Kisim Ol Man Long Olgeta Hap

“Taim mi autim gutnius, mi no inap apim nem bilong mi yet . . . Autim gutnius em wok Bikpela i givim mi na mi mas mekim. . . . Sapos mi no autim gutnius, bai mi stap nogut tru.”​—⁠1 KORIN 9:16.

1, 2. (a) Husat tru ol i bin mekim dispela wok olsem tok bilong 1 Korin 9:16 i makim? I gat wanem as na yu bekim tok olsem? (b) Ol Witnes Bilong Jehova i save ol i gat wanem wok, na ol i mekim dispela wok?

HUSAT long taim bilong yumi ol i bin mekim tru dispela wok em Pol i toktok long en? Husat ol milion milion i bin i go long olgeta hap bilong graun na wok long kisim ol man na meri i laik tru long save long God? (Matyu 5:⁠3) Husat ol i bin bihainim tok bilong Krais long Matyu 24:14 na ol i no pret long kalabus o i dai, maski dispela samting i bin painim ol long planti kantri?

² Em ol Witnes Bilong Jehova, olsem ol samting i bin kamap i makim klia. Long yia i go pinis, winim 4 milion Witnes i bin go long haus bilong ol man long 211 kantri na ol hap em narapela kantri i bosim na “autim gutnius” long kain kain tok ples, winim 200. I no ol misineri i bin skul ol tasol i mekim dispela wok. Nogat. Olgeta Witnes Bilong Jehova i pilim tru olsem ol i gat wok long autim tok na lainim ol man long olgeta haus na long kain kain taim na ples. Bilong wanem ol i pilim olsem ol i mas autim bilip bilong ol long ol narapela man? Long wanem ol i save, man i kisim save pinis em i gat wok em i mas mekim.​—⁠Esekiel 33:​8, 9; Rom 10:​14, 15; 1 Korin 9:​16, 17.

Kisim Ol Man​—⁠Em Bikpela Wok Bilong Olgeta Hap

3. Ol i mas mekim wok bilong ‘kisim pis’ long wanem ol hap?

³ Dispela bikpela wok bilong ‘kisim pis’ i no bilong wanpela wara tasol o wanpela raunwara o solwara. Nogat. Olsem Jisas i tok, ol i mas wok long kisim ol man long “olgeta lain.” (Mak 13:⁠10) Taim Jisas i no go antap yet long Papa, em i tokim ol disaipel bilong em: “Yupela mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela. Harim. Mi save stap wantaim yupela olgeta de, i go inap long dispela taim i pinis.”​—⁠Matyu 28:​19, 20.

4. (a) Ol disaipel bilong Jisas bilong pastaim, em ol i bilong lain Juda, ol i mas kirap nogut long wanem samting? (b) Ol Witnes Bilong Jehova i ting olsem wanem long hap ol i mas autim tok long en?

⁴ Ol dispela disaipel bilong Jisas i bilong lain Juda na ol i mas kirap nogut long dispela wok Jisas i tokim ol long mekim. Em i tok, ol i mas go long ol manmeri bilong ol narapela lain ol i “no klin” long ai bilong God na lainim ol. Ol i mas stretim tingting pastaim bambai ol inap pilim tru dispela wok na kirap long mekim. (Aposel 10:​9-35) Tasol ol i no ken abrusim; long rot bilong wanpela tok piksa, Jisas i bin tokim ol, “gaden em i dispela graun.” Olsem na ol Witnes Bilong Jehova long nau i ting olsem, i stret ol i mas wok long ‘kisim pis’ long olgeta hap bilong dispela graun. God i givim dispela wok long ol na ol i no tingting long mekim inap long wanpela mak, olsem long hap bilong kantri bilong ol yet tasol. Nogat. Tru, sampela taim ol i mas was gut, olsem long ples i gat tambu na ol man i no inap bihainim wanem wanem lotu ol yet i laikim. Tasol ol i wok hariap long painim ‘ol pis.’ Bilong wanem ol i wok hariap? Long wanem, ol samting i kamap long graun long nau na truim bilong ol tok profet bilong Baibel i makim olsem i no longtaim na dispela wok bilong ‘kisim pis’ long olgeta hap bai pinis.​—⁠Matyu 13:38; Luk 21:​28-33.

Wok Bilong Kisim Pis i Kamap Gutpela Long Olgeta Hap

5. Wok bilong ‘kisim pis’ i pulim wanem kain manmeri i kam?

⁵ Bikpela hap lain bilong ol manmeri God i makim bilong kisim Kingdom long heven, em ol i bin “kisim” ol namel long ol lain man paslain long yia 1935 na namba bilong dispela lain i olsem inap pinis. Olsem na bihain long 1935 ol Witnes Bilong Jehova i bin wok long painim ol manmeri i gat pasin daun em Baibel i tok, God bai “givim olgeta graun long ol.” (Buk Song 37:​11, 29) Ol dispela manmeri i save “bel nogut na i wari long olgeta dispela pasin nogut ol [man] i save mekim,” na ol i kirap nau long mekim ol samting i makim olsem ol i laikim Kingdom bilong God. Ol i kirap mekim dispela samting taim “bikpela hevi tru” i no bagarapim yet pasin nogut Satan i bin kamapim long graun, na olgeta manmeri i lotuim em ol i go insait long “bikpela paia” na bagarap olgeta.​—⁠Esekiel 9:4; Matyu 13:​47-50; 24:⁠21.

6, 7. (a) Long 1943 ol i kirap mekim wanem bilong helpim wok bilong autim tok? (b) Wanem ol gutpela samting i bin kamap long dispela rot?

⁶ Olsem wanem long dispela wok bilong ‘kisim pis’ long olgeta hap bilong graun? Em i kamap gutpela inap long nau? Orait, skelim ol samting i bin kamap. Long yia 1943, maski Namba 2 Pait i stap yet, ol gutpela brata bilong lain remnan long namba wan ofis bilong ol Witnes Bilong Jehova long Bruklin long Nu Yok ol i save, bihain bai i gat bikpela wok bilong ‘kisim pis’ long olgeta hap bilong graun. Orait, ol i redi olsem wanem bilong mekim dispela wok?a​—⁠Kamapim Tok Hait 12:​16, 17.

⁷ Long 1943 Sosaiti Wastaua i kamapim wanpela skul bilong ol misineri, ol i kolim Skul Gileat (Stat 31:​47, 48) na ol i kirap givim skul long 100 misineri long olgeta 6-pela 6-pela mun, na salim ol i go olsem ‘ol man bilong kisim pis’ long olgeta hap. Long 1943 i gat 126,329 Witnes tasol ol i wok long ‘kisim pis’ long 54 kantri. Insait long 10-pela yia, dispela lain i go bikpela na i gat 519,982 Witnes long 143 kantri! Tru tumas, Skul Gileat i lainim ol man na meri long mekim gut wok bilong ‘kisim pis’ na ol i no pret long mekim dispela wok​—⁠ol i redi long i go long ol narapela kantri bilong kisim ol man namel long ol manmeri i gat narapela kain pasin na sindaun. Long dispela rot planti tausen manmeri i gat gutpela bel ol i harim tok na ol i bilip. Ol dispela misineri na ol Witnes bilong ol kantri ol i go long en, ol i bin wok gut wantaim na wok bilong ol i karim gutpela kaikai​—⁠nau planti planti manmeri i kam insait na lain bilong Jehova i go bikpela.

8, 9. (a) Yumi ken stori long husat ol i bin mekim gutpela wok misineri? (b) Olsem wanem ol misineri i bin lukim lain i go bikpela long ol hap ol i autim tok long en? (Lukim tu 1992 Yearbook of Jehovah’s Witnesses.)

⁸ Planti misineri bilong Skul Gileat long pastaim tru ol i wok yet long ol longwe ples ol i bin go long en, maski nau ol i winim pinis 70 o 80 krismas. Tupela gutpela lapun misineri olsem em Erik Briten (Eric Britten) i winim 82 krismas, na meri bilong em Kristina (Christina). Tupela i bin insait long namba 15 klas bilong Skul Gileat long 1950, na tupela i wok yet long Brasil. Taim ol i go long Brasil long pastaim bilong mekim wok misineri, lain Witnes long dispela kantri i no winim 3,000. Tasol nau planti Witnes moa yet i stap, winim 300,000! Tru tumas, long Brasil ‘lain i liklik i bin kamap planti,’ na wok bilong ‘kisim pis’ i bin kamap gutpela.​—⁠Aisaia 60:⁠22.

⁹ Na olsem wanem long ol misineri long Afrika? Planti ol i bin lain long i stap gut wantaim ol manmeri bilong dispela hap, maski pasin samting bilong ol i narapela kain, na ol i laikim ol tru. Fopela gutpela misineri olsem em tupela brata wanblut, Jon na Erik Kuk (John na Eric Cooke) wantaim meri bilong tupela, em Katlin na Metel (Kathleen na Myrtle), nau ol i mekim wok long Saut Afrika. Jon tupela Erik i bin insait long namba 8 klas bilong Skul Gileat na ol i winim skul long 1947. Sampela kantri Jon o Erik i bin mekim wok misineri long en em Angola, na Simbabwe, na Mosambik, na Saut Afrika. Sampela misineri i go long Afrika ol i bin dai, long wanem, sik i painim ol, o i gat pait, o ol man i bin mekim nogut long ol. Sampela olsem em Alan Bate na Arte Losen (Alan Battey na Arthur Lawson), em tupela i dai long taim pait i kamap long Laibiria i no longtaim i go pinis na ol lain bilong Laibiria yet i bin pait. Tasol ol dispela misineri i bin kisim planti ‘pis’ long Afrika. Long nau, long olgeta hap bilong Afrika, i gat planti Witnes tru i stap, winim 400,000.

Olgeta i Insait

10. Wanem samting i kirapim ol painia long mekim wok? Ol painia i wok strong olsem wanem na ol i mekim gutpela wok?

¹⁰ Tasol yumi mas save, ol misineri bilong ol narapela kantri ol i liklik lain tasol, inap sampela tausen, tasol ol pablisa na painiab bilong kantri yet ol i bikpela lain, inap sampela milion. Ol dispela pablisa na painia i mekim bikpela hap wok bilong autim tok. Long 1991 i gat inap olsem 550,000 painia na wasman bilong raun. Em planti tru, na olgeta dispela gutpela Witnes i wok strong insait long bikpela wok bilong ‘kisim pis’​—⁠yumi inap pilim gut dispela samting taim yumi tingim bikpela wok ol i mekim long autim tok, em ol i save lusim 60 i go inap 140 aua long autim tok long olgeta mun. Planti ol i bin lusim planti samting bilong ol yet na lusim bikpela mani samting bilong ol yet bambai ol inap mekim dispela wok. Wanem samting i kirapim ol long mekim? Ol i givim bel olgeta na tingting na laip na strong olgeta bilong ol long God bilong ol, em Jehova, na ol i save laikim ol narapela man olsem ol i laikim ol yet.​—⁠Matyu 22:​37-39.

11. I gat wanem samting tru i kamapim klia olsem spirit bilong Jehova i wok strong insait long lain bilong em?

¹¹ Na olsem wanem long ol narapela Witnes i no mekim wok painia, em ol inap olsem 3 milion 500 tausen na ol tu i givim bel olgeta long mekim wok bilong Jehova inap tru long skel bilong ol? Sampela ol i meri marit na ol i gat ol liklik pikinini ol i mas lukautim, tasol ol tu i insait long dispela wok bilong ‘kisim pis’ long olgeta hap bilong graun​—⁠maski ol i no gat bikpela hap taim bilong mekim dispela wok, ol i save lusim hap taim bilong ol long mekim. Na planti ol i man marit na ol i wok mani long olgeta de bilong wok, tasol ol i save makim hap taim long Sarere Sande o long apinun bilong lainim ol man ol i no save long ol long tok i tru. Na i gat bikpela lain singel, ol man na meri, na ol yangpela, em ol tu i insait long dispela wok. Ol i save autim tok na mekim gutpela pasin tu na dispela i litimapim nem bilong God. Wanem narapela lain bilong lotu i wankain olsem dispela lain i gat 4 milion manmeri long en ol i save wok strong long olgeta mun long autim gutpela tok bilong Kingdom bilong God na ol i no save kisim pe? Dispela samting i kamapim klia olsem spirit bilong Jehova i wok strong insait long lain bilong em!​—⁠Buk Song 68:11; Aposel 2:​16-18; lukim tu Sekaraia 4:⁠6.

Sampela Samting i Mekim na Lain i Go Bikpela

12. Wanem samting i kirapim tingting bilong ol man na pulim ol i kam? Hamas hamas ol i wok long kam insait?

¹² Ol gutpela samting tru i kamap long dispela bikpela wok bilong autim tok long olgeta hap na yumi kirap nogut long en. Long 1991 planti nupela Witnes, winim 300,000, ol i bin kisim baptais long wara. Em inap olsem 3,000 nupela kongrigesen i gat wan handet wan handet Witnes long en! Dispela gutpela samting i bin kamap olsem wanem? Yumi mas tingim tok bilong Jisas, em i tok: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en . . . Tok i stap long buk bilong ol profet olsem, ‘God bai i skulim olgeta manmeri.’ Orait olgeta manmeri i harim tok bilong Papa na i kisim save long em, ol i save kam long mi.” Olsem na i no long rot bilong wok bilong ol man na ol dispela ‘pis’ i kam. Nogat. Jehova i save skelim bel bilong ol man na taim em i lukim man i gat gutpela bel, em i save kirapim tingting bilong dispela man na pulim em i kam long em.​—⁠Jon 6:​44, 45; Matyu 10:​11-13; Aposel 13:⁠48.

13, 14. Planti Witnes i gat wanem gutpela tingting?

¹³ Tasol Jehova i givim wok long ol man bilong ‘kisim pis,’ na long rot bilong ol Jehova i pulim ol man i kam long em. Olsem na tingting bilong ol dispela man long ol manmeri na long hap ol i wok long ‘kisim pis’ long en em bikpela samting. Yumi amamas, long wanem, planti ol i bin givim bel long bihainim tok bilong Pol, em i tok: “Yumi no ken les long mekim gutpela pasin. Sapos yumi no slek long mekim wok, orait long taim bilong kisim kaikai yumi bai kisim gutpela kaikai tru.”​—⁠Galesia 6:⁠9.

¹⁴ Planti gutpela Witnes ol i bin autim tok inap planti yia pinis, na ol i wok long skelim gut ol samting i kamap long graun. Ol i bin lukim gavman bilong Hitler, na bilong Mussolini, na bilong ol narapela hatpela bos, i kamap strong na bihain i bagarap. Sampela i bin lukim ol planti bikpela pait i bin kamap long graun kirap long yia 1914 na i kam inap long nau. Ol i bin lukim ol hetman bilong graun i bilip na wetim Lig ov Nesen na bihain Yunaitet Nesen i kamapim gutaim. Ol i bin lukim ol gavman long planti kantri i tambuim wok bilong Jehova, na bihain ol i orait long en. Ol dispela samting i bin kamap, tasol ol Witnes Bilong Jehova i no bin les long mekim gutpela pasin​—⁠ol i no bin slek long mekim wok bilong kisim ol man. Ol i bin stap strong tru long bilip!​—⁠Matyu 24:13.

15. (a) Wanem ol samting i bin helpim yumi long autim tok long ol kain kain man long teritori bilong yumi? (b) Ol dispela buk samting i bin helpim yu olsem wanem long hap yu autim tok long en?

¹⁵ I gat sampela samting moa i mekim na lain bilong Jehova i wok long i go bikpela long olgeta hap. Wanpela samting em olsem: Ol Witnes Bilong Jehova i bin lain long helpim ol kain kain man ol i bungim long taim ol i autim tok. Ol man bilong narapela narapela lain na lotu na tok ples ol i bin lusim ples bilong ol na i go sindaun long ol narapela kantri, na ol Witnes Bilong Jehova i bin wok long kisim save long tingting bilong ol dispela kain kain man i stap long teritori bilong ol. Ol Witnes long olgeta hap i bin helpim gut dispela wok, long wanem, ol i bin redim ol Baibel na ol buk na nius samting bilong Baibel long planti tok ples, winim 200. Ol i bin tanim olgeta tok o hap tok bilong Baibel New World Translation long 13 tok ples, long tok Sek na tok Slovak tu. Buklet Stap Amamas Oltaim Long Graun! em ol i bin wokim 62 milion long 195 tok ples bilong ol man long ol kantri i stap longwe longwe. Buk Nambawan Man Tru i Winim Olgeta Narapela Man, em ol i tanim pinis long 59 tok ples, na i gat wanpela buk (Mankind’s Search for God) ol i bin tanim long 30 tok ples na dispela buk i stori long bilip bilong ol man bilong ol bikpela lotu bilong graun na as bilong en, na dispela buk i helpim tru wok bilong kisim ol man long olgeta hap.

16. Sampela i bin mekim wanem bilong helpim ol man long ol narapela kantri?

¹⁶ Wanem samting moa i bin helpim wok bilong kisim ol man long olgeta hap? Narapela samting em olsem: Planti tausen Witnes i bin bihainim pasin bilong Pol, em i harim singaut bilong ‘man bilong Masedonia’ na em i amamas long lusim Esia Maina na i go long hap bilong Yurop bilong helpim ol Masedonia. Ol dispela Witnes i bin i go long ol narapela kantri i sot long ol man bilong autim tok bilong Kingdom, na i sot long ol elda na wokman bilong kongrigesen tu. Ol dispela Witnes i kain olsem ol man bilong kisim pis ol i stap long wanpela hap i gat planti man bilong kisim pis na ol i raun planti taim long ol wara bilong kisim pis, na ol dispela man i lusim dispela hap na i go long narapela hap i no gat planti bot bilong kisim pis na i gat planti pis long ol wara.​—⁠Aposel 16:​9-12; Luk 5:​4-10.

17. Stori long sampela ol i redi long lusim ples bilong ol na i go long narapela kantri bilong helpim ol man?

¹⁷ Long dispela taim nau, long sampela klas bilong Skul Gileat i gat sampela sumatin i kam long narapela narapela kantri long hap bilong Yurop. Ol i bin lain long mekim tok Inglis na ol i givim ol yet bilong i go mekim wok long ol narapela kantri namel long ol man bilong ol narapela lain na pasin. Na long rot bilong Skul Bilong Lainim Wok Bilong Lukautim Kongrigesen, ol i bin skulim gut planti brata singel inap tupela mun na bihain salim ol i go long ol narapela kantri bilong helpim ol kongrigesen na sekit. Nau rot i op bilong ‘kisim pis’ long hap bilong Isten Yurop na sampela kantri bipo yumi kolim Rasia.​—⁠Lukim Rom 15:​20, 21.

18. (a) Olsem wanem na planti painia inap mekim gut wok autim tok? (b) Olsem wanem ol inap helpim ol narapela long kongrigesen?

¹⁸ Narapela samting i helpim wok bilong kisim ol man long olgeta hap em Skul Bilong Ol Painia, em bilong ol painia oltaim. Insait long tupela wik ol i stori long olgeta tok i stap long wanpela buk, nem bilong en Stap Olsem Lait Namel Long Ol Lain Man, em ol i bin redim bilong helpim ol painia tasol. Long rot bilong dispela buk ol i lain long mekim gut wok bilong autim tok, long wanem, ol i stori long ol kain tok olsem: “Wok Strong Long Bihainim Pasin Sori,” na “Bihainim Pasin Bilong Jisas,” na “Wok Long Kamap Gutpela Tisa.” Olgeta kongrigesen i save amamas long ol dispela lain i save gut long wok bilong i go long olgeta haus na kisim ol man, na ol inap lainim planti moa insait long ol kongrigesen long mekim dispela bikpela wok bilong ‘kisim pis’!​—⁠Matyu 5:​14-16; Filipai 2:15; 2 Timoti 2:​1, 2.

Inap Yumi Mekim Gutpela Moa?

19. Olsem wanem yumi ken lain long mekim gut wok bilong autim tok, olsem Pol i bin mekim?

¹⁹ Olsem Pol, yumi tu yumi mas tingting long bihain na long gutpela samting inap kamap. (Filipai 3:​13, 14) Pol i lain long autim tok long olgeta kain kain man, na long kain kain taim na ples. Em i save gut long kamapim ol tok em ol man i harim inap wanbel long en, na em i save tingim pasin na tingting bilong ol man long ples em i autim tok long en, na long dispela as em inap toktok gut wantaim ol. Yumi inap kirapim planti Baibel-stadi sapos yumi pilim gut tingting bilong man bilong haus long tok bilong Kingdom, na yumi kamapim ol tok i stret long em. Yumi gat ol kain kain buk samting bilong helpim ol man long lainim tok bilong Baibel, olsem na yumi ken tokim man long kisim buk i stret long em. Sapos yumi lain long pilim gut tingting bilong ol man, na yumi redi long kamapim kain kain tok bilong helpim ol kain kain man, dispela tupela samting tu i bikpela samting bilong helpim wok i kamap gutpela, na bai yumi kisim planti ‘pis.’​—⁠Aposel 17:​1-4, 22-28, 34; 1 Korin 9:​19-23.

20. (a) Wok bilong yumi long ‘kisim pis,’ bilong wanem dispela i bikpela samting long nau? (b) Yumi olgeta wan wan i gat wanem wok long nau?

²⁰ Dispela wok bilong kisim ol man long olgeta hap, bilong wanem em i bikpela samting long nau? Long wanem, ol samting i bin kamap na nau i kamap olsem tok profet bilong Baibel i makim, dispela i kamapim klia olsem bikpela bagarap tru i laik painim ol lain bilong Satan hia long graun. Olsem na yumi ol Witnes Bilong Jehova i mas mekim wanem? Tripela bikpela tok bilong stadi long dispela Wastaua i kamapim klia wok bilong yumi​—⁠yumi mas wok strong long kisim ol man long hap yumi stap long en. Strongpela tok promis i stap long Baibel olsem Jehova i no ken lusim tingting long ol wok bilong ‘kisim pis’ em yumi wok strong long mekim. Pol i tok: “God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God, na dispela i bin kirapim yupela long helpim ol manmeri bilong em. Na yupela i save mekim olsem yet. Na mipela i laikim tumas bai yupela olgeta i mas wok strong olsem tasol, na holimpas bilip bilong yupela, na wetim dispela taim God i makim bilong mekim gut long yumi.”​—⁠Hibru 6:​10-12.

[Ol Futnot]

Yu Tingim?

◻ Bilong wanem ol Witnes Bilong Jehova i ting i stret ol i mas mekim wok bilong ‘kisim pis’ long olgeta hap bilong graun?

◻ Olsem wanem Skul Gileat bilong lainim ol misineri i bin helpim wok bilong ‘kisim pis’?

◻ Wanem sampela samting i bin mekim na wok bilong ol Witnes Bilong Jehova i kamap gutpela?

◻ Yumi wan wan i ken mekim wanem na bai yumi inap mekim gutpela moa wok Kristen bilong yumi long autim tok?

[Sat long pes 24]

OL SAMTING I KAMAP LONG WOK BILONG KISIM OL MAN

Yia Ol Kantri Ol Witnes

1939 61 71,509

1943 54 126,329

1953 143 519,982

1973 208 1,758,429

1983 205 2,652,323

1991 211 4,278,820[7]

[Piksa long pes 25]

Ol i mekim yet wok autim tok namel long ol man bilong kisim pis long Raunwara Galili