Mi Bin Stap Wanpela Bikhetman

Stori bilong Meros William Sunday

Taim mi liklik pikinini yet, papamama i lainim mi long laikim tru God; tasol taim mi gat 18 krismas, mi bikhet na lusim famili. Inap 13 yia mi stap olsem pikinini i bin lusim papa em tok piksa bilong Jisas i stori long em. (Luk 15:​11-​24) Mi kamap man bilong salim ol drak na klostu mi bagarapim laip bilong mi. Mi laik stori long yu long samting i bin kirapim mi long senisim pasin bilong mi na kam bek.

MAMA i karim mi long 1956, na papamama bilong mi ol i Kristen. Famili bilong mipela i gat 9-pela pikinini na mi namba tu pikinini. Mipela i sindaun long Ilesha, em wanpela taun long saut-wes bilong Naijiria. Papa bilong mi i go bikpela insait long lotu Katolik, tasol long 1945 ankol bilong em i givim buk The Harp of Goda long em. Taim Papa i ritim buk pinis, em i kirap painim ol Witnes Bilong Jehova. Long 1946 em i kisim baptais, na bihain liklik Mama tu i kisim baptais.

Mi tingim yet olsem taim mi pikinini mi bilip tru long Jehova na mi givim bel long autim tok wantaim papamama bilong mi. Papa bilong mi i stadi long Baibel wantaim mi. Sampela taim Alice Obarah tu i stadi wantaim mi, man bilong em i wasman raun long hap bilong mipela. Papamama bilong mi i laik bai mi kamap man bilong autim tok fultaim. Tasol Mama i tok gutpela sapos mi go long haiskul pastaim.

Taim mi gat 16 krismas mi go long haiskul, tasol mi no bihainim gutpela tingting na mi kirap poromanim ol wanskul i no tingim ol stiatok bilong Baibel. Em i wanpela bikpela popaia tru! I no longtaim na mi kirap smok na mekim pasin pamuk. Mi luksave olsem pasin mi kirap bihainim i no stret wantaim ol tok mi harim long ol miting Kristen, olsem na mi lusim ol miting na wok bilong autim tok long ol haus. Papamama bilong mi i bel hevi tru, tasol mi no wari moa long tingting bilong ol narapela.

Mi Lusim Famili

Taim mi bin skul inap tupela yia long haiskul, mi lusim haus na stap wantaim ol pren i sindaun klostu. Sampela taim mi go bek long haus bilong mipela long pasin hait, na kisim sampela kaikai na ranawe. Papa i bel hevi na em i no baim moa skulfi bilong mi, em i ting dispela bai kirapim mi long senisim pasin.

Tasol long dispela taim mi kisim prais olsem sampela lain i laik baim skul bilong mi. Ol i salim skulfi bilong mi long Skotlan na sampela taim ol i givim mi ol presen, na mani tu. Tupela brata bilong mi i no bung moa wantaim ol Witnes Bilong Jehova, na dispela i bagarapim moa yet bel bilong papamama. Planti taim Mama i krai na i tokim mi long lusim pasin nogut. Dispela i mekim mi bel hevi, tasol mi no senisim pasin bilong mi.

Stap Long Ol Biktaun

Mi pinisim skul long 1977, na bihain mi go long Lagos na kisim wok mani. Bihain liklik, mi kisim mani long pasin i no stret na mi baim wanpela teksi. Nau mi gat mani, olsem na mi kirap kisim ol drak na lusim bikpela haptaim long ol klap na haus pamuk. I no longtaim na mi les long stap long Lagos, na long 1981, mi go sindaun long London. Bihain mi go long Beljam na mi insait long wanpela kos bilong lainim tok Frans na mi wok haptaim long wanpela haus kaikai. Tasol mi lusim bikpela haptaim bilong salim ol ka na redio samting i go long Naijiria.

Papa i raitim pas long brens ofis bilong ol Witnes Bilong Jehova long Beljam na askim ol long painim mi na traim long kirapim mi long stadi long Baibel. Tasol taim ol Witnes i kam long haus bilong mi, mi no laik harim tok bilong ol. Mi kirap go long wanpela lotu we mipela i kaikai, dring, na pilai spot bihain long lotu.

Salim Ol Drak

Long 1982, mi salim wanpela ka i gat bikpela pe i go long Naijiria na mi go long wof bilong Naijiria bilong kisim dispela ka. Lain bilong kastam long Naijiria i lukim olsem ol pepa bilong ka i giaman, na ol i kalabusim mi inap 40 de. Papa i baim kot na mi lusim kalabus. Mi mas i gat mani bilong stretim kot, olsem na mi go bek long Beljam wantaim ol samting mi ken salim, na mi kisim tu sampela kilo mariwana. Taim ol i no kotim mi moa long dispela pepa giaman, mi kirap salim ol drak.

Wanpela taim polis i holim mi long Netelan. Ol lain bilong imigresen i tok mi mas lusim kantri, na ol i putim mi long wanpela balus i go long Naijiria. Taim mi go, mi bungim ol narapela man bilong salim ol drak, na mipela i pasim tok long wok bung wantaim long salim ol drak. Long Janueri 1984, mi go sindaun long narapela kantri long Afrika. Mi save long tok Frans, em tok ples bilong dispela kantri, olsem na i no longtaim na mi kamap pren bilong ol polis, ol soldia, na lain bilong imigresen. Olsem na mipela inap kisim planti tausen kilo mariwana i kam insait long dispela kantri.

Ol i Holim na Kalabusim Mi

Hevi i painim mi gen. Mi bin pasim tok wantaim wanpela kepten bilong ami long helpim mi long kisim ol drak long ples balus i kam insait long kantri. Tasol em i kam leit, na ol polis i holim mi. Ol polis i paitim mi na givim bikpela pen tru long mi na mi hap i dai. Ol i kisim mi i go long haus sik na lusim mi long hap, ol i ting mi bai dai. Tasol mi no dai na bihain mi lusim haus sik, na ol i kotim na kalabusim mi.

Taim mi lusim kalabus, wanpela pren mi bin askim em long lukautim haus bilong mi, em i bin salim olgeta samting bilong mi na ranawe. Wantu mi kirap salim mariwana bilong kisim mani bilong lukautim mi yet. Tasol inap 10-pela de bihain, polis i holim mi gen na kalabusim mi inap 3-pela mun. Taim mi lusim kalabus, mi sik nogut tru na klostu mi dai. Tasol maski i olsem mi inap i go bek long Lagos.

Salim Gen Ol Drak

Long Lagos, mi bungim sampela man mi bin wok wantaim bilong salim ol drak, na mipela i go long India we mipela i baim heroin em mipela inap kisim 600,000 dola long en. Mipela i lusim Bombay (nau Mumbai) na go long Swiselan, na bihain mipela i go long Potugal, na Spen. Mipela wan wan i kisim bikpela winmani na mipela i bihainim narapela narapela rot bilong go bek long Lagos. Long pinis bilong 1984, mi salim sampela drak moa. Mi gat bikpela laik long kisim wan milion dola na go sindaun long Amerika.

Long 1986, mi bungim olgeta mani mi gat na baim sampela heroin long Lagos. Mi kisim dispela heroin i go long narapela kantri, tasol wanpela man i gat pasin mangal i kisim dispela heroin na em i no givim mani long mi. Mi pret long ol man bai kilim mi i dai, olsem na mi go bek long Lagos na mi no tokim wanpela man long samting i bin kamap. Mi bagarap stret, long wanem, mi no gat mani na mi bel hevi tru. Em namba wan taim mi sindaun na tingting long as bilong laip. Mi askim mi yet, ‘Bilong wanem mi save karim ol dispela hevi?’

Kam Bek Long God

Bihain liklik, long wanpela nait, mi beten askim Jehova long helpim mi. Long de bihain, wanpela lapun man na meri bilong em i paitim dua bilong mi. Ol i Witnes Bilong Jehova. Mi stap isi na putim yau long tok bilong ol na kisim wanpela magasin. Mi tok: “Papamama bilong mi ol i Witnes Bilong Jehova. Alice Obarah i bin stadi long Baibel wantaim mi.”

Dispela lapun man, P. K. Ogbanefe, i tok: “Mipela i save gut long ol Obarah. Ol i wok nau long brens ofis bilong Naijiria long Lagos.” Tupela lapun hia i kirapim mi long go lukim ol. Mi bungim ol Obarah na dispela i strongim tru bel bilong mi. Bihain long dispela, Brata Ogbanefe i kirap stadi long Baibel wantaim mi, na kwiktaim mi kirap senisim pasin nogut bilong mi. Dispela i no isi, long wanem, longpela taim mi bin kisim ol drak na i hatwok tru long lusim. Tasol mi tingting strong long stretim pasin bilong mi.

Tasol i gat planti samting bilong pulim na traim mi! Ol “pren” bilong mi i kam long haus bilong mi na i laik pulim mi long mekim pasin nogut. Inap liklik haptaim mi kirap smok gen na mekim pasin pamuk. Long rot bilong beten mi kamapim tru bel bilong mi long God. I no longtaim na mi save olsem ol pren bilong dispela graun i pulim mi long rot nogut, olsem na ol i no inap helpim mi nau. Mi luksave olsem bilong kamap strong long lotu i tru, mi mas lusim Lagos. Tasol mi sem long go bek long famili long Ilesha. Tasol bihain, mi raitim pas long papa na bikpela brata bilong mi na askim ol sapos mi ken kam bek long famili.

Papa i amamas long mi kam bek, na brata bilong mi i tok em bai helpim mi long sait bilong mani. Olsem na bihain long 10-pela yia long mi bin lusim papamama, mi kam bek. Ol i tok amamas long mi. Mama i tok: “Tenkyu, Jehova!” Taim Papa i kam bek long haus long apinun, em i tok: “Jehova bai helpim yu.” Papa i beten long Jehova wantaim famili olgeta, na i askim Em long helpim mi nau, long wanem, mi kam bek bilong mekim laik bilong Em.

Mekim Wok Bilong Inapim Taim Mi Bin Westim

Mi kirap stadi gen long Baibel na kamap strong hariap; mi kisim baptais long Epril 24, 1988. Kwiktaim mi kirap givim bel long mekim wok autim tok. Long Novemba 1, 1989, mi kirap mekim wok painia oltaim​—⁠olsem man bilong autim tok fultaim. Long 1995, ol i singautim mi long go long namba 10 klas bilong Ministerial Trening Skul long Naijiria. Long Julai 1998, ol i makim mi long kamap wasman raun, na mi go lukim ol kongrigesen bilong ol Witnes Bilong Jehova. Wanpela yia bihain, gutpela samting tru i kamap taim mi painim Ruth, em i kamap meri bilong mi na poroman bilong raun wantaim.

Ol narapela tu long famili bilong mi i bin kamap strong long lotu i tru. Wanpela brata bilong mi husat i bin lusim Jehova, em i kam insait gen long lotu i tru na kisim baptais. Mi amamas long Papa i lukim mipela i kam bek long tok i tru. Papa i amamas long mekim wok olsem kongrigesen sevan i go inap long taim em i dai long 1993 taim em i gat 75 krismas. Mama i wok yet long givim bel long lotuim Jehova long Ilesha.

Mi bin raun long 16 kantri long Yurop, Esia, na Afrika, bilong painim mani kago. Tasol dispela i bin kamapim planti bikpela hevi long mi. (1 Timoti 6:​9, 10) Taim mi tingting i go bek, mi bel hevi stret long mi bin westim bikpela haptaim bilong laip bilong mi olsem yangpela man long ol drak na pasin pamuk. Mi bel hevi long pen mi bin givim long God Jehova na famili bilong mi. Tasol mi amamas long mi stap laip na mi bin kisim stretpela tingting. Mi tingting strong long stap gut long Jehova na mekim wok bilong em i go inap long oltaim oltaim.

[Futnot]

[Piksa long pes 21]

Taim mi yangpela bikhetman

[Piksa long pes 23]

De mi kisim baptais

[Piksa long pes 23]

Mi wantaim meri bilong mi, Ruth