Ol Samting i Pasim Rot na Ol Man na Animal i No Stap Gut Wantaim

Ol pikinini i save amamas tru long lukim ol piksa olsem i stap long skin bilong dispela magasin. Kain piksa olsem i save pulim ai bilong ol bikpela manmeri tu.

Bilong wanem na i olsem? Gutpela pasin wanbel namel long man na ol animal nogut tru em i wanpela driman nating bilong ol pikinini? O dispela samting bai i kamap tru?

Man Yet i Gat Hap Asua

Wanpela bikpela samting i pasim rot bilong kain bel isi olsem em man yet. Baibel i tok: “Long dispela taim mi lukim sampela bikman i wok long daunim ol arapela manmeri na mekim nogut long ol.” (Saveman 8:9) Nau dispela samting i kamap ples klia long pasin man i mekim long ol animal.

Olsem bipo tru long Rom, ol i bin kisim planti ol animal nogut bilong mekim ol i pait long ol bikpela stediam bilong pilai spot. Wanpela ripot i tok, long yia 106 king bilong Rom, nem bilong em Trajan, i putim ol pilai olsem spot samting na tupela man i pait wantaim, na man i win em i kilim i dai narapela na dringim blut bilong em, na long dispela rot ol i bin kilim i dai 10,000 man na 11,000 animal bilong amamasim ol dispela lain manmeri ol i dai tru long lukim dispela kain spot.

Tru, ol kain spot o pilai olsem i no kamap long nau. Tasol ol ripot i soim olsem namba bilong planti kain kain animal i wok long i go liklik na sampela kain i pinis olgeta, na dispela i kamapim long ples klia olsem man i mekim nogut tru long ol animal. Ol man i kamap planti na ol i pinisim ol bikpela bus ol animal i stap long en na nau i no gat planti hap bus bilong ol animal i stap long en. Na tu, man i gat pasin bilong laikim tumas mani kago, olsem na ol i kilim i dai ol animal na kisim skin, kom, na tit bilong ol dispela animal. Sampela saveman i pilim olsem, lain bilong sampela bikpela animal i wok long pinis na wan wan tasol bihain bai yu inap painim ol long ol banis i gat ol animal bilong bus long en.

Animal Bilong Kaikai Man

Narapela hevi i pasim rot bilong bel isi, ating em ol animal bilong bus yet. Long hap bilong Afrika na long Esia, taim ol man i harim stori olsem wanpela animal i kaikai man, ol i no kirap nogut, long wanem dispela samting i save kamap planti taim. Wanpela buk (The Guinness Book of Animal Facts and Feats) i tok, “long olgeta wan wan yia ol bikpela pusi olsem taiga i kilim i dai inap 1,000 ol man.” Long India, ol taiga i kilim i dai inap olsem 50 manmeri long olgeta wan wan yia. Na long dispela kantri yet i gat sampela lepat tu i kaikai man.

Wanpela buk (Dangerous to Man bilong Roger Caras) i tok, sampela taim lepat i kaikai ol man em sik i bin painim ol na ol i dai. Nau em i lain long kaikai skin bilong ol man, olsem na em i kamap lepat bilong kaikai man. Tu, taim ol bikpela sik i kamap, planti man i kisim dispela sik na ol i dai, na ol man i no inap planim ol hariap na ol lepat i kaikai skin bilong ol. Olsem na ‘ol man i pret nogut tru, long wanem nau ol lepat i lain pinis long kaikai skin bilong man na bai ol i kilim sampela bilong kaikai.’

Tasol Caras i skelim dispela samting na em i tok, ol lepat i no save kaikai skin bilong ol man i dai pinis tasol, nogat. Sampela taim ol i ranim man na holim ol na kaikaim ol. Narapela as em olsem, bel bilong lepat i save kirap kwik na taim em i lukim ol man i wokabaut o pikinini i pilai, nau em i ranim ol na kaikaim ol.

Wanpela buk (The Man-Eating Leopard of Rudraprayag bilong Colonel J. Corbett) em i tok, long India namel long yia 1918 i go 1926, wanpela lepat tasol i bin kilim i dai 125 manmeri. Na planti yia bihain, sampela lepat bilong kaikai man i kilim i dai inap 82 manmeri long provins Bagalpur.

Na Long 1950, narapela man bilong lukautim hap bilong ol animal long Tansania i tok, inap 5-pela mun samting em i bin traim long sutim wanpela lepat i save kaikai man na i wok long pretim ol man bilong ples Ruponda, tasol em i no inap. Bihain dispela lepat i kilim i dai 18 pikinini, na wanpela as ples yet i umbenim em na ating ol i kilim em. Na long narapela ples kanaka, em long Masaguru, narapela lepat i kilim i dai 26 meri na pikinini.

Na narapela samting em laion bilong Afrika. Taim em i laik kaikai man, planti taim em i save kisim ol man tasol na meri nogat. Wanpela man em C. Ionides, long buk bilong em (Mambas and Man-Eaters) em i stori olsem: ‘Mi stap 23 yia long wanpela ples olsem nesenel-pak na mi kilim inap 40 samting laion, planti long ol i save kaikai man, na sampela i laik kamap olsem, na sampela bilong ol i kaikai ol animal bilong ples olsem bulmakau samting. Na em i tok moa olsem, ol laion i birua tru taim ol man i pinisim ol abus bilong ol.

Tok Profet Long Bel Isi Bai Kamap Long Graun Olgeta

Tru, nau ol dispela samting i pasim rot na ol man na animal bilong bus i no stap gut wantaim. Tasol Baibel i tok profet olsem: “Ol man i bin kisim olgeta kain wel abus, . . . Na ol i save bosim ol dispela samting na mekim ol i stap aninit long ol.”​—Jems 3:7.

Baibel i bin tok profet tu long Esekiel 34:25 na i stori long ol animal nogut bilong bus olsem: “Na mi [God] bai mekim kontrak wantaim ol, bilong ol i ken i stap gut. . . . Olsem na bai ol dispela ples nogut, olsem ples nating na bikbus, ol bai i kamap gutpela ples bilong ol [man] i stap long en.”

Olsem wanem? Ol dispela tok profet bilong Baibel i olsem ol driman nating tasol? Harim pastaim sampela samting i truim dispela tok profet bilong Baibel, olsem long olgeta hap graun ol man na animal nogut bilong bus ol inap i stap gut wantaim. Na i gat sampela gutpela stori bilong ol samting i bin kamap na i makim olsem sampela man ol i bin i stap gut wantaim ol animal nogut bilong bus.