Olsem Wanem Yu Insait Long Tok Piksa Bilong Umben na Pis?
“God i larim yupela i save pinis long as bilong tok hait bilong kingdom bilong heven.”—MATYU 13:11.
1, 2. I gat wanem samting na ating bai yumi gat laik long save long ol tok piksa bilong Jisas?
YU SAVE amamas taim yu save long wanpela tok hait o yu kisim save long as bilong wanpela tok bokis? Sapos dispela save i helpim yu long save gut long ol samting God i laik bai yu mekim, em gutpela, a? Wanpela tok piksa bilong Jisas i ken givim kain save olsem long yu. Planti long lain i bin harim Jisas i mekim dispela tok piksa, na planti man bihain long dispela taim, ol i longlong long dispela tok, tasol yu inap save long as bilong en.
2 Tingim tok bilong Jisas long Matyu sapta 13 long pasin bilong em long mekim ol tok piksa. Ol disaipel i askim em: “Bilong wanem yu save mekim tok piksa long ol manmeri?” (Matyu 13:10) Tru ya, bilong wanem Jisas i mekim ol tok hait, olsem ol tok piksa, em planti man i no ken save long as bilong en? Long ves 11 i go 13 Jisas i bekim tok long ol disaipel olsem: “God i larim yupela i save pinis long as bilong tok hait bilong kingdom bilong heven. Tasol em i no soim long ol dispela manmeri. . . . Long dispela as tasol mi save mekim tok piksa long ol. Ai bilong ol i lukluk, tasol ol i no lukim wanpela samting. Ol i putim yau, tasol ol i no harim tok na kisim save.”
3. Sapos yumi save long insait bilong ol tok piksa bilong Jisas, dispela inap helpim yumi olsem wanem?
3 Na nau Jisas i kamapim tok bilong Aisaia 6:9, 10, em i toktok long ol man i yaupas na aipas long ol samting bilong spirit. Tasol yumi no ken stap olsem. Sapos yumi kisim save long as bilong ol tok piksa bilong Jisas na yumi mekim ol samting ol dispela tok piksa i makim bilong yumi, orait bai yumi inap i stap amamas long nau na i go inap long olgeta taim bihain. Jisas i mekim gutpela tok promis olsem: “Yupela i ken amamas. Ai bilong yupela i save lukim ol samting. Na yau bilong yupela i save harim tok.” (Matyu 13:16) Dispela tok i stret long olgeta tok piksa bilong Jisas, tasol long nau yumi ken tingim dispela sotpela tok piksa long umben na pis olsem i stap long Matyu 13:47-50.
Wanpela Tok Piksa i Makim Bikpela Samting
4. Jisas i mekim wanem tok piksa, olsem Baibel i kolim long Matyu 13:47-50?
4 Jisas i tok: “Kingdom bilong heven em i olsem wanpela umben ol i tromoi i go daun long raunwara, na i kisim ol kain kain pis. Umben i pulap, orait ol i pulim i kam sua. Na ol i sindaun na bungim ol gutpela gutpela pis long sampela dis. Tasol ol pis nogut ol i tromoi. Long las de bilong dispela graun bai i olsem tasol. Ol ensel bai i kam na kisim ol man nogut i stap namel long ol stretpela man. Na ol bai i tromoi ol i go long bikpela paia. Long dispela paia ol bai i krai nogut na skrapim tit bilong ol.”
5. I gat wanem ol askim long insait bilong dispela tok piksa long umben?
5 Ating yu bin lukim ol man i tromoi umben bilong kisim pis, o ating yu bin lukim long piksa long televisen samting, olsem na i no hatwok long yu tingim stori bilong dispela tok piksa. Tasol olsem wanem long ol liklik hap bilong en na insait bilong en? Olsem: Jisas i tok, dispela tok piksa i stori long “kingdom bilong heven.” Tasol taim em i tok, Kingdom i olsem umben i kisim “ol kain kain pis,” em i no laik makim olsem i gat “ol kain kain” man bai stap insait long Kingdom, olsem ol gutpela man wantaim man nogut, a? Na tu, husat bai mekim dispela wok bilong kisim pis? Olsem wanem? Dispela wok bilong kisim na tilim ol pis i bin kamap long taim bilong Jisas, o ating em i mas kamap long taim bilong yumi tasol, olsem long taim bilong “las de bilong dispela graun”? Na olsem wanem long yu? Sampela samting bilong dispela tok piksa i makim yu tu? Yu ken mekim wanem na bai yu no insait long dispela lain ol bai i krai nogut na skrapim tit bilong ol?
6. (a) Bilong wanem yumi mas i gat bikpela laik long save long insait bilong tok piksa bilong umben? (b) Wanem samting inap helpim yumi long save long insait bilong en?
6 Ol kain askim olsem i kamapim klia olsem i hatwok liklik long save long insait bilong dispela tok piksa. Tasol yu no ken lusim tingting olsem Jisas i bin tok: “Yupela i ken amamas. Ai bilong yupela i save lukim ol samting. Na yau bilong yupela i save harim tok.” Orait, nau yumi ken wok long kisim save long insait bilong dispela tok piksa bambai yumi no ken i stap olsem yaupas o aipas—yumi ken pilim tru insait bilong en. Yumi kisim save pinis long wanpela bikpela samting bilong helpim yumi long save long insait bilong dispela tok piksa. Stori i kamap paslain long dispela stori i bin toktok long Jisas i singautim sampela man bilong Galili, em ol i man bilong kisim pis, na ol i lusim dispela wok bilong ol na kirap mekim wanpela wok i kain olsem wok bilong kisim pis—em wok bilong “kisim ol manmeri.” (Mak 1:17) Jisas i tokim ol: “Bihain bai yu wok long kisim ol manmeri i kam long mi.”—Luk 5:10.
7. Jisas i tok piksa long pis i makim wanem samting?
7 Olsem na long dispela tok piksa, ol pis i makim ol man. Na taim ves 49 i toktok long tilim ol pis nogut na ol gutpela pis i go narapela narapela, i no toktok long ol pis tru—em i toktok long ol man nogut na ol gutpela man. Na ves 50 tu i no stori long ol pis tru—em i stori long ol man ol bai krai na skrapim tit bilong ol. Olsem na dispela tok piksa i makim wok bilong bungim ol manmeri na bihain tilim ol i go tupela lain. Dispela wok em bikpela samting tru, olsem ol samting i painim dispela tupela lain i kamapim.
8. (a) Wanem samting bai painim ol pis nogut? (b) Tok bilong Jisas long ol samting bai painim ol pis nogut i givim wanem save long yumi long Kingdom?
8 Jisas i tok, ol bai tromoi ol pis nogut, olsem ol man nogut, i go long paia na ol bai skrapim tit bilong ol. Long narapela tok piksa Jisas i tok, dispela i makim olsem ol i stap ausait long Kingdom. (Matyu 8:12; 13:41, 42) Na long Matyu 5:22 na Matyu 18:9 em i toktok long “paia,” na dispela i makim bagarap, olsem man i bagarap na pinis olgeta. Olsem na yumi mas save gut long insait bilong dispela tok piksa na bai yumi ken kirap mekim sampela samting, nogut yumi stap ausait long Kingdom o yumi bagarap, a? Yumi olgeta yumi save, man nogut i no ken stap insait long Kingdom bilong God—long nau na long bihain tu, nogat. Olsem na taim Jisas i tok, “kingdom bilong heven em i olsem wanpela umben,” dispela tok bilong em i givim save long yumi olsem, long ol samting bilong Kingdom bilong God i gat wanpela samting i olsem umben ol i tromoi i go daun insait long wara bilong kisim kain kain pis.
9. Olsem wanem ol ensel i insait long tok piksa bilong umben?
9 Taim umben i go daun long wara na i kisim pinis ol pis, nau em taim bilong skelim ol na tilim ol i go narapela narapela. Husat ol bai insait long dispela wok, olsem Jisas i tok? Matyu 13:49 i tok, ol dispela man bilong kisim na tilim ol pis em ol ensel. Olsem na Jisas i stori olsem ol ensel bai bosim wanpela samting i stap long graun em bilong skelim ol man—husat inap long i stap long Kingdom bilong heven, na husat i no inap.
Kisim Ol Pis—Long Wanem Taim?
10. Yumi ken tingim wanem ol samting na bai yumi save, wok bilong kisim pis i bin i stap longpela taim?
10 Tok bilong ol ves klostu i helpim yumi long save long taim bilong truim bilong dispela tok piksa. Paslain liklik long taim Jisas i mekim dispela tok piksa, em i bin mekim narapela tok piksa long man i tromoi gutpela pikinini wit long gaden, na bihain birua i tromoi pikinini bilong gras nogut long dispela gaden, na gaden i makim dispela graun. Na long Matyu 13:38 Jisas i tok, gutpela pikinini wit i makim “ol manmeri bilong kingdom,” na gras nogut i makim “ol manmeri bilong Satan.” Tupela lain i mas kamap wantaim insait long planti handet yia i go inap long las de, em taim bilong kisim ol kaikai bilong gaden, na nau ol i tilim pikinini wit i go narapela na gras nogut i go narapela, na ol i kukim gras nogut long paia. Orait, sapos yumi skelim tupela tok piksa wantaim yumi ken save, umben i mas wok long kisim ol man inap longpela taim.—Matyu 13:36-43.
11. Olsem wanem wanpela wok bilong kisim pis long olgeta hap i bin kirap long taim bilong ol aposel?
11 Na dispela tok piksa bilong Jisas i tok, umben i kisim olgeta kain pis, maski em gutpela pis o pis nogut. Taim ol aposel i stap yet, ol ensel i bosim wok bilong kisim ol pis na ol i mekim wok long oganaisesen Kristen bilong God long kisim ol “pis,” em ol manmeri i bin kamap Kristen na God i bin makim ol long spirit holi. Yumi ken tok, paslain long de Pentikos long yia 33 wok bilong Jisas long kisim ol man i bin kamapim 120 disaipel. (Aposel 1:15) Tasol taim God i kapsaitim spirit holi long ol Kristen na ol i kamap lain bilong em, nau wok bilong kisim ol pis long dispela samting i olsem “umben” i kirap tru, na ol i kisim planti tausen gutpela “pis.” Kirap long yia 36, dispela wok bilong kisim ol man i go nabaut long ol narapela hap, na ol man bilong ol narapela lain i kam insait long lotu Kristen—ol tu i kam insait long lain bilong Krais em God i makim long spirit holi.—Aposel 10:1, 2, 23-48.
12. Taim ol aposel i dai pinis, wanem samting i bin kamap?
12 Ol aposel i dai pinis na insait long ol handet handet yia bihain, i gat sampela ol gutpela Kristen i bin stap, na ol i bin wok strong long painim tok i tru bilong God na holimpas. God i orait long sampela bilong ol na makim ol long spirit holi. Tasol taim ol aposel i dai pinis, i no gat samting moa bilong pasim rot, na ol tok giaman i kam insait long lotu Kristen na ol Kristen giaman i wok long kamap. (2 Tesalonaika 2:7, 8) Em nau, wanpela oganaisesen i kamap, em ol i giaman na tok ol i lain bilong God, olsem lain holi, na spirit bilong God i makim ol bilong mekim wok king wantaim Jisas.
13. Olsem wanem yumi ken tok, ol misin i holim nating nem Kristen i bin mekim hap wok insait long wok bilong kisim ol pis long umben?
13 Ol dispela lain i giaman na tok ol i Kristen, yu ting ol i gat hap wok insait long dispela tok piksa bilong umben? I gat as na yumi ken tok, ol i gat hap wok insait long en. Ol misin i holim nating nem Kristen ol i hap bilong dispela samting em umben i makim. Tru, inap planti handet yia Misin Katolik i bin pasim Baibel na bai ol man nating i no ken kisim. Tasol sampela man bilong ol dispela misin ol i bin mekim bikpela wok long tanim tok bilong Baibel i go long ol narapela tok ples, na wokim planti Baibel na tilim long ol man. Ol dispela misin i bin kamapim o helpim ol sosaiti i mekim wok bilong tanim Baibel i go long ol kain kain tok ples bilong ol longwe longwe ples. Na ol i bin salim ol dokta na tisa, olsem ol misineri, i go long ol kantri na ol dispela misineri i bin kamapim planti planti skin Kristen. Ol dispela wok bilong ol dispela misin i bin bungim planti pis nogut, em God i no orait long ol. Tasol long dispela rot planti lain i no Kristen ol i bin harim sampela hap tok bilong Baibel na ol i bin kisim save long hap pasin bilong lotu Kristen, maski i no lotu Kristen tru.
14. Sampela wok ol misin i holim nating nem Kristen i bin mekim, olsem wanem dispela i bin helpim wok bilong kisim ol gutpela pis?
14 Tasol long ol dispela taim i gat sampela ol i bin holimpas tok bilong Baibel, na maski ol i stap nabaut, ol i bin wok strong long mekim wok bilong God inap long strong bilong ol. Olgeta dispela man, maski ol i stap long wanem wanem taim, ol i stap olsem lain tru bilong God long graun, em God i makim ol long spirit holi. Na yumi ken save, ol i bin wok long kisim ol pis, olsem kisim ol man, na planti man ol i kisim, em God i mas orait long ol, olsem ‘gutpela pis,’ na makim ol long spirit holi. (Rom 8:14-17) Ol dispela gutpela man i tok ol i Kristen ol inap autim tok tru bilong Baibel long planti man i bin kamap skin Kristen, o ol i bin kisim hap save tasol bilong Baibel long rot bilong ol Baibel em ol dispela sosaiti bilong ol misin i bin tanim long tok ples bilong ol. Tru tumas, wok bilong kisim ol pis i go yet, maski planti pis ol misin i kisim i olsem pis nogut long ai bilong God.
15. Umben long dispela tok piksa i makim wanem samting tru?
15 Olsem na umben i makim ol manmeri i tok ol i lain bilong God, em ol i gat wok long kisim pis. Sampela em ol lain i holim nating nem Kristen, na sampela em ol Kristen tru God i bin makim ol long spirit holi na ol i bin kisim ol gutpela pis i kam inap long nau na ol ensel i bosim dispela wok bilong ol, olsem Matyu 13:49 i tok.
Taim Bilong Yumi Em Bikpela Taim Tru
16, 17. Olsem wanem dispela taim nau i bikpela samting long truim bilong tok piksa bilong Jisas long umben?
16 Orait, nau yumi ken tingim taim bilong mekim dispela wok. Inap planti handet yia umben i bin kisim ol gutpela pis wantaim ol pis nogut, na bihain em taim bilong ol ensel i mas mekim bikpela wok bilong ol long skelim ol dispela pis na tilim i go narapela narapela. Dispela wok i mas kamap long wanem taim? Ves 49 i tok, ol ensel i mas mekim dispela wok “long las de.” Dispela tok i wankain olsem tok piksa bilong Jisas long ol sipsip na meme, em i tok: “Taim Pikinini Bilong Man i kam bek olsem king wantaim olgeta ensel, orait em bai i sindaun long sia king bilong en. Na olgeta lain manmeri bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap.”—Matyu 25:31, 32.
17 Em nau, olsem Matyu 13:47-50 i tok, i gat wanpela bikpela wok bilong skelim ol man, na ol ensel i bosim, na dispela wok i bin kirap long yia 1914, em ‘taim bilong las de’ i bin kirap long dispela yia. Dispela wok i kamap ples klia long yia 1919 long taim lain remnan i lusim kalabus bilong spirit ol i bin stap long en inap liklik taim, na ol i kamap olsem gutpela samting moa bilong mekim wok long en bilong kisim ol pis.
18. Olsem wanem ol i bin putim ol gutpela pis long ol dis?
18 Na wanem samting bai painim ol gutpela pis? Ves 48 i tok, ol ensel bai bungim ol “long sampela dis. Tasol ol pis nogut ol i tromoi.” Ol dis i samting bilong lukautim ol pis na ol i putim ol gutpela pis long en. Ol i bin mekim olsem long taim bilong yumi o nogat? Ol i bin mekim. Ol i save putim ol gutpela man long ol kongrigesen bilong ol Kristen tru. Ol dispela kongrigesen i olsem dis na ol i bin helpim na lukautim gut ol pis bambai ol i ken mekim wok bilong God, a? Em nau, yumi bin stori long ol samting bilong dispela tok piksa na ol samting em i makim, tasol ating sampela bai tok, ‘Em gutpela, tasol dispela i mekim wanem long i stap bilong mi yet long nau na long bihain?’
19, 20. (a) Bilong wanem i bikpela samting long nau long yumi mas save long insait bilong dispela tok piksa? (b) Wanem bikpela wok bilong kisim ol pis i bin kirap long yia 1919?
19 Truim bilong ol samting dispela tok piksa i makim i bin wok long kamap insait long ol handet handet yia kirap long taim bilong ol aposel na i kam inap long yia 1914, tasol i no bilong dispela hap taim tasol. Insait long dispela hap taim, dispela “umben” i bin bungim ol manmeri i tok ol i Kristen, em ol Kristen giaman na ol Kristen tru. Tru tumas, “umben” i bin bungim ol pis nogut wantaim gutpela pis. Tasol dispela wok i no pinis long yia 1914. Na long 1919 ol ensel i no pinis long skelim ol man i go tupela lain. Nogat. Long sampela samting dispela tok piksa long umben i makim ol samting i kamap inap long nau. Yumi insait long dispela, na ol samting i laik painim yumi klostu nau, em tu i insait long dispela. Olsem na i bikpela samting tru long yumi mas save olsem wanem na bilong wanem i olsem, na bai Jisas i ken tokim yumi: “Yupela i ken amamas. Ai bilong yupela i save lukim ol samting. Na yau bilong yupela i save harim tok.”—Matyu 13:16.
20 Ating yu save, bihain long 1919 lain remnan i bin kirap long wok strong wantaim ol ensel long wok bilong autim tok. Ol ensel i mekim wok yet long dispela “umben” long kisim ol pis na pulim i kam long nambis na putim ol gutpela pis i go long narapela hap na ol pis nogut i go long narapela hap. Sapos yumi skelim hamas ol i bin kam insait bihain long 1919, yumi ken save, long rot bilong “umben” ol ensel i bin wok yet long kisim ol gutpela pis bilong God i ken makim ol long spirit holi na inapim lain 144,000. (Kamapim Tok Hait 7:1-4) Tasol long 1935 samting wok bilong kisim dispela lain i olsem inap pinis. Orait, olsem wanem? I olsem lain remnan i mas lusim wok bilong umben long kisim pis, na sindaun nating, na wet tasol long kisim prais bilong ol long heven? Nogat tru!
Wok Bilong Yu Insait Long Wok Bilong Kisim Pis
21. Wanem narapela wok bilong kisim ol pis i bin kamap long taim bilong yumi? (Luk 23:43)
21 Bikpela hap stori bilong tok piksa bilong Jisas long umben i stori long wok bilong kisim ol gutpela pis ol bai kisim prais bilong i stap long Kingdom long heven. Dispela tok piksa i stori long wok bilong kisim pis, tasol i gat narapela wok bilong kisim pis, olsem bilong kisim ol man, i kamap bikpela tru long olgeta hap, olsem stori i kamap paslain long dispela stori long Wastaua i bin makim. Dispela wok bilong kisim pis i no bilong kisim ol gutpela pis bilong i stap long Kingdom long heven, olsem Jisas i tok piksa long en. Nogat. Dispela wok bilong kisim pis em bilong kisim ol manmeri na bai ol i ken tingting long i stap long paradais long graun.—Kamapim Tok Hait 7:9, 10; lukim tu Matyu 25:31-46.
22. Wanem gutpela samting inap painim yumi long bihain? Tasol sapos nogat, orait wanem samting inap painim yumi?
22 Sapos yu gat dispela tingting long i stap oltaim long paradais long graun, yu ken amamas long Jehova i bin larim wanpela wok bilong kisim pis i stap inap long nau. Long dispela rot gutpela samting inap painim yu long bihain. Inap painim yu? Tru tumas, i stret yumi ken tok olsem, long wanem, sapos yu stap gut long Man i bosim dispela wok bilong kisim pis, gutpela samting inap painim yu. (Sefanaia 2:3) Long tok piksa bilong Jisas, umben i kisim planti pis, tasol gutpela samting i painim sampela tasol, i no olgeta. Yu tingim? Jisas i tok, ol ensel bai tekewe ol pis nogut long ol gutpela pis. Na wanem samting bai painim ol? Long Matyu 13:50, Jisas i stori long samting nogut bai painim ol pis nogut i no inap long Kingdom bilong God. Jisas i tok, ol ensel “bai i tromoi ol i go long bikpela paia,” na dispela i makim bagarap bai painim ol—bai ol i lus olgeta.—Kamapim Tok Hait 21:8.
23. I gat wanem samting na wok bilong kisim ol pis i bikpela samting long nau?
23 Tasol ol gutpela pis bilong i stap long Kingdom long heven, na ol narapela pis ol inap i stap oltaim long graun, gutpela samting tru bai painim ol long bihain. Olsem na i gat gutpela as na ol ensel i wok strong long nau bambai wok bilong kisim ol pis long olgeta hap bilong graun i ken kamap gutpela. Na ol i kisim planti planti pis tru! I stret yumi ken tok, dispela tu i olsem mirakel, wankain olsem ol dispela bikpela lain pis ol aposel i bin kisim taim Jisas i bin tokim ol long putim umben bilong ol i go daun!
24. Yumi mas i gat wanem laik long dispela wok i olsem wok bilong kisim ol pis?
24 Olsem wanem long yu? Yu wok strong tru insait long dispela wok bilong ‘kisim pis’ em bilong helpim ol manmeri long kisim laip? Maski yumi bin mekim bikpela wok o liklik wok i kam inap long nau, gutpela sapos yumi olgeta wan wan i ken save long ol gutpela samting dispela wok i kamapim long olgeta hap long nau. Sapos yumi save long dispela samting, em bai kirapim yumi long givim bel moa yet long putim ol umben i go daun long wara bilong kisim ol pis i laik kam insait nau!—Skelim Matyu 13:23 na 1 Tesalonaika 4:1.
Yu Tingim Ol Dispela Tok?
◻ Long tok piksa bilong Jisas long umben, tupela kain pis i makim wanem samting?
◻ Olsem wanem ol misin i holim nating nem Kristen i bin mekim hap wok insait long wok bilong umben?
◻ Wok bilong kisim pis nau long taim bilong yumi, bilong wanem i bikpela samting tru?
◻ Tok piksa bilong umben i mas kirapim yumi wan wan long skelim yumi yet olsem wanem?
[Piksa long pes 18]
Insait long planti handet yia ol man i bin kisim pis long Raunwara Galili
[Kredit Lain]
Pictorial Archive (Near Eastern History) Est.