Tok Bilong God i Gat Laip
Yu Ting Olsem Wanem long Kingdom?
SAPOS yu save i gat wanpela bokis mani ol i bin haitim long wanpela gaden, na yu save, sapos yu baim olgeta samting bilong yu i go long narapela man, bai yu inap baim dispela gaden na kisim dispela bokis mani, orait, bai yu mekim wanem?
Jisas i mekim tok piksa long dispela samting bilong soim yumi, Kingdom bilong God em i bikpela samting. Jisas i tok: “Kingdom bilong heven em i olsem wanpela bokis mani ol i bin haitim long wanpela gaden. Wanpela man i painim, na em i haitim gen. Em i amamas tru, na em i go salim olgeta samting bilong en na i go baim dispela gaden.”—Matyu 13:44.
Olsem wanem? Yu kain olsem dispela man long tok piksa? Jisas i kain olsem dispela man. Taim em i save God i laik kamapim wanpela gavman long heven—olsem “kingdom bilong heven”—em i laik tru long kisim dispela ‘bokis mani i stap hait.’ Em i laik tru long kamap King bilong dispela Kingdom, olsem na em i lusim olgeta samting bilong em. Pastaim em i stap olsem wanpela strongpela spirit long heven, tasol em i lusim dispela wok na em i kamap man nating long graun long wanpela taun i stap longwe, em Nasaret. Bihain em i karim bikpela pen long han bilong ol manmeri na ol i kisim em i dai. Em i mekim ol dispela samting na kamapim ples klia olsem i stret em i kisim wok King long Kingdom bilong God.
Olsem wanem long yu? Yu redi long lusim ol samting bambai yu ken kisim gutpela samting long bihain? Yumi mas mekim olsem, olsem na Jisas i tok: “Kingdom bilong heven em i olsem wanpela man bilong bisnis em i wok long painim naispela naispela bis. Em i lukim wanpela bis i gutpela tru, orait em i go salim olgeta samting bilong en na i go baim dispela gutpela bis.”—Matyu 13:45, 46.
Kwiktaim dispela man bilong bisnis i salim olgeta samting bilong em bambai em inap kisim dispela bis i gutpela tru. Dispela i givim bikpela hatwok long em na em i lusim olgeta samting bilong em! Tasol dispela em samting nating long ai bilong em. Em i tingting tru long kisim dispela bis na em i no laik lusim taim. Taim rot i op em i wok strong long kisim. Na i wankain tu long Kingdom. Ating bai yumi hatwok long tingim Kingdom pastaim. Tasol kisim laip long heven na wok king wantaim Krais, o kisim laip oltaim long graun aninit long Kingdom, em gutpela prais, winim olgeta narapela samting. Yu tingim gut dispela prais?
Jisas i kirapim ol wokboi bilong em long tingting tru long kisim prais. Em i makim gutpela pasin ol i ken bihainim. (1 Pita 2:21) Yumi save long tingting bilong Jisas, em i tok: “Kaikai bilong mi em i olsem: Mi bihainim laik bilong dispela em i bin salim mi na mi kam. Na mi mas pinisim wok bilong em.” (Jon 4:34) Namba wan tingting bilong Jisas, em olsem: Em i mas bihainim laik bilong God. Em i no wok long kisim ol samting ol narapela man i laik kisim. Em i tingim wanpela samting tasol—em i laik “baim dispela gaden” ol i haitim bokis mani long en, em i laik “baim dispela gutpela bis.” Olsem wanem long yu? Yu painim Kingdom bilong God pastaim? Ol samting yu mekim long olgeta de i makim olsem yu tingim Kingdom pastaim?—Matyu 6:31-33.