Askim

Kristen i mas i gat wanem tingting long painim abus na painim pis?

Baibel i no tambuim wok bilong painim abus o painim pis. (Lo 14:​4, 5, 9, 20; Matyu 17:27; Jon 21:6) Tasol ol Kristen husat i save painim abus na painim pis ol i mas tingim sampela stiatok bilong Baibel.

God i orait long Noa na ol tumbuna pikinini bilong em long kilim ol animal na kaikai, tasol ol i mas rausim blut bilong ol paslain long ol i kaikai. (Stat 9:​3, 4) Dispela lo i kamapim klia olsem yumi mas rispektim laip bilong ol animal, long wanem, God yet i givim laip long ol. Olsem na ol Kristen i no save kilim nating ol animal olsem wanpela spot o bilong kisim amamas tasol.​—Sindaun 12:10.

Narapela samting yumi mas tingim em astingting bilong yumi long kilim animal. Ol aposel ol i man bilong kisim pis na taim ol i kisim planti pis ol i save amamas. Tasol i no gat wanpela samting i makim olsem ol i hambak na litimapim save bilong ol long kisim pis na painim abus, o ol i go painim abus o painim pis bilong resis wantaim ol narapela na kamapim olsem ol i man tru, o amamas long ranim ol animal na kilim ol, nogat.​—Song 11:5; Galesia 5:26.

Orait, yumi mas askim yumi yet: ‘Mi stap gutpela piksa long pasin bilong bihainim tingting bilong Jehova long tingim laip em i bikpela samting? Mi save tingting oltaim na stori planti long painim abus na pis? Ol samting mi mekim i kamapim klia olsem mi kisim bikpela amamas long painim na kilim ol pis na ol abus o i kamapim olsem mi wanpela wokman bilong God? Wok bilong painim abus o pis i mekim na mi save raun wantaim ol man i no wanbilip na mi no tingim famili bilong mi?’​—Luk 6:45.

Sampela man husat i save painim abus o pis bilong kaikai, ol i pilim olsem i stret long lusim ol wok Kristen long taim bilong painim abus o pis. Tasol yumi kamapim bilip bilong yumi olsem yumi trastim God taim yumi no larim wanpela samting i go pas long laik bilong em. (Matyu 6:33) Na tu, ol Kristen i bihainim olgeta lo bilong “Sisar” taim ol i go painim abus na pis, maski gavman i strong long ol man i bihainim ol dispela lo o nogat.​—Matyu 22:21; Rom 13:1.

Bilong mekim pasin i stret wantaim tingting bilong Jehova long wok bilong painim abus o pis, ating sampela i mas senisim tingting bilong ol na bai ol i bihainim ol lo bilong em. (Efesus 4:​22-​24) Tasol yumi mas rispektim ol disisen em ol narapela i bin skelim gut long bel na mekim. Tok bilong aposel Pol i stret long dispela, olsem: “Yumi mas lusim pasin bilong skelim pasin bilong ol arapela brata na tingting nogut long ol. Yumi mas bihainim narapela tingting, em long yumi no ken mekim wanpela samting bilong mekim brata i pundaun.” (Rom 14:13) Taim yumi kamapim pasin laikim na pasin rispek, dispela i kamapim bel isi insait long kongrigesen na i amamasim Man Bilong Wokim yumi, em i As bilong olgeta samting i gat laip.​—1 Korin 8:13.a

[Futnot]