Ol Miting Bilong Wok Bilong Februeri
Wik i Kirap long Februeri 1
Singsing 65
10 min: Ol toksave bilong kongrigesen.
20 min: “Mekim Ol Samting Bambai Miting Bilong Wok i Helpim Tru Yumi.” Paslain long miting, makim wanpela brata i save gut long kaunim tok na em i ken redi long kaunim ol paragraf. Kaunim pinis paragraf, orait kamapim askim bilong en. Tokim sampela brata sista long redi na bai ol i ken stori liklik long olsem wanem ol Miting Bilong Wok Autim Tok i bin helpim ol.
15 min: Inap Wanpela Yangpela Man na Meri i Stap ‘Poroman Nating Tasol’? Long pasin sori wanpela elda i ken lukim ol tok i stap long pes 232 na 233 bilong buk Sampela Askim Bilong Ol Yangpela, na stori long dispela samting.
Singsing 124 na beten.
Wik i Kirap long Februeri 8
Singsing 139
10 min: Ol toksave bilong kongrigesen.
20 min: “Mekim Wok Bilong Jehova Moa Yet.” Wasman bilong wok autim tok i ken toktok wantaim kongrigesen long ol dispela tok. Redim gut soim.
15 min: “Jehova i Bin Lukautim Mi Gut.” Wanpela elda o wokman bilong kongrigesen i ken lukim Wastaua bilong Septemba 1, 1992, long pes 26-30, na stori long tok bilong wanpela brata bilong Nu Silan.
Singsing 77 na beten.
Wik i Kirap long Februeri 15
Singsing 112
10 min: Ol toksave bilong kongrigesen. Ripot bilong ol akaun.
20 min: “Autim Gupela Tok—Long Rot.” Paslain long miting, makim sampela brata sista i save gut long kaunim tok na ol i ken redi long kaunim ol paragraf. Kaunim pinis paragraf, orait kamapim askim bilong en.
15 min: Yupela Papamama i Save Toktok Gut Wantaim Ol Pikinini Bilong Yupela? Wanpela elda i save mekim gutpela wok i ken mekim tok na lukautim dispela soim.
Bikpela samting em ol papamama na pikinini i mas toktok gut wantaim. Na taim ol pikinini i wok long i go bikpela, papamama i mas wok strong moa long mekim olsem. Taim sampela hevi i kamap insait long famili na papamama i mas givim sampela tok bilong Baibel long ol pikinini bilong stretim dispela hevi, ol i mas mekim long pasin sori na pilim tru hevi bilong ol na bai ol i no inap bagarapim bel bilong pikinini. Long dispela rot ol inap stretim kwik ol hevi.
Inap planti yia pinis oganaisesen bilong Jehova i wok long kirapim olgeta famili long mekim famili-stadi long olgeta wik. Dispela em i wanpela lo bilong Baibel, olsem i stap long Lo 6:6-8 na Efesus 6:1-4.
Wanpela hap tok bilong Galesia 6:7, 8 i tok, “Yu planim pikinini bilong wanem kain kaikai, em dispela kain kaikai tasol bai kamap long gaden bilong yu.” Ating wanpela as bilong ol hevi nau i kamap namel long sampela papamama na ol pikinini, em ol i no mekim famili-stadi.
SOIM: Redim gut dispela soim na bai ol brata sista i ken kisim gut. Wanpela papa na mama i sindaun i stap long haus bilong ol. Em i klostu biknait, na tupela i wetim pikinini man bilong tupela, em yangpela man Tom. Em i go raun long wanpela hap na em i no kam bek yet long haus.
Mama: Mi tingting planti long Tom. Em i mekim wanem na em i no kam bek kwik long haus? Em klostu biknait.
Papa: Mi no save. Taim em i kam bek long haus, ating mi mas givim sampela strongpela tok long em. Planti taim yumi tokim em, em i mas kam bek taim i no tudak yet, na em i no ken poroman wantaim ol dispela manki bilong ausait.
Mama: Tru, tasol i no gutpela sapos yumi kirap krosim em taim em i kam bek long haus. Bel bilong yumi i hat na nogut yumi mekim sampela tok o sampela samting i no stret na bihain yumi hevi long dispela samting yumi bin mekim.
Papa: Ating yu tok stret. Tumora bel bilong yumi bai kol na yumi ken toktok wantaim em. Em i kam nau. Mi harim lek bilong em. [Tom i kam.]
Brata i Lukautim Soim: [Em i askim ol brata sista olsem:] Yupela papamama na yupela ol pikinini i bikpela pinis, yupela ting i gutpela sapos papamama bilong Tom i mekim wanem? [Wet liklik na bai ol i ken tingim na kamapim sampela bekim.] Orait, nau yumi ken putim yau long tok bilong ol:
Papa: Tom, mitupela mama i tingting planti long yu. Mipela i no save yu go we na yu mekim wanem.
Tom: Mi raun wantaim ol manki na mipela kisim sampela amamas. Tasol mipela i no mekim sampela pasin nogut.
Mama: Taim yu no kam bek kwik long haus na i biknait pinis, mitupela papa i tingting planti long yu. Tasol yu kam bek pinis na mipela i amamas.
Papa: Tru Tom, no gat wanpela bagarap i bin painim yu, na mitupela i amamas long dispela samting. Tasol mipela i bel hevi liklik, long wanem, mipela i tokim yu pinis long yu mas i kam bek long haus taim i no tudak yet, na yu no ken raun wantaim ol dispela manki bilong ausait. Tasol yu no bihainim tok bilong mipela, na mipela i bel hevi long dispela. Tasol yu go slip nau na tumora yumi ken kisim Baibel na lukim sampela tok em Baibel i givim long ol pikinini na papamama. [Tom i lusim tupela na em i go slip.]
Mama: [Em i malolo liklik.] Papa, yumi no bin mekim famili-stadi bilong yumi inap planti wik pinis.
Papa: Em, yu tok stret. Tasol nau long dispela taim yumi gat planti wok tru na yumi no gat taim bilong mekim famili-stadi.
Mama: Ating samting yumi planim pinis, nau yumi wok long kamautim.
Brata i Lukautim Soim: Sapos dispela hevi i painim yu, bai yu mekim wanem bilong stretim? Long wik antap bai yumi lukim ol samting dispela papa na mama i mekim bilong stretim dispela hevi.
Singsing 55 na beten.
Wik i Kirap long Februeri 22
Singsing 92
10 min: Ol toksave bilong kongrigesen.
20 min: “Yu Gat Tingting Long Mekim Wok Painia?” Paslain long miting, makim sampela brata o sista i save gut long kaunim tok na ol i ken redi long kaunim ol paragraf. Kaunim pinis paragraf, orait kamapim askim bilong en.
15 min: Famili-Stadi—Samting Bilong Helpim Famili Nau Long Dispela Taim Nogut. Wanpela elda i ken lukautim dispela hap na redim soim.
Long wik i go pinis yumi lukim wanpela famili i pilim olsem famili-stadi em i bikpela samting bilong helpim ol nau long dispela “taim bilong las de” bilong planti hevi nogut tru. Famili i mas i gat man bilong soim gutpela rot long ol na olgeta long famili i mas wok gut wantaim. Papa i mas mekim wok bos na meri i mas helpim papa, na pikinini i mas wok gut wantaim tupela.
Olgeta insait long famili i mas bihainim ol lo bilong famili. Ol dispela lo i stap long Baibel na ol buk na nius bilong Sosaiti. Bilong kisim laip i stap oltaim, yumi mas bihainim ol dispela lo. Sapos yumi laik bihainim ol dispela lo, pastaim yumi mas kisim save long en. Olsem na yumi mas stadi. Famili-stadi inap helpim famili long kisim laip.
Nau yumi ken lukim wanpela famili ol i wok long kisim save long ol lo ol i mas bihainim, olsem i stap long sapta 13 long buk Yangpela.
Papa: Gutpela tru, yumi famili olgeta i ken mekim famili-stadi long nau nait na lainim sampela tok moa bilong Baibel. Bai mi wok strong long mekim gut wok bilong mi, na bai ol tok yumi kisim save long en inap helpim yumi. Tasol yupela i gat wanem wok?
Tom: Mipela mas givim bel long stadi na bekim ol askim.
Papa: Orait, yumi beten pastaim. [Malolo liklik bilong makim olsem ol i beten.]
Papa: Em, yumi beten pinis askim Jehova long blesim stadi bilong yumi. Nau yumi ken stadi long buk Yangpela long sapta 13. Mama, yu kaunim paragraf 1. [Mama i kaunim.]
Papa: Tenkyu mama. Tom, yu kaunim paragraf 2. [Tom i kaunim.]
Papa: [Em i tokim pikinini meri long kaunim paragraf 3 na 4. Pikinini meri i kaunim.]
Papa: [Em i kamapim askim bilong ol dispela paragraf. Bihain em i toktok liklik wantaim famili long ol bikpela tok bilong ol dispela paragraf.]
Papa: Em tasol. Stadi bilong yumi i pinis. Mi amamas long mekim dispela stadi, na olsem wanem long yupela? Yupela ol pikinini i ting olsem wanem long dispela famili-stadi bilong yumi?
Tom: Nau mi save, famili-stadi i gutpela samting bilong helpim yumi, na mi mas wok long givim bel moa yet long wok gut wantaim famili.
Mama: Mi amamas long stadi, na mi save, sapos yumi mekim famili-stadi bilong yumi long olgeta wik, bai yumi kisim ol gutpela blesing long Jehova.
Singsing 100 na beten.