Ol Samting Jehova i Wokim i Nambawan Tru
‘Ol Diwai i Save Kisim Planti Wara’
OLSEM WANEM? Wanpela taim yu bin i stap insait long bikbus na lukim lait bilong san i sut i kam namel long ol longpela diwai? Yu inap harim pairap bilong ol lip i meknais long win?—Wok Pris 26:36.
Long sampela hap bilong graun insait long yia, ol lip bilong sampela diwai i save kamap ret, orens, yelo na ol narapela kala. Man, i olsem paia i kukim bikbus! Dispela samting i stret tru wantaim dispela tok: “Yupela ol maunten na yupela olgeta diwai i stap long ol bikbus, yupela tu i mas amamas na singaut.”—Aisaia 44:23.a
Bikbus i karamapim klostu 33 pesen bilong graun. Bikbus na olgeta samting i gat laip i stap long en i litimapim tru Man Bilong Wokim olgeta samting, em God Jehova. Man bilong raitim song i tok: “Yupela litimapim nem bilong” God, yupela “ol diwai i save karim kaikai na ol diwai bilong bus.”—Song 148:7-9.
Buk The Trees Around Us i tok: “Long i stap bilong ol man, ol diwai i bikpela samting bilong helpim ol na inapim laik bilong ol long lukim ol naispela samting.” Ol bikbus i lukautim, helpim, na mekim wara bilong ol man i kamap klin. Na tu, ol diwai i save mekim win i kamap klin. Long rot bilong wok bilong fotosintesis, ol lip i save kisim wara, lait bilong san, gris bilong graun na ges kabon daioksait long win, na wokim suga na oksijen.
Bikbus em i wanpela gutpela samting tru. Long olgeta samting i stap long bikbus, ol traipela diwai i pulim tru ai bilong ol man. Ol kain kain gras na rop i kamap namel long ol diwai. Ol dispela kain gras i save kamap long ples kol bilong ol traipela diwai na ol i save kisim wara bilong bikbus.
Long sampela bikbus, winim 10 milion lip i save pundaun long graun klostu long pinis bilong yia. Wanem samting i save painim ol? Ol binatang samting i save kaikai ol lip na mekim ol lip i kamap gris bilong graun. Yes, i no gat wanpela samting i lus nating taim ol dispela binatang samting i redim graun gen bilong ol samting i ken kamap long en.
Aninit long ol lip i pundaun, i gat ol planti samting i stap laip. Buk The Forest i tok: “Insait long wanpela liklik hap graun, em sais bilong en olsem 30 skwe sentimita na i go daun insait long graun inap 2.5 sentimita, i gat samting olsem 1,350 binatang samting i stap, na graun em man inap holim long han, i gat planti bilion narapela binatang i stap em man i no inap lukim long ai.” Na tu, bikbus i pulap long ol snek, pisin, binatang, na ol animal. Husat i mas kisim biknem long ol dispela gutpela na narapela narapela kain samting? I stret tru long Man Bilong Wokim olgeta dispela samting i tokaut olsem: “Olgeta wel abus bilong bus na olgeta bulmakau i stap long olgeta maunten, olgeta i bilong mi yet.”—Song 50:10.
God i wokim sampela animal em ol inap slip i dai inap sampela mun long taim bilong kol na ol i no kaikai inap longpela taim tasol ol i no kisim bagarap. Tasol i no olgeta animal i save slip i dai. Long taim bilong kol, yu inap lukim ol dia i kalap kalap i go. Ol dia i no save slip i dai inap sampela mun samting o ol i no save bungim kaikai, nogat, ol i save raun painim kaikai, na ol i save kaikai ol nupela kru bilong ol han bilong diwai, olsem yu lukim long dispela piksa long Jemani.
Baibel i stori planti long ol plaua samting. Wanpela buk i kamapim olsem Baibel i kolim 130 kain kain plaua samting na 30 kain kain diwai. Wanpela saveman bilong skelim plaua samting, em Michael Zohary, em i stori long dispela samting na em i tok: “Long ol buk nating, wanpela man i no inap painim planti stori bilong plaua samting insait long en olsem Baibel i mekim.”
Ol diwai na bikbus ol i gutpela presen i kam long Man Bilong Wokim olgeta samting. Sapos yumi bin raun long bus, bai yumi wanbel long tok bilong man bilong raitim song, em i tok: “Ren i save kam daun na ol diwai bilong Lebanon i save kisim planti wara. Ol dispela diwai sida i bilong Bikpela stret. Bipo em yet i planim. Ol pisin i save wokim haus long ol dispela diwai sida.”—Song 104:16, 17.
[Futnot]
a Lukim 2004 Calendar of Jehovah’s Witnesses, long Janueri na Februeri.
[Blok/Ol Piksa long pes 9]
Wanpela gutpela diwai bilong karim ol prut long hap bilong Midel-Is em diwai amon. Long kirap bilong yia—paslain long olgeta narapela diwai i putim plaua—em i save kirap long slip, olsem em i save putim plaua. Ol Hibru bilong bipo ol i save kolim diwai amon olsem diwai bilong kirap, ol i tok olsem long wanem em i save putim plaua hariap. Dispela diwai i save putim ol plaua em kala bilong ol i pink o wait.—Saveman 12:5, NW.
I gat inap 9,000 pisin em ol man i save long en, na 5,000 bilong ol dispela pisin ol i save singsing. Ol i save singsing long bikbus. (Song 104:12) Olsem, ol liklik pisin ol i kolim song sparo i save mekim ol naispela singsing. Ol pisin ol i save kolim mourning warbler, olsem i stap long piksa hia, ol i pisin bilong singsing, na kala bilong ol i grei, yelo na grin.—Song 148:1, 10.
[Piksa long pes 9]
Bikbus long Normandy, Frans