“Wanpela Gutpela Presen Tru”
OL PAPAMAMA i save wok strong long skulim ol pikinini na bai ol i kamap man bilong bihainim lo na givim bel long lotuim God. Na papamama i amamas tru taim ol pikinini i kamapim bel bilong ol, olsem ol i tenkyu long papamama. Dispela em i bikpela samting, long wanem, wanpela mak bilong “las de,” em pasin bilong ‘sakim tok bilong papamama,’ i kamap bikpela tru.—2 Timoti 3:1, 2.
Yangpela meri, em Nensi, em i gat 15 krismas na em i go yet long hai-skul, na papamama bilong em ol i Witnes Bilong Jehova. Wanpela taim, wanpela tisa i tok olgeta sumatin i mas raitim stori long wanem presen em i gutpela tru, winim ol narapela ol i bin kisim. Orait, dispela em i stori bilong Nensi, na het-tok bilong en i olsem, “Wanpela Gutpela Presen Tru”:
“I gat kain kain man na ol i givim ol kain kain presen, olsem—pasin sori na pasin pren na ol kain kain narapela samting. Na i gat sampela kain samting olsem presen nogut yumi no laikim, olsem: Pasin bilong bel nogut, na stap rabis tru. Ol kain kain man i save givim samting olsem presen long ol narapela. Sampela man i tingim ol yet na ol i givim ol presen na i gat ol man ol i save laik long givim samting long narapela. Tasol gutpela presen tru mi bin kisim, em papa i bin givim long mi—mi kisim stretpela save bilong God.
“Olgeta narapela presen bai stap inap liklik taim tasol na i bagarap, tasol dispela presen papa i givim long mi bai stap oltaim. Ol samting mi lainim bai i strongim mi na bosim olgeta wokabaut bilong mi. Mi kisim save long dispela God em Baibel i stori long em na dispela i helpim mi long save gut long God, olsem em i wanpela Man mi laik i stap aninit long em, na mi save tingim tru em olsem em i wanpela pren.
“Papa i dai long dispela yia. Taim em i stap laip yet, mi save i go oltaim long em bilong helpim mi. Ol narapela i save mekim olsem tu. Planti taim mi no save lukim papa taim em i kam bek long haus taim em i pinis wok long apinun. Long wanem, em i save raun na strongim bel bilong ol narapela ol i stap long haus sik. Mi save em i givim taim bilong em long helpim ol narapela. Na maski nau em i no stap moa bilong strongim mi na soim mi long rot mi ken bihainim, tasol mi save, Papa long heven bai helpim mi long kisim ol samting bilong helpim i stap bilong mi.
“Mi laikim tru dispela presen, na mi tok tenkyu tru long God long em i bin givim dispela papa long mi em i stap strong long bilip. Papa i stap olsem gutpela piksa na bai mi tingim dispela samting long olgeta taim bihain. Mi ting taim mi bikpela meri pinis, mi ken mekim wankain gutpela pasin olsem papa i bin mekim.
“Gutpela save mi kisim long God em i olsem presen i dia tumas na bai i stap inap oltaim bihain. Na mi tok tenkyu tu long papamama long wanem, tupela i lainim mi long dispela gutpela presen tru. Ol i stap strong long bilip na bai mi tingim dispela samting oltaim.”
Tisa bilong Nensi i amamas tru long dispela stori na i tok em i pilim tru, olsem na em i kaunim long klas, na em i givim gutpela mak long Nensi.
Mama bilong Nensi tu em i amamas long harim dispela stori Nensi i raitim. Em i tok: ‘Bel bilong mi i amamas tru. I hatwok long kisim save long tingting bilong pikinini, tasol mi amamas, long wanem mi save, Nensi em i wok long kamap gutpela na i wok strong long bihainim ol samting em i lain long en.’