Han Bilong Yumi i Nambawan

YANGPELA man i singaut strong na hama i pundaun na em i holim strong bikpela pinga bilong em, i olsem em i laik rausim pen. Em i laik paitim nil, tasol nogat, em i popaia na paitim bikpela pinga bilong em.

Taim dispela hevi i kamap, ating dispela kamda i ting sapos em i no gat dispela bikpela pinga, em tu i gutpela. Tasol maski dispela bikpela pinga sampela taim i “hevi tumas,” em i hap bilong wanpela bikpela samting bilong yumi​—em han bilong yumi.

Yumi mekim wok long han bilong yumi long olgeta taim​—olsem ol pinga na skru bilong pinga​—olsem na ating sampela taim yumi ting han bilong yumi i no bikpela samting. Tasol klostu i no gat wanpela wok yumi inap mekim sapos yumi no mekim wok long han bilong yumi. Wanpela Baibel i tanim wanpela savetok bilong King Solomon olsem: “Olgeta wok han bilong yu inap mekim, orait taitim bun na mekim save tru.” (Saveman 9:​10, NW) Olsem na i stret tru Solomon i save mekim tok piksa long han bilong makim wok ol man i save mekim.

Em i Nambawan

Kwiktaim tru pinga bilong yumi i ken paitim ol baten bilong masin taipraita o paitim ol baten bilong wanpela piano na musik i kamap. Tasol olsem wanem long bikpela pinga bilong han? Orait, traim dispela: Opim han na stretim ol pinga bilong yu. Brukim ol wan wan pinga kirap long liklik pinga. Em nau, i hatwok tru long brukim ol wan wan pinga na larim ol narapela i stap stret, a? Tasol nau, brukim bikpela pinga bilong yu, brukim i go daun na i kam antap na i go raun. Nau yu inap mekim olsem na ol narapela pinga inap stap stret tasol. Long dispela samting bikpela pinga bilong yumi i narapela kain tru​—em i gat narapela kain skru long as bilong pinga na narapela kain masol​—olsem na em inap mekim planti samting.

Olsem: Bikpela pinga bilong yumi inap holim ol narapela pinga na long dispela rot yumi inap holimpas ol samting. Dispela em i no liklik samting. Traim long holimpas wanpela toea o opim wanpela tin, tasol no ken mekim wok long bikpela pinga. Maski bikpela pinga bilong kamda i “hevi tumas,” em i mas mekim wok yet long en long holim nil na mekim wok long hama. Sampela lain long bipo, taim ol i kalabusim ol soldia bilong ol birua ol i bin katim bikpela pinga bilong han lek bambai ol i no inap moa long pait.​—Hetman 1:​6, 7.

Ol pinga inap mekim planti wok, tasol ol i no gat planti masol. Ating bai yu ting dispela i no gutpela tumas, long wanem, sapos ol pinga i gat planti masol bai ol i strong moa. Tasol taim yu mekim wok long ol masol bai ol i go bikpela, na olsem wanem long pinga bilong yumi sapos ol i gat ol bikpela masol? Yumi mekim planti wok long ol pinga bilong yumi na ating i no longtaim na han bilong yumi bai kamap olsem wanpela bikpela pul bilong kanu, olsem na bai yumi no inap moa long mekim planti ol wok olsem samap samting. Yumi ken amamas tru long Jehova i bin putim planti masol long han bilong yumi na long rot bilong ol rop ol dispela masol i givim strong long ol pinga.

Soken Bilong Han

Skin bilong han bilong yu i no wanpela karamap tasol. Pulim skin bilong ausait bilong han bilong yu long tupela pinga na bai yu lukim skin i slek na yu ken surikim i go i kam na tu yu inap pasim han bilong yu. Tasol olsem wanem long insait bilong han bilong yu? Skin i no slek olsem skin long ausait. Olsem wanem bai yu inap long holimpas wanpela samting sapos skin bilong yu i slek na yu ken surikim i go i kam? Ating bai yu no inap. Ol pinga na han bilong yumi i gat samting olsem ol liklik pilo na bai yumi inap holimpas strong moa yet wanpela samting.

Sapos yu lukluk long insait bilong han bilong yu bai yu lukim skin i no stret olgeta. I gat planti ol bikpela na liklik baret na mak. Aninit long matres bilong su i gat ol baret baret na lek i ken holim gut graun, wankain olsem ol baret bilong han bilong yumi i helpim yumi long holim gut ol samting.

Skin bilong han bilong yumi i gat ol liklik liklik hul na tuhat inap kamap. Ating yu lukim pinis wanpela wokman i bin rapim han bilong em taim em i laik mekim wanpela bikpela wok. Em i no wokim nating dispela samting. Taim em i rapim han, tuhat i kamap na dispela i helpim em long holimpas strong moa yet wanpela samting. Yu mekim wanem samting taim i hatwok long yu long opim wanpela lip bilong wanpela buk? Yu mekim wankain samting​—yu rapim pinga bilong yu wantaim bikpela pinga na bai yu inap long opim wanpela lip.

Ol baret na mak long pinga bilong yu i gat narapela wok bilong en​—ol i kamapim mak bilong pinga bilong yu. Ating yu kirap nogut long save, long ol 50 bilion pinga i no gat wanpela mak bilong pinga i wankain olsem narapela. Maski mama i karim tupela pikinini wantaim na narapela i wankain long narapela, mak bilong pinga bilong tupela i narapela narapela kain. Bipo yet, inap 200 yia samting paslain long Krais, ol bisnisman long Saina i lukim mak bilong pinga bilong man na ol inap save long ol man i save baim ol samting bilong ol. Mak bilong pinga bilong ol i olsem ol i raitim nem bilong ol long wanpela kontrak. Maski yu bagarapim pinga bilong yu, mak bilong pinga bai i stap yet.

Planti Tausen Rop Wailis

Maski han bilong yumi i no inap lukluk, o harim, o harim smel, han i bikpela samting bilong helpim yumi long pilim ol samting. Olsem: Yu save mekim wanem samting sapos yu stap long wanpela rum i no gat lait? Yu taitim han bilong yu na stretim ol pinga na pilim ol samting bilong rum. Yes, han bilong yumi i no olsem gutpela samting bilong wok tasol, em inap long givim planti save long yumi. Han i helpim yumi long save​—stov i hat, taul i gat wara, klos i olsem wanem, na planti samting moa. Taim yumi laik holim samting yumi mas mekim wok long han bilong yumi.

Long wanpela skwea sentimita pinga bilong yumi i gat 1,400 rop wailis, olsem na pinga bilong yumi inap pilim tru ol samting. Sapos yu sutim pes bilong yu long tupela pin, na narapela i longwe long narapela inap 6 milimita, bai yu pilim i olsem wanpela pin. Tasol long pinga bilong yumi i gat planti rop wailis, olsem na sapos yu mekim wankain samting long pinga bilong yu, wantu bai yu pilim olsem i tupela pin. Dispela samting i mekim na ol man i aipas inap kaunim ol buk brel, em ol buk bilong ol man i aipas. Husat inap tok han bilong yumi i no inap lukim samting?

Ol kapa bilong pinga tasol ol i no gat ol rop wailis. Tasol dispela samting i no mekim na ol kapa i no gat wok bilong en. Nogat tru. Ol kapa i helpim na lukautim ol pinga. Ol i helpim yumi tu taim yumi laik rausim skin bilong wanpela muli, o skrapim wanpela liklik pipia long klos bilong yumi, o litimapim wanpela liklik bis. Ating yu laik save ol kapa bilong pinga bilong yumi i go longpela hariap olsem wanem? Long taim bilong san ol i go longpela hariap, winim taim bilong kol. Kapa bilong bikpela pinga i go longpela hariap, winim kapa bilong liklik pinga. Kapa bilong pinga long han yu save rait o mekim wok long en i save go bikpela hariap, winim kapa bilong pinga bilong narapela han. Long wanpela de kapa bilong pinga i save go longpela olsem 0.1 milimita samting.

Han i Kamapim Pasin Bilong Yumi

Han bilong yumi i ken stori long planti samting. Taim yumi sekanim man long tok gude long em, o taim yumi putim isi han long man bilong mekim gut long em, o taim yumi pret na han bilong yumi i guria​—ol dispela samting i kamapim pasin bilong yumi. Ating planti bilong yumi bai i hatwok long toktok sapos yumi no inap wokim han. Ol man i yaupas ol i mekim bikpela wok tru long han bilong ol. Ol retskin bilong Amerika, ol man bilong Hawaii, na ol Busman bilong Afrika ol i mekim planti tok long rot bilong han.

Ol han i no save kamapim pasin bilong yumi tasol​—ol i save tokim yumi long sampela samting tu. Jon Napier i tok long buk bilong em (Hands) olsem: ‘I no gat narapela samting bilong man inap kamapim ol tok, na bel, na tingting bilong man olsem han bilong em.’ I tru, sampela “han” bilong ol animal i wankain liklik olsem han bilong man, tasol sapos yumi tingim han bilong yumi na wanem wok han inap mekim, yumi save han i no bin kamap nating. Han bilong yumi i kamapim klia bikpela save bilong dispela man i wokim han na wokim ol narapela samting tu, em God Jehova.​—KTH 4:11.

Olsem na taim yangpela kamda i holim gen hama na nil, ating em i gat narapela kain tingting long han na pinga bilong em. Tru tumas, han bilong yumi i helpim tru yumi long mekim olgeta samting yumi laik mekim.

[Piksa long pes 20]

Long ol 50 bilion pinga, i no gat tupela pinga em mak bilong ol i wankain