Askim

◼ I orait long Kristen i go na painim abus o painim pis?

I gat kain kain tingting long dispela samting, long wanem long sampela kantri ol man i mekim dispela samting olsem rot bilong kisim amamas, na sampela man i nolaik tru long dispela pasin. Olsem na i gutpela ol Kristen i mas wok strong long kisim save na bihainim tingting bilong Jehova long Baibel long dispela samting.

God i givim wok long ol man long bosim ol animal “bilong ples” na ol animal “bilong bus.” Pastaim God i no orait long ol man i ken kilim ol animal bilong kaikai; ol inap i stap laip maski ol i no kaikai abus. (Stat 1⁠:​24, 29, 30) Bihain long Tait Wara, God i orait long ol man i ken kaikai abus, tasol em i tok ol i no ken kaikai “mit i gat blut i stap yet long en.” (Stat 9⁠:​3, 4) Ol i ken kaikai mit bilong animal bilong ples o animal bilong bus.

Lain Israel ol i save lukautim ol animal, olsem ol sipsip na bulmakau samting. Olsem na taim ol i laik kaikai abus ol i ken kilim sipsip o bulmakau bilong ol na kaikai. Na tu ol i save go painim abus long bus na kisim pis bilong kaikai. (Lo 12⁠:​20-24; 14⁠:​4-20) Dispela i stret wantaim tok piksa bilong Jehova, em i tok, em bai ‘salim planti man i go kisim ol manmeri bilong em olsem man i kisim pis long umben o man i painim abus long bus.’ (Jeremaia 16⁠:16) Bihain, Jisas i makim ol man bilong kamap aposel bilong em, na sampela ol i man bilong kisim pis. Na em i bin tokim ol man long i go hukim pis na tromoi umben bilong kisim pis.​—⁠Matyu 4⁠:​18-22; 17⁠:27; Luk 5⁠:​2-6; Jon 21⁠:​4-7.

Taim Aisak i lapun, em i laik kaikai abus, olsem na pikinini man bilong em, Jekop, em i laik kilim tupela yangpela meme na wokim kaikai bilong papa bilong em. Na Iso em i go long bus bilong painim abus bilong papa. Aisak i laikim abus bilong bus, maski ol i gat animal bilong ples i stap. Na tu, tupela pikinini man i kilim abus bambai narapela i ken kaikai, i no bilong ol yet i kaikai.​—⁠Stat 27⁠:​1-19.

Ol i save kilim animal bilong narapela samting tu, i no bilong kaikai tasol​—⁠ol i wokim klos long skin o gras bilong ol. (2 King 1⁠:8; Mak 1⁠:6; Hibru 11⁠:37) Lain Israel i wokim karamap long skin bilong animal, na ol i save samapim skin meme bilong pulimapim wara. Maski God i tambuim ol long kaikai sampela animal, ol inap wokim ol dispela samting long skin bilong ol dispela animal.​—⁠Kisim Bek 39⁠:​33, 34; Hetman 4⁠:19.

Lo bilong God i tok, taim ol i kilim animal ol i mas kapsaitim blut bilong en long graun, na dispela i mas kirapim ol man bilong painim abus long tingim gut laip bilong animal, long wanem, laip bilong en i kam long God, na ol i no ken kilim nating ol animal. (Wok Pris 17⁠:13) Nimrot i save kilim i dai planti animal, na ating em i hambak long save bilong em long painim abus, o em i hambak long hamas animal em i kilim, o em i kilim nating ol animal na pasim het samting bilong ol long banis bilong haus bilong em bambai em i ken kisim biknem. ‘Em i saveman tru bilong painim abus,’ tasol em i bikhet long Jehova.​—⁠Stat 10⁠:⁠9.

Sampela man i save amamas nating olsem long painim abus long bus o kilim animal o kisim pis. Nogut bel bilong Kristen i kirap long laikim kain amamas olsem. Planti man bilong painim abus o painim pis, taim ol i skelim bel bilong ol, nau ol i save, bel bilong ol i skrap long kisim amamas bilong kilim animal o pis. Man i amamas olsem, em i no save tingim laip bilong animal em i bikpela samting. Tru, i no gat tambu long painim abus o painim pis (sapos dispela abus o pis i bilong kaikai o bilong mekim narapela gutpela wok long en), tasol i no stret sapos Kristen i gat pasin wankain olsem Nimrot na em i mekim dispela samting bilong amamas tasol long painim abus o pis na kilim i dai, o bilong kisim biknem tasol. Kristen i mas was gut long dispela samting, na i gat sampela samting moa em i mas tingim.

Wastaua bilong Februeri 1, 1984 (pes 15-22) em i stori olsem ol Kristen tru i no save karim gan o putim gan long haus bilong mekim pait o bilong lukautim ol, nogut wanpela man i bagarapim ol. Sampela Witnes ol i tingim gut dispela tok na ol i no laik holim tu ol gan bilong kilim abus long bus. Na planti ol i bin rausim gan bilong ol o ol i no putim long ples klia​—⁠ol i putim long ples i hatwok long kisim kwik. Long dispela rot ol dispela Kristen i kamapim long ples klia olsem ol i no tingim gan em i bikpela samting, na ol i no ting ol gan inap helpim ol taim wanpela man i laik bagarapim ol. Na tu i gutpela sapos yumi no ken kisim gan bilong painim abus, o sapos yu kisim, orait gutpela sapos yu no putim long ples klia, nogut bagarap i painim wanpela man. Olsem bai liklik pikinini i no ken holim gan na kilim nating man o bagarapim wanpela man, na sapos wanpela man i pret tru o bel hevi, em i no ken holim kwik gan bilong bagarapim em yet o narapela man.​—⁠Skelim Sindaun 22⁠:⁠3.

Sampela Kristen i save laikim swit bilong sampela abus bilong bus o pis bilong solwara, na ol i no laik tromoi bikpela pe bilong kisim, olsem na ol i save go long bus na painim abus o ol i go pulim pis. Sampela ol i laik raun painim abus long bus, long wanem ol i amamas long pulim gutpela win na strongim skin, na sampela ol i laik sindaun isi na wok long hukim pis, long wanem dispela i mekim skin i malolo. Baibel i no tambuim dispela ol pasin, olsem na sapos wanpela i laik mekim olsem, yumi no ken sutim tok long em. Pasin bilong Aisak wantaim tupela pikinini man bilong em i soim yumi, maski man yet i kaikai abus o pis em i kisim o em i givim long narapela man bilong kaikai, yumi no ken toktok planti long dispela.​—⁠Matyu 7⁠:​1-5; Rom 14⁠:⁠4.

Aposel Pita em i laikim tumas long painim pis. Taim Jisas i kirap bek na em i no i go yet long heven, wanpela taim em i tanim i kamap man na em i stap wantaim Pita. I gat sampela pis i stap klostu na Jisas i laik helpim Pita long skelim gut bel bilong em, olsem em i gat wanem tingting long ol pis na long pasin bilong wok bisnis long painim pis. Olsem na Jisas i askim em: ‘Saimon, yu laikim mi moa yet winim ol dispela?’​—⁠Jon 21⁠:​1-3, 9-15; lukim The Watchtower (tok Inglis), Novemba 1, 1988, pes 31.

I wankain tu long Kristen i laik painim abus o pulim pis na bel bilong em i no gat tok long dispela​—⁠em i mas tingim gut wanem samting i bikpela samting. Olsem: Em bai lusim miting na i go painim abus o pulim pis, o olsem wanem? Olsem wanem long toktok bilong em? Em i hambak long save bilong em long painim abus o kisim pis? Sapos sampela taim wanpela strongpela Kristen i laik painim abus o painim pis, gutpela sapos em inap tok olsem: “Yes, Bikpela, yu save, mi laikim yu [winim dispela ol samting].”​—⁠Jon 21⁠:⁠16.