Rot Bilong Redim Ol Miting Bilong Wok Autim Tok
1. Wanem wok bilong Miting Bilong Wok Autim Tok? Olsem wanem dispela miting inap helpim tru yumi?
1 Miting Bilong Wok Autim Tok em i bilong redim yumi long mekim gutpela wok taim yumi autim tok. Dispela miting i save stori planti long wok bilong autim gutnius bilong Kingdom, kamapim ol disaipel, na autim tok long strafe bilong kot bilong God bai kamap. (Mt. 28:20; Mk. 13:10; 2 Pi. 3:7) Dispela miting i helpim tru yumi taim yumi redim gut ol tok na redi long insait long en.
2. Olsem wanem yumi inap redi long putim yau long wanpela tok?
2 Wanpela Tok: Nem bilong buk samting em brata bai kisim tok long en i stap long hap bilong sediul. Yu ken ritim hap ol i makim, skelim ol skripsa ol i no raitim tok bilong en, na tingting long olsem wanem yu ken mekim wok long en taim yu autim tok.
3. Yumi ken mekim wanem bilong redim ol hap i gat askim na bekim?
3 Ol Askim na Bekim: Brata i lukautim dispela hap long wankain pasin olsem brata i save lukautim Stadi Wastaua, tasol em i mekim sotpela kirap bilong tok na pinis bilong tok. Makim ol bikpela poin bilong wan wan paragraf, na redi long kamapim ol gutpela sotpela bekim i kamapim klia ol dispela poin.
4. Olsem wanem yumi inap redim dispela hap bilong toktok wantaim ol bratasista?
4 Toktok Wantaim Ol Bratasista na Kamapim Ol Askim: Brata i lukautim dispela hap em bai mekim olsem wanpela tok, tasol em bai kamapim sampela askim na ol bratasista i ken bekim. Sapos yu bin makim ol bikpela tok na lukim ol skripsa ol i no raitim tok bilong en, ating yu inap long bekim tok taim brata i mekim ol askim. Brata i lukautim dispela hap bai kirapim odiens long kamapim gut ol bikpela tok.
5. Yumi ken mekim wanem na bai ol soim i ken helpim tru yumi?
5 Ol Soim: Sampela tok i gat ol soim bilong kamapim olsem wanem yumi inap mekim wok long dispela tok long teritori bilong yumi. Brata bai makim elda o pablisa i save gut long autim tok o painia bilong mekim ol soim. Taim yu redim dispela hap, yu ken tingting long olsem wanem brata bai mekim dispela tok. Taim ol i bihainim tok bilong tilim nius i stap long Wok Kingdom na mekim soim long dispela, yu ken tingting long olsem wanem yu bai senisim sampela tok bilong en bambai tok i stret long ol narapela narapela man bilong haus. Kisim i kam long miting ol buk o nius em ol bai mekim soim long en. Long taim bilong Famili Lotu long nait, i gutpela long yupela i bihainim sampela bilong ol dispela tok na mekim traim.
6. Wanem sampela as na yumi redim ol Miting Bilong Wok Autim Tok?
6 Bai yumi amamas moa long Miting Bilong Wok Autim Tok sapos yumi redim na tingim gut ol tok bai kamap. Taim yumi mekim olsem, narapela inap strongim tru narapela. (Ro. 1:11, 12) Sapos yumi makim taim bilong redim ol Miting Bilong Wok Autim Tok, bai yumi redi gut moa long inapim wok bilong yumi long autim tok.—2 Ti. 3:17.