Ol Bikpela Wok Bisnis i Kamap Na i Pinis Gen

As Bilong Ol Hevi Bilong Mani

SAMPELA pasin bilong lotu na wok politik i kamap long rot bilong Nimrot, em dispela man i bin kamapim taun Babilon planti tausen yia i go pinis. Na em i as tu bilong sampela pasin bilong mekim wok bisnis hia long graun.​—Stat 10:​8-12.

Man bilong wokim yumi, em inap stretim rot bilong givim kaikai samting long planti lain manmeri ol bai kamap. Tasol taim namba wan man na meri i sakim ol tok bilong Jehova na em i rausim ol long ples Paradais, ol man i kirap bihainim laik bilong ol yet. (Stat 3:​1-24) God i no bosim moa wokabaut bilong ol man, olsem na ol i kamapim ol lotu na ol wok gavman bilong ol yet. Bihain ol i save i mas i gat sampela kain pasin bilong skelim na tilim ol kaikai samting long ol man, olsem na ol i kamapim pasin bilong mekim wok bisnis. God i no soim rot long ol long mekim.

Olsem na long taim bilong Nimrot pasin bilong mekim wok bisnis i stap pinis. Wanpela buk (The Collins Atlas of World History) i tok, ‘kirap long yia 3 tausen paslain long Krais, i gat planti strongpela lain i mekim wok bisnis long Mesopotemia [Babilon]. Ol i baim ol kago na kaikai samting i go long ol man na kisim winmani, na ol i mekim wok long ol kago na kaikai olsem mani bilong baim ol samting bilong ol narapela lain, na ol i mekim wok long mani silva samting.’ Narapela buk (The Encyclopedia Americana) i tok, ol man i stap long hap bilong Babilonia ‘i save long planti pasin bilong mekim wok bisnis. Ol i save givim mani long ol narapela olsem dinau, na ol i save givim hap mani pastaim long ol samting ol i baim, na ol i save mekim wok long ol samting i olsem sek.’

Ol lain bilong Mesopotemia i gat pasin bilong givim mani kago samting bilong ol long narapela man long mekim wok long en na bihain man i mas bekim wantaim hap mani o kago moa olsem interes. Olsem na mani i gat strong long bosim pasin bilong mekim wok bisnis. Ol i painim sampela olpela rait olsem kontrak bilong bisnis long hap bilong Babilon. Ol dispela rait i kamapim long ples klia olsem sampela ol man bilong bisnis i bin mekim nogut long ol rabisman bilong ol dispela ples. Ol i bin bihainim wankain pasin olsem sampela bikpela man bilong bisnis long nau​—ol i bin mekim pasin giaman na pulim nating mani bilong ol rabisman. Olsem na ol man long dispela taim bipo, ol i no save laikim ol man i save mekim wok bisnis long hap bilong Babilon na Ninive.

Baibel i no kolim pasin bilong mekim wok bisnis long taim bilong Nimrot. Tasol Baibel i kolim ol tok olsem “mekim wok bisnis,” na “baim” bilong makim olsem sampela handet yia bihain, pasin bilong mekim wok bisnis i stap pinis.​—Lukim Stat 34:​10, 21; 39:1; 41:​56, 57.

Tru, inap longtaim ol olpela rait bilong lain Babilon i stap long ston samting, ol i no stori long ol pasin bilong mekim wok bisnis. Wanpela buk (Ancient Mesopotamia) i mekim wankain tok tu, tasol em i tok moa olsem, “ wan tausen yia bihain planti wok bisnis tru i stap long dispela hap, olsem na yumi no ken ting paslain long dispela taim i no gat wok bisnis i stap.” Dispela i makim olsem long dispela taim pasin bilong mekim wok bisnis i stap long han bilong ol lain bilong tok ples Arameik, na ol i raitim ol tok long pitpit o skin bilong bulmakau samting.

Ol lain bilong Mesopotemia na Isip bipo ol i save go mekim wok bisnis long ol narapela hap long rot bilong ol kamel samting. Bihain ol lain Fonisia i go mekim wok bisnis long ol narapela hap long rot bilong ol sip. Ol sip i save kam sua long taun Katis, na Tair, na Saidon, olsem na ol i kamap olsem ol taun bilong mekim wok bisnis long en. Ol i save mekim wok bisnis long senisim ol kago na kaikai samting i go i kam. Tasol long yia 950 samting paslain long Krais ol Grik i kirap long mekim wok long mani silva samting long baim ol samting. Na wanpela buk (The Collins Atlas of World History) i tok, ‘ inap planti handet yia bihain [long 500 B.C.E.] wok bisnis na wok bilong mani, na wok bilong ol beng, na salim ol kago long rot bilong sip samting i kamap strong, olsem na ol man bilong raitim stori bilong bipo i tok dispela pasin bilong ol i wankain olsem pasin bilong ol man bilong bisnis long nau em ol i mekim wok long mani kago bilong ol long pulim sampela winmani moa.’

Bipo tru, ol man i mekim wok long mani taim ol i mekim wok bisnis. Taim ol i mekim stretpela pasin long wok bisnis bilong ol, God i orait long ol, tasol em i no orait long ol taim ol i no mekim stretpela pasin. (Saveman 7:12; Luk 16:​1-9) Pasin bilong laikim tumas mani i kirapim planti man long paulim kot, na putim ol pren long han bilong ol birua, na mekim tok giaman, na kilim man i dai tu. Mani i no as tru bilong dispela hevi, nogat. Ol man i laikim tumas mani ol i kamapim dispela hevi. Olsem na yumi no giaman taim yumi tok olsem, ‘mani i mekim na ol man inap mekim wok bilong ol’ na yumi ken tok tu, inap planti tausen yia pinis ol man i bin mekim wok long ol kain kain samting olsem mani.​—Lukim blok, pes 7.

Olsem na paslain long taim bilong ol Kristen, as bilong planti pasin na lo bilong mekim wok bisnis i bin kamap, na long nau yumi save mekim wok long en. Maski pasin bilong mekim wok bisnis i bin stap inap longtaim, ol man i karim ol hevi yet. Tasol klostu nau bai hevi bilong mani i pinis. Long wan wan Kirap! bilong narapela 5-pela bai kamap bihain, bai mipela i stori moa long dispela samting.

[Rait long pes 8]

Pasin bilong laikim tumas mani i kirapim planti man long paulim kot, na putim ol pren long han bilong ol birua, na mekim tok giaman, na kilim man i dai tu

[Blok/Piksa long pes 7]

Pastaim Sol, Nau Plastik

Sol:

Ol soldia bilong Rom long bipo i save kisim liklik hap sol olsem pe, tasol bihain ol i kirap long givim mani long ol olsem pe. Na long Rom bipo ol bulmakau tu i olsem pe bilong baim ol samting.

Ol Hap Ain:

Long bipo long Mesopotemia ol i mekim wok long silva taim ol i mekim wok bisnis. Long Isip bipo ol i bin mekim wok long bras, na silva, na gol. Wanpela profesa, nem bilong em Hans Bielenstein, em i tok, taim ol lain king ol i kolim Ming ol i bin bosim Saina (yia 1368-1644), ‘ol i bin mekim wok long bras, em ol i makim olsem mani i gat liklik strong; na silva, em ol i makim olsem mani i gat bikpela strong.’

Mani Bras na Silva:

Ating ol lain Lidia bilong Turki long 650 yia samting paslain long Krais, ol i namba wan lain bilong wokim mani. Ol i bungim gol na silva wantaim bilong wokim mani em ol i kolim elektram. Ol i skelim hevi bilong en, na wan wan mani i gat narapela narapela mak bilong pe; ating dispela em namba wan taim bilong wokim mani tru. Inap 100 yia samting bihain, ol Grik i kirap long wokim mani long hap bilong ol.

Mani Pepa:

Namba wan mani pepa i kamap long hap bilong Saina long yia 1024, em taim pasin bilong mekim wok bisnis i go bikpela na ol i sot long mani silva samting. Profesa Bielenstein i tok: ‘Ol i traim mekim wok long pepa mani long hap bilong Saina long yia 811, long taim bilong T’ang. Gavman i kamapim wanpela pepa em ol i ken mekim wok long en taim ol i mekim wok bisnis o baim ol samting, na bihain ol i ken senisim dispela pepa na kisim mani olsem senis bilong en.’ Long Inglan long 1821, gavman i mekim wok long gol, na bihain ol narapela gavman i mekim olsem. Olsem na ol man inap senisim mani pepa bilong ol long mak bilong gol em gavman i lukautim. Tasol nau ol gavman i no mekim olsem moa. Ol i tok tasol olsem mani bilong ol i gat strong, na i no gat wanpela samting bilong strongim dispela tok.

Ol Sek:

Long 1650 samting, ol man bilong beng long Inglan i kamapim pasin bilong raitim namba bilong mani long sek na haus beng bai senisim na givim mani long man. Dispela pasin bilong mekim bisnis em i gutpela na i no gat hatwok, na planti man i save mekim wok long en.

Mani Plastik:

Kredit kat o mani plastik olsem sampela i save kolim i kamap long Amerika long 1920 samting na bihain planti man long graun i kirap long mekim wok long en. Tru ol inap mekim planti wok long en na i no gat wok long ol i mas karim planti mani, tasol em inap kirapim ol man long baim nating nating ol samting o dinau nating long ol samting na bihain ol i hatwok long bekim.