Gutpela Tingting Bilong Monki
Long Siera Leon long Wes Afrika i gat wanpela tok tumbuna em i tok olsem: “Monki i no save tok tasol long pikinini bilong em olsem, ‘Hangamap strong long baksait bilong mi!’ Nogat. Em i save tok moa olsem, ‘Lukluk i go daun.’ ”
Dispela i kirapim yumi long tingim wanpela pikinini monki em i sindaun long baksait bilong mama antap tru long het bilong diwai. Insait bilong dispela tok tumbuna em i olsem: Sapos mama monki i tokim pikinini bilong em long hangamap strong long baksait bilong em, bai pikinini i mekim olsem i go inap liklik taim, tasol bihain bai em i les na i no holim moa baksait bilong mama, long wanem, em i no kisim gut tok bilong mama.
Tasol sapos pikinini monki i lukluk i go daun, em bai save em i stap antap tru, na em bai bihainim kwik dispela tok. Sapos em i no bihainim, em inap kisim bikpela bagarap o em inap dai! Tasol nau em i pilim gut dispela tok, na em bai holim strong baksait bilong mama. Na sapos mama i mekim sampela tok moa, em bai bihainim kwik.
Dispela stori bilong monki em gutpela tok piksa long pasin bilong lainim ol man na ol pikinini tu. Olsem: Taim yu tokim ol long wanpela samting, yu mas kamapim as bilong dispela samting na ol inap kisim gut.
I tru sampela taim yumi no inap kamapim kwik as bilong tok yumi givim long ol long namba wan taim. Olsem: Sapos pikinini bilong yu i brukim rot i go, na planti ka samting tu i ron long rot, ating bai yu tok strong long em i tanim na i kam bek hariap long yu. Tok yu givim long em pastaim em bikpela samting. Tasol bihain yu tokim pikinini long as bilong dispela tok yu bin mekim, na nau em i pilim gut.
Baibel i stori long dispela kain pasin—em pasin bilong mekim tok na givim save tu wantaim, na Baibel i tok: “Yangpela man i bihainim lo, em i gat gutpela tingting.”—Sindaun 28:7.
[Piksa Kredit Lain long pes 24]
©Zoological Society of San Diego