Taim Man i Dai Yu Ting Em i Pinis Olgeta?
ATING i no gat narapela tok ol man i bin tingting planti long en olsem dispela askim long, wanem samting i save painim yumi taim yumi dai. Inap planti tausen yia, ol saveman bilong olgeta lain ol i bin tingting long dispela askim. Tasol save bilong ol man na wok bilong ol saientis i bin kamapim ol kain kain tingting na stori nating tasol.
Orait olsem wanem long ol tok i stap long Baibel? Ating sampela bai tok, ol tok bilong Baibel long dai na laip bihain long taim yumi dai, dispela tu i paulim tingting bilong yumi. Tasol yumi mas save olsem planti lotu bilong dispela graun i save bungim ol tok bilong Baibel i klia tru wantaim ol kain kain stori giaman na stori bilong ol tumbuna, na dispela i paulim tru tingting bilong ol man. Tasol sapos yu sakim ol tok bilong ol tumbuna na ol stori nating i no gat as bilong en na yu skelim ol tok bilong Baibel stret, bai yu lukim olsem ol tok bilong Baibel i klia tru na i soim yumi gutpela samting yumi inap bilip na wet long en.
Taim Yu No Bin Kamap Yet
Yumi ken tingim tupela tok bilong King Solomon i stap long stori i kamap paslain long dispela. Ol dispela skripsa i kamapim klia olsem taim ol man o animal i dai pinis, ol i no save long wanpela samting. Olsem na Baibel i tok, taim man i dai pinis em i no inap mekim wanpela wok, pilim, o tingting long wanpela samting.—Saveman 9:4-5, 6, 10.
Yu hatwok long bilipim dispela tok? Orait tingim dispela: Taim wanpela man i no kamap laip yet, em i stap olsem wanem? Yu bin stap we paslain long taim yu kamap nupela long bel bilong mama na yu kamap man o meri i gat laip? Orait sapos tru yumi gat samting insait long yumi em yumi no inap lukim na i stap laip yet taim yumi dai, em i bin stap we long taim yu no bin kamap yet long bel bilong mama? Yumi mas tok tru olsem, yu no inap tingting bek long narapela laip yu bin stap long en paslain long yu kamap man. Taim yu no kamap yet long bel bilong mama, yu no bin stap. Dispela tok i klia tru, a?
Olsem na i stret yumi ken tok, taim yumi dai tingting bilong yumi i kamap wankain olsem long taim yumi no bin kamap yet. Em i wankain olsem God i bin tokim Adam taim em i sakim tok bilong God: “Mi bin wokim yu long graun, na bai yu go bek gen long graun.” (Stat 3:19) Long dispela rot ol man i no narapela kain long ol animal. Tok bilong Baibel long ol man i dai pinis i stret tru, olsem: “Laip bilong man i no winim laip bilong abus. Nogat.”—Saveman 3:19, 20.
Orait yu ting dispela i makim olsem yumi ol man i bilong i stap sampela yia tasol na bihain yumi no i stap moa i go inap oltaim oltaim? O yu ting i gat gutpela samting i wetim ol man i dai pinis? Tingim dispela samting.
Man i Gat Laik Long i Stap Laip
Klostu olgeta man i no laik toktok long indai. Na moa yet ol i no laik toktok long dai bilong ol yet o tingim dispela samting. Tasol long olgeta de, TV na ol piksa wokabaut i save kamapim piksa bilong ol manmeri i dai long kain kain rot, na yumi lukim na ritim long ol nius ol stori tru tru bilong ol manmeri i dai long ol bikpela bagarap.
Olsem na dai bilong ol manmeri yumi no save long ol i olsem samting i save kamap tasol long olgeta de. Tasol taim wanpela long famili i dai, o dai i laik painim yumi yet, yumi ting em i samting nogut. Dispela i olsem, long wanem, yumi ol man i gat strongpela laik long i stap laip. Na tu, yumi save tingim hamas yia yumi stap, na yumi save tingting long taim bihain bihain i no gat pinis bilong en. King Solomon i tok, God “i putim tingting bilong laip i stap oltaim long bel bilong ol man.” (Saveman 3:11, NW ) Sapos ol samting i stap orait tasol, yumi gat laik long i stap oltaim oltaim. Yumi no laik bai ol i makim wanpela de o yia bilong yumi mas i dai. Ol animal i no gat dispela kain laik bilong i stap oltaim. Ol i no gat tingting long taim bihain.
Man Inap Mekim Kain Kain Samting
Ol man i gat laik long i stap oltaim oltaim, na tu, ol inap wok i go i go na kamapim ol kain kain samting i go inap oltaim oltaim. I olsem i no gat pinis bilong ol samting man inap lain long en. Ol i tok, i no gat narapela samting olsem kru bilong man, em inap tingim na kisim save long ol kain kain samting na stretim bek ol hap bilong en i kisim sik o bagarap. Tingting bilong yumi man inap skelim gut ol samting na kisimgut as bilong ol strongpela save na tingting, tasol ol animal i no inap mekim olsem. Ol saveman i bin kisim liklik save tasol long ol samting kru bilong man inap mekim.
Taim yumi wok long i go lapun, dispela strong bilong kru i stap yet. Long nau sampela saveman i kisim save olsem, taim man i wok long go lapun, kru i no wok long bagarap—em inap wok gut yet. Sampela saveman i wok long wanpela lain (The Franklin Institute’s Center for Innovation in Science Learning) ol i tok: ‘Kru bilong man em inap stretim stretim ol samting bilong en na wokim ol nupela liklik rop nev i bin bagarap. Na taim man i lapun tu, kru inap kamapim ol nupela sel. Ol sik i save mekim na tingting bilong sampela i no wok gut, tasol taim ol lapun i gat hevi olsem tingting i lus, o ol i no inap mekim gut wok long han bilong ol, ating as bilong dispela em ol i stap nating na i no mekim sampela wok olsem eksasais samting, na ol i no wokim tingting.’
Em nau, sapos oltaim yumi wokim tingting na sik i no kisim kru, em inap mekim wok i go i go inap long olgeta taim bihain. Wanpela saveman, James Watson, em i bilong wanpela lain i bin kisim save long DNA, em i tok, ‘kru bilong man i narakain samting tru, winim olgeta samting yumi bin painim long dispela graun na long ples antap.’ Buk bilong wanpela saientis i gat save long wok bilong kru, em Gerald Edelman, em i tok, wanpela liklik hap tru bilong kru inap olsem het bilong liklik stik masis, ‘em i gat olsem wan bilion liklik rop nev, em ol inap pas wantaim na mekim wok long kain kain rot em yumi no inap kaunim namba bilong en.’
Orait yu ting i stret long kru bilong man inap mekim ol bikpela wok na kisim ol kain kain save i go i go, tasol yumi save stap liklik taim tasol na yumi dai? I no stret, a? Em i kain olsem wanpela tren i gat strongpela ensin tru na planti rum bilong en na em i karim wanpela liklik hap wesan i go inap sampela sentimita tasol! Orait bilong wanem yumi ol man inap wokim tingting na lain long ol kain kain samting, i olsem i no gat pinis bilong en? Yu ting as bilong dispela i olsem ol man i no bilong i dai—God i bin wokim ol bilong i stap oltaim oltaim?
Samting God i Promis Long Mekim
Dispela strongpela laik bilong yumi long i stap laip, na kru bilong yumi inap lain na kisim save i go i go, i givim tingting long yumi olsem, God i bin wokim man bilong i stap longtaim, winim 70 o 80 yia. Na dispela i givim narapela tingting gen long yumi, olsem i mas i gat wanpela Man Bilong Tingim na Wokim olgeta samting, olsem wanpela God. I gat ol lo i bosim ol samting bilong ples antap em ol i no save senis senis, na graun i pulap long kain kain samting i gat laip em yumi kirap nogut long en, na dispela i strongim tru bilip olsem i gat wanpela Man i bin wokim olgeta dispela samting.
Orait sapos God i bin wokim yumi bilong yumi ken i stap oltaim oltaim, bilong wanem yumi save dai? Na taim yumi dai, wanem samting i save painim yumi? Yu ting em i laik bilong God long kirapim bek ol man i dai pinis? God i gat savetingting na bikpela strong, olsem na i stret yumi ken ting em bai bekim ol dispela askim, a? Na em i bin mekim olsem. Tingim ol dispela samting:
◼ Long pastaim tru em i no laik bilong God long ol man i mas i dai. Namba wan taim Baibel i toktok long dai i soim olsem pastaim em i no laik bilong God long ol man i mas i dai. Long Buk Stat, Baibel i stori long God i givim rot long namba wan man na meri, em Adam na Iv, long kamapim klia olsem ol i laikim em tru na ol i stap gut long em, olsem na God i givim wanpela liklik traim long ol. Em i tambuim tupela long kaikai pikinini bilong wanpela diwai. God i tok: “Sapos yu kaikai, wantu bai yu dai.” (Stat 2:17) Adam na Iv bai i dai sapos ol i bikhet long God na i no winim dispela traim. Stori bilong Baibel i soim olsem tupela i no stap gut long God, olsem na tupela i dai. Long dispela rot, sin na dai i painim ol man bilong graun.
◼ Baibel i kolim dai olsem slip. Paslain long taim Jisas i kirapim bek Lasarus, em i tokim ol aposel bilong em: “Pren bilong yumi Lasarus i slip. Tasol mi bai go na kirapim em.” Na tru tumas, Jisas i mekim olsem! Baibel i tok taim Jisas i singaut, “Lasarus i kirap bek na i kam ausait”—em i bin i stap “long matmat” na nau em i lusim na i stap laip gen!—Jon 11:11, 38-44.
Bilong wanem Jisas i tok dai i olsem slip? Long wanem, man i slip em i no save mekim wanpela samting. Taim man i slip i dai, em i no save long ol samting i kamap klostu long em o long hamas aua i lus. Em i no pilim pen o hevi. Na olsem tasol, ol man i dai pinis ol i no mekim wanpela wok o tingting long wanpela samting. Tasol i gat sampela samting moa: Taim man i slip yumi save bihain em bai kirap. Na Baibel i tok promis long dispela samting bai painim ol man i dai pinis.
Man Bilong Wokim yumi, em yet i tok promis: “Mi bai kisim bek ol long ples bilong ol man i dai pinis. Dai, mi bai kamap olsem samting nogut tru na pinisim yu olgeta. Ples bilong ol man i dai pinis, mi bai kamap olsem sik nogut tru bilong bagarapim yu olgeta.” (Hosea 13:14) Narapela tok profet bilong Baibel i tok God “bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.” (Aisaia 25:8) Dispela pasin bilong givim laip gen long ol man i dai pinis, ol i kolim olsem kirap bek.
◼ Ol man i kirap bek ol bai stap we? Olsem yumi stori pinis, ol man bilong graun i gat bikpela laik long i stap i go i go. Orait yu laik i stap oltaim oltaim long wanem hap? Bai yu amamas sapos yu save, taim yu dai pinis bai yu stap olsem hap bilong wanpela spirit samting, olsem sampela lotu i tok? Yu laik kamap narapela man olgeta na yu no inap tingim moa long yu husat tru long taim yu no bin i dai yet? Bai yu amamas sapos yu kisim laip olsem wanpela animal o diwai? Sapos yu yet inap makim, yu laik i stap long wanpela ples i no gat wanpela samting bilong graun i stap long en o ol samting yu bin kisim amamas long en?
Sapos ol samting i stap gutpela tasol, bai yu amamas long i stap long graun i wanpela gutpela ples paradais, a? Na dispela em i wanpela tok promis bilong Baibel, olsem yumi inap i stap oltaim oltaim long dispela graun yet. God i bin wokim graun bambai ol manmeri em ol i laikim em tru na mekim wok bilong em oltaim oltaim na amamas long mekim, ol i ken i stap long dispela graun. Olsem na Baibel i tok: “Ol stretpela man bai i kisim graun God i givim ol, na bai ol i stap oltaim long en.”—Song 37:29; Aisaia 45:18; 65:21-24.
◼ Wanem taim bai ol i kirap bek? Olsem Baibel i tok, dai i olsem slip, na dispela i makim olsem taim ol man i dai ol i no kirap bek wantu tasol. I gat hap taim bilong ol i “slip” pastaim, namel long taim ol i dai na taim ol i kirap bek. Long Baibel wanpela man nem bilong em Jop i bin mekim dispela askim: “Sapos wanpela man i dai, em inap kisim laip gen?” Orait nau em i bekim na i tok: “Bai [God i] singautim mi na bai mi lusim dispela ples [matmat].” (Jop 14:14, 15; NW ) Em nau, bai i gat bikpela amamas tru long taim ol man i dai pinis ol i kirap bek na bung gen wantaim famili bilong ol!
Yu No Ken Pret Nogut Tru
Tru, dispela gutpela promis bilong Baibel em yumi ken bilip na wet long en i no tekewe dispela pasin bilong pret long dai. Em i pasin bilong yumi ol man long tingting planti long pen na hevi em sampela taim i save painim ol man taim ol i laik i dai. Ating yu pret, nogut wanpela bilong famili bilong yu i dai. Na ating yu pret, nogut i dai bilong yu yet bai givim bikpela bel hevi long famili bilong yu, na dispela kain pret tu em pasin bilong yumi ol man.
Tasol Baibel i tokaut klia ol man i dai pinis ol i stap olsem wanem, na long dispela rot Baibel i helpim yumi long daunim pasin bilong pret nogut tru long indai. Yu no ken pret olsem taim yu dai, ol spirit nogut bai givim bikpela pen long yu long helpaia, o long yu bai stap long wanpela ples em spirit bilong ol man i save stap long en na go nabaut nabaut inap oltaim oltaim. Na yu no ken pret na ting taim yu dai, bai yu pinis olgeta na i no ken i stap moa. Bilong wanem yu no ken pret olsem? Long wanem, God inap tingim olgeta man na olgeta samting, na em i tok promis long kirapim bek olgeta manmeri i dai pinis na ol i stap long tingting bilong em, na ol bai stap laip gen hia long dispela graun. Bilong yumi ken bilip tru long dispela samting, Baibel i tok: “God bilong yumi yet i save helpim yumi na yumi stap gut. God, Bikpela bilong yumi, em i save helpim yumi na yumi no i dai.”—Song 68:20.
[Rait long pes 5]
“Mi bin wokim yu long graun, na bai yu go bek gen long graun.”—Stat 3:19
[Rait long pes 6]
“[God] i putim tingting bilong laip i stap oltaim long bel bilong ol man.”—Saveman 3:11, NW
[Blok/Piksa long pes 8]
BEKIM BILONG OL ASKIM BILONG YU LONG INDAI
Tru, i gat sampela askim long indai na kirap bek em ol dispela stori hia i no bekim. Planti ol i bin painim ol gutpela bekim bilong ol kain askim olsem taim ol i stadi gut long Baibel wantaim ol Witnes Bilong Jehova. Mipela i laik kirapim yu long mekim olsem. Daunbilo i gat sampela askim bai yu kisim bekim bilong en:
◼ Wanem insait bilong dispela tok “hel” na “bikpela hul i gat paia”?
◼ Sapos i no gat helpaia, olsem wanem God i save givim strafe long ol man nogut?
◼ Baibel i tok, taim man i dai, spirit i save lusim bodi. Dispela spirit em i wanem samting?
◼ Bilong wanem i gat planti stori bilong ol man i bin toktok wantaim ol man i dai pinis?
◼ Wanem taim ol man i dai pinis bai kirap bek na i stap long Paradais long graun?
◼ Olgeta man i dai pinis bai i kirap bek, maski ol i bin mekim wanem kain pasin taim ol i stap laip?
Plis lukim pes i stap long baksait bilong dispela nius bilong save long olsem wanem yu ken kisim ol gutpela bekim bilong Baibel long ol dispela askim.
[Piksa long pes 7]
Jisas i tok, “Lasarus i slip. Tasol mi bai go na kirapim em”
[Piksa long pes 8, 9]
Tingim bikpela amamas bai kamap taim ol famili bilong yumi i dai pinis ol i kirap bek!