Strong Bilong Indai Bai Pinis
SAMPELA man i ting yumi bilong i dai tasol. Dispela tingting i no stret. Long Rom 5:12 Baibel i tok Adam i bin sakim tok bilong God, olsem na indai i painim yumi olgeta.
God i wokim man bilong i stap laip, olsem na Em i bin wokim rot bambai pe nogut bilong sin em Adam i putim long ol man i no ken pas olgeta long ol. Em i bin salim Pikinini bilong em bilong givim laip bilong em bilong baim bek yumi. (Matyu 20:28; 1 Jon 2:2) Na em i bin tok promis long kamapim wanpela paradais long dispela graun na nupela gavman bai bosim dispela paradais. Dispela gavman bai pinisim olgeta samting nogut em sin na indai i bin kamapim. (Luk 18:30) Baibel i tok olsem: “God yet bai i stap wantaim ol, . . . Em bai i mekim drai wara i stap long ai . . . Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:3, 4) Tasol olsem wanem long ol man i dai pinis?
God bai kirapim bek ol na ol inap stap long Paradais long dispela graun. Skin na tingting bilong ol bai gutpela olgeta. Jon 5:28, 29 i tok: “Taim i laik kamap na olgeta manmeri i stap long matmat . . . ol bai i lusim matmat na i kam ausait.” Dispela man em God i bin salim bilong baim bek ol manmeri, em Jisas, em i tok: “Laik bilong Papa bilong mi em i olsem: Olgeta man i lukim Pikinini na i bilip long em, ol bai i kisim laip i stap gut oltaim oltaim. Na bai mi kirapim ol long las de.”—Jon 6:40.
Em dispela bilip long ol daiman inap kirap bek i save strongim planti man em wanpela long famili i bin i dai. Ol i save em i ‘slip’ tasol, olsem na ol i no “sori tumas, olsem ol arapela manmeri i no bilip long God na i no wetim taim bilong kirap bek long matmat.” (1 Tesalonaika 4:13) Ol i amamas long wetim dispela nupela taim em God i tok promis long kamapim, na ol i ken bungim gen ol dispela man i dai pinis, na ol i kirap bek long matmat. Yes, ol i gat strongpela bilip long God, em Man i save mekim gut bel bilong ol man.—Rom 15:4, 13; 2 Korin 1:3; 2 Tesalonaika 2:16.
Long dispela as tasol na pasin bilong ol Witnes long planim man i narapela kain. Ol Witnes i laik bai God i orait long ol, na ol i no save mekim wanpela samting em i no stret long Baibel. Ol i save klia long olgeta pasin bilong planim man i no stret long tok bilong Baibel. Ol i save lotuim trupela God Jehova, olsem na ol i no inap mekim sampela samting i save litimapim nem bilong man i dai pinis. Na taim man i dai ol i no save tromoi bikpela mani o mekim planti bilaspasin bilong planim em, long wanem, ol i save dispela samting i no save amamasim God. (1 Jon 2:16) Olsem na taim ol Witnes i planim wanpela man, ol i no save mekim planti samting. Ol i kamapim sampela gutpela tok bilong Baibel bilong mekim gut bel bilong famili, na ol i ken tingim dispela taim ol daiman bai kirap bek. Taim wanpela man i dai pinis ol Witnes tu i bel hevi, tasol ol i no mekim olsem ol narapela man i mekim.
Ol Witnes i save, klostu nau ‘birua’ bilong yumi olgeta, em ‘indai,’ bai pinis. Na tok bilong Baibel bai kamap tru, olsem: “God i winim pait na em i pinisim dai tru. Dai, we stap strong bilong yu? . . . Dai, we stap spia bilong yu?”—1 Korin 15:26, 54, 55.