As Bilong Kamapim Lig ov Nesen

NAMBA WAN PAIT i stap inap 4-pela yia, na planti man i dai na planti taun i bagarap olgeta. Ol man i no bin lukim dispela kain samting bipo. Ol kantri i bruk long tupela lain na bung wantaim ol kantri i no gat planti samting bilong pait, na tupela i pait. Narapela i ting ol bai winim narapela. Ol man i ting dispela pait em i olsem wanpela pilai samting, olsem na ol i singaut amamas na kirapim ami bilong ol long go pait.

Tasol sampela mun bihain ol man i kisim save olsem pait em i samting nogut tru. Planti man i dai, na planti taun i bagarap, na planti kantri i gat bikpela dinau ol i mas bekim. I mas i gat wanpela rot na bai dispela hevi i no ken kamap gen. Sapos ol man inap painim wanpela rot bilong stretim ol hevi long pasin isi, na i no long rot bilong pait, ating em gutpela tru, a? Ating em i wanpela nupela kain tingting tru, a? Nogat. Dispela kain tingting i bin kamap bipo tu.

Bilong Wanem Dispela Kain Tingting i No Wok Gut Bipo?

Paslain long Namba Wan Pait ol man i bin kirapim wanpela kot bilong stretim ol hevi long pasin bilong bel isi. Nem bilong dispela kot em Kot bilong Abitresen long ples Heig, long kantri Netelan. Bihain long yia 1900 planti man i ting em bai kamap wanpela ples bilong stretim ol hevi long rot bilong toktok na bai pait i no ken kirap. Tasol wanem samting i kamap long tupela kibung bilong ol long ples Heig long 1899 na 1907, na long dispela rot Kot bilong Heig i kamap?

Long tupela kibung, ol kantri i no tok orait long bihainim olgeta tok bilong dispela Kot, o putim mak o rausim sampela samting bilong ol bilong pait. Taim ol bikman i tok ol kantri i mas rausim ol samting bilong pait, ol kantri i no laik, na ol i no wanbel long stretim ol hevi long rot bilong toktok.

Olsem na taim Kot bilong Heig i kirap wok, ol kantri i painim pinis rot na kot i no ken bosim wok gavman bilong ol. Ol i mekim olsem wanem? Ol i mekim olsem: Ol i tok, sapos hevi i kamap, ol i ken karim i go long jas bilong stretim, na sapos ol i laik bihainim ol i ken bihainim, na sapos nogat, orait, nogat. Em laik bilong ol tasol.

Dispela samting i pasim rot na ol i no inap kamapim bel isi na gutaim long graun. Olsem na ol i wok long hipim yet ol samting bilong pait i go inap Jun 1914, em taim pait i kirap gen na pasin wanbel i no stap moa long graun.

Taim pait i no kirap yet, lain Serbia i bekim tok bilong kantri Ostria, na ol i tok ol i redi long “stretim hevi long rot bilong toktok, na askim . . . Kot bilong Heig long skelim na stretim.” Tasol ol kantri i pasim tok pinis olsem sapos em laik bilong ol, orait, Kot bilong Heig i ken stretim. Kantri Ostria i no laik bai Kot i skelim dispela hevi, olsem na pait i kamap​—na 20 milion man, em ol man i no insait long pait, wantaim ol soldia, olgeta wantaim i dai long dispela pait!

Ol Lotu i Laikim Lig ov Nesen

Long Me 1919, bisop bilong Misin Episkopal, em Chauncey M. Brewster, i mekim tok long wanpela kibung bilong ol bisop long Amerika, olsem: ‘Sapos ol man i laik kamapim stretpela na gutpela pasin bel isi, ol i mas kamapim nupela gavman samting, winim Kot bilong Heig, na ol kantri i mas wok gut wantaim na i olsem ol i stap insait long wanpela oganaisesen samting.’

Kadinal bilong Misin Katolik bilong Beljam, nem bilong em Mesia, em i mekim wankain tok tu, olsem: “Long tingting bilong mi, mi ting olsem nambawan wok bilong ol gavman em long mekim sampela samting long nau bambai ol samting i painim yumi i no ken painim ol man long bihain.” Em i tok, ol man i bin kamapim Kontrak Bilong Vesels “ol i painim rot bilong kamapim gutaim long graun” na em i tok, ol i mas kamapim wanpela oganaisesen bilong kamapim gutaim long graun.

Wanpela nius (The New York Times) bilong Janueri 2, 1919, i tok olsem: “Pop i Laik Bai Lig ov Nesen i Kamap.” Na nius i tok: “Pop Benedict i bilip olsem long rot bilong dispela Kibung Bilong Kamapim Bel Isi, bai wanpela nupela taim i kamap na bai i gat Lig ov Nesen.” Pop i no tok stret olsem “wanpela nupela taim,” tasol taim tupela nius (Associated Press, na Vatican Press Office) i stori long tok bilong em ol i raitim olsem.

Tingim dispela: Ol man i bel hevi na ol i laik bai pait i mas pinis, long wanem, planti pait tru i bin kamap na ol man i wok long karim hevi long dispela. Na dispela pait em i nogut tru, winim olgeta narapela pait bilong bipo. Olsem na ol man i krai long gutaim i mas kamap, na pop i kirap tok olsem: “Mi laik bai wanpela Lig ov Nesen i kamap, na em i ken pinisim dispela lo i tok olsem ol yangpela man i mas insait long ami na long dispela rot em bai pinisim pasin bilong hipim samting bilong pait; na em bai makim wanpela kot bilong graun olgeta, na long dispela rot em bai pinisim o stretim ol hevi. Na sapos pasin sekan i kamap long rot bilong wanpela oganaisesen em i gat strongpela as, bai ol man inap mekim ol samting long laik bilong ol yet, na narapela man i no bosim narapela.” Sapos Lig ov Nesen inap mekim dispela samting, orait em bai kamapim wanpela “nupela taim.”

Bilong Wanem Em i Bagarap?

Ol samting dispela oganaisesen bai mekim, na em bai mekim olsem wanem, stori bilong dispela i gutpela, na ol i bin ting ol inap kamapim. Kontrak bilong Lig ov Nesen i tok olsem em i gat wok bilong “kirapim olgeta man long wok gut wantaim, na bilong kamapim pasin bel isi na gutpela sindaun long olgeta hap bilong graun.” Tasol bilong kamapim bel isi na gutpela sindaun long graun, olgeta wan wan kantri i mas wok gut wantaim, na ol i “no ken pait.”

Olsem na sapos wanpela tok kros i kamap namel long tupela kantri, ol i mas tingim tok promis ol i bin mekim, na ol i mas stap wanbel wantaim narapela lain na larim ‘Kot bilong Lig ov Nesen na ol lain jas i skelim na stretim,’ na Kot bilong Abitresen i ken mekim wok bilong stretim ol hevi na kamapim pasin wanbel. Long dispela rot ol i bin ting narapela bikpela pait i no ken kamap long graun. Tasol sori, narapela pait i bin kamap.

Sampela saveman i tok, wanpela as na Lig ov Nesen i no kamapim bel isi em olsem: Planti ol “memba i no tingim samting ol i mas mekim na bai pait i no ken kamap.” Wanpela samting ol i mas mekim, em ol i mas rausim ol samting bilong pait. Tasol ol i no mekim olsem. Olsem na pait i kamap gen. Ol kantri i resis gen long bungim ol samting bilong pait. Na Lig ov Nesen i no inap senisim tingting bilong ol long lusim dispela pasin. Ol i no harim tok em i mekim. Ol i no kisim save na tingting long samting i bin kamap long 1914. Ol i ting olsem: Sapos wanpela kantri i gat planti samting bilong pait, em bai ting em i gat bikpela strong tru, winim ol narapela kantri.

Sapos ol i bin tingting gut ol inap save, sapos “ol i pas gut wantaim ol i no inap bagarap.” Sapos wanpela kantri i pait long narapela kantri, i olsem em i pait long olgeta kantri. Tasol wanem samting i bin kamap taim wanpela kantri i kirap na birua long narapela na i no laik stretim long rot bilong toktok? Olgeta i no tingting long wok gut wantaim long pasim pait, nogat. Ol i bruk long tupela lain. Wankain tingting kranki olsem i bin kamap long 1914 na pait i bin kamap!

Lain Lig ov Nesen i no strong tumas, long wanem, lain Amerika i no insait long en. Planti man i ting olsem Amerika i gat bikpela strong tru na em inap long kirapim Lig ov Nesen long wok gut. Sapos Amerika i bin insait long en, bai i olsem olgeta kantri i insait, na long dispela rot em inap wok gut.

Tasol i gat ol narapela as tu na Lig ov Nesen i no wok gut. Tingim hap tok i stap long Kontrak bilong en. Em i tok: “Sapos wanpela memba i stap insait inap tupela yia, na bihain em i laik lusim, orait em inap mekim olsem.” (Hap Namba 1(3)) Dispela hap tok i no helpim wok bilong Lig ov Nesen, na dispela samting i mekim na nau ol wan wan kantri i no pas gut wantaim em.

Dispela lo i givim rot long ol kantri long lusim Lig ov Nesen, na nau em i no gat strong moa long pasim ol long lusim em. Olsem na inap long Me 1941, 17 kantri i no stap insait moa long Lig ov Nesen. Namba 2 Pait i kamap pinis, na hatwok bilong ol man long kamapim wanpela “nupela taim long graun” em i lus nating, na wok bilong Lig ov Nesen i wok long bagarap.

I mas i gat narapela gutpela rot bilong stretim ol hevi!

[Rait long pes 7]

Lig ov Nesen i no pasim Namba 2 Pait

[Piksa long pes 7]

Bom i pundaun long biktaun Kasino, Itali, long Mas 15, 1944

[Kredit Lain]

U.S. Army