Miting Bilong Wok i Save Inapim Yumi Long Mekim Olgeta Kain Gutpela Wok
1 Miting Bilong Wok Autim Tok em bilong kirapim na inapim yumi long mekim bikpela wok moa long autim tok na kamapim ol disaipel. (2 Ti 3:17) Tasol sapos yumi no redim gut ol tok bilong miting o yumi no bihainim ol tok yumi lainim, miting bai helpim yumi liklik tasol.
2 Pasin bilong redim tok pastaim bai helpim yu long kisim gut ol tok yu lainim long miting. Sapos long miting yumi bai mekim wok long sampela buk, lukim pastaim, na bringim i kam long miting na bai yu ken lukim ol tok brata i mekim na bekim sampela tok. Putim gut yau, na raitim sampela tok long notbuk samting na bai yu ken mekim wok long en long bihain.
3 Taim wasman siaman i kisim nupela Wok Kingdom em i mas lukim gut ol tok bilong en. Em i mas makim sampela elda na wokman i gat save na bai ol i ken redim ol tok. (om pes 70) Sapos kongrigesen i no gat planti elda na wokman, orait, wasman siaman i ken makim sampela narapela brata i gat save na ol i ken helpim ol. (km-E [Ostrelia] 11/76, Askim) Brata i mekim tok, em i mas redim gut pastaim na bihainim pasin bilong mekim tok olsem Wok Kingdom i kolim. Na em i mas was gut, nogut em i pulim tok na kalapim ol minit bilong tok.
4 Bilong kirapim miting i gat sampela toksave. Brata bilong mekim ol toksave i mas lukim wasman siaman pastaim na bai em i ken save long ol tok em i mas mekim. Ating i gat sampela pas bilong Sosaiti em i ken kaunim o em i ken tokaut long ol bung bilong i go autim tok o kirapim ol brata long putim ripot bilong mun. Sapos sampela brata sista i sik, em i ken tokaut long dispela bambai yumi ken i go lukim ol, o em i ken stori long sampela samting kongrigesen i laik mekim bihain. Putim gut yau na bai yu ken save long ol dispela samting na redi long mekim sampela wok.
5 Sapos wanpela hap bilong miting i gat askim na bekim, orait redim gut pastaim. Kaunim ol paragraf na lukim ol skripsa. Tingting long olsem wanem yu inap bihainim dispela tok, na wanem kain tok yu ken kamapim bilong strongim ol narapela. Yu ken kamapim sotpela ekspiriens bilong helpim ol brata long save olsem wanem ol i ken bihainim ol dispela tok.
6 Taim ol i mekim soim, tingim wanem tok yu bai mekim sapos man bilong haus i kamapim dispela tok long yu. Tingim tok ol i mekim long soim bilong helpim man bilong haus long kisim gut tok. Tingim tok yu bin mekim bipo taim dispela samting i bin painim yu. Tingim olsem wanem dispela soim inap helpim yu long mekim gut tok long bihain.
7 Ol brata sista insait long soim samting ol i mas redim gut pastaim. Olgeta wan wan i mas save long ol tok na ol samting ol i mas mekim long pletfom. Sapos ol i no redim gut, bai ol i no inap kirapim na strongim ol brata. Bilong helpim ol long redi gut, sampela i save traim ol hap bilong soim ol bai insait long en taim Stadi Wastaua i pinis. Ol i mekim long pletfom na ol i stretim tok wantaim ol brata i lukautim maikrofon.
8 Sampela taim program bilong miting bai kamapim wanpela tok bilong helpim kongrigesen o wanpela tok bilong Wastaua. Taim brata i mekim tok, putim gut yau, na pilim tru long bel, na wok long bihainim.
9 Yumi mas “redi long mekim olgeta kain gutpela wok.” (2 Ti 2:21) God i helpim yumi long mekim olsem long rot bilong Miting Bilong Wok. Sapos yumi go long olgeta miting na wok strong long bihainim ol tok yumi lainim, dispela bai helpim yumi long “mekim tru dispela wok [autim tok].”—2 Ti 4:5.
[Ol Askim]
1. Miting Bilong Wok Autim Tok i gat wanem wok bilong en?
2. Yu mas mekim wanem na bai yu inap kisim gut ol tok yu lainim long Miting Bilong Wok?
3. (a) Ol i makim husat long mekim ol tok long Miting Bilong Wok? (b) Brata bilong mekim tok i mas mekim wanem?
4. Bilong kirapim miting, brata i ken mekim wanem ol toksave?
5. Kolim sampela samting ol brata i ken mekim na bai ol i redi long bekim tok.
6. Taim yu lukim soim, gutpela sapos yu tingim wanem ol samting?
7. Bilong wanem yumi mas traim ol soim?
8. Taim ol brata i mekim tok, yumi mas mekim wanem tripela samting?
9. Olsem wanem Miting Bilong Wok inap helpim yumi long mekim tru wok autim tok?