Tingting Long i Stap Long Nupela Taim
GOD i gat wanpela laik na em i wokim dispela gutpela graun yumi stap long en, na em i laik givim wok long yumi ol man bilong inapim dispela laik. (Aisaia 45:18) Planti samting long graun i wok long bagarap, na dispela i no litimapim nem bilong God. Tasol yu ting God bai larim graun i bagarap olgeta? Nogat tru!
Ol man i laik tru long nupela taim i kamap, na dispela laik i stret long samting bipo tru ol man i bin kisim—em gutpela ples paradais long dispela graun. Adam na Iv i bin i stap long dispela Paradais, na God i laik bai olgeta manmeri i ken amamas na stap oltaim long dispela ples.—Stat 1:28.
God i opim rot bilong yumi ken i stap long dispela nupela taim, na long dispela taim em bai blesim ol man i stap gut long em, na wanem ol samting ol i laikim, em bai givim long ol. (Song 10:17; 27:4) Olsem wanem? Yu laik stap long dispela nupela taim?
Laik Bilong Yu
Moses i givim tok long lain Israel, na ol i mas skelim—ol i laik bai God i bosim ol o ol narapela lain i bosim ol. Em i tok: “I gat rot bilong i stap gut na rot bilong i dai. . . . Yupela i mas . . . harim tok bilong [God] na bel tru long em oltaim. Olsem na bai yupela na ol lain pikinini bilong yupela inap i stap longpela taim.” (Lo 30:19, 20) Tru tumas, rot yu tingting long bihainim, em inap helpim yu long i stap laip o bai yu kisim bagarap.
Ol dispela stori bilong nupela taim God i laik kamapim, i bilong kirapim yu bambai yu gat laik long i stap long en na yu no ken wetim nating nupela taim ol man i tok ol bai kamapim. I gat planti gutpela samting bilong dispela nupela taim God i laik kamapim em yu ken kisim save long en.
Olsem: Olsem wanem yumi save dispela nupela taim em i klostu nau? Em bai pinisim ol olpela gavman bilong graun olsem wanem? Wanem ol samting bai kamap paslain long nupela taim i kamap? Olsem wanem yumi ken save ol tok promis bilong Baibel bai kamap tru?
Baibel i gat bekim bilong ol dispela askim. Ol Witnes Bilong Jehova bai amamas long kamapim sampela tok bilong Baibel long ol gutpela blesing bai kamap long nupela taim God bai kamapim. Na ol bai amamas long soim yu long taim gavman bilong God i kirap mekim wok, na olsem wanem dispela gavman bai bosim graun olgeta.
Gutpela yu bihainim pasin bilong ol Beria long bipo. Ol i bin harim tok bilong Pol na “long olgeta de ol i save ritim na skelim tok i stap long buk bilong God, bilong ol i ken save, tok bilong Pol em i tru, o nogat.” (Aposel 17:11) Taim yu stori wantaim ol Witnes long Baibel, bai yu amamas long lain long ol gutpela samting God i tok promis long givim long yumi long bihain.
Olsem na yu yet mas skelim—yu laik mekim laik bilong God na mekim wok bilong Kingdom bilong em? O yu laik bilip long ol samting ol man i mekim bilong bosim graun? Mipela i laik kirapim yu long lain gut long ol tok promis bilong God na bihain yu ken pasim tok long bel olsem yu laik mekim wanem samting. Taim yu kisim save long Baibel, dispela bai strongim bilip bilong yu long ol samting bai kamap bihain, na em bai helpim yu nau long stap strong long ol samting bilong spirit taim ol man i bosim yet dispela graun.—2 Timoti 1:13.
Inap planti yia pinis ol man i laik tru long wanpela nupela taim i kamap, na klostu nau em bai kamap. Ol Witnes i laik bai yu go insait long dispela nupela taim na stap amamas oltaim oltaim. God tu i laikim olsem. Olsem na sapos yu gat laik tru long stap long dispela nupela taim God bai kamapim, bihain bai yu lukim tru olsem ol manmeri i no bin wetim nating dispela nupela taim.