Yu Laikim Wanem Kain Amamas?

PASIN bilong kisim stretpela tingting long ol samting bilong amamas, na pasin bilong skelim wanem kain amamas yumi laik kisim, tupela i no wankain. I gat taim bilong amamas, tasol yu mas save tu olsem planti amamas i no gutpela na i save pulim nating taim bilong yumi. Tasol long olgeta wan wan de yumi mas pasim tok long wanem ol samting yumi laik mekim​—na dispela tu i hatwok.

Ol kampani bilong kamapim piksa wokabaut o musik samting i kamapim planti kain kain samting bilong amamas, olsem na i hatwok long skelim wanem samting yumi laik lukim o harim. Tasol inap planti tausen yia nau, Baibel i givim stretpela tingting long ol man i laik save long dispela samting. Ol nupela masin samting bilong kamapim amamas i no senisim ol lo bilong Baibel, nogat; yumi stap long taim nogut, olsem na Baibel i gat bikpela wok bilong helpim yumi. Nau yumi ken skelim ol lo bilong Baibel bilong helpim yumi long skelim tupela bikpela samting bilong amamas​—ol i wanem kain amamas na ol i save pulim bikpela haptaim bilong yumi o olsem wanem?

Baibel i Tok Wanem Long Dispela?

Wanpela yangpela i harim musik hevi metol i stori long pasin bilong kilim i dai skin, olsem na em i kilim i dai skin bilong em yet. Wanpela yangpela meri i gat 14 krismas i paitim paitim mama bilong em na mama i dai. Musik hevi metol i kirapim em long mekim olsem. Wanpela yangpela i gat 15 krismas i kilim i dai wanpela meri, na loya bilong dispela yangpela i tok olsem ol piksa bilong man i kilim i dai narapela man i kirapim em long mekim olsem.

Olsem na ol amamas yumi laik lukim o harim, em inap bosim sampela tingting o pasin bilong yumi tu. Sampela saveman bilong graun i ting ol dispela samting yumi stori pinis long en i stori nating. Tasol ol tok bilong Baibel i kamapim stret as bilong ol dispela hevi. Baibel i tok olsem: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) Sampela amamas i truim dispela tok bilong Baibel. Olsem: Sapos yumi lukim ol pasin nogut long piksa wokabaut samting i olsem yumi bung wantaim ol man i no gat gutpela tingting. Wankain tok i kamap long 1 Korin 15:​33, olsem: “Sapos yumi poroman wantaim ol man nogut, bai ol i bagarapim gutpela pasin bilong yumi.” Dispela i no wanpela tok nating, nogat. Em wanpela lo i save bosim pasin bilong yumi ol man.

Ol lo bilong Baibel inap helpim yumi, nogut yumi litimapim nem bilong ol hapman bilong spot, na piksa, na musik samting. Maski ol dispela man bilong spot o piksa samting i save pait o insait long pasin pamuk samting long piksa o ol i stap tasol, ol yangpela i save givim bel yet long ol na i olsem ol i lotu long ol. Wanpela nius (The European) i tok: ‘Ol saveman i tok olsem long planti hap nau ol yangpela i wok long bihainim ol man bilong singsing na dispela i kamap olsem lotu bilong ol.’ Tasol tingim tok bilong Song 146:3: “Ol king na ol man bilong graun i no inap kisim bek yu. Olsem na nogut yu bilip long ol.” Na Sindaun 3:31 i tok: “Bel bilong yu i no ken kirap long bihainim pasin bilong ol man bilong pait, na yu no ken wokabaut long rot bilong ol.”

Narapela bikpela samting em olsem: Taim wanpela Kristen i laikim wanpela samting bilong amamas, em i mas save, dispela inap mekim wanem long em na long ol narapela long kongrigesen. (1 Korin 10:23-33) Baibel i helpim yumi long skelim gut ol amamas em yumi laik kisim. Aposel Pol i tok: “Oltaim yupela i mas tingting tasol long ol pasin i tru na ol pasin i gutpela long ol man i mekim na ol stretpela pasin na ol klinpela pasin na ol naispela samting na ol samting i gutpela tru na olgeta pasin i nambawan tru na olgeta pasin yumi save amamas tru long lukim ol man i mekim.”​—Filipai 4:8.

Ol dispela lo bilong God i bin bosim wokabaut bilong lain bilong em inap planti handet yia pinis. Ol Kristen bilong Rom bipo ol i no gat wok bilong tingim wanpela lo long Baibel i tok olsem spot bilong lain Rom long kilim ol man i dai na bagarapim ol man na amamas long lukim dispela samting i no stret​—ol dispela Kristen i save pinis em i samting nogut na ol i no inap lukim. Ol i mekim wok long ol dispela lo yumi kolim pinis, na long dispela rot ol i lukautim gut ol yet na famili bilong ol na kongrigesen.

Pasin Bilong Skelim Gut na Makim Amamas

Ol trupela Kristen i save bihainim wankain pasin long nau. Taim ol i laik baim wanpela kaset samting, ol i save skelim pastaim. Ol i mekim olsem wanem? Pastaim long ol i baim kaset samting, ol i save skelim karamap bilong en. Ol i kamapim tok bilong musik olsem wanem? Singsing bilong kaset i kamapim ol pasin nogut? Pasin birua? Pasin pait? Pasin belhat? Pasin pamuk samting? Sampela taim yu ken skelim ol toktok bilong en i stap insait long karamap bilong en. Na long skin bilong ol buk o ol nius, i gat liklik toktok bilong helpim yumi long save wanem kain stori i stap insait long buk. Na i gat liklik stori bilong ol piksa wokabaut long ol nius samting. Olsem na sapos ol man bilong graun i ting olsem wanpela piksa o musik i nogut, long wanem, em i kamapim pasin sem samting, o pasin nogut, o pasin pait, i no stret sapos wanpela Kristen i lukim dispela kain piksa o harim dispela kain musik, a?

King Solomon i tok: “Yumi no ken strong tumas long bihainim stretpela pasin na long kisim gutpela tingting. Nogut yumi bagarapim yumi yet.” (Saveman 7:16) Olsem na yu mas was gut. Sapos yu bin skelim gut tok bilong Baibel na yu beten na nau yu pilim olsem tingting bilong yu long amamas yu laikim i stret, na yu lukim olsem ol wanbilip i gat wankain lo bilong Baibel olsem yu, tasol ol i gat narapela kain tingting long amamas, no ken larim dispela samting i bagarapim bel bilong yu. Larim wan wan i skelim pasin bilong em yet. No ken skelim pasin bilong yu wantaim pasin bilong ol narapela.​—Galesia 6:4.

Skelim Gut Ol Amamas

Ol man bilong dispela graun i no save skelim gut taim bilong wok na malolo. Olsem: Wanpela nius (Parks & Recreation) i tok, taim bilong malolo na amamas “em i as tru bilong i stap bilong yumi.” Sampela saveman i tok, long ol kantri i gat planti wok bisnis samting, ol man i tingim tasol amamas long taim bilong malolo, na pasin bilong go long lotu tu i kamap olsem samting ol man i mekim long taim bilong malolo tasol.

Bipo yet Baibel i tok olsem “long taim bilong las de, . . . ol man bai i laikim ol yet tasol,” na “ol bai i laikim tumas ol kain kain pasin bilong amamas bilong dispela graun, na ol bai i no laikim God.” (2 Timoti 3:​1-4) Tasol ol lo bilong Baibel i helpim yumi long skelim gut wanem wok i nambawan wok bilong yumi. Olsem Jisas i tok: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela na long strong bilong yupela.” (Mak 12:30) Olsem na lain bilong God i laikim tru em, na dispela samting i stap nambawan samting tru long laip bilong ol. Na wok Kristen bilong ol i no samting ol i mekim wan wan taim long taim ol i malolo, nogat. Em i nambawan wok ol i save mekim long olgeta taim. Wok mani samting bilong ol i bilong helpim ol long mekim dispela bikpela wok.​—Matyu 6:33.

Olsem na Kristen i mas skelim gut, nogut em i tromoi bikpela hap taim tumas long kisim kain kain amamas, na dispela i no helpim em. (Luk 14:28) Sapos wanpela kain amamas i pasim Kristen long stadi, o stadi wantaim famili long Baibel, o bung wantaim ol wanbilip, o go tokaut long ol man long tok bilong God, o mekim sampela wok bilong famili, orait i gutpela sapos em i lusim dispela amamas.

Ol Samting Yu Laikim i Kamapim Bel Bilong Yu

Sapos yumi lusim bikpela hap taim long kisim amamas bilong skin, i olsem yumi ting dispela i nambawan samting bilong yumi, na dediket bilong yumi i nambatu samting, na ol man i ken save yumi wanem kain man; yumi no save skelim gut ol samting.

Ol samting yu pasim tok long mekim i mas kamapim tingting bilong yu na i no tingting bilong narapela man. Jehova bai skelim bel na tingting bilong yumi long ol samting yumi mekim. Hibru 4:13 i tok: “I no gat wanpela samting God i bin wokim, em inap hait long pes bilong God. Nogat tru. Olgeta samting i op olgeta na i stap ples klia tru long ai bilong God. Na God tasol bai i skelim olgeta pasin yumi mekim.” Orait, olsem wanem long yumi? Bai yumi larim ol lo bilong God i bosim olgeta samting yumi mekim?

[Piksa long pes 8]

Amamas yu laikim i kamapim bel bilong yu na famili bilong yu

[Piksa long pes 9]

Yu save was gut long samting yu lukim na harim na kaunim?