Redi Long Helpim Ol Narapela
RAFAEL, em wanpela Witnes Bilong Jehova na taim em i wok long wanpela haus kot long Maiami long Florida, em inap long helpim ol wanwok long samting bilong spirit. Rafael i raitim pas na em i tok: “Wanpela de, wanpela meri i save kisim ol Wastaua na Kirap! long mi long olgeta taim, em i tok, wanpela man bilong salim ol buk i askim em long baim wanpela ensaiklopedia bilong Baibel bilong pikinini man bilong em i gat 8-pela krismas. Pe bilong buk em 500 kina samting, tasol em i no inap baim long wanem em bikpela pe tumas. Kwiktaim mi tokim em mi inap kisim buk Baibel Stori Buk Bilong Mi i kam. Long de bihain mi karim buk i kam na em i laikim tru ol piksa na em i tok dispela buk em i gutpela buk tru.
“Meri ya i putim buk long tebol bilong em na mekim wok i stap, na 15 minit bihain narapela wanwok i kam long mi na em i holim buk Baibel Stori Buk Bilong Mi long han bilong em, na em i laik save long mi kisim buk we. Mi tokim em Sosaiti Was Taua i save wokim dispela buk. Em i laik kisim 3-pela buk bilong ol pikinini bilong em. Em i save lainim ol pikinini long Sande-skul na em i pilim olsem dispela buk bai helpim ol pikinini. Em i tok bihain em bai tokim mi, em i laik kisim hamas buk moa.
“Bihain long 30 minit, narapela wanwok i kam long mi, em i holim dispela buk long han na em i laik kisim 3-pela bilong dispela buk. Liklik taim bihain sampela moa i kam tokim mi ol i laik kisim sampela buk. Mi kisim oda long ol bilong baim 12-pela buk Baibel Stori Buk Bilong Mi. Ol meri i krosim mi, long wanem, pastaim mi no bin tokim ol long dispela buk! Long de bihain mi karim ol buk i kam na givim long ol wanwok i laik kisim buk.
“Long wik antap tisa bilong Sande-skul i tok em i laik kisim 15 buk bilong ol sumatin bilong em. Em i bin wet long kisim orait bilong pris na bos bilong Sande-skul long mekim wok long dispela buk bilong lainim ol pikinini. Em i tok pris i laikim tru dispela buk na em i tok ol i bin wokim gut tru ol planti piksa long buk, na em i givim tok orait long kisim ol buk.
“Dispela tisa bilong Sande-skul i laik givim ol buk olsem presen long taim bilong Krismas. Em i tok, em i save mi no save mekim Krismas, tasol em i ting dispela buk i gutpela presen long givim long taim bilong Krismas. Em i tok moa olsem, taim em i kaunim buk long ol pikinini, ol i save putim yau gut.
“Wanpela wanwok i tok, em i save kaunim ol stori long ol pikinini bilong em long olgeta nait, na em yet i lainim ol nupela samting, olsem: Pastaim em i no bin save olsem i gat ol traipela man i bin i stap long taim bilong Noa. Narapela wanwok i tok, ating wanpela man i gat bikpela save long wokim piksa em i bin wokim ol piksa long dispela buk. Em i wokim ol piksa olsem samting tru. Wanwok i tok dispela buk em i ‘nambawan tru.’
“Mi tilim 32 buk Baibel Stori Buk Bilong Mi long ples wok long sampela de tasol, na mi wok yet long tilim sampela buk moa. Taim mi soim buk long wanpela, em i save askim mi olsem: ‘Yu kisim buk we?’
Olsem wanem? Yu redi long helpim ol narapela long samting bilong spirit? Rafael, nau em wanpela elda long wanpela kongrigesen bilong ol Witnes Bilong Jehova long Maiami, em i pinisim stori olsem: “Dispela samting i lainim mi long autim tok long kain kain taim na ples na mi gat laik tru long helpim ol narapela.”