Nius i Kam Long Olgeta Hap
◼ Magasin The Medical Journal of Australia i stori olsem winim 1,000 ripot i kamapim olsem sapos yangpela man o meri i lukim TV na vidio i soim pasin bilong pait na bagarapim man dispela i save kirapim ol long pait na bagarapim man.
◼ Ol i ting olsem ples Lateu, long Tegua Ailan, long Vanuatu, em namba wan ples we senis bilong taim bilong win na ren i fosim ol man long lusim dispela ples na i go sindaun long narapela hap. Planti taim “bikpela win na ren na biksi i bagarapim haus na ples bilong ol.”—VANUATU NEWS, VANUATU.
Bikpela Hap Pipia i Drip Long Solwara
Long kirap bilong yia 2006, niuspepa The Honolulu Advertiser i tok bikpela hap pipia i “lusim hap not na drip i kam long hap saut bilong solwara long Hawaii na i go long ol nambis, em ol samting bilong hukim pis na ol plastik.” Tait bilong solwara i save karim ol pipia long Not Pasifik i go long wanpela hap bilong solwara i stap isi, tasol sampela taim win i subim ol dispela pipia i go long Hawaii. Long 2005, “ol i painim winim 2,000 hap pipia,” na tu ol i painim 100 umben bilong kisim pis. Ol pipia inap bagarapim ol pis samting bilong solwara. Charles Moore, em man i bin kamapim wanpela lain (Algalita Marine Research Foundation), em i tok: “Ol pis long solwara i no kisim gutpela kaikai. Olgeta i kaikai ol liklik hap pipia plastik.”
Planti Man Moa i Winim 100 Krismas
Wanpela magasin (New Scientist) i tok krismas bilong planti man long nau i winim 100. Long olgeta hap bilong graun nau i gat 200,000 manmeri i gat 100 krismas. Na tu, dispela magasin i tok, 66 bilong ol dispela lain i gat 110 krismas. Dispela magasin i tok em i hatwok long save tru tru man i gat hamas krismas olsem na ol i ting nogut namba bilong ol manmeri husat i winim 110 krismas i mas 450 samting.”
Hatpela Pasin Long Ples Wok
Nius The Wall Street Journal i tok: “Taim man i mekim hatpela pasin long wanwok bilong em olsem em i mekim sampela pasin na toktok i bagarapim bel bilong em, dispela inap mekim na planti samting bilong kampani inap lus. Olsem: Taim, strong na ol wokman.” Wanpela lain i skelim 3,000 manmeri na 90 pesen bilong ol dispela manmeri i tok, “ol wanwok bilong ol i save mekim hatpela pasin long ol long ples wok.” Inap olsem 50 pesen bilong ol i tok “hap taim bilong ol long mekim wok i lus nating, long wanem, ol i wari long samting wanwok i bin mekim,” na “25 pesen bilong ol i tok dispela samting i mekim na ol i no wok strong olsem bipo,” na long 8-pela 8-pela man wanpela i lusim wok. Dispela nius i kamapim tok bilong Christine Porath em wanpela profesa long Yunivesiti Bilong Sauten Califonia, em i tok, “taim ol wokman i no givim bel long mekim wok bilong ol, o ol i no go long wok, o ol i stil, dispela i soim olsem kampani ol i wok long en i gat hevi long pasin bilong mekim hatpela pasin long narapela.”
Sid i Putim Kru Bihain Long 2,000 Yia
Planti man i save laikim diwai det bilong Juda bilong bipo, long wanem, em i naispela diwai, em i gutpela bilong malolo aninit long en, na ol i wokim marasin long en, tasol namel long yia 1095 i go inap 1270 samting, ol soldia bilong lotu Kristen i kam pait na bagarapim olgeta diwai det. Nius The New York Times i tok, tasol nau “ol saveman na ol saientis bilong Israel i mekim wanpela sid bilong diwai det i stap nating inap 2,000 yia long putim kru. Ol i givim nem Metusela long dispela sid, na ol i bin painim dispela sid taim ol i digim graun long Masada,” em dispela hap ol Rom i bin kisim long yia 73 C.E. Wanpela savemeri bilong skelim ol diwai samting, nem bilong em Elaine Solowey, em i bin mekim dispela sid i putim kru, em i tok olsem sampela yia bai lus pastaim na bai dispela diwai inap kamapim pikinini, na em inap mekim olsem sapos em i diwai meri. “Tasol sapos em i diwai man em bai stap olsem samting bilong lukluk tasol long en na skelim.”