Mekim Wok Bilong Kisim Ol Man
“Jisas i tokim Saimon olsem, ‘Yu no ken pret. Nau yu wok long kisim pis, tasol bihain bai yu wok long kisim ol manmeri i kam long mi.’ ”—LUK 5:10.
1, 2. (a) Wok bilong kisim pis em bikpela wok bilong ol man long bipo o nogat? (b) Klostu 2,000 yia bipo wanem nupela wok bilong kisim pis i bin kirap?
INAP planti tausen yia ol man i bin kisim pis long ol solwara na ol raunwara na ol wara, em kaikai bilong ol. Pis em bikpela kaikai bilong ol Isip long bipo, na ol i bin kisim long wara Nail, tasol taim wara i tanim long blut long taim bilong Moses, ol i gat hevi, long wanem, ol i sot long wara, na ol pis i dai na nau kaikai tu i sot. Na taim Jehova i givim Lo long ol Israel long Sainai, em i tokim ol long wanem kain pis ol i ken kaikai na wanem kain i tambu, olsem na yumi ken save, ol bai kaikai pis long Graun Bilong Promis, na sampela bilong ol bai kamap man bilong kisim pis.—Kisim Bek 7:20, 21; Wok Pris 11:9-12.
2 Tasol klostu 2,000 yia bipo i gat nupela wok bilong kisim pis i bin kamap, i no bilong kisim ol pis tru. Em wanpela wok bilong spirit, na dispela wok bai helpim ol man bilong kisim pis, na em bai helpim ol dispela pis yet! Dispela wok i stap long nau tu, na i helpim planti milion man long olgeta hap bilong graun.
“Kisim Ol Manmeri”
3, 4. Husat tupela man bilong kisim pis i laik tru long harim tok bilong Krais Jisas?
3 Long yia 29, Man bilong kirapim dispela nupela kain wok bilong kisim pis, em Jisas, em i go long Jon Bilong Baptais na em i kisim baptais long wara Jordan. Sampela wik bihain Jon i lukim Jisas i kam na Jon i tokim tupela disaipel bilong em: “Lukim. Em i Pikinini Sipsip Bilong God.” Nem bilong wanpela bilong dispela tupela disaipel em Andru, na kwiktaim em i go bungim brata bilong em, em Saimon Pita, na Andru i tok: “Mipela i lukim pinis Mesaia”! Andru tupela Saimon i man bilong kisim pis.—Jon 1:35, 36, 40, 41; Matyu 4:18.
4 Sampela wik bihain, Jisas i autim tok long ol manmeri klostu long Raunwara Galili, klostu long haus bilong Pita tupela Andru. Jisas i tokim ol manmeri olsem: “Yupela i mas tanim bel, long wanem, kingdom bilong heven em i kam klostu pinis.” (Matyu 4:13, 17) Yumi ken save, Pita tupela Andru i gat bikpela laik long harim tok bilong Jisas, tasol ating ol i no save, wanpela tok Jisas i laik mekim nau bai kamapim bikpela senis long ol em bilong olgeta taim bihain. Na dispela tok bilong Jisas na ol samting em bai mekim, dispela i gat bikpela insait bilong en, na yumi olgeta bilong nau i mas tingim.
5. Olsem wanem Pita, em wanpela man bilong kisim pis, em i bin helpim Jisas?
5 Baibel i stori olsem: “Wanpela taim Jisas i sanap long nambis bilong raunwara Genesaret, na planti manmeri i kam long em bilong harim tok bilong God, na ol i sanap klostu long em na banisim em tru. Na Jisas i lukim tupela bot i stap long nambis bilong raunwara, em ol bot bilong ol man bilong kisim pis. Tasol ol dispela man i lusim bot, na ol i wok long wasim ol umben.” (Luk 5:1, 2) Long dispela taim bipo ol man i wok bisnis long kisim pis, planti taim ol i save wok nait, na long moningtaim ol i save wasim umben bilong ol. Jisas i laik mekim wok long wanpela bot bilong ol na bai em i ken autim gut tok long ol man. “Jisas i kalap long wanpela bot, em bot bilong Saimon. Na em i tokim Saimon long kam insait long bot na subim bot i go lusim nambis liklik. Na Jisas i sindaun long bot na i skulim ol manmeri.”—Luk 5:3.
6, 7. Jisas i bin wokim wanem mirakel long wok bilong kisim pis? Na bihain em i mekim wanem tok long wok bilong kisim pis?
6 Tasol Jisas i no tingting tasol long skulim ol manmeri, nogat. “Em i skulim ol pinis, orait bihain em i tokim Saimon olsem, ‘Pul i go namel long wara, na yutupela tromoi ol umben i go daun bilong kisim pis.’ ” Tasol tupela i bin wok nait long kisim pis, i go inap tulait, na ol i no kisim sampela. Olsem na Pita i bekim tok olsem: “Bikman, long nait mipela i wok hat tru i go inap tulait, na mipela i no kisim wanpela pis. Tasol bai mi bihainim tok bilong yu na tromoi ol umben.” Ol i tromoi umben na wanem samting i kamap? “Ol i kisim bikpela lain pis moa, na ol umben i laik bruk. Olsem na tupela i singautim ol poroman bilong ol i stap long narapela bot, long kam helpim ol. Na ol i kam, na ol i pulimapim pis long tupela bot. Na tupela bot i pulap tru na i laik i go daun long wara.”—Luk 5:4-7.
7 Jisas i bin wokim wanpela mirakel. Long nait dispela wara i no gat pis, tasol nau ol pis i pulap long en. Dispela mirakel i mekim Pita i kirap nogut. “Saimon Pita i lukim dispela, na em i brukim skru klostu long lek bilong Jisas na i tok, ‘Bikpela, yu lusim mi na yu go. Mi man bilong sin.’ Em i lukim olgeta dispela pis ol i kisim, na em i kirap nogut tru. Na ol poroman bilong en, ol tu i kirap nogut. Tupela poroman bilong Saimon, em Jems wantaim Jon, tupela pikinini bilong Sebedi, tupela tu i kirap nogut.” Jisas i mekim isi bel bilong Pita na bihain em i mekim dispela tok em bai kamapim bikpela senis tru long Pita. Jisas i tok: “Yu no ken pret. Nau yu wok long kisim pis, tasol bihain bai yu wok long kisim ol manmeri i kam long mi.”—Luk 5:8-10.
Ol Man Bilong Kisim Ol Manmeri
8. Fopela man i wok bisnis long kisim pis ol i mekim wanem long singaut bilong i go “kisim ol manmeri”?
8 Olsem na Jisas i tok piksa long pis i makim man, na em i tokim dispela man bilong pasin daun long lusim wok bilong em long kisim pis tru na kirap long mekim narapela wok i winim dispela wok—em i mas wok long kisim ol manmeri. Pita wantaim brata bilong em Andru, tupela i amamas long kisim dispela wok. “Kwiktaim tupela i lusim umben na i go bihainim em.” (Matyu 4:18-20) Na Jisas i singautim Jems tupela Jon, ol i stap long narapela bot na ol i wok long samapim umben i bin bruk. Em i tokim tupela tu long kamap man bilong kisim ol manmeri. Na yu ting tupela i mekim wanem? “Kwiktaim tupela i lusim bot na i lusim papa bilong tupela, na tupela i go bihainim Jisas.” (Matyu 4:21, 22) Jisas i save gut long kisim ol man, na nau em i kisim 4-pela man.
9, 10. Pita wantaim poroman bilong em i kamapim klia olsem ol i bilip long wanem samting? Olsem wanem ol i lain long kisim ol man?
9 Ol man bilong wok bisnis long kisim pis, ol i save maketim pis bilong kisim mani bilong helpim ol long i stap laip. Tasol ol man bilong kisim ol manmeri, ol i no ken mekim olsem. Olsem na ol dispela disaipel i lusim olgeta samting bilong ol na i go bihainim Jisas, na long ol dispela rot ol i kamapim klia bikpela bilip bilong ol. Ol i bilip tru olsem dispela nupela wok bilong ol bai kamap gutpela. Jisas i bin mekim ol pis i pulap long wara em pastaim i no gat pis long en. Olsem na ol i save, taim ol i putim umben bilong ol i go daun insait long ‘wara,’ em lain Israel, God bai helpim ol na bai ol i kisim planti manmeri. Dispela wok bilong kisim ol manmeri i bin kirap long taim bilong ol aposel em i stap yet, na Jehova i helpim yet dispela wok, olsem na planti manmeri i kam insait.
10 Inap tupela yia samting Jisas i lainim ol dispela disaipel long pasin bilong kisim ol man, na sampela taim em i stori gut long pasin ol i mas mekim na em i salim ol i go autim tok paslain long em. (Matyu 10:1-7; Luk 10:1-11) Taim ol birua i holim Jisas na kilim em i dai, dispela i bagarapim tru bel bilong ol disaipel. Tasol olsem wanem? Ol i lusim dispela wok bilong kisim ol man? Orait, yumi stori moa na yumi ken save.
Ol i Wok Long Kisim Ol Man Namel Long Olgeta Manmeri
11, 12. Bihain long taim Jisas i kirap bek, em i wokim wanem mirakel long wok bilong kisim pis?
11 Jisas i dai ausait long Jerusalem na kirap bek, na bihain liklik ol disaipel i go bek long Galili. Wanpela taim 7-pela i stap long nambis bilong Raunwara Galili. Pita i tok em bai go kisim pis, na ol narapela tu i go wantaim em. Em nait, na ol i tromoi tromoi umben i go i go inap tulait, na olsem bipo, nau tu ol i no kisim sampela pis. Orait, ol i lukim wanpela man i sanap long nambis na dispela man i singaut long ol na i tok: “ ‘Ol pikinini, ating yupela i gat sampela pis?’ Na ol i bekim tok olsem, ‘Nogat.’ Na em i tokim ol, ‘Yupela tromoi umben long han sut bilong bot, na bai yupela i kisim sampela.’ Olsem na ol i tromoi umben i go daun, na ol i kisim planti pis moa, na ol i no inap pulim umben i kam antap.”—Jon 21:5, 6.
12 Ol disaipel i kirap nogut tru! Ol i mas tingim dispela taim bipo Jisas i bin wokim mirakel na ol i bin kisim planti pis, na nau wanpela, o ating olgeta, i save dispela man i sanap long nambis em Jisas tasol. “Dispela disaipel Jisas i laikim tumas, em i tokim Pita olsem, ‘Em Bikpela tasol.’ Saimon Pita i bin lusim saket na i mekim wok. Na taim em i harim dispela tok, ‘Em Bikpela,’ em i pasim saket na i kalap i go daun long wara na swim i go long nambis. Na ol arapela disaipel ol i kam long bot, na ol i pulim umben i kam wantaim ol pis. Ol i no bin i stap longwe long nambis. Ol i stap samting olsem 100 mita tasol.”—Jon 21:7, 8.
13. Taim Jisas i go antap pinis long heven, bihain wanem wok bilong kisim pis long olgeta hap i bin kirap?
13 Dispela mirakel i makim wanem samting? Em i makim wok bilong kisim ol man em i no pinis yet. Na Jisas i makim olsem tu taim em i tokim Pita 3-pela taim long givim kaikai long ol sipsip—na taim em i tokim Pita long mekim, i olsem em i tokim olgeta narapela disaipel tu ol i mas mekim. (Jon 21:15-17) Tru tumas, i gat bikpela wok long givim kaikai bilong spirit long ol man, na klostu long taim Jisas i dai em i bin tok profet olsem: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Orait, long taim ol disaipel i stap em taim bilong kirapim dispela wok. Ol bai putim umben bilong ol i go daun long solwara, na solwara i makim olgeta manmeri long graun, na taim ol i pulim umben i kam antap bai umben i pulap.—Matyu 28:19, 20.
14. Long ol yia paslain long taim Jerusalem i bagarap, wok bilong kisim ol man, em ol disaipel bilong Jisas i mekim, i kamap gutpela olsem wanem?
14 Taim Jisas i no go antap yet long sia king bilong Papa bilong em long heven, em i tokim ol disaipel: “Bihain Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.” (Aposel 1:8) Taim ol i kisim spirit holi long de Pentikos long yia 33, dispela bikpela wok bilong kisim ol man i kirap na i mas i go long olgeta hap bilong graun, na long dispela de stret ol i kisim 3,000 manmeri. Bihain liklik “namba bilong ol manmeri i bilip long en i go inap olsem 5,000.” (Aposel 2:41; 4:4) Lain bilong ol i wok long i go bikpela na Baibel i tok: “Planti manmeri moa yet i bilip long Bikpela, na ol i kam insait long lain bilong en.” (Aposel 5:14) Bihain liklik sampela Samaria i bilip long gutnius, na bihain moa sampela bilong ol narapela lain tu ol i bilip. (Aposel 8:4-8; 10:24, 44-48) Na 27 yia bihain long de Pentikos, aposel Pol i tokim ol Kristen long Kolosi, ol i bin autim gutpela tok “long olgeta manmeri i stap long graun.” (Kolosi 1:23) Em nau, ol disaipel bilong Jisas i no bin putim umben i go daun long hap bilong Galili tasol—ol i bin putim i go daun namel long ol Juda i stap nabaut long ol narapela narapela hap em Rom i bosim, na ol i bin putim i go daun tu namel long ol manmeri bilong ol narapela lain, maski i olsem i no gat planti ‘pis’ long dispela ‘wara.’ Taim ol i pulim umben i kam antap, ol ‘pis’ i pulap long en—ol i kisim planti manmeri. Long ol Kristen bilong pastaim, truim bilong tok profet bilong Jisas long Matyu 24:14 i bin kamap paslain long taim Jerusalem i bagarap long yia 70.
Ol i Kisim Ol Manmeri Long “De Bilong Bikpela”
15. Long hap bilong Kamapim Tok Hait, Baibel i tok profet long wanem wok moa bilong kisim pis, olsem kisim ol man? Ol i mas mekim dispela wok long wanem taim?
15 Tasol dispela wok i mas i go moa. Long yia 96 wanpela aposel tasol i stap laip, em Jon, na long rot bilong driman Jehova i givim save long em long ol samting bai kamap long “de bilong Bikpela.” (Kamapim Tok Hait 1:1, 10) Wanpela bikpela samting, em wok bilong autim gutpela tok bilong Kingdom long olgeta hap bilong graun. Jon i tok: “Mi lukim narapela ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun. Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin.” (Kamapim Tok Hait 14:6) Ol ensel i mas bosim ol wokman bilong God taim ol i autim gutpela tok bilong Kingdom long olgeta hap bilong graun, i no long ol hap Rom i bosim tasol. Bikpela wok i stap bilong kisim ol manmeri long olgeta hap bilong graun, na truim bilong dispela i bin kamap long taim bilong yumi.
16, 17. Wok bilong kisim ol man long nau i bin kirap long wanem taim? Jehova i blesim dispela wok olsem wanem?
16 Olsem wanem long dispela wok long nau long taim bilong yumi? Pastaim i no gat planti man bilong kisim ol man. Taim Namba Wan Pait i pinis i gat 4,000 manmeri tasol i save givim bel long autim tok bilong Kingdom, na klostu olgeta ol i bilong lain remnan. Wanem wanem hap Jehova i givim rot long ol, ol i tromoi umben bilong ol long ol dispela hap, na ol i kisim planti man. Bihain long namba 2 pait, Jehova i opim rot long ol bilong putim umben i go daun long sampela hap moa. Ol misineri i bin skul long Skul Gileat ol i go pas long mekim dispela wok long planti kantri. Ol kantri olsem Japan, na Itali, na Spen, em pastaim i olsem i no gat planti ‘pis’ i stap, tasol bihain ol i bin kisim planti manmeri long ol dispela hap. Na nau tasol yumi bin kisim save long gutpela wok bilong kisim ‘pis’ i bin kamap long hap bilong Isten Yurop, em ol i bin kisim planti manmeri.
17 Long nau, long planti kantri, planti ‘pis’ tru i pulap long ol umben na ol umben i laik bruk. Ol i kisim planti manmeri tru, olsem na ol i bin kamapim ol nupela kongrigesen na sekit. Bilong helpim ol dispela planti manmeri, long olgeta taim ol i wok long sanapim ol nupela Haus Kingdom na Haus Kibung. Na i mas i gat planti elda moa na ol wokman bilong kongrigesen bilong lukautim ol dispela nupela manmeri i kam insait. Tru tumas, long yia 1919 liklik lain remnan i bin kirapim bikpela wok tru. Truim bilong Aisaia 60:22 i kamap, em i tok, “ol lain i liklik tru bai ol i kamap planti moa”—liklik lain 4,000 bilong bipo i kamap olsem 4 milion samting long nau. Tasol wok bilong kisim pis i no pinis yet.
18. Olsem wanem yumi ken bihainim gutpela pasin bilong ol man bilong kisim ol man long taim bilong ol aposel?
18 Na olsem wanem long yumi wan wan? Taim Jisas i bin singautim Pita na Andru na Jems na Jon long lusim wok bilong ol long kisim pis na kam mekim wok long kisim ol man, Baibel i tok, kwiktaim “ol i lusim olgeta samting bilong ol, na ol i bihainim Jisas.” (Luk 5:11) Ol i makim gutpela pasin bilong bilip na givim bel tru! Olsem wanem? Yumi tu i ken bihainim dispela pasin bilong redi long mekim wok bilong Jehova, maski yumi mas lusim planti samting? Planti milion i bin mekim olsem. Long bipo ol disaipel i bin painim ol man long wanem wanem hap Jehova i larim ol i go long en, na ol i autim tok long ol Juda na long ol narapela lain, na ol i no abrusim sampela man. Na yumi tu i mas autim tok long olgeta kain man yumi save bungim, maski ol i husat.
19. Yumi mas mekim wanem sapos long hap yumi tromoi umben long en i olsem i no gat planti pis?
19 Tasol olsem wanem sapos long hap bilong yu i no planti man i laik harim tok? Yu no ken bel hevi. Tingim ol disaipel, ol i bin wok long nait olgeta long kisim pis, tasol nogat, na long moningtaim Jisas i wokim mirakel na nau planti tumas pis i pulap long umben bilong ol. Wankain samting long spirit inap kamap long nau tu. Long kantri Aialan ol strongpela Witnes i bin wok long autim tok inap planti yia na i no gat planti man i harim, tasol nau senis i kamap na ol man i wok long kam insait, na yiabuk bilong 1991 i tok, long 1990 lain bilong ol i go bikpela bikpela long olgeta mun inap 29 mun olgeta! Long hap bilong yu samting olsem inap kamap. Taim Jehova i larim rot i op yet, yumi mas wok yet long kisim ol pis!
20. Wanem taim yumi mas mekim dispela wok bilong kisim ol man?
20 Long Israel bipo, ol man bilong kisim pis ol i save mekim wok bilong ol long nait long taim ol narapela man i slip gut long bet bilong ol. Em nait, na i no gutpela taim tumas long raun mekim wok, tasol em i gutpela taim bilong kisim ol pis. Orait, yumi tu i mas tingim wanem taim i gutpela bilong bungim ol man taim i gat planti i stap long haus bilong ol na ol inap harim tok, ating long apinun, o long Sarere Sande, o long narapela taim. Yumi mas wok strong long painim ol man i gat gutpela bel.
21. Sapos yumi autim tok planti taim long teritori bilong yumi, yumi mas tingim wanem ol samting?
21 Olsem wanem sapos yumi raun autim tok planti taim long olgeta hap teritori bilong yumi? Ol man bilong wok bisnis long kisim pis long nau, planti taim ol i tok, planti man tumas i go long olgeta taim bilong kisim pis, olsem na long nau i no gat planti pis i stap long wara o solwara. Orait, olsem wanem long wok bilong yumi long kisim man? Sapos yumi go planti taim, yu ting bihain bai ‘ol pis’ i pinis na i no gat sampela moa bilong kisim? Nogat! Long planti hap, ol Witnes i raun raun olgeta taim long kisim man, na ol i kisim yet sampela. Na long sampela hap, planti man i kam insait, long wanem, ol Witnes i raun planti taim long ol dispela hap. Tasol long ol hap yumi save autim tok planti taim long en, yumi mas tingim gut ol haus i no gat man i stap, olsem raitim long notbuk samting, na yumi mas givim bel long go bek gen long narapela taim na traim painim ol man bilong ol dispela haus. Na yumi ken lainim narapela narapela stori bilong kamapim long ol man, nogut yumi mekim wankain tok long ol long olgeta taim. Yumi mas save, i no longtaim na bai ol narapela Witnes i kam autim tok long ol man yumi autim tok long ol, olsem na yumi no ken stori longtaim tumas na bai ol i no amamas moa long yumi, na nogut yumi no tingting gut na yumi mekim ol i kros. Na yumi ken lain gut tu long autim tok long rot na long kain kain taim na ples. Long olgeta taim yumi mas redi long mekim wok long umben bilong yumi bilong spirit.
22. Long dispela taim nau i gat wanem gutpela wok tru yumi inap mekim?
22 Dispela kain pasin bilong kisim pis em i narapela kain, long wanem, em i helpim man bilong kisim pis, na em i helpim pis yet—ol man yumi kisim, sapos ol i stap strong ol inap i stap laip oltaim. Pol i bin tokim Timoti olsem: “Yu mas was gut long ol pasin bilong yu yet na long wok yu mekim bilong skulim ol manmeri. Na sapos yu strong long mekim olsem, orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.” (1 Timoti 4:16) Jisas em i man bilong kirapim dispela wok bilong kisim ol man na lainim ol disaipel long mekim, na em i bosim yet dispela wok long nau. (Lukim Kamapim Tok Hait 14:14-16.) Yumi gat gutpela wok tru yumi ken mekim—yumi ken wok aninit long Jisas na mekim dispela wok bilong kisim ol man! Yumi no ken les. Yumi mas wok yet long putim umben bilong yumi i go daun inap long taim Jehova yet i makim. Nau long las taim i no gat narapela wok i winim dispela gutpela wok bilong kisim ol man!
Yu Inap Tingim?
◻ Jisas i lainim ol disaipel bilong em long mekim wanem wok?
◻ Jisas i mekim wanem na dispela i makim olsem taim em i dai, wok bilong kisim ol man i no pinis?
◻ Long taim bilong ol aposel, olsem wanem Jehova i bin blesim wok bilong kisim ol man?
◻ Wanem bikpela wok bilong kisim planti man i bin kamap long “de bilong Bikpela”?
◻ Yumi ken mekim wanem na bai wok bilong yumi wan wan long kisim ol man i kamap gutpela moa?
[Piksa long pes 15]
Jisas i kirap bek na bihain ol aposel i mekim wok bilong God long kisim ol man i go long planti hap