Kisim Pis Long Raunwara Galili

OLSEM WANEM long wok bilong ol man bilong kisim pis long raunwara Galili long taim bilong ol aposel? Bekim bilong dispela askim bai helpim yumi long kliagut long planti stori i stap long fopela Gutnius, kain olsem ol stori i kamap paslain long dispela stori.

Longpela bilong raunwara Galili em 21 kilomita na braitpela bilong en em 12 kilomita. Kirap long bipo yet dispela raunwara i pulap long pis na ol man bilong kisim pis i save kisim pis long en. Wanpela dua bilong banis bilong Jerusalem ol i kolim Dua Bilong Pis, ating long dispela hap ol i save salim pis. (Nehemia 3:3) Raunwara Galili em wanpela bilong ol wara ol i save kisim pis long en na salim long dispela ples.

Aposel Pita i bilong wanpela taun i stap klostu long raunwara Galili, ol i kolim Betsaida, mining bilong en “Haus Bilong Man Bilong Kisim Pis.” Narapela taun i stap klostu long raunwara Galili ol i kolim Magadan, o Magdala, em dispela taun Jisas i bin bringim ol disaipel bilong en i go long en bihain long em i wokabaut antap long wara. (Matyu 15:39) Wanpela man bilong raitim buk i tok, nem bilong dispela taun long tok Grik yumi inap tanim olsem “Taun We Ol i Save Draim na Solim Pis.” I gat planti hap long dispela taun we ol i save draim na solim pis​—o ol i putim long viniga samting na wokim wanpela sos long en em ol i save putim long ol sospen graun ol i kolim amphoras. Ol i save putim long boks na salim i go long olgeta hap bilong Israel na long sampela narapela kantri tu.

Wok bilong kisim, draim, solim, na salim pis, em i wanpela bikpela wok bisnis long Galili long taim bilong Jisas. Ating i luk olsem em wanpela wok i helpim planti man long dispela ples long sait bilong mani. Tasol dispela i no olsem. Wanpela saveman i tok: “Em i no wanpela bisnis we ol man yet i bosim na kisim mani long en, olsem ol man long nau i ritim Nupela Testamen i ting long en.” Em wanpela bisnis gavman i bosim na i helpim moa yet sampela bikman.

Gavman bilong Rom i makim Herot Antipas long bosim distrik Galili. Em i bosim ol rot, ol bris long ol pasis, na ol samting olsem main, bikbus, na wok bisnis bilong kisim pis. Ol dispela samting i wanpela rot Herot i save kisim takis long en. Long nau yumi no gat wanpela samting i stori long ol lo bilong takis long Galili long taim bilong ol aposel. Tasol i luk olsem pasin bilong Herot long putim ol lo bilong kisim takis i wankain long pasin bilong ol bikman Grik na pasin ol Rom i bihainim long ol arapela distrik ol i bosim long hap bilong is. Winmani i kam long ol bisnis na wok bilong kisim pis samting, planti bilong ol dispela winmani i go long ol bikman na i no long ol man nating, em ol lain i mekim dispela wok.

Hevi Bilong Baim Takis

Long taim bilong Jisas, ol gutpela hap graun long hap bilong Galili i bilong lain bilong king na ol i brukim na skelim ol dispela hap graun na Herot Antipas i givim olsem presen long ol bikman. Ol man i stap aninit long Herot ol i gat wok long givim mani bilong sapotim sindaun bilong em, na wok bilong em long sanapim ol bikpela haus, wok gavman bilong em, na ol kain kain presen em i save givim long ol pren bilong em na ol helpim em i givim long ol taun. Ol takis ol i makim long kisim long ol man nating, ol i bikpela tumas na i putim hevi long ol.

Herot i bosim tu ol raunwara. Herot na ol man em i bin givim ol hap graun long ol olsem presen, ol i bosim wok bilong kisim pis. Long ol graun em king i bosim, ol hetman bilong ol man bilong kisim takis​​—em ol maniman i bin baim rait bilong kisim takis​​—ol i gat namba long wokim kontrak wantaim ol man bilong kisim pis. Sampela man i tok olsem ofis bilong Matyu long kisim takis i stap long Kaperneam​​—em wanpela ples we ol i save kisim pis long en long raunwara Galili​​—olsem na ating em i wok aninit long ol hetman bilong ol man bilong kisim takis long hap em i stap long en.a

Ol samting ol man i bin painim 100 yia samting paslain long Krais, i soim olsem planti taim ol man long Palestain i no save givim mani bilong baim takis, ol i save givim hap bilong ol samting ol i wok bisnis long en olsem takis. Sampela man bilong kisim pis i save givim 25 i go 40 pesen bilong ol pis long ol man ol i bin wokim kontrak wantaim ol long kisim pis. Ol olpela rait i soim olsem long sampela hap em Rom i bosim, gavman i makim sampela man bilong sekim wok bilong kisim pis. Long Pisidia, i gat sampela lain em ol i save sekim ol man bilong kisim pis sapos ol i gat kontrak bilong kisim pis o nogat, na ol man bilong kisim pis i mas salim pis long ol namelman tasol, em ol tu i stap aninit long gavman na ol i mas baim takis.

Wanpela saveman i tok olgeta dispela samting i soim olsem, “king na ol bikman i bosim ol hap graun, ol i kisim bikpela winmani, tasol ol man bilong kisim pis ol yet i kisim liklik mani tasol.” Gavman i makim ol narapela wok bisnis tu long baim bikpela takis. Ol man bilong baim takis ol i no amamas liklik long baim. Tasol narapela samting i mekim na ol man i no laikim ol lain bilong kisim takis, olsem ol stori i stap long ol Gutnius i kamapim, em pasin bilong ol man bilong kisim takis long giaman na pulim bikpela takis long ol man nating, na ol i kamap maniman long dispela rot.​​—Luk 3:​13; 19:​2, 8.

Ol Man Bilong Kisim Pis Em 4-pela Gutnius i Stori Long Ol

Fopela Gutnius i kamapim olsem Saimon Pita i gat ol man i wok wantaim em long wok bisnis bilong em long kisim pis. Ol man i kam helpim Pita long pulim umben bilong pis​—em ol pis em i kisim long rot bilong mirakel​—ol i ‘poroman bilong em i stap long narapela bot.’ (Luk 5:​3-7) Ol saveman i tok “ol man bilong kisim pis inap pasim tok long wok bung wantaim . . . long baim kontrak bilong kisim pis.” Ating em samting ol pikinini man bilong Sebedi, na Pita, na Andru, na ol poroman bilong ol i bin mekim.

Baibel i no stori long ol dispela man bilong kisim pis long Galili ol i gat ol bot bilong ol yet na ol samting bilong kisim pis. Sampela man i ting olsem ol i gat ol dispela samting. Baibel i tok Jisas i bin kalap long wanpela bot “bilong Saimon.” (Luk 5:3) Tasol wanpela buk i stori long dispela samting olsem, “ating ol bot ol i mekim wok long en ol i bilong ol bikman.” Maski dispela samting i tru o nogat, Baibel i stori long Jems na Jon i bin stretim ol umben bilong tupela. Na tu, ol man bilong kisim pis i mas toktok i go i kam wantaim ol man bilong baim pis long pe bilong pis em ol bai makim. Na sampela taim ol man bilong kisim pis i mas haiarim ol man bilong helpim ol.

Olsem na i gat planti samting ol man bilong kisim pis long raunwara Galili i save mekim insait long wok bisnis bilong ol long kisim pis. Taim yumi tingim ol dispela samting, dispela i helpim yumi long kliagut long mining bilong ol stori i stap long 4-pela Gutnius na ol tok bilong Jisas long pasin bilong kisim pis na ol man bilong kisim pis. Na bikpela samting moa, dispela save i helpim yumi long kliagut long bilip bilong Pita, Andru, Jems, na Jon. Wok bilong kisim pis em rot we ol i save kisim mani bilong lukautim ol yet. Maski ol i holim bikpela o liklik mani taim Jisas i singautim ol long bihainim em, wantu ol i lusim dispela wok mani bilong ol​​—em wanpela wok we ol i save kisim mani long en​​—bambai ol i ken kamap ol man bilong “kisim ol manmeri.”​—Matyu 4:​19.

[Futnot]

[Mep long pes 25]

(Bilong save ol dispela rait i stap we long pes, lukim buk o magasin)

Raunwara Hula

Betsaida

Kaperneam

Magadan

Raunwara Galili

Jerusalem

Raunwara Detsi

[Kredit Lain]

Todd Bolen/Bible Places.com

[Piksa Kredit Lain long pes 26]

Todd Bolen/Bible Places.com