“Ol Liklik Tren” i Save Lait Long Tudak
◼ Long wanpela nait long bus bilong Brasil, i gat wanpela “tren” i liklik tru i lusim ol pipia lip i stap long graun na i kam ausait. Tupela retpela hetlait i laitim rot bilong em, na long wan wan sait i gat 11-pela yelo na grin saitlam. Dispela i no wanpela tren tru tru. Nogat. Em wanpela liklik snek i stap long sampela hap bilong Not na Saut Amerika. Longpela bilong en inap 70 milimita, na bihain em i save senis na kamap wanpela binatang bitel. Ol liklik snek meri i no save senis, na bodi bilong ol i luk olsem ol tren i gat lait, olsem na sampela i save kolim ol olsem tren snek. Ol manmeri i stap long ol ples ausait long taun i save kolim ol olsem ol liklik tren.
Kala bilong liklik snek em braunpela na long san em i hatwok long lukim em. Tasol long nait em i save kamapim ol lait i gat kain kain kala. Insait long bodi bilong en i gat tupela kain marasin samting (luciferin na luciferase) i miks wantaim bilong kamapim lait na dispela lait i no save kamapim hat. Kala bilong lait em ret, orens, yelo na grin.
Retpela hetlait i save lait klostu olgeta taim—tasol ol yelo na grin saitlam i no olsem. Ol wok painimaut i kamapim olsem ol hetlait i save helpim liklik snek long painim ol narapela kain liklik snek ol i kolim milipid, em nambawan kaikai bilong em. Wok bilong ol saitlam em bilong pretim ol birua, olsem ol anis, ol rokrok, na ol spaida. I olsem dispela lait i tok: “Mi no gutpela kaikai. Lusim mi!” Olsem na liklik snek i save kamapim lait long ol saitlam taim birua i stap. Na tu, ol i save kamapim lait long ol saitlam taim ol i mekim save long ol milipid, na taim liklik snek meri i holimpasim ol kiau bilong em. Lait bilong ol saitlam i lait liklik pastaim na i wok long kamap strong tru na bihain lait i dai olgeta. Dispela i save kamap insait long sampela seken tasol na em inap mekim mekim i go i go.
Tru tumas, maski yumi lukluk we, olsem namel long ol pipia lip long graun, yumi inap painim ol samting i luk naispela tru. Dispela i kirapim yumi long tingim tok man bilong raitim song i mekim bilong litimapim nem bilong Man Bilong Wokim olgeta samting, em i tok: “Ol samting yu bin wokim i pulap tru long dispela graun.”—Song 104:24.
[Piksa Kredit Lain long pes 18]
Robert F. Sisson/National Geographic Image Collection