Mekim Ol Samting Bambai Miting Bilong Wok i Helpim Tru Yumi
1 Olgeta wokboi bilong God i mas laik tru bai God i skulim ol, olsem Devit i tok: “Bikpela, yu mas skulim mi gut long pasin yu laik mi mekim, na oltaim bai mi bihainim laik bilong yu. Lainim mi gut bai mi tingting long yu wanpela tasol, na mi mekim wok bilong yu oltaim.” (Sng 86:11) Ol Miting Bilong Wok i kolim stret ol samting yumi mas mekim bambai yumi ken inapim wok Jehova i bin givim long yumi, em wok bilong autim gutpela tok bilong Kingdom. Olsem wanem? Ol tok bilong ol Miting Bilong Wok i helpim yu tru? Yu kisim gut ol dispela tok na yu bihainim?
SAPOS YUMI REDI GUT, DISPELA BAI HELPIM YUMI
2 Yu mas redi gut pastaim na bai ol tok bilong Miting Bilong Wok i ken helpim yu. Bilong wanem yu mas redi gut pastaim? Long wanem, dispela bai redim bel na tingting bilong yu, na bai yu inap kisim gut ol tok. Sapos yu stadi pastaim na lukim gut ol tok miting bai kamapim, na yu tingim gut ol dispela tok long bel, na yu skelim gut ol skripsa em Wok Kingdom samting i kolim, dispela bai helpim yu long kisim gut ol kaikai bilong spirit long miting, na bai yu no lusim tingting long ol dispela tok. Na bai yu inap bekim gut tok insait long miting, na mekim gut soim sapos ol i makim yu long mekim, na taim ol i makim yu long mekim wanpela tok, bai yu kamapim ol gutpela tok i gat as bilong en. Na bel bilong yu bai amamas, long wanem, yu save yu mekim gutpela wok tru.—Kis 23:19a; Snd 16:23.
3 Taim yumi laik redim ol tok bilong miting, gutpela sapos olgeta wan wan long famili i gat ol buk na Wok Kingdom samting ol bai mekim wok long en long miting. Ol brata i gat wok long lukautim hap program long Miting Bilong Wok, ol i mas redi gut. Em bikpela samting. Paslain tru long miting, ol i mas makim ol brata bilong mekim ol tok samting, na bai ol i gat taim inap long ol i redi gut!
SAPOS YUMI BEKIM SAMPELA TOK LONG MITING NA YUMI BIHAINIM OL TOK YUMI HARIM, DISPELA BAI HELPIM YUMI
4 Taim yu bekim sampela tok long miting, dispela i save helpim yu na bai yu amamas long ol miting, a? Wastaua (tok Inglis bilong Julai 1, 1972, pes 411) i tok: ‘Taim man i kamapim bilip bilong em namel long ol brata Kristen bilong em, olsem em i bilip tru long Jehova, dispela i save mekim bel bilong em i amamas tru. I no olsem yumi mas bekim tok na taim yumi bekim tok wanpela taim pinis, orait nau yumi ken malolo na larim ol narapela i bekim tok. Nogat. . . . Yumi laikim tumas Jehova, olsem na bel bilong yumi i kirapim yumi long litimapim nem bilong em na yumi laik tru long tokaut na kamapim bel bilong yumi, olsem yumi laikim tumas em.’
5 Jehova i givim wok long yumi bilong autim gutpela tok bilong Kingdom. Em i laikim yumi tumas na long rot bilong Miting Bilong Wok em i skulim yumi bambai yumi olgeta wan wan inap autim gut tok bilong Kingdom. Jehova em i Bikpela Tisa bilong yumi na em i laik bai yumi putim gut yau long ol tok bilong em na bihainim. (Lukim Lo 17:10.) Sapos yu bihainim gut ol tok yu save lainim long miting, dispela bai helpim yu na bai yu inap tok olsem: “Mi pinisim dispela wok yu bin givim mi.”—Ese 9:11.
6 Na bai yu kisim amamas, long wanem, samting yu mekim em inap helpim yu yet long kisim laip na ol man i harim tok bilong yu bai ol tu inap long kisim laip. (1 Ti 4:16) Tru tumas, ol Miting Bilong Wok inap helpim yumi long kisim planti gutpela samting bilong spirit. Gutpela sapos yu yet wantaim famili bilong yu i wok strong bambai ol Miting Bilong Wok inap helpim yu!
[Ol Askim]
1. (a) Olgeta wokboi bilong Jehova i mas laik tru long wanem samting? Devit i kolim wanem ol gutpela tok taim em i beten na kamapim dispela laik bilong em? (b) Ol Miting Bilong Wok i helpim yumi olsem wanem long dispela samting?
2. (a) Yumi olgeta wan wan i mas mekim wanem na bai Miting Bilong Wok inap helpim yumi? (b) Sapos yumi pilim tru gutpela wok dispela miting inap mekim bilong helpim yumi, bai yumi mekim wanem, olsem Sindaun 16:23 i tok?
3. Sapos ol i makim yumi long mekim sampela tok o soim samting long Miting Bilong Wok na ol i toksave long yumi paslain tru long miting, olsem wanem dispela bai helpim yumi?
4. (a) Wanem samting inap mekim na bai yumi amamas tru long i go long Miting Bilong Wok? (b) Wanem samting i kirapim yumi long bekim tok long Miting Bilong Wok?
5. Sapos yumi bihainim ol tok yumi save lainim long Miting Bilong Wok, dispela inap helpim yumi olsem wanem?
6. Oganaisesen bilong Jehova i kirapim yumi long kisim wanem ol gutpela samting?