Skelim Gut Sampela Bilip Nating Long Indai

LONG bipo yet i kam inap long nau, ol man i bin tingting planti na ol i pret long indai. Ol tingting giaman bilong lotu, ol pasin bilong ples, tingting bilong wan wan man, ol dispela samting tu i mekim na ol man i pret moa yet long indai. Pret bilong indai inap pasim man long amamas long i stap bilong em, na em inap kisim tingting olsem i no gat as long i stap bilong ol man.

Bikpela lotu i gat bikpela asua moa long kamapim planti bilip nating long indai. Orait, skelim sampela bilong ol dispela bilip wantaim tok i tru bilong Baibel, na traim long stretim tingting bilong yu yet long indai.

Bilip Nating 1: Indai em i pinis bilong laip bilong man na em samting i mas kamap.

Wanpela buk, Death​​—⁠The Final Stage of Growth, i tok: “Indai . . . em i wanpela bikpela samting long i stap bilong yumi.” Ol kain tok olsem i kamapim klia dispela bilip olsem indai em samting i mas painim olgeta samting i gat laip. Olsem na dispela bilip i kirapim planti man long kisim tingting olsem i stap bilong yumi i no gat as bilong en, na ol i ken mekim nabaut bilong painim rot bilong helpim ol yet.

Tasol yu ting i stret indai i mas painim yumi ol man? I no olgeta saveman i gat dispela tingting. Olsem: Long wanpela inteviu, Calvin Harley, em i wanpela saveman bilong stadi long hevi bilong i go lapun, em i tok em i no ting olsem ol man “i mas i dai.” Saveman William Clark i tok: “Indai i no wanpela samting i mas painim ol man.” Na Seymour Benzer bilong wanpela lain (California Institute of Technology) i tok: ‘Pasin bilong i go lapun em i olsem ol samting i kamap na yumi laik senisim, na i no olsem ol samting i kamap long taim bilong en na yumi no inap senisim.’

Taim ol saientis i stadi long ol samting long skin bilong man, ol i kirap nogut. Ol i kisim save olsem skin bilong yumi i gat ol samting bilong helpim yumi long i stap laip longpela taim moa, winim 70 o 80 yia. Olsem: Ol saientis i painimaut olsem kru bilong ol man inap holim planti samting moa yet long tingting. Wanpela saveman i tok kru bilong yumi inap holim planti save tru inap olsem “olgeta tok i stap long 20 milion volium bilong ol bikpela buk olsem i stap long ol bikpela laibreri.” Sampela saveman i ting olsem insait long hap taim bilong man i stap laip, em i save mekim wok long liklik hap tru (.01 pesen) bilong kru. Olsem na i stret yumi laik save, ‘I gat wanem as na yumi gat wanpela kru em inap long mekim bikpela wok tru, tasol yumi save mekim wok long liklik hap tru bilong en long taim yumi stap laip?’

Tingim tu pasin bilong ol man long pret long indai! Planti man i save bel hevi nogut tru taim poroman marit, o wanpela pikinini i dai. Taim wanpela ol i laikim tumas i dai, ol man inap bel hevi long dispela samting inap longpela taim. Ol man em ol i save tok i stret long ol man i mas i dai, ol tu i hatwok long ting olsem indai bilong ol i makim pinis bilong olgeta samting. Wanpela nius (British Medical Journal) i toktok long “wanpela tingting bilong planti saveman olsem olgeta man i gat laik long i stap laip inap longpela taim.”

Taim yumi skelim pasin ol man i mekim taim wanpela i dai, na pasin bilong man long tingim na lainim planti samting moa, na laik bilong em long i stap laip oltaim, yumi inap luksave olsem God i bin wokim man bilong i stap laip, a? Tru tumas, God i no wokim man bilong i dai na dispela i olsem samting i mas kamap, nogat, em i wokim man bilong i stap laip inap oltaim oltaim. Tingim tok God i bin mekim long namba wan man na meri: “Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.” (Stat 1:​28) Man! Ol inap amamas long i stap laip inap oltaim oltaim!

Bilip Nating 2: Long rot bilong indai, God i save kisim ol man bilong i go i stap wantaim em.

Wanpela mama i gat 27 krismas na em i laik dai na lusim tripela pikinini bilong em, em i tokim wanpela sister bilong Misin Katolik olsem: “No ken kam insait na tokim mi olsem em laik bilong God long mi mas i dai. . . . Mi save bel hevi tru taim narapela man i tokim mi olsem.” Tasol planti lotu i save skulim ol man olsem long indai​​—⁠olsem God i save kisim ol man bilong i go i stap klostu long em.

Yu ting Man bilong wokim yumi em i man nogut tru na bai em i mekim yumi i dai, maski em i save olsem dispela samting i save bagarapim tru bel bilong yumi? Nogat. God bilong Baibel i no save mekim olsem. 1 Jon 4:8 i tok, “God yet em i as bilong dispela pasin bilong laikim ol arapela.” Tingim: Dispela ves i no tok olsem God i gat pasin bilong laikim ol narapela o God i save laikim ol narapela, tasol em i tok olsem God yet em i as bilong dispela pasin bilong laikim ol narapela. Dispela pasin bilong em long laikim ol narapela em i bikpela tru, na i klin, na i gutpela tru na i save stiaim olgeta samting em i mekim, olsem na i stret Baibel i tok em i as bilong pasin bilong laikim ol narapela. Em i no wanpela God i save kisim ol man long rot bilong indai bilong i stap klostu long em.

Lotu giaman i bin paulim tingting bilong planti man long wanem samting i painim ol man i dai pinis. Heven, hel, klinpaia, limbo​​—⁠ol dispela i sampela ples em ol man i no klia long en na i pretim ol. Tasol Baibel i tokim yumi olsem ol man i dai pinis ol i no save long wanpela samting; yumi inap tok i olsem ol i slip. (Saveman 9:​5, 10; Jon 11:​11-​14) Olsem na i no gat wok long yumi tingting planti long wanem samting i painim yumi taim yumi dai, wankain olsem yumi no save tingting planti taim yumi lukim wanpela man i slip indai. Jisas i tok long wanpela taim bai kamap na “olgeta manmeri i stap long matmat” ol bai “lusim matmat na i kam ausait” na kisim nupela laip long Paradais bai kamap long graun.​​—⁠Jon 5:​28, 29; Luk 23:⁠43.

Bilip Nating 3: God i kisim ol liklik pikinini bilong kamap ensel.

Elisabeth Kübler-Ross, em i bin stadi long ol man i gat bikpela sik, em i kolim narapela samting em planti man bilong lotu i save tingim. Em i stori long samting i bin kamap tru na em i tok “i no stret long tokim liklik pikinini em brata bilong em i dai olsem God i laikim tumas ol liklik mangi, olsem na em i kisim Johnny i go long heven.” Kain tok olsem inap mekim na ol man i kisim tingting kranki long God, na dispela kain tok i no stret long pasin bilong em. Dokta Kübler-Ross i tok moa: “Taim dispela liklik meri i kamap bikpela, dispela bel kros bilong em long God i stap yet, olsem na 30 yia bihain bel na tingting bilong em i bagarap olgeta taim pikinini man bilong em yet i dai.”

I gat wanem as na God i kisim wanpela liklik pikinini bilong kamap ensel? I olsem God i mas i gat dispela pikinini, na papamama bilong em nogat, a? Sapos i tru olsem God i save kisim ol pikinini, dispela bai mekim em i kamap Man i no save laikim ol narapela na man i tingim laik bilong em yet tasol, a? Tasol Baibel i tok: “Pasin bilong laikim ol arapela em i pasin bilong God.” (1 Jon 4:⁠7) Yu ting wanpela God i save laikim tru ol narapela em inap mekim wanpela pasin em ol man i no inap orait long en?

Olsem na bilong wanem ol pikinini i save dai? Wanpela tok Baibel i mekim bilong bekim dispela askim i stap long Saveman 9:​11: “Taim nogut i save painim yumi olgeta.” Na Song 51:5 i tokim yumi olsem yumi olgeta i gat sin pinis taim mama i karim yumi, na long nau indai bai painim olgeta man​—⁠ol inap dai long kain kain rot. Sampela taim pikinini i dai long bel na mama i karim em. Sampela taim birua samting i painim ol pikinini na ol i dai. I no asua bilong God na ol dispela bagarap samting i painim ol.

Bilip Nating 4: Sampela man i kisim pen taim ol i dai pinis.

Planti lotu i skulim ol man olsem ol man nogut bai go long bikpaia na kisim pen inap oltaim oltaim. Yu ting dispela bilip i stret na Baibel i as bilong en? Ol man i save stap laip inap 70 o 80 yia. Sapos man i mekim ol pasin nogut tru long laip olgeta bilong em, yu ting i stret long em i kisim pen inap oltaim oltaim? Nogat. Em i no stretpela pasin liklik long givim pen oltaim oltaim long man long ol sin em i bin mekim insait long sotpela hap taim em i bin i stap laip.

God tasol inap tokim yumi long samting i painim ol man taim ol i dai, na em i bin mekim olsem long Tok bilong em, em Baibel. Na Baibel i tok: “Ol abus i save dai, na yumi man tu i save dai. Man na abus i save pulim win, na dispela i as bilong laip bilong tupela wantaim. . . . God i bin kisim graun na wokim tupela, olsem na taim tupela i dai bai tupela i kamap olsem graun gen.” (Saveman 3:​19, 20) I no gat wanpela tok long hia i makim bikpaia. Taim ol man i dai ol i kamap das ​​—⁠ol i no i stap moa.

Bilong man i ken kisim pen, em i mas i gat tingting. Yu ting ol daiman i gat tingting? Orait, Baibel i bekim dispela askim tu, olsem: “Ol man i gat laip i winim ol man i dai pinis. Long wanem, ol i save wanpela samting bai i kamap long ol. Ol i save bai ol i dai. Tasol ol man i dai pinis, ol i no inap save long wanpela samting. Bai ol i no kisim gutpela samting moa. Ol man i lusim tingting pinis long ol.” (Saveman 9:​4, 5) Ol man i dai pinis “ol i no inap save long wanpela samting,” olsem na ol i no inap kisim pen long wanpela hap.

Bilip Nating 5: Indai i makim olsem yumi no inap kisim laip gen.

Yumi no i stap moa taim yumi dai, tasol dispela i no makim olsem yumi no gat rot bilong kisim laip gen. Gutpela man Jop i save olsem em bai go long matmat, Sheol, taim em i dai. Tasol tingim beten bilong em long God: “God, i gutpela sapos yu haitim mi long ples bilong ol man i dai pinis, inap belhat bilong yu i slek olgeta. Na yu ken makim wanpela taim bilong tingim mi gen. Na bai mi wet i stap inap long taim yu makim bilong mi i stap long dispela ples, em i pinis. . . . Bai yu singautim mi na bai mi lusim dispela ples na kam long yu.”​—⁠Jop 14:​13-15.

Jop i bilip olsem sapos em i stap gut long God i go inap long taim em i dai, God bai tingim em na kirapim em bek. Dispela em bilip bilong olgeta wokboi bilong God long bipo. Jisas yet i strongim dispela bilip na em i kamapim olsem God bai mekim wok long em bilong kirapim bek ol man i dai pinis. Ol tok bilong Krais yet i strongim bilip bilong yumi: “Taim i laik kamap na olgeta manmeri i stap long matmat ol bai i harim maus bilong Pikinini [Jisas], na ol bai i lusim matmat na i kam ausait. Ol manmeri i bin mekim gutpela pasin, ol bai i kirap bek na i stap laip. Na ol manmeri i bin mekim pasin nogut, ol bai i kirap bek na i kamap long kot na kot bai i tok olsem, ol i mas bagarap.”​​—⁠Jon 5:​28, 29.

Klostu nau God bai pinisim olgeta pasin nogut na kamapim nupela taim long graun aninit long wok bos bilong em long heven. (Song 37:​10, 11; Daniel 2:​44; KTH 16:​14, 16) Paradais bai kamap long olgeta hap bilong graun, na ol manmeri i mekim wok bilong God ol bai i stap long en. Baibel i tok: “Long sia king mi harim maus bilong wanpela man i singaut strong olsem, ‘Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.’ ”​​—⁠KTH 21:​3, 4.

I No Pret Moa

Taim yu kisim save olsem ol daiman inap kirap bek, na tu, taim yu kisim save long Man i as bilong dispela samting, dispela inap mekim gut bel bilong yu. Jisas i tok promis olsem: “Yupela bai i save long tok tru, na tok tru bai i mekim yupela i kamap fri.” (Jon 8:​32) Dispela i makim olsem yumi bai kamap fri long pret bilong indai. Jehova wanpela tasol inap pinisim hevi bilong i go lapun na indai, na givim laip oltaim long yumi. Yu inap bilip long ol tok promis bilong God? Yes, yu inap bilip, long wanem, oltaim Tok Bilong God i save kamap tru. (Aisaia 55:11) Mipela i laik kirapim yu long kisim sampela save moa long ol samting God i tingting pinis long mekim long ol man. Ol Witnes Bilong Jehova bai amamas tru long helpim yu.

[Rait long pes 6]

Pret bilong indai inap pasim man long amamas long i stap bilong em

[Sat long pes 7]

SAMPELA BILIP NATING LONG INDAI BAIBEL I TOK WANEM?

[Piksa long pes 8]

Taim yumi save long tok i tru bilong indai, dispela i helpim yumi long lusim pret bilong indai

[Piksa Kredit Lain long pes 5]

Barrators​​—⁠Giampolo/The Doré Illustrations For Dante’s Divine Comedy/Dover Publications Inc.