Mipela Abrusim Wanpela Bom Bilong Kilman

LONG moningtaim long Sande, Julai 21, 1985 ol Witnes Bilong Jehova wantaim ol narapela man i bung long Haus Kingdom bilong Kasula long wanpela hap wes bilong Sidni, long Ostrelia. Wanpela man, em David Winder, em i kirapim pablik-tok bilong em long 9:35 long moningtaim. Em i toktok long pasin ol Kristen i mas mekim bilong i stap gut long God. Bihain liklik long 10 klok mipela olgeta i lukluk i go daun long Baibel bilong mipela taim dispela brata i wok long kaunim Jon 6:68.

Em i no pinisim dispela tok bilong Jon 6:68 na traipela pairap i kamap aninit long pletfom, na dispela brata i mekim pablik-tok em i slip long pletfom na tantanim, long wanem em i kisim bikpela bagarap. Wanpela pren bilong mipela (Graham Wykes), em i gat meri pikinini, em i dai wantu tasol. Planti ol narapela i bin kisim hap bagarap, na sampela i kisim bikpela bagarap. Ol man i kirap nogut tru long dispela samting i painim wanpela haus lotu, long wanem i no gat wanpela as na man i mas mekim dispela kain pasin long mipela. Taim dispela samting i kamap long nius ol man long Ostrelia i kirap nogut long lukim dispela samting long televisen bilong ol o harim long redio bilong ol.

Ol Samting Mipela Mekim

Bihain long dispela pairap, liklik taim na i no gat wanpela i pairap o toktok samting. Ating planti bilong mipela i longlong nabaut, na taim mipela lukluk nabaut mipela pret na i olsem maus bilong mipela i pas. Mipela i no inap pulim gut win, long wanem, das i pulap. Lukluk na smel bilong dispela ples i olsem wanpela hap em pait i bin kamap long en. Ol pikinini i wok long krai na sampela i bikmaus tru, long wanem, dispela samting i pretim ol nogut tru. Bihain wanpela man i draivim taksi em i tok em i lukim wanpela meri ating bipo em i gat naispela pes, tasol taim ol i putim em long ambulens-ka, hap pes bilong em i tekewe pinis.a Dispela em meri bilong mi, nem bilong em Sue (Su).

Taim dispela bom i pairap, wanpela samting i stap long pletfom i sut i kam na paitim pes bilong Sue na em i hap i dai. Yau bilong mi i bagarap. Mipela bin sindaun long namba 2 lain sia long poret bilong pletfom, tasol ples man i sanap long en bilong mekim pablik-tok, klostu em i antap long dispela bom. Dispela kilman i bin haitim bom aninit long pletfom.

Mi brukim skru na putim han long het bilong mi, nogut sampela plang samting i pundaun long het bilong mi. Nau mi kisim tingting olsem bom i bin bagarapim Haus Kingdom bilong mipela. Planti plang na pipia samting i stap nabaut nabaut na planti das tu, na dispela i mekim na mi no lukim meri bilong mi. Mi bin singaut olsem, “Susi, Susi!” na taim mi singaut olsem mi tingting planti: “Olsem wanem? em i dai pinis? Olsem wanem long David (em dispela man i bin wok long mekim pablik-tok)​—na ol narapela tu, ol i stap olsem wanem? Olsem wanem long mi? Sampela bagarap i bin painim mi tu?”

Sampela plang bilong rup insait long Haus Kingdom, na ol sia plastik, na ol liklik hap plang, na paus bilong ol man, na ol Baibel na magasin, ol i stap nabaut nabaut na ol i bagarap. Orait, nau sampela man i wok long lusim ol pipia nabaut, pes bilong ol i olsem ol i longlong, na planti bilong ol em blut i wok long kapsait long pes bilong ol; na sampela em ol liklik hap plang i bin sut i go insait long pes bilong ol na blut i kapsait. Klostu olgeta man i bin sindaun baksait long Haus Kingdom i no kisim bagarap; sampela tasol i kisim bagarap long yau bilong ol.

Bikpela Birua i Painim Meri Bilong Mi

Mi painim Sue taim mi lukim su bilong em. Wanpela hap plang bilong rup i bin pundaun long em na em i slip aninit long dispela. Gutpela tru dispela plang i no hevi tumas. Taim mi rausim plang mi kirap nogut tru long lukim pes bilong Sue. Nus bilong em i krungut na arere bilong maus antap i bruk nogut tru na dispela skin i hangamap i go daun klostu long wasket bilong em. Planti tit bilong em i bagarap, na taim mi lukim bagarap long ai bilong em mi ting em bai kamap aipas. Gras bilong em i no sindaun gut. Bikpela hap blut na das na ol liklik hap plang i pulap long gras. Wanpela han bilong em i kisim bikpela bagarap, tasol mi amamas long lukim liklik blut tasol i kapsait long dispela han. Tasol bihain mi save, dispela tingting bilong mi i no stret. Bihain mi apim het na sol bilong Sue na em i kolim nem bilong mi, tasol nek bilong em i no gat strong. Mi tok isi long em, long wanem mi ting em bai bel hevi long samting i bin kamap. Tasol bihain Sue i tokim mi, em i ting em i slip long bet bilong em na em i driman nogut tasol, na em i laik bai mi kirapim em. Mi holim em na em i hap i dai. Mi no laik lusim em, tasol mi ting mi mas painim man bilong helpim mi.

Narapela Witnes, ai bilong em i raun na tingting bilong em i paul nabaut long dispela bikpela bagarap i bin kamap. Taim em i lukim meri bilong mi em i wok long toktok nabaut. Mi holim Sue long han bilong mi na mi tokim dispela meri long kam klostu long mi. Em i brukim skru klostu long mi na nau mi inap toktok wantaim em. Ai bilong dispela meri i pas long Sue na em i givim han bilong em long mi na mitupela i mekim liklik beten long Jehova long em i ken givim save na strong long mipela long winim dispela hevi. Taim mitupela i tok ‘amen,’ maski aiwara i pulap yet long ai bilong em, nau em i stap bel isi. Mi tokim em long painim wanpela samting bilong putim aninit long het bilong Sue olsem pilo.

Sampela i Abrusim Bagarap

Taim dispela bom i pairap wanpela yangpela man, em Paul Hahn, em i sindaun long lain sia long poret, klostu long piano. Dispela pairap i tromoi piano i go antap, na taim piano i bruk bikpela hap bilong en i pundaun long Paul na rausim bikpela hap skin bilong em long lek antap. Sampela tit bilong em i bruk. Man dispela bom i bin kilim i dai, meri bilong em i slip klostu long Paul na em i kisim bikpela bagarap long het na long skin bilong em tu. Tupela pikinini meri bilong em i kisim bagarap tu.

Dispela man bilong mekim pablik-tok, em David Winder, em i kisim bikpela bagarap tru. Mipela kirap nogut tru, long wanem bom i no kilim em i dai. Dispela bom i bin tromoi em wantaim ol plang samting bilong pletfom i go antap tru long ples bipo kapa bilong Haus Kingdom i bin i stap. Em i sut i go antap na em i kam daun klostu long ples em i bin sanap long en taim em i mekim tok. Lek bilong em i bagarap tru na sampela i ting bai em i no inap wokabaut moa. Tasol long nau em inap wokabaut. Sampela klos bilong em ol i painim long wanpela diwai klostu. Wanpela tebol i bin sindaun long pletfom, ol i painim long gaden bilong man i stap longwe liklik long Haus Kingdom. Bikpela blut tru i kapsait, olsem na ol i putim Devit long helikopta na kisim em i go long wanpela haus sik.

Ol Man Bilong Helpim Mipela i Kamap

Ol polis na man bilong ambulens-ka i kamap hariap, olsem wantu tasol. Ol man bilong ambulens i lukautim ol man i kisim bagarap na ol polis i mekim narapela bikpela wok. Taim dispela bom i pairap ol taun klostu long mipela i bin harim dispela pairap, olsem na ol rot i kam long Haus Kingdom i pas pas, long wanem planti handet man i kam bilong lukim wanem samting i kamap. Na ol man bilong nius ol tu i kam wantaim kamera bilong ol na kisim planti piksa. Ol man i stap klostu long Haus Kingdom i mekim gutpela pasin bilong helpim mipela.

Ol man i kisim bagarap, ambulens-ka i karim ol i go long haus sik. Ol dokta na nes i kirap nogut tru long harim stori bilong samting i bin kamap. Planti Witnes i kam long haus sik bilong mekim gut bel bilong mipela. Dispela brata, David Winder, em wantaim meri bilong mi i bin kisim bikpela bagarap. Ol i kisim tupela i go long wanpela haus sik i save lukautim ol man i kisim bikpela bagarap. Long dispela nait stret long bikpela haus sik long Livapul ol dokta i mekim dai tingting bilong mi na ol i wok long rausim ol liklik pipia plang i stap insait tru long han bilong mi. Long de bihain mi tingting planti long meri bilong mi na mi laik go lukim em. Long apinun ol dokta i larim mi i lusim haus sik, na mi go lukim Sue.

Hevi Long Blut

Mi painim meri bilong mi long wanpela rum bilong haus sik bilong lukautim ol sikman nogut. Taim mi lukim em mi krai. Pes bilong em i solap nogut tru, na em i bagarap, olsem na yu no inap save em husat. Ol dokta i bin samapim pes na i luk olsem ol liklik blakpela sipa i pasim skin bilong pes.

Sue i no inap lukluk, long wanem pes i solap nogut tru na dispela i pasim tru ai bilong em. Planti liklik bun long pes bilong em i bruk, olsem bun bilong nus, na bun bilong maus, na ol narapela bun. Tasol bikpela hevi em olsem: Bun bilong het antap long nus i go insait tru long het na dispela bun i sutim wanpela rop bilong blut. Olsem na taim em i bin slip long plua bilong Haus Kingdom aninit long ol pipia plang, blut i bin lusim het na i go daun long bel bilong Sue. Tasol long ai mi no inap lukim na save long dispela samting. Mak bilong blut bilong em i go daun tru inap long 6. (Mak bilong planti meri long blut em 14.)

Olsem na ol dokta i laik givim blut long Sue. Dokta bilong katim man i tokim Sue, sapos em i mas mekim wok long blut na Sue i no larim em i mekim, em i no gat rot bilong helpim em. Sue i tokim dokta, em i save long dispela, na mitupela bai karim dispela hevi na sapos em i mekim wok long narapela marasin, em gutpela, tasol em i no ken mekim wok long blut, maski wanem samting i kamap. (Aposel 15:​28, 29) Dokta i no amamas long dispela.

Olsem na ol dokta na nes i wok long bagarapim tingting bilong Sue, long wanem, em i no laik kisim blut. Ol i askim Sue: ‘Yu gat pikinini?’ Sue i tok: “Nogat.” Olsem na ol dokta i tok: ‘Gutpela, long wanem, sapos olsem, dispela ol pikinini bai i gat mama em i gat pes nogut.’ Na dispela dokta i tokim Sue, mi bai katim marit, long wanem nau pes bilong em i bagarap. Sue i ting olsem wanem long ol dispela samting? Em i tok: ‘Mi bel hevi tru, tasol mi strongim bel olsem: Dispela dokta i laik stretim bek pes bilong mi (na em i ting em i mas mekim wok long blut bilong mekim olsem), tasol taim em i mekim tok olsem, mi no ken tru larim em i bagarapim maus bilong bel bilong mi.’ Dispela ol tok long blut i mekim na taim i lus nating. Tasol ol narapela dokta na nes i lukautim gut Sue na mipela i tingim tru dispela gutpela pasin bilong ol.

Bom i pairap na nau 11-pela de i go pinis. Ol liklik bun i bruk long pes bilong Sue i wok long kamap strong, tasol ol i no stap long ples stret, olsem na i mas i gat wanpela dokta bilong katim em hariap! Taim dispela dokta bilong katim ol man i raun lukim ol sikman, em i lukim Sue na em i singaut strong olsem: ‘Mi no ken helpim em!’ Em i tok olsem na em i lusim bet bilong Sue. Dispela i putim bikpela traim long mipela. Tasol dispela samting i kamap em i gutpela samting. Olsem wanem em i gutpela samting?

Dokta Bilong Pasin Sori

Wanpela Witnes em i dokta, em i bin toktok wantaim wanpela dokta bilong stretim pes o narapela hap bilong skin taim bikpela bagarap i painim man. Dispela dokta i orait long helpim Sue. Tru em i no katim Sue, tasol dispela em i gutpela, long wanem i no gat hevi moa long blut. Dispela dokta i gat pasin sori. Mipela amamas tru long em, long wanem, em i tok em bai helpim Sue maski em i no ken mekim wok long blut.

Em i subim sampela pin ain, longpela bilong en em 7-pela sentimita, i go insait long ol liklik bun i bruk long pes bilong Sue. Na em i wokim sampela samting moa bilong strongim ol dispela pin. Dispela ol pin bai holim ol bun i bruk na helpim ol bun long kamap strong na i stap stret. Sue i tok: ‘Mi hatwok long slip inap long 6-pela wik, long wanem, ol dispela pin ain i go insait long ol bun na narapela hap bilong ol i stap ausait! ’ Antap bilong maus i bin bagarap, na dokta i pasim antap bilong maus wantaim daunbilo bilong maus, em dispela hap i no bagarap; em i pasim long waia. (Lukim piksa long pes 10.) Tasol Sue i no inap harim smel bilong wanpela samting​—dispela i bagarap nau.

Sue em meri bilong lap. Em inap lap long hevi bilong em. Em i tok pilai olsem ol dispela pin na waia i mekim na pes bilong em i luk olsem dispela waia i stap antap long televisen. Tasol em i mas i gat strongpela bel tu, long wanem, insait long 2 na hap yia ol dokta i mas katim em planti taim bilong stretim yau bilong em i bin bagarap na stretim tit bilong em, ol tu i bin bagarap.

Mipela Lain Long Sampela Samting

Mitupela i lain long planti samting, olsem beten i gat strong, na Jehova i no larim yumi i kisim wanpela traim i winim strong bilong yumi. Sue i bin tokim mi olsem, taim namba wan dokta i putim hevi long em long kisim blut, em i pret na em i bel hevi long ol i toktok planti long blut. Tasol taim em i beten long Jehova em i stap bel isi na em i kisim strong. Nau mipela strongim bel na ting sapos bihain narapela traim i kamap, Jehova bai helpim mipela gen, maski wanem hevi i kamap.

Sampela i bin askim mipela, bilong wanem Jehova i larim dispela man i putim wanpela bom bilong bagarapim Haus Kingdom na kilim i dai wanpela brata? Tasol bipo na long nau tu, lain bilong God i bin kisim kain kain hevi. Sapos Jehova i banisim yumi, olsem lukautim gut yumi na em i no larim wanpela hevi i painim yumi, olsem Satan i tok Jehova i bin mekim long Jop, ating lain bilong God i giaman tasol long lotuim em, na ol i no givim bel tru long em. I no gat as na yumi ken ting yumi no ken kisim bagarap samting, long wanem Baibel i tok ‘taim nogut i save painim yumi olgeta.’ Yes, taim yumi save yumi inap kisim bagarap, o ol birua i kilim yumi i dai long wanem yumi strong long holimpas bilip, dispela i makim olsem yumi no tingim samting bilong yumi yet, nogat​—yumi bilip tru long God.​—Saveman 9:11; Jop sapta 1 na 2; Matyu 10:39.

Ol Brata Spirit i Mekim Gutpela Pasin

Taim dispela hevi i painim mipela, ol brata long spirit “i winim pasin namel long tupela brata.” (Sindaun 18:24) Sue i tok: ‘Sampela wanblut bilong mi i stap longwe tru inap 4,000 kilomita, na ol i kisim balus na i kam bilong i stap wantaim mipela inap 2-pela wik na helpim mipela. Mi amamas tru long sampela wanblut na pren i bin stap wantaim mi, long wanem, planti taim mi driman nogut.’ Planti ol i salim pas na kat na telegram na ol plaua bilong amamasim mi; sampela i kam long ol brata sista i stap klostu na long ol brata sista long ol narapela kantri. Dispela i kamapim klia gutpela pasin Kristen long ai bilong ol narapela man.

Sue i tok moa: ‘Na ol i helpim mipela long samting bilong skin. Ol pren Witnes i stap klostu ol i wokim prut na kumu samting i kamap wara, em ol kaikai i gat marasin ain long en bilong strongim blut. Mipela ting, mipela bin askim ol dokta long daun long laik bilong mipela long blut, olsem na mi mas kaikai samting bilong strongim blut bilong mi. Mi kisim sampela marasin ain tu.’ Sue i tok moa: ‘Mipela mekim olsem, na mak bilong blut bilong mi i go antap inap 3-pela mak moa paslain long taim dokta i katim mi. Nupela dokta i amamas tru.’

Pasin bilong no ken les kwik, na pasin sori, na beten, na spirit holi bilong God, na taim i lus liklik, na gutpela kaikai​—ol dispela samting i mekim na skin bilong Sue i orait gen. Tru, Sue i no orait olgeta. Kingdom bilong God tasol inap stretim long taim bilong en. Ol man i save long Sue, ol tasol i save pes bilong Sue i narapela kain liklik, tasol dokta bilong em i bin mekim gutpela wok na long ai bilong mi, mi ting Sue i gat gutpela pes tru.

Samting mipela ol Witnes Bilong Jehova i wetim em i bikpela samting. Em inap helpim mipela long winim olgeta traim. Dispela hevi i bin kamap long kongrigesen bilong mipela i no bagarapim kongrigesen, nogat, em i strongim kongrigesen na mipela olgeta i pas gut wantaim. Wanpela pren bilong harim tok em i bin kam harim pablik-tok long de dispela bom i pairap. Em i lap na tok, i olsem ‘bom i sutim mi i kam insait long tok i tru.’ Long ai bilong em yet em i lukim dispela pasin birua i kamap, olsem na em i strongim bel bilong em long stadi moa yet long Baibel.

Inap long nau ol i no painim na kotim dispela man i bin putim bom, tasol polis i tingim wanpela man, em wanpela kilman na wanpela man i nolaik tru long ol Witnes. Tasol polis i no inap makim stret olsem em dispela man i bin mekim dispela samting.

Nau 6-pela yia samting i go pinis na mitupela Sue i wok yet long hetkota bilong Was Taua long Ostrelia. Mipela amamas tru long nupela Haus Kingdom ol i wokim long Jun 22-24, 1990. Ol i wokim klostu tru long Haus Kingdom em bom i bin bagarapim. Pasin Kristen i bin winim pasin bilong wanpela man i nolaik tru long ol Witnes.​—Peter na Sue Schulz i kamapim dispela stori.

[Ol Futnot]

[Ol Piksa long pes 10]

Nau tasol ol i kisim dispela piksa bilong Peter na Sue Schulz

Dokta i pasim waia long pes bilong Sue Schulz

[Piksa long pes 13]

Nupela Haus Kingdom i bikpela