I Stap na Wok Bilong Jisas

Ol i Kisim Sampela Save Moa

OL DISAIPEL i kisim save pinis long insait bilong tok piksa bilong man i planim kaikai. Tasol ol i laik kisim sampela save moa. Ol i tokim Jisas, “Yu skulim mipela long as bilong dispela tok piksa bilong gras nogut i kamap long gaden.”

Pasin bilong ol i narapela kain tru long bikpela lain manmeri i stap long nambis! Bel bilong Ol dispela manmeri i no kirapim ol long kisim save long as bilong ol dispela tok piksa; ol i amamas long harim ol stori tasol. Jisas i lukim pasin bilong ol disaipel bilong em i narapela kain long pasin bilong ol dispela manmeri na em i tok:

“Skel yupela i save givim long ol man, dispela skel tasol bai God i bekim long yupela. Na bai em i skruim sampela moa long yupela.” Ol disaipel i laik tru long kisim sampela save moa, olsem na Jisas i skulim ol long planti samting. Bilong bekim askim bilong ol disaipel bilong em, em i tok:

“Man i tromoi gutpela pikinini kaikai, em i Pikinini Bilong Man. Na gaden em i dispela graun. Na gutpela pikinini kaikai, em ol manmeri bilong kingdom. Na gras nogut, em ol manmeri bilong Seten. Dispela birua i tromoi pikinini bilong gras nogut, em Seten. Taim bilong kisim kaikai, em las de bilong dispela graun. Ol wokman em ol ensel tasol.”

Jisas i kamapim as bilong dispela tok piksa pinis na em i stori long ol samting bai kamap. Long las de “ol wokman,” em ol ensel bilong God, bai rausim ol Kristen giaman i kain olsem gras nogut namel long “ol manmeri bilong Kingdom.” “Ol manmeri bilong Seten” bai kisim mak bilong bagarap, tasol “ol stretpela manmeri” bai lait olsem san insait long Kingdom bilong Papa bilong ol.

Jisas i givim tripela tok piksa moa long ol disaipel bilong em. Namba wan, em i tok: “Kingdom bilong heven em i olsem wanpela bokis mani ol i bin haitim long wanpela gaden. Wanpela man i painim, na em i haitim gen. Em i amamas tru, na em i go salim olgeta samting bilong en na i go baim dispela gaden.”

Orait narapela tok piksa i olsem: “Kingdom bilong heven em i olsem wanpela man bilong bisnis em i wok long painim naispela naispela bis. Em i lukim wanpela bis i gutpela tru, orait em i go salim olgeta samting bilong en na i go baim dispela gutpela bis.”

Jisas yet i olsem man i painim pinis bokis mani na bisnisman i painim pinis bis i dia tumas. Em i baim olgeta samting bilong em i go long ol man, i olsem em i lusim bikpela namba em i bin holim long heven na kamap man nating long graun. Taim em i stap man bilong graun em i karim bikpela pen na hevi, na long dispela em i soim olsem, em inap tru long kamap king long Kingdom bilong God.

Ol man i bihainim Jisas i olsem ol tu i mas baim olgeta samting bilong ol i go long ol man bambai ol inap kisim gutpela prais bilong mekim wok king wantaim Jisas o stap aninit long Kingdom bilong em hia long graun. Orait olsem wanem long yumi? Kingdom bilong God em i nambawan samting long yumi, kain olsem bis i dia tumas?

Narapela tok piksa bilong Jisas i olsem: Kingdom bilong heven em i olsem wanpela umben ol i tromoi i go daun long raunwara, na i banisim kain kain pis. Ol pis i pulap long umben, orait ol i pulim i kam antap long nambis. Na ol i sindaun na bungim ol gutpela gutpela pis long sampela basket. Tasol ol pis nogut ol i tromoi. Jisas i tok, long las de bilong dispela graun bambai i olsem tasol. Ol ensel bai i kam na tekewe ol man nogut i stap namel long ol stretpela man. Na ol man nogut bai bagarap olgeta.

Jisas yet i kirapim dispela wok bilong bungim ol man, em i olsem wok bilong kisim pis. Na em i lainim ol disaipel long “kisim man.” Ol ensel i bosim dispela wok i kam inap long nau. Nau em taim bilong pulim dispela “umben” i kam antap, em i makim ol lain i tok ol i Kristen.

Ol pis nogut bai i bagarap olgeta, tasol yumi ken amamas, long wanem yumi inap i stap olsem ‘gutpela pis.’ Yumi mas wok strong long kisim sampela save moa, olsem ol disaipel bilong Jisas i bin mekim. Sapos olsem, bai Jisas i givim sampela save moa long yumi, na bai God i givim blesing long yumi, em laip i stap oltaim.

Matyu 13:​36-52; 4:19; Mak 4:​24, 25.

◆ Olsem wanem ol disaipel i narapela kain long bikpela lain manmeri i stap long nambis?

◆ Husat i olsem man bilong planim kaikai? Gaden i makim wanem samting? Gutpela pikinini kaikai i makim wanem samting? Birua em i husat? Taim bilong kamautim kaikai i makim wanem taim? Ol wokman bilong kamautim kaikai ol i husat?

◆ Wanem tripela tok piksa moa Jisas i kamapim? Ol i lainim yumi long wanem samting?