i “giamanim olgeta manmeri bilong graun.” (Kamapim Tok Hait 12:9) Em i gat bikpela laik long pulim ol manmeri na bai ol i lusim God. Olsem na em i bin kamapim kain kain tok nogut long God bilong giamanim ol man​—wanpela tok giaman i olsem God i save mekim na bai ol pikinini i dai na lusim papamama na nau God yet inap kisim ol.

“Olsem Wanem long Pikinini Bilong Mi Bihain?”

Ol papamama, em pikinini bilong ol i dai pinis, ol i no ken ting God i gat asua, nogat. Sapos ol i lukim tok bilong God long Baibel dispela bai mekim gut bel bilong ol, long wanem ol bai save, i gat gutpela samting ol i ken wetim i kamap bihain. Lotu giaman i bin paulim tingting bilong planti manmeri, olsem na ol i no save ol pikinini bilong ol i stap we​—heven o bikpaia o klinpaia samting​—olsem ol i stap amamas o ol i stap nogut tru. Tasol Baibel i tok, ol man i dai pinis ol i no save long wanpela samting​—i olsem ol i slip tasol. (Saveman 9:​5, 10; Jon 11:​11-14) Taim pikinini i slip i stap, papamama i no save tingting planti, a? Olsem na taim pikinini bilong ol i dai ol i no ken tingting planti na pret long ol samting i painim em. Jisas i tok, taim bai kamap bihain na “olgeta man i stap long matmat” bai ol i “lusim matmat na i kam ausait,” na kisim gutpela laip long paradais long graun.​—Jon 5:​28, 29.

Tru, i gat gutpela samting i wetim ol pikinini i dai pinis, tasol dispela i no inap daunim ol hevi em dai i save kamapim. Taim pren bilong Jisas, em Lasarus, i dai, Jisas yet i bel hevi na em i krai​—maski em i save liklik hap taim tasol na em bai kirapim bek Lasarus. Olsem na yumi save, taim man i dai i no olsem em i mas pinis olgeta na em i no inap i stap laip gen, nogat. Jisas na Papa bilong em, Jehova, tupela i no laik tru long man i mas i dai. Baibel i tok i dai i olsem laspela “birua” na Jisas bai “pinisim i dai.” (1 Korin 15:26) Long Paradais bihain, taim Satan i no stap bos moa, i dai bai pinis olgeta. Ol man i dai pinis bai kirap bek na stap laip gen. Em nau, taim ol papamama i kisim bek ol pikinini bilong ol bipo ol i dai pinis, orait bai yumi inap tok, ‘i dai i pinis olgeta.’​—Hosea 13:14.