Strongpela Skin Bilong Kina
ATING yu save pinis olsem i no hatwok long brukim wanpela sok long namel, a? Tasol nau, traim brukim dispela retpela kina, em ol i kolim abaloni, i go long tupela hap. Ating yu mas mekim wok long hama long brukim. Skin bilong kina i kamap long wanpela marasin em kalsiam-kaboneit, olsem kambang, na ol i wokim sok long dispela wankain samting tasol. Skin bilong kina i strong tru na i no inap bruk hariap olsem sok.
Wanem samting i mekim na skin bilong en i strong olsem? Ol saintis long Yunivesiti bilong Wosington long Sietol long Amerika, ol i kisim sampela save pinis long skin bilong dispela kina. Skin bilong kina i bilong lukautim em na ol birua i no ken bagarapim em. Ol nupela skin i save kamap na karamapim ol olpela skin, olsem na em i strong tru. Skin ausait em i gat planti makmak, tasol skin insait em ol i kolim neika em i olsem glas i gat kain kain kala na dispela hap i save holim strong skin bilong kina.
Wanpela nius (Science News) i tok, ol dispela saintis long Wosington i kisim save olsem skin bilong en i pas gut olsem simen. Ol dispela simen i liklik tru na ol i pas wantaim long rot bilong wanpela strongpela glu em kina yet i save wokim. Ol saintis i wok yet long skelim olsem wanem kina i save wokim dispela glu. Ol saintis i tok, taim wanpela samting i paitim skin long ausait, ol dispela liklik simen i save holim strong dispela kina. Taim skin bilong kina i bruk liklik, dispela glu i gat wok bilong karamapim ol hul. Na tu i gat 5-pela narapela rot i stap bilong helpim kina na skin bilong en i no ken bruk!
Ol saintis i kirap nogut long strongpela skin bilong kina na ol i laik painim rot long bihainim wankain pasin olsem bilong kina long wokim ol strongpela kap samting long graun. Sapos ol inap mekim, bai ol i kisim biknem. Tasol sori tumas, taim ol man i skelim ol samting em Man Bilong Wokim Olgeta Samting i kamapim, na ol i laik traim long bihainim pasin bilong em long wokim wankain samting, ol i save lusim tingting long givim biknem long bikpela save bilong em!—Jop 37:14.