Famili na Ekspiriens i Helpim Mi Long Kamap Gutpela Tru

Long 1913, papa bilong mi, John Mills i kisim baptais long New York City taim em i gat 25 krismas. Brata Russell i mekim tok bilong baptais. Bihain liklik, Papa i go long Trinidat na em i maritim Constance Farmer husat i givim bel tru long stap olsem Baibel Sumatin. Papa i helpim pren bilong em Williama R. Brown long soim piksa “Photo-Drama of Creation.” Ol i mekim olsem i go inap long Brata William na meri bilong em i go long Wes Afrika long 1923. Papa na Mama i gat hop bilong kisim laip long heven, na tupela i stap na mekim yet wok long Trinidat.

PAPAMAMA I LAIKIM MIPELA

Papa na Mama i gat 9-pela pikinini, na ol i kolim nem bilong fesbon olsem Rutherford—nem bilong presiden bilong Watch Tower Bible and Tract Society. Taim mi bon long Disemba 30, 1922, ol i kolim mi Clayton J. Woodworth—edita bilong The Golden Age (nius Kirap!). Papamama i salim mipela olgeta i go long skul, tasol ol i strong moa long mipela i mas winim ol mak long sait bilong wok lotu. Mama i save gut tru long wei bilong yusim tok bilong Baibel long kirapim tingting bilong mipela. Papa i save amamas tru long tokim mipela long ol stori bilong Baibel, na em i save mekim ol eksen bilong helpim mipela long piksaim gut ol samting i kamap long stori.

Hatwok bilong ol i kamapim gutpela samting. Ol i gat 5-pela pikinini man, na 3-pela bilong ol i go long Skul Gileat, na mi wanpela bilong ol. Tripela susa bilong mipela i mekim wok painia inap planti yia long Trinidat na Tobago. Wok tisa na gutpela eksampel bilong papamama i helpim tru mipela ol pikinini na i olsem ol i “planim [mipela] insait long haus bilong Jehova.” Ol i strongim mipela long kamap gutpela tru “long ples bung insait long banis bilong God bilong yumi.”—Sng. 92:13.

Haus bilong mipela i kamap ples bilong mekim bung bilong autim tok. Ol painia i save kam long haus na stori long Brata George Young, em misineri bilong Kanada na em i visitim Trinidat. Papamama i amamas na stori long Brata na Sista Brown, em bipo ol i poroman wantaim long mekim wok autim tok na bihain ol i go long Wes Afrika. Olgeta dispela samting i kirapim mi long mekim wok autim tok taim mi gat 10-pela krismas.

WOK I KIRAP NUPELA

Long dispela taim bipo, ol magasin bilong yumi i tokaut klia long tok giaman bilong ol lotu, gridi pasin bilong wok bisnis, na pasin nogut bilong lain politik. Long 1936, ol pris pasto i kirapim ekting gavana bilong Trinidat long tambuim olgeta pablikesen bilong Was Taua. Mipela i haitim olgeta buk na nius na tilim i go inap long olgeta pablikesen i pinis. Mipela i raitim ol tok long traipela pepa na wokabaut o ron long baisikol na soim long ol manmeri. Mipela i wok bung wantaim ol pablisa bilong taun Tunapuna em ol i gat spika long kar, na mipela i autim tok i go inap long ol ples i stap longwe tru long biktaun bilong Trinidat. Mipela i amamas tru long mekim dispela wok! Olgeta dispela samting i kirapim mi long kisim baptais taim mi gat 16 krismas.

Famili bilong mi na ol ekspiriens bilong mi taim mi stap pikinini yet, olgeta dispela samting i kirapim laik bilong mi long mekim wok misineri. Dispela laik i stap strong yet taim mi go long Aruba long 1944, na mi autim tok wantaim Brata Edmund W. Cummings. Mipela i amamas tru olsem mipela inap kirapim 10-pela manmeri long i kam long Memorial long 1945. Long 1946, fes kongrigesen i kamap long dispela ailan.

Bihain liklik, mi autim tok long wanwok bilong mi, Oris Williams. Oris i tok pait bikos em i laik sambai long bilip bilong em. Tasol long rot bilong Baibel stadi, em i kisim stretpela save long Tok Bilong God, na em i kisim baptais long Janueri 5, 1947. Bihain, mitupela i laikim narapela narapela na mitupela i marit. Em i kirap mekim wok painia long Novemba 1950. Planti gutpela samting i kamap long laip bilong mitupela.

BIKPELA WOK LONG NAIJIRIA

Long 1955, ol i invaitim mipela long i go long Skul Gileat. Mitupela Oris i risain long wok, salim haus na ol kago, na mitupela i lusim Aruba. Long Julai 29, 1956, mipela i grediuet long namba 27 klas na kisim asainmen bilong i go long Naijiria.

Oris i tok: “Spirit bilong Jehova inap helpim yumi long karim ol hevi bilong wok misineri. Man bilong mi i laik mekim wok misineri, tasol mi no laik mekim dispela wok. Mi laik kamapim na lukautim ol pikinini. Mi senisim tingting taim mi luksave olsem em i bikpela samting tru long mipela i mas autim gutnius. Taim mipela i grediuet long Gileat, mi holim wanpela tingting tasol long mekim wok misineri. Mipela i kalap long bikpela sip, Queen Mary. Brata i wok long ofis bilong Brata Knorr, em Brata Worth Thornton, i kam tok gutbai olsem ‘Bon voyage!’ Em i tok mipela bai wok long Betel. Mi tingting olsem, ‘O, no!’ Tasol kwiktaim tingting bilong mi i senis na mi laikim tru Betel; mi kisim kain kain asainmen. Asainmen mi laikim tru em wok risepsenis. Mi save amamas long bungim ol manmeri, na dispela asainmen i opim rot long mi inap bungim planti bratasista long Naijiria. Taim ol i kam kamap long risepsen, planti bilong ol i gat das i karamapim ol, ol i taiet, hangre, na nek i drai. Mi amamas tru long mi inap helpim ol long kisim ol samting ol i nidim na dispela i mekim gut bel bilong ol. Dispela asainmen i olsem wok lotu mi mekim long Jehova, olsem na mi belgut tru na dispela i givim bikpela amamas long mi.” Yes, olgeta asainmen i helpim mipela long kamap gutpela tru.

Taim olgeta long famili i kam bung gen long Trinidat long 1961, Brata Brown i stori long sampela gutpela ekspiriens bilong em long Afrika. Mi stori long wok i kamap bikpela long Naijiria. Brata Brown i putim 2-pela han long baksait bilong mi na em i tokim Papa: “Johnny, yu no gat sans long go long Afrika, tasol Woodworth i go!” Papa i tok: “Worth, mekim yet gutpela wok yu mekim!” Ol dispela tok i strongim laik bilong mi long mekim gut wok autim.

Long 1962, ol i invaitim mi long atendim namba 37 klas bilong Gileat na kisim sampela moa trening inap 10-pela mun. Brata Wilfred Gooch i stap brens ovasia long Naijiria, na em i go long namba 38 klas bilong Gileat na em i kisim asainmen bilong i go long Inglan. Olsem na mi kisim ples bilong em na kamap brens ovasia long Naijiria. Mi bihainim eksampel bilong Brata Brown na mi raun long planti hap bilong Naijiria na bungim planti bratasista na mi laikim ol tru. Maski ol i no gat planti mani kago, ol i stap belgut na amamas na dispela i soim klia olsem mani kago i no rot bilong kisim amamas tru. Taim ol i kam long miting, ol i save werim ol klos i klin na i stret. Long taim bilong kibung, planti bilong ol i save kam long ol trak na ol bolekaja,b em ol bas ol i wokim long Naijiria na sait sait bilong ol i no gat wol. Ol dispela bas i gat ol stika i gat kain kain rait long en. Wanpela stika i tok: “Ol liklik drop bilong wara i save kamapim bikpela solwara.”

Dispela tok em i tru olgeta! Olgeta wan wan i mas putim han long mekim wok; mitupela Oris tu i mekim olsem. Long 1974, Naijiria em namba 1 ples ausait long Amerika we i gat 100 tausen pablisa. Wok i kamap bikpela na planti gutpela samting i kamap!

Long dispela taim, bikpela pait long Naijiria i stap yet kirap long 1967 i go inap 1970. Sampela bratasista i stap long hap bilong Biafra long hapsait bilong Wara Naija, na inap planti mun ol i no gat rot long kam long brens ofis. Olsem na mipela yet i mas kisim kaikai bilong strongim bilip na bringim i go long ol. Olsem mi tok long kirap bilong stori, planti taim mipela i beten, trastim Jehova, na brukim wara i go long hapsait.

Mi inap tingim yet hau mipela i brukim Wara Naija. Mipela inap lusim laip long han bilong ol soldia i holim gan, o long rot bilong bikpela sik na ol narapela birua. Mipela i abrusim ol soldia long wanpela sait bilong wara, na mipela i bungim gen ol soldia long hapsait bilong wara. Wanpela taim Wara Naija i spit tru na mi kalap long pasindia kanu long Asaba na mi go long Onitsha, na mi go moa long Enugu na strongim ol wasman. Narapela taim, mi go strongim ol elda long Aba, em hap we i tambu long onim lait long nait. Long Port Harcourt, mipela i beten na pinisim kwik miting taim ol soldia bilong gavman i kam long hapsait bilong Biafra.

Ol dispela miting i strongim ol bratasista long pilim tru pasin laikim bilong Jehova, na helpim ol long stap wanbel na abrusim pasin bilong sapotim wanpela lain tasol. Ol bratasista long Naijiria i sanap strong long dispela taim nogut. Ol i stap wanbel na laikim tru narapela narapela maski ol i bilong kain kain ples. Mi amamas tru long mi inap stap wantaim ol long dispela taim bilong hevi!

Long 1969, Brata Milton G. Henschel em siaman bilong “Gutaim Long Graun” Intenesenel Kibung long Yankee Stadium, New York, na mi stap helpim bilong em, olsem na mi kisim skul long planti samting. Dispela i helpim mi tru bikos long 1970, mipela i mekim Intenesenel Kibung “Men of Goodwill” long Lagos, Naijiria. Dispela kibung i kamap bihain stret long wanpela bikpela pait insait long kantri, tasol Jehova i blesim dispela kibung na gutpela samting tru i kamap. Ol i trensletim tok bilong dispela kibung long 17 tokples, na 121, 128 manmeri i stap long dispela kibung. Brata Knorr na Brata Henschel na ol narapela husat i satarim balus long Amerika na Inglan bilong i kam long kibung, ol i lukim planti manmeri tru i kisim baptais—3,775 nupela disaipel! Long ol kibung i kamap bihain long Pentikos, i no gat bikpela lain manmeri olsem i kisim baptais long seim de! Long dispela taim, mi bisi tru long helpim wok bilong oganaisim kibung. Insait long sotpela taim tasol, namba bilong ol pablisa i go antap tru!

Mi stap moa long 30 yia long Naijiria, na sampela taim mi mekim wok wasman raun na wasman son long Wes Afrika. Ol misineri i save amamas tru long luksave olsem brens ofis i tingim olgeta wan wan bilong ol na strongim ol! Mipela i kirapim ol long luksave olsem mipela i no lusim tingting long ol! Dispela wok i skulim mi olsem em i bikpela samting long tingim gut olgeta wan wan manmeri bikos dispela bai helpim ol long kamap strong long bilip na stap wanbel insait long oganaisesen bilong Jehova.

Pait na sik i putim hevi long mipela, tasol Jehova i helpim mipela long karim ol dispela hevi. Oltaim mipela i lukim blesing bilong Jehova. Oris i stori olsem:

“Mitupela wantaim i kisim sik malaria. Wanpela taim Worth i sik nogut tru na tingting bilong em i no wok gut, na mipela i bringim em i go long haus sik long Lagos. Dokta i tok Worth inap lusim laip, tasol mi amamas tru olsem em i stap laip yet! Tingting bilong em i kamap orait na em i autim tok long nes long Kingdom Bilong God. Bihain mi go wantaim Worth long visitim nes, Mr. Nwambiwe, long kirapim laik bilong em long kisim save long Baibel. Em i kisim tok i tru, na em i kamap elda long Aba. Mi helpim planti manmeri long kamap ol wokman na wokmeri bilong Jehova, na mi helpim tu sampela strongpela Muslim. Mipela i amamas tru long save na laikim ol manmeri bilong Naijiria, na mipela i laikim tu kalsa, kastam, na tokples bilong ol.”

Narapela skul: Taim yumi go long narapela ples na yumi laik mekim gut asainmen, yumi mas laikim ol bratasista maski kalsa bilong ol i no wankain olsem kalsa bilong yumi.

OL NUPELA ASAINMEN

Long 1987, mipela i kisim nupela asainmen bilong kamap misineri long naispela ailan bilong Sen Lusia long Karibian. Mipela i amamas long dispela asainmen, tasol i gat sampela hatwok. Long Afrika, wanpela man inap maritim planti meri. Long Sen Lusia, ol man na meri i stap wantaim, tasol ol i no stretim marit. Tok Bilong God i kirapim planti Baibel sumatin bilong mipela long stretim marit.

Taim krismas bilong mipela i go antap na strong i pinis, Gavening Bodi i soim pasin laikim na long 2005, ol i invaitim mipela long i go mekim wok long hetkota long Brooklyn, New York, Amerika. Long olgeta de, mi tok tenkyu long Jehova long Oris. Em i lusim laip bilong em long 2015, na mi misim em stret. Em i bin i stap gutpela poroman marit na em i gat pasin laikim na olgeta lain i laikim em. Mitupela i marit inap 68 yia olgeta na mi laikim em tumas. Mipela i luksave olsem sapos yumi laik i stap amamas insait long marit na long kongrigesen, yumi mas soim rispek long wok bos, redi long fogivim narapela, bihainim pasin daun, na kamapim ol pasin bilong holi spirit.

Taim mipela i bel hevi, mipela i save askim Jehova long helpim mipela long daunim hevi. Taim mipela i stretim stretim ol pasin kranki bilong mipela, mipela i kisim blesing, na mipela bai kisim planti moa blesing long bihain!—Ais. 60:17; 2 Kor. 13:11.

Jehova i blesim wok bilong papamama na ol narapela long Trinidat na Tobago, olsem na ol nupela ripot i soim olsem long nau, 9,892 manmeri i bihainim lotu i tru. Long Aruba, planti bratasista i strongim fes kongrigesen mi bin stap long en. Long nau, dispela ailan i gat 14 kongrigesen. Long Naijiria, namba bilong ol pablisa long nau em 381,398. Long ailan bilong Sen Lusia, 783 manmeri i sapotim Kingdom Bilong Jehova.

Mi abrusim pinis 90 krismas. Song 92:14 i stori long ol manmeri i mekim wok bilong God kirap long taim ol i yangpela yet—i olsem papamama i planim ol insait long haus bilong Jehova. Dispela ves i tok: “Maski ol i lapun pinis, ol bai karim yet kaikai; ol bai i stap strong na stap gutpela tru.” Mi amamas tru olsem mi yusim laip olgeta bilong mi long mekim wok bilong Jehova. Papamama na ol narapela i bin strongim mi long givim bel olgeta long mekim wok bilong Jehova. Jehova i soim pasin laikim na em i larim mi long “kamap gutpela tru long ples bung insait long banis bilong God bilong [mi].”—Sng. 92:13.