Baibel i Tok Wanem?

Mats na Kamapim Kros—Inap Senisim Pasin Bilong Graun?

‘YUMI Mas Tokaut, Yumi Mas Mats.’ Dispela em het-tok bilong wanpela stori long wanpela nius (National Catholic Reporter) bilong ol Katolik. Ol i kamapim dispela tok paslain liklik long pait i bin kamap long Galf bilong Persia long 1991. Dispela nius i bin strongim ol man long Amerika long mats. Nius i tok: ‘I mas i gat planti milion man bilong toktok olgeta taim long pasin sekan bilong kirapim dispela bikhet gavman long tingim samting ol i mekim. Olgeta man i mas mats.’

Long nau planti kain tok olsem i save kamap. Ol man i mats na kamapim kros bilong ol, long wanem, i gat planti hevi long wok politik, mani, ol samting bilong wara na graun na win, na ol dispela samting i laik bagarapim sindaun bilong ol man. Planti lotu na bos bilong ol i orait long ol man i mats na kamapim tingting bilong ol.

Tasol em i stret long ol Kristen i mats? Ol mats, maski ol man i kros na mats, o ol i mats nating na ol i no kros, dispela inap senisim pasin bilong dispela graun o nogat?

Tingting Bilong Kristen Long Ol Mats

Wanpela saveman i tok, ol mats ‘i gutpela rot bilong kamapim tingting bilong ol man long wok politik samting na bilong kirapim gavman long mekim sampela samting ol i toktok long en tasol ol i no mekim wanpela samting.’ Planti man i mats ol i ting gutpela samting inap kamap long samting ol i mekim, olsem gavman bai stretim ol hevi na ol pasin i no stret long ol wok politik na sindaun bilong ol man.

Tasol Jisas i bin makim wanem pasin ol wokboi bilong em i mas bihainim? Taim Jisas i stap long graun ol lain Juda i bin stap aninit long Gavman Rom na dispela gavman i mekim hatpela pasin long lain Juda, olsem na ating ol Juda i no laikim Rom i bosim ol. Tasol Jisas i no bin tokim ol wokboi bilong em long mats o mekim wanpela wok politik samting bilong stretim dispela hevi bilong ol. Nogat. Planti taim em i bin tokim ol wokboi bilong em ol i no ken insait long “pasin bilong dispela graun.”​—Jon 15:19; 17:16; 6:15.

Dispela i wankain long taim ol man i bin giaman na holim Jisas. Jisas i no tokim ol wokboi bilong em long kirap na mats bilong kamapim pasin giaman bilong gavman. Nogat. Em i bin tokim gavena bilong Rom olsem: “Kingdom bilong mi em i no bilong dispela graun. Sapos kingdom bilong mi em i bilong dispela graun, orait inap ol wokman bilong mi i pait, na i no gat wanpela man inap putim mi long han bilong ol Juda. Tasol kingdom bilong mi em i no bilong dispela graun.” (Jon 18:​33-36) I olsem bikpela hevi inap kamap long dispela, tasol Jisas i no mekim wanpela samting olsem mats, long wanem, em i save em i no ken insait long wok politik. Na em i strongim ol wokboi bilong em long abrusim dispela samting.

Olsem na sapos Kristen i insait long ol mats, em i save sakim lo Jisas i bin kamapim, olsem ol Kristen i no ken insait liklik long ol pait o wok politik samting bilong dispela graun. Sapos em i insait long ol mats, dispela inap kamapim sampela hevi i no stret long Kristen. Taim sampela mats i kirap, ol man i wokabaut isi isi, tasol bihain pasin bikhet na kros pait na tok nogut inap kamap. Sampela taim ol i brukim lo bilong gavman na mekim mats, na ating bikman bilong gavman inap putim gut yau long toktok bilong ol, tasol pasin ol i mekim em i no stret wantaim tok bilong Baibel, em i tok yumi “mas i stap aninit long ol gavman,” na oltaim “painim rot bilong i stap wanbel wantaim olgeta man.” (Rom 12:18; 13:1) Baibel i no tok ol Kristen i mas kirap na bikhet, nogat; em i tok ol i mas wokabaut stret namel long ol man, na ol i mas bihainim tok bilong olgeta gavman, maski gavman i gat hatpela pasin.​—1 Pita 2:​12, 13, 18.

Tasol ating sampela man bai tok: ‘Olgeta mats i no save kamapim kros pait.’ Em i stret, na i olsem sampela mats i kamapim gutpela samting, tasol yu ting ol mats inap senisim pasin bilong dispela graun?

Ol Inap Senisim Pasin Bilong Dispela Graun?

Ol Kristen i tingim tru ol man na ol i laik helpim ol. Tasol yu ting ol inap mekim olsem long rot bilong ol mats? Wanpela buk (Demonstration Democracy) i tok: ‘Wok politik i no inap stretim olgeta samting​—sampela samting tasol.’ Olsem na yumi i mas i gat narapela samting bilong senisim ol pasin nogut na hevi bilong dispela graun; ol mats i no gat strong long mekim olsem.

Jisas i gat wankain tingting taim em i stori long olpela lotu Juda. Ol Farisi i man bilong lotu, tasol ol i mekim long tupela maus. Jisas i tok: “I no gat man i save kisim hap nupela laplap bilong samapim hul long olpela saket. Sapos em i mekim olsem, orait taim ol i wasim saket dispela laplap bilong pasim hul em bai i go liklik na brukim saket gen, na hul bai i kamap bikpela moa.” (Matyu 9:16) Bilong wanem Jisas i kamapim dispela tok? Trupela lotu em Krais i lainim ol man long en, i no ken stretim o mekim gut olpela lotu Juda i laik pinis. Jisas i save i no gat rot long stretim olpela pasin bilong lotu Juda.

Na long nau tu, i no gat rot long stretim pasin bilong dispela graun. Inap planti handet yia pinis ol man i mekim pasin i no stret, na hatpela pasin, na putim hevi long ol narapela man. Saveman 1:15 i tok: “Ol samting i krungut pinis, em yumi no inap stretim.” Tru tumas, maski yumi wok strong, yumi no inap tru long stretim olgeta hevi bilong dispela graun. Bilong wanem yumi no inap mekim olsem? Baibel i tok: “Dispela graun olgeta em i stap aninit long strong bilong Satan.” (1 Jon 5:19) Na Jisas i tok dispela man em “hetman i save bosim dispela graun.” (Jon 12:31) Maski ol man i mekim wanem samting bilong stretim ol hevi, ol i no inap stretim taim Satan i stap bos bilong dispela graun.

I no olsem ol Kristen i no tingim ol hevi bilong dispela graun, o ol i no laik mekim wanpela samting bilong stretim ol hevi. Baibel i tokim ol Kristen long kirap na mekim wanpela wok, em long autim tok na skulim ol man long gutpela tok bilong Kingdom bilong God, em dispela Kingdom Jisas i lainim ol wokboi bilong em long beten long en. (Matyu 6:10; 24:14) Baibel i tok dispela Kingdom i no ken senisim pasin bilong dispela graun. Em bai pinisim olgeta gavman nogut na ol samting i save bagarapim sindaun bilong ol man. Na em bai kamapim stretpela pasin. (Daniel 2:44) Taim dispela kain pasin i stap, i no gat wanpela man i mas mats, long wanem, God Jehova bai kamapim olgeta samting ‘inap long olgeta man i ken stap gut.’​—Song 145:16.

[Piksa Kredit Lain long pes 18]

Labor strike, Leslie’s