LAIP STORI
Mi Stap Gut Bikos Mi Trastim Jehova
TAIM ol man i askim mi long laip bilong mi, planti taim mi save tokim ol, “Mi olsem sutkeis long han bilong Jehova!” Wankain olsem mi save kisim sutkeis bilong mi i go long wanem ples mi laik go long en, mi laik bai Jehova na oganaisesen bilong em i stiaim mi i go long wanem ples ol i laik mi go long en na long wanem taim ol i laik mi go. Mi bin tok orait long mekim ol asainmen we i gat hatwok bilong en, na sampela taim mi inap kisim bagarap. Tasol mi luksave olsem mi stap gut taim mi trastim Jehova.
MI KISIM SAVE LONG JEHOVA NA TRASTIM EM
Mi bon long 1948 long wanpela liklik viles long hap saut wes bilong Naijiria. Long dispela taim, Ankol Moustapha, em liklik brata bilong papa bilong mi, na Wahabi, em bikpela brata bilong mi, tupela i kisim baptais olsem ol Witnes Bilong Jehova. Taim mi gat 9-pela krismas, papa bilong mi i dai. Mi bel hevi tru. Wahabi i tokim mi olsem mipela inap lukim gen Papa taim em i kirap bek. Dispela tok i mekim isi bel bilong mi na i kirapim mi long stadi long Baibel. Mi baptais long 1963. Bihain liklik, tripela brata bilong mi tu i kisim baptais.
Long 1965, mi go stap wantaim bikpela brata bilong mi Wilson long Lagos, na mipela i amamas long bung wantaim ol painia oltaim long Igbobi Kongrigesen. Mi lukim ol i amamas na givim bel long mekim wok, na dispela i kirapim mi tu long mekim wok painia kirap long Janueri, 1968.
Wanpela brata i wok long Betel, em Albert Olugbebi, i oganaisim wanpela spesel miting wantaim mipela ol yangpela na em i stori olsem i gat bikpela nid long ol painia salim long hap not bilong Naijiria. Mi tingim yet tok Brata Olugbebi i mekim bilong kirapim mipela long mekim wok painia, em i tok: “Yupela i yangpela, na yupela i ken yusim taim na strong bilong yupela long mekim wok bilong Jehova. I gat planti wok bilong mekim!” Mi laik tru long bihainim pasin bilong profet Aisaia long redi long mekim olgeta kain asainmen, olsem na mi putim aplikesen bilong kamap painia salim.—Ais. 6:8.
Long Me 1968, mi kisim asainmen long kamap painia salim long biktaun Kano long hap not bilong Naijiria. Em long taim bilong Biafran Woa (1967-1970), em woa i bin kamapim bikpela hevi long hap not bilong Naijiria na kilim i dai planti manmeri tru na bihain dispela woa i go olgeta long hap is bilong Naijiria. Wanpela brata i tingim seifti bilong mi, na em i traim long pasim mi long go. Tasol mi tokim em: “Tenkyu long tingim mi. Tasol sapos Jehova i laik bai mi mekim dispela asainmen, orait mi bilip tru olsem em bai stap wantaim mi.”
MI TRASTIM JEHOVA LONG PLES I GAT WOA
Mipela i sori tru long lukim hevi em woa i kamapim long Kano. Dispela woa i bagarapim tru dispela biktaun. Taim mipela i autim tok, sampela taim mipela i save lukim bodi bilong ol daiman, em ol man i bin kilim i dai long taim bilong woa. Pastaim i gat sampela kongrigesen long Kano, tasol planti bratasista i ranawe. Namba bilong ol pablisa i stap bek long Kano em aninit long 15, na ol i pret nogut tru na bel hevi. Ol dispela bratasista i amamas tru taim mipela 6-pela painia salim i go kamap long hap. Ol pablisa i amamas taim mipela i strongim ol. Mipela i helpim ol long oganaisim ol miting na kirapim gen wok autim tok na salim ol ripot bilong wok autim tok na ol oda bilong litresa i go long brens.
Mipela ol painia salim i kirap long lainim tokples Hausa. Taim ol asples i harim mipela i autim gutnius bilong Kingdom long tokples bilong ol yet, planti bilong ol i putim yau long tok mipela i autim. Tasol ol memba bilong bikpela lotu long dispela hap i no amamas long mipela i autim tok, olsem na mipela i mas was gut. Wanpela taim wanpela man i holim naip na em i ronim mi na narapela brata taim mitupela i autim tok. Gutpela tru olsem mipela i ron spit moa winim em, olsem na mipela i abrusim bagarap! Maski ol dispela hevi i kamap, Jehova i ‘lukautim mipela na mipela stap gut,’ na namba bilong ol pablisa i wok long i go antap. (Sng. 4:8) Long nau, winim 500 pablisa i stap long 11-pela kongrigesen long Kano.
OL MAN I BIRUA LONG MIPELA LONG NAIJA
Mekim wok painia salim long Niamey, Naija
Long Ogas 1968, bihain long mipela i stap long Kano inap sampela mun tasol, ol i salim mi na tupela narapela painia salim i go long Niamey, em biktaun bilong Ripablik Bilong Naija. I no longtaim, mipela i luksave olsem Naija, long Wes Afrika, em i wanpela bilong ol rijen long graun we ples i hot nogut tru. Mipela i mas lain long autim tok long ples i hot, na tu, lainim bikpela tokples bilong dispela ples, em tokples Frans. Ol dispela hatwok i stap, tasol mipela i trastim Jehova na mipela i kirap autim tok long dispela biktaun wantaim wan wan pablisa i stap long hap. Insait long sotpela haptaim, klostu olgeta manmeri long Niamey em ol inap rit, ol i kisim wanpela kopi bilong buk bilong mekim Baibel stadi em The Truth That Leads to Eternal Life. Ol manmeri i save kam painim mipela bilong kisim wanpela kopi bilong dispela buk!
I no longtaim na mipela i luksave olsem ol ofisa bilong gavman i no amamas long ol Witnes Bilong Jehova. Long Julai 1969, mipela i bung wantaim long mekim fes kibung sekit insait long dispela kantri, na inap olsem 20 manmeri i kam long dispela kibung. Mipela i amamas tru long tupela nupela pablisa bai kisim baptais. Tasol long fes de bilong dispela kibung sekit, ol polis i kam na stopim mipela long kirapim program bilong kibung. Ol i kisim mipela ol painia salim brata na wasman sekit i go long polis stesin. Bihain long ol i kwestenim mipela, ol i odaim mipela long go bek long polis stesin long neks de bilong lukim ol gen. Mipela i luksave olsem hevi bai go bikpela, olsem na mipela i mekim arensmen bilong mekim tok bilong baptais long haus bilong wanpela na mipela i hait na baptaisim dispela tupela pablisa long wanpela riva.
Sampela wik bihain, gavman i odaim mi na 5-pela narapela painia salim long lusim Naija. Ol i givim mipela 48 aua long lusim kantri na mipela i mas painim rot bilong mipela yet long mekim olsem. Mipela i bihainim tok bilong ol na mipela i go stret long brens ofis long Naijiria, na long hap mipela i kisim ol nupela asainmen.
Ol i makim mi long mekim wok painia salim long Orisunbare, em wanpela viles long Naijiria, na maski ol pablisa i no planti mi amamas tru long autim tok wantaim ol na mekim ol Baibel stadi. Tasol 6-pela mun bihain, brens ofis i singautim mi wanpela tasol long go bek long Naija. Pastaim mi tingting planti na mi pret, tasol mi amamas olsem mi bai go bek long Naija na bungim ol bratasista!
Mi go bek long Niamey. Long neks de, wanpela bisnisman bilong Naijiria i luksave olsem mi wanpela Witnes na em i givim mi sampela askim long Baibel. Bihain mi stadi wantaim em na em i lusim pasin bilong em long smok na dring planti alkohol na em i kisim baptais. Mi amamas long autim tok wantaim ol bratasista long narapela narapela hap bilong Naija, na insait long ol yia i go pinis mi lukim ol manmeri i kisim tok i tru long dispela ples. Fes taim mi go kamap long Naija i gat 31 Witnes, tasol taim mi lusim dispela kantri i gat 69 Witnes.
“MIPELA I NO SAVE OL BRATASISTA LONG GINI I STAP OLSEM WANEM”
Long Disemba 1977, mi go bek long Naijiria bilong kisim trening. Long pinis bilong 3-pela wik trening bilong mi, Malcolm Vigo, em kodineta bilong Brens Komiti i tokim mi long ritim wanpela pas i kam long Siera Leon brens. Ol brata i laik makim wanpela singel painia brata i gat gutpela helt na em i save mekim tok Inglis na tok Frans bilong i go long Gini bilong mekim wok wasman sekit long hap. Brata Vigo i tokim mi olsem ol i bin trenim mi long mekim dispela asainmen. Em i tokim mi olsem dispela asainmen i gat hatwok bilong en. Em i tok: “Skelim gut paslain long yu tok orait long mekim dispela asainmen.” Wantu tasol mi bekim tok bilong em olsem: “Jehova i salim mi long go, olsem na bai mi go.”
Mi kisim balus i go long Siera Leon na bungim ol brata long brens ofis. Wanpela brata long Brens Komiti i tokim mi olsem: “Mipela i no save ol bratasista long Gini i stap olsem wanem.” Brens long Siera Leon i lukautim wok autim tok long Gini, tasol i hatwok long ol i kontektim ol pablisa long Gini bikos i gat hevi bilong wok politik long dispela kantri. Inap sampela haptaim ol i traim long salim ol brata i go bilong visitim ol bratasista long Gini, tasol i hatwok long mekim olsem. Olsem na ol i askim mi long i go long Conakry, em biktaun bilong Gini na traim kisim tok orait long gavman long mi ken stap long hap.
“Jehova i salim mi long go, olsem na bai mi go”
Taim mi go kamap long Conakry, mi go long embasi bilong Naijiria na mi bungim ambasada. Mi tokim em olsem mi laik autim tok long Gini. Em i tokim mi olsem mi no ken stap long hap bikos ol inap arestim mi o paitim mi. Em i tok: “Go bek long Naijiria na autim tok long hap.” Tasol mi tokim em olsem: “Mi bai stap.” So mi raitim pas i go long gavman bilong Gini long helpim mi na ol i helpim mi.
Bihain liklik, mi go bek long brens ofis long Siera Leon na mi tokim ol brata long disisen bilong gavman. Ol brata i amamas tru taim ol i harim olsem Jehova i blesim raun bilong mi i go long dispela hap. Gavman i tok orait long mi ken stap long Gini!
Mekim wok sekit long Siera Leon
Kirap long 1978 i go inap 1989, mi mekim wok sekit long Gini na Siera Leon, na mi stap olsem helpim bilong wasman sekit long Laibiria. Pastaim mi save sik planti taim. Sampela taim mi save sik taim mi stap long ol ples i stap longwe long taun. Tasol ol brata i save traim bes long helpim mi long go long haus sik.
Wanpela taim, mi kisim bikpela sik malaria, na tu, mi gat ol snek long bel. Bihain taim mi kamap orait, mi painimaut olsem ol brata i bin stori long wanem hap ol bai planim mi long en bikos ol i ting mi bai dai! Maski mi bungim ol dispela hevi we mi inap lusim laip bilong mi, mi no bin tingting long lusim asainmen bilong mi. Na i kam inap long nau, mi bilip yet olsem yumi inap stap gut oltaim aninit long lukaut bilong God na maski yumi dai, em bai kirapim bek yumi.
MI NA MERI BILONG MI I TRASTIM JEHOVA
Long weding de bilong mitupela long 1988
Long 1988, mi bungim Dorcas, em wanpela painia sista husat i laikim tru Jehova na em i gat pasin daun. Mitupela i marit na em i stap gutpela poroman bilong mi long mekim wok sekit. Dorcas em i gutpela meri marit na em i save redi long daunim ol laik bilong em bilong mekim wok bilong Jehova. Sampela taim, mipela i save karim ol kago bilong mipela na wokabaut inap 25 kilomita long wanpela kongrigesen i go long narapela kongrigesen. Bilong i go long ol kongrigesen i stap longwe tru, mipela i yusim olgeta kain trenspot bilong ron long ol rot i gat graun malumalum na planti bikpela pot-hol long en.
Dorcas i gat strongpela bel. Olsem, sampela taim mipela i save brukim ol wara i gat ol pukpuk long en. Wanpela taim mipela i mas raun inap 5-pela de na kalap long kanu bilong brukim wara bikos bris ol i wokim long diwai em i bruk. Taim Dorcas i sanap bilong i go ausait long kanu, em i pundaun i go insait long wara i dip nogut tru. Mitupela wantaim i no save long swim na i gat ol pukpuk insait long wara. Gutpela tru olsem sampela yangpela man i daiv i go insait long wara na seivim em. Inap sampela haptaim, mipela i kisim ol driman nogut long dispela, tasol mipela i mekim yet wok sekit.
Ol pikinini bilong mipela, Jahgift na Eric, ol i presen i kam long Jehova
Long kirap bilong 1992, mitupela Dorcas i kirap nogut taim mipela i painimaut olsem em i kisim bel. Mipela i tingting olsem ating mipela bai lusim asainmen bilong mipela olsem ol painia salim. Tasol mipela i tok, “Jehova i givim wanpela presen long mitupela!” Olsem na mipela i givim nem Jahgift long pikinini meri bilong mipela. Fopela yia bihain long Jahgift i bon, brata bilong em Eric i bon. Tupela pikinini bilong mipela em ol i presen i kam long Jehova. Inap sampela haptaim, Jahgift i mekim wok long rimot trenslesen ofis long Conakry, na Eric em i wanpela kongrigesen sevan.
Bihain Dorcas i mas lusim wok painia salim, tasol em i mekim yet wok painia oltaim na em i mekim bikpela tu long tupela pikinini bilong mipela. Jehova i bin helpim mi long mekim yet wok painia salim. Bihain long ol pikinini i kamap bikpela, Dorcas i kirap gen long mekim wok painia salim. Nau mitupela wantaim i mekim wok misineri long Conakry.
JEHOVA I LUKAUTIM MIPELA NA MIPELA I STAP GUT
Oltaim mi save go long wanem hap Jehova i askim mi long go long en. Planti taim mi na meri bilong mi i luksave olsem em i lukautim mipela na blesim mipela. Mipela i trastim Jehova na dispela i helpim mipela long abrusim ol hevi em ol man i save karim taim ol i trastim mani kago samting. Ol samting i kamap long laip bilong mi na Dorcas i helpim mipela long luksave olsem Jehova em i “God bilong kisim bek mipela,” olsem na em i lukautim mipela na mipela i stap gut. (1 Sto. 16:35) Mi bilip tru olsem Jehova i save lukautim gut laip bilong ol manmeri i trastim em wankain olsem “man i save lukautim gut ol samting i dia tumas insait long beg.”—1 Sml. 25:29.