‘Pasin Bilong Kaikai Wantaim i Mekim na Mipela i Pas Gut’

OLSEM WANEM? Famili bilong yu i save amamas long kaikai wantaim, maski em wanpela taim tasol long de? Sori tru, nau long dispela taim we ol man i save hariap hariap long mekim ol samting, planti famili i no save kaikai wantaim, wan wan i kaikai long laik bilong ol yet. Tasol taim famili i kaikai wantaim dispela i helpim ol long wanpela bikpela samting tru, em pasin bilong toktok gut wantaim na pas gut wantaim.

Algirdas, meri bilong em Rima, na tripela pikinini meri bilong ol, ol i stap long Lithuania, em wanpela kantri long hap not bilong Yurop. Algirdas i tok: “Maski mi save wok na ol pikinini i go long skul, mipela i stretim ol wok bilong mipela bambai mipela olgeta inap kaikai wantaim long apinun. Long taim bilong kaikai, mipela i save toktok wantaim long ol samting mipela i bin mekim long dispela de, na long ol hevi, ol tingting, ol samting mipela i laikim na ol samting mipela i no laikim. Na tu, mipela i save toktok wantaim long ol samting bilong lotu. Tru tumas, pasin bilong mipela famili long kaikai wantaim i mekim na mipela i pas gut wantaim.”

Rima i tok: “Taim mi redim kaikai wantaim ol pikinini, dispela tu i save opim rot long mipela i toktok gut wantaim. Ol pikinini i save amamas long mekim ol samting wantaim long haus kuk, na long wankain taim ol i lain long mekim ol gutpela wok. Taim mipela i mekim olsem, mipela i mekim wok, tasol mipela i kisim amamas tu.”

Algirdas, Rima, na ol pikinini bilong ol i kisim planti gutpela samting, long wanem, ol i makim taim bilong famili i kaikai wantaim. Sapos yu no mekim yet, traim long makim wanpela taim long olgeta de bilong famili olgeta i ken kaikai wantaim, maski yu papa o mama wanpis, yu tu i ken mekim olsem. Ol gutpela samting i kamap long dispela, bai i winim tru ol hatwok bilong yu long mekim olsem.