Laip Stori

Wok Bilong Kamapim Disaipel i Bin Stiaim Laip Bilong Mi

Stori bilong Lynette Peters

Ol soldia i kam bilong helpim mipela long lusim ples. Wanpela soldia i save gut long sut long gan i sanap antap long rup bilong haus. Ol soldia i slip long gras ol i holim gan na redi i stap. Taim mipela i ran hariap i go long helikopta i wetim mipela long dispela Sande moning, mi na ol narapela misineri i strongim bel na stap isi. Wantu mipela i flai i go. Tenpela minit bihain, mipela i kamap gut long wanpela sip bilong ami i sua klostu long nambis.

LONG moningtaim long de bihain, mipela i harim olsem ol paitman i bin bomim hotel we mipela i bin hait long en long nait bipo. Inap planti yia i gat pait insait long kantri Siera Leon, na nau woa i kirap. Olgeta man bilong ol narapela kantri, na mipela tu, i mas ranawe long dispela kantri wantu. Tasol paslain long mi stori long as na dispela samting i painim mi, mi laik stori long mi yet.

Mi kamap bikpela long Britis Giana, kirap long 1966 ol i kolim Gaiana. Long 1950 i go 1959 samting, taim mi yangpela, sindaun bilong mi i gutpela na mi amamas. Planti papamama i ting ediukesen i bikpela samting, na ol i laik bai ol yangpela i mas kisim ol gutpela mak long skul. Mi tingim yet wanpela taim wanpela wokman bilong beng i bin askim papa bilong mi: “Bilong wanem yu baim bikpela skulfi olsem bilong ol pikinini bilong yu?” Papa i tok: “Nambawan gutpela ediukesen tasol inap helpim ol pikinini long kisim gutpela wok mani na namba.” Long dispela taim em i ting mipela inap kisim nambawan gutpela ediukesen long ol skul i gat nem. I no longtaim na em i kisim narapela tingting long dispela.

Taim mi gat 11-pela krismas, mama bilong mi i kirap stadi long Baibel wantaim ol Witnes Bilong Jehova. Em i bin go long Haus Kingdom wantaim wanpela neiba. Ol samting tupela i harim long dispela nait i mekim na tupela i save olsem ol i painim pinis tok i tru. Bihain, mama i stori long narapela neiba long ol samting ol i bin harim. I no longtaim na tripela i kirap stadi wantaim ol misineri, Daphne Harry (bihain nem bilong em Baird) na Rose Cuffie. I no winim wanpela yia, Mama na tupela pren bilong em ol i kisim baptais. Inap 5-pela yia bihain long dispela, papa bilong mi i lusim lotu Sevende Adventis na kisim baptais olsem wanpela Witnes Bilong Jehova.

Mi wanpela bilong 10-pela pikinini. Mi wantaim 2-pela susa bilong mi​—mipela 3-pela i paslain long ol narapela pikinini​—i bin stap planti taim long haus misineri we Daphne na Rose i sindaun long en na mipela i amamas tru. Long ol dispela taim mipela i harim ol gutpela stori bilong wok autim tok bilong ol. Ol dispela misineri i save amamas tru long wok strong long helpim ol man long ol samting bilong lotu. Pasin bilong ol i mekim na mi kisim laik long kamap misineri.

Ol famili na wanskul ol i save ting bikpela skul na gutpela wok mani i bikpela samting, olsem na wanem samting i bin helpim mi long tingting strong long wok autim tok fultaim? I gat planti samting mi inap mekim​—mi inap skul bilong kamap loya, lain long musik, kamap dokta, o kain samting olsem. Gutpela pasin bilong papamama bilong mi i soim rot long mi. Ol i bihainim gut tok i tru long laip bilong ol, stadi gut long Baibel, na wok strong long helpim ol narapela long save long Jehova.a Na tu, long olgeta taim ol i save singautim ol bratasista i wok autim tok fultaim i kam long haus bilong mipela. Gutpela amamas ol dispela brata na sista i kamapim i bin strongim laik bilong mi long larim wok bilong kamapim disaipel i stiaim laip bilong mi.

Taim mi gat 15 krismas, mi kisim baptais. Na taim mi pinisim haiskul mi kirap mekim wok fultaim olsem painia. Philomena, em i wok long haus sik, em i namba wan meri mi bin helpim em long dediket na baptais. Amamas mi kisim taim mi lukim olsem em i laikim tru Jehova, dispela i strongim laik bilong mi long mekim yet wok autim tok fultaim. Liklik taim bihain, ol i laik givim gutpela wok moa long mi long gavman we mi mekim wok kuskus. Tasol mi no kisim dispela wok, mi mekim yet wok painia.

Mi stap yet wantaim papamama, na ol misineri i wok yet long kam long haus bilong mipela. Mi amamas tru long harim ol gutpela stori bilong ol! Dispela i strongim laik bilong mi long kamap misineri, maski i luk olsem dispela samting i no inap kamap. Long dispela taim ol i save salim ol misineri i kam long Gaiana, na ol i mekim olsem yet long nau. Wanpela de long 1969, mi kirap nogut, tasol mi amamas tu, long kisim singaut bilong go long Wastaua Baibel Skul Bilong Gileat long Brooklyn, New York.

Wanpela Asainmen Mi No Ting Long Kisim

I gat 54 sumatin bilong 21 kantri i stap long Gileat klas namba 48. Inap 17 bilong mipela em ol sista singel. Maski dispela i bin kamap inap 37 yia i go pinis, mi tingim yet dispela 5-pela mun bilong skul. I gat planti samting bilong lain long en​—i no ol tok i tru bilong Baibel tasol, nogat, mipela i lainim tu ol samting inap helpim mipela long mekim gut wok misineri. Olsem: Mi lain long pasin bilong bihainim tok, bihainim stretpela pasin long putim klos na bilas, na mekim wok yet i go maski sampela hevi i kamap.

Long olgeta taim papamama bilong mi i bin tokaut olsem pasin bilong go oltaim long ol miting em i bikpela samting. Sapos wanpela bilong mipela pikinini i tok em i sik na i no inap go long miting long Sande, papamama i no larim em i go long harim ol man i pilai piano o pilai musik long nait bihain. Tasol inap liklik haptaim long taim bilong Skul Gileat, mi no go long olgeta miting. Wanpela Fraide nait mi tokim Don na Dolores Adams olsem mi no inap go. Tupela marit hia i bilong Betel na ol i save kisim mi i go long ol miting. Mi tokim ol olsem mi gat planti homwok! Olsem na mi no inap go long miting bilong Skul Tiokratik Bilong Autim Tok na Skul Bilong Autim Tok. Brata Adams i toktok gut wantaim mi, na bihain em i tok: “Larim maus bilong bel i stiaim yu.” Mi tingim gut tok bilong em na long dispela nait na long olgeta nait bihain mi no lusim ol miting. I kam inap long nau, mi no larim wanpela samting i pasim mi long go long ol miting Kristen, taim mi gat bikpela sik samting tasol mi no go.

Taim mipela sumatin i stap long skul inap 10-pela wik samting, mipela i kirap toktok long ol hap we mipela bai kisim asainmen. Long tingting bilong mi, mi bin ting olsem ol bai makim mi long go long Gaiana, long wanem, long dispela hap ol i sot tru long ol manmeri bilong autim tok. Man! Mi kirap nogut taim mi kisim save olsem mi bai i no inap go bek. Ol i makim mi long go long Siera Leon, long Wes Afrika. Mi amamas tru long Jehova i truim laik bilong mi long mekim wok misineri longwe long ples bilong mi!

Planti Samting Bilong Lain Long En

“Naispela tru,” dispela tok em i stret long kamapim tingting bilong mi taim mi lukim Siera Leon long namba wan taim. I gat planti maunten na nambis. Tasol nambawan gutpela samting long dispela kantri bilong Wes Afrika em ol manmeri, em gutpela pasin laikim bilong ol i mekim na ol man bilong ol narapela kantri tu ol i save stap isi na amamas. Dispela i helpim tru ol nupela misineri long ol i no ken tingim tumas ples bilong ol. Ol manmeri bilong Siera Leon i save amamas long toktok long ol pasin na kastam bilong ol, na ol i amamas moa long helpim ol nupela manmeri long lainim tok ples bilong ol, em Krio.

Ol manmeri i mekim tok ples Krio ol i gat planti gutpela savetok. Olsem: Wanpela monki i wok, narapela monki i kaikai. Insait bilong dispela savetok i olsem: Man i planim kaikai, i no long olgeta taim em bai kamautim kaikai. Dispela i makim gut pasin i no stret i stap long olgeta hap bilong graun, a?​​—Aisaia 65:22.

Mi amamas long mekim wok bilong autim tok na kamapim ol disaipel. I gat wan wan taim tasol we mipela i bungim man i no gat laik long harim tok bilong Baibel. Long ol planti yia i go pinis, ol misineri na ol wokman bilong Jehova em ol i mekim wok inap planti yia pinis, ol i bin helpim ol manmeri​—ol yangpela na ol lapun​—bilong kain kain sindaun na lain long kisim tok i tru.

Erla St. Hill, namba wan poroman bilong mi long wok misineri, em i bin wok strong tru long mekim wok autim tok, na tu, em i wok strong long mekim wok bilong em long lukautim haus misineri. Em i helpim mi long kisim save long planti bikpela samting, olsem save gut long ol neiba, visitim ol Witnes na man i amamas long harim tok bilong Baibel em ol i sik, na sapos inap, go long ol bung bilong planim daiman. Na tu, em i skulim mi olsem taim mi autim tok long wanpela teritori, em i bikpela samting olsem taim mi laik lusim dispela teritori, pastaim mi mas go lukim ol brata na sista i stap long dispela hap. Taim mi mekim ol dispela samting, kwiktaim mi kisim ol nupela mama, brata, susa, na pren, na asainmen bilong mi i kamap olsem ples tru bilong mi.​​—Mak 10:​29, 30.

Na tu, mi kamap pren tru wantaim ol gutpela misineri mi bin wok wantaim ol. Wanpela bilong ol em Adna Byrd, em i bin mekim wok long Siera Leon namel long 1978 na 1981, na Cheryl Ferguson, em poroman bilong mi inap 24 yia.

Pait Insait Long Kantri i Kamapim Ol Traim

Long 1997, olsem wanpela mun bihain long ol i dediketim nupela haus brens long Siera Leon, woa i mekim na mipela i mas lusim kantri, olsem pastaim mi stori long en. Sikspela yia paslain long dispela, mipela i amamas long lukim strongpela bilip bilong ol Witnes bilong Laibiria, em ol i bin ranawe i kam long Siera Leon bilong abrusim woa long Laibiria. Sampela i kam na ol i no holim wanpela samting. Maski ol i gat bikpela hevi, ol i kam autim tok long olgeta de. Mipela i pilim tru gutpela pasin bilong ol long laikim tru Jehova na ol manmeri.

Nau mipela yet i refiuji long kantri Gini. Mipela i bihainim pasin bilong ol bratasista bilong Laibiria na wok yet long bilip na wet long Jehova na putim wok bilong Kingdom i go pas long ol narapela samting. Wanpela yia bihain, mipela inap go bek long Siera Leon, tasol 7-pela mun bihain, ol i kirap pait na mipela i mas ranawe gen i go long Gini.

I no longtaim na mipela i harim olsem sampela paitman i bin kirap sindaun long haus misineri bilong mipela long Kissy, na ol i stilim na bagarapim olgeta samting bilong mipela. Tasol mipela i no bel hevi, nogat, mipela i amamas long i stap laip. Mipela i holim liklik samting tasol, tasol mipela i karim dispela hevi.

Bihain long mipela i ranawe long namba tu taim, mi na poroman bilong mi Cheryl i stap olgeta long Gini. Olsem na mi mas lain long tok ples Frans. Sampela wanwok misineri i mekim tok Frans kwiktaim, maski ol i popaia sampela taim. Tasol mi, mi nolaik tru long toktok na mekim ol popaia, olsem na mi mekim tasol tok Frans sapos i no gat narapela rot. Mi bel hevi tru. Long olgeta de mi mas tokim mi yet long as na mi stap long Gini​—em bilong helpim ol man long kisim save long Jehova.

Isi isi mi wok long lain long rot bilong ol buk na long putim gut yau long ol manmeri i mekim gut dispela tok ples, na mi askim ol pikinini bilong kongrigesen long helpim mi, em ol i no pret long tokim mi olsem mi mekim ol popaia. Na mi amamas long kisim gutpela helpim long rot bilong oganaisesen bilong Jehova. Kirap long Septemba 2001, Wok Kingdom Bilong Yumi i kamapim ol gutpela tok yumi ken mekim bilong tilim ol nius long ol manmeri, na tu, ol tok bilong tilim ol buk na buklet long ol manmeri bilong kain kain bilip. Nau mi pilim olsem mi strong moa long autim tok na i no pret, maski mi no inap mekim gut ol tok olsem mi inap mekim long tok ples bilong mi yet.

Mi bin kamap bikpela insait long wanpela bikpela famili, na dispela i bin helpim mi long sindaun gut wantaim planti manmeri. Wanpela taim mipela 17 misineri i stap long wanpela haus misineri. Insait long 37 yia mi mekim wok misineri, mi bin sindaun wantaim planti misineri, winim 100. Mi amamas tru long kisim save long planti misineri olsem, em olgeta i gat narapela narapela pasin, tasol olgeta i mekim wankain wok! Na mi amamas tru long stap wanwok bilong God na helpim sampela manmeri long kisim tok i tru bilong Baibel!​​—1 Korin 3:9.

Long ol yia mi bin mekim wok misineri mi no bin stap insait long planti bikpela samting bilong famili bilong mi yet, olsem long ol weding bilong klostu olgeta yangpela bratasusa bilong mi. Na mi no bin lukim tumas ol pikinini bilong ol bratasusa bilong mi olsem mi laik lukim ol. Tasol maski mi no bin bung planti taim wantaim famili bilong mi, oltaim ol i save kirapim mi long mekim yet wok misineri.

Tasol ol amamas mi no kisim wantaim famili bilong mi, sampela taim mi bin kisim taim mi mekim wok misineri. Maski mi makim olsem mi bai stap singel, mi gat planti pikinini bilong spirit​—i no ol manmeri tasol mi bin stadi wantaim ol long Baibel, nogat, ol manmeri mi kamap pren wantaim ol, ol tu i stap olsem pikinini spirit bilong mi. Na tu, mi bin lukim ol pikinini bilong ol i kamap bikpela, ol i marit, na kamapim pikinini bilong ol insait long tok i tru. Olsem mi, sampela bilong ol tu i bin larim wok bilong kamapim disaipel i stiaim laip bilong ol.

[Futnot]

[Ol Mep long pes 15]

(Bilong save ol dispela rait i stap we long pes, lukim buk o magasin)

Ol i makim mi long go long Siera Leon, Wes Afrika

GINI

SIERA LEON

[Piksa long pes 13]

Mi na dispela tupela susa bilong mi, i bin amamas long lusim bikpela haptaim wantaim ol misineri long yia 1950 i go 1959 samting

[Piksa long pes 14]

Mi na ol wanskul bilong namba 48 klas bilong Skul Gileat

[Piksa long pes 16]

Ol i dediketim haus brens long Siera Leon