Nupela Sediul Bilong Miting Bilong Kongrigesen
1 Long wik i kirap long Epril 21-27, 2008, ol bratasista long olgeta hap i bin kisim wanpela bikpela toksave, olsem: “Kirap long Janueri 1, 2009, Buk Stadi Bilong Kongrigesen bai kamap long wankain taim olsem Skul Tiokratik Bilong Autim Tok na Miting Bilong Wok. Bai yumi senisim nem bilong Buk Stadi Bilong Kongrigesen, bai yumi kolim olsem Baibel Stadi Bilong Kongrigesen.”
2 Sediul Bilong Dispela Miting: Taim bilong mekim dispela miting wantaim singsing na beten em 1 aua na 45 minit. Kirapim miting wantaim singsing na beten (5 min.), bihain mekim Baibel Stadi Bilong Kongrigesen (25 min.). Skul Tiokratik Bilong Autim Tok (30 min.) bai kamap bihain stret long en. Orait nau mekim wanpela singsing (5 min.) bilong kirapim Miting Bilong Wok (35 min.). Miting bai pinis wantaim singsing na beten (5 min.). Bilong helpim yu long redi long ol dispela miting, sediul bilong Baibel Stadi Bilong Kongrigesen, Skul Tiokratik Bilong Autim Tok, na Miting Bilong Wok, bai stap long Wok Kingdom bilong olgeta wan wan mun.
3 Long Papua Niugini, hevi long ka na pasin raskol i mekim na sampela kongrigesen i save mekim 4-pela miting long wanpela de. Ol dispela miting em Pablik Miting, Stadi Wastaua, Skul Tiokratik Bilong Autim Tok na Miting Bilong Wok. Sapos ol elda i skelim olsem ol bai bihainim yet sediul bilong mekim ol miting long wanpela de, orait ol i mas putim Baibel Stadi Bilong Kongrigesen tu i go insait long dispela sediul. Miting bai kirap wantaim singsing na beten (5 min.), bihain mekim Pablik Miting (30 min.). Orait nau mekim singsing (5 min.) bilong kirapim Stadi Wastaua (60 min.). Mekim wanpela singsing (5 min.) bilong pinisim Stadi Wastaua, bihain long en malolo (15 min.). Bihain long malolo mekim singsing (5 min.) na Baibel Stadi Bilong Kongrigesen (25 min.). Skul Tiokratik Bilong Autim Tok (30 min.) bai kamap bihain stret long en. Orait nau mekim wanpela singsing (5 min.) bilong kirapim Miting Bilong Wok (35 min.). Miting bai pinis wantaim singsing na beten (5 min.). Sapos ol elda i skelim ol samting na ol i ting i gutpela long mekim Baibel Stadi Bilong Kongrigesen paslain na pinisim miting wantaim Stadi Wastaua, dispela tu i orait. Sapos olsem, orait malolo (15 min.) paslain long Pablik Miting. Maski yupela i bihainim wanem sediul, yupela i mas mekim olgeta miting insait long 3 aua na 45 minit.
4 Baibel Stadi Bilong Kongrigesen: Mekim dispela miting long wankain pasin olsem yumi save mekim Stadi Wastaua. I no gat wok long mekim riviu bilong ol tok yumi stadi long wik i go pinis. Mekim sotpela kirap bilong tok tasol. Dispela bai givim inap taim long ol bratasista long mekim ol sotpela bekim. Wasman siaman bai bosim dispela wok bilong makim ol elda long lukautim dispela miting, em bai makim wanpela elda long wanpela wik.
5 Miting Bilong Wok: Miting Bilong Wok bai stap wankain yet, tasol ol hap bilong en bai sotpela. Mekim ol toksave insait long 5 minit. Long dispela rot, bai i gat inap taim long mekim ol bikpela toksave na ritim sampela pas i kam long brens ofis. I no gat wok long ritim ol toksave long bung bilong wok autim tok, klinim Haus Kingdom, na ripot bilong ol akaun—putim tasol long notisbot na bai ol bratasista i ken ritim. Ol brata i gat hap bilong mekim tok i mas redim gut, bihainim gut instraksen, na no ken kalapim minit ol i makim bilong wan wan hap.
6 Visit Bilong Wasman Sekit: Bai no gat senis long sediul bilong ol miting long wik bilong wasman sekit. Long Tunde, mekim Skul Tiokratik Bilong Autim Tok, na Miting Bilong Wok na bihain mekim wanpela singsing. Bihain wasman sekit bai mekim tok insait long 30 minit. Olsem yumi save mekim long nau taim wasman sekit i kam lukim kongrigesen, makim narapela apinun bilong mekim Baibel Stadi Bilong Kongrigesen, mekim wanpela singsing, na bihain wasman sekit bai mekim tok. Pinisim miting long rot bilong wanpela singsing na beten.
7 Bung Bilong Wok Autim Tok: Lain elda bai makim ol wasman bilong grup long lukautim ol grup bilong wok autim tok na bilong helpim ol wan wan insait long grup. Taim wanpela kongrigesen sevan i mas mekim dispela wok, orait em i mas kisim nem olsem “sevan bilong grup.”
8 Olsem ol dispela tok hia i kamapim, yumi bai kisim ol gutpela kaikai bilong spirit bilong strongim yumi long pas gut wantaim Jehova. Dispela bai inapim yumi long kamap man bilong autim gut tok na skulim gut ol man, na bai yumi lain long mekim planti gutpela wok.—Ef. 4:13, 14; 2 Ti. 3:17.
9 Pasin bilong stadi gut long ol dispela tok paslain long ol miting, dispela bai helpim yumi long tingim gut ol bikpela tok i kamap long olgeta wan wan miting. Yumi olgeta bai gat rot bilong bekim tok long ol miting, na long dispela rot narapela bai strongim bilip bilong narapela. (Ro. 1:11, 12; Hi. 10:24) As na yumi mekim olsem em bilong “olgeta manmeri i lukim pasin bilong [yumi] yet i kamap gutpela tru” long rot bilong “autim stret tok tru bilong God.”— 1 Ti. 4:15; 2 Ti. 2:15.
10 Yumi amamas long ol dispela bikpela senis i kamap long ol miting bilong yumi long kongrigesen. Yumi mas strong long mekim gutpela wok long ol tok em “wokboi i gat gutpela tingting” i givim long yumi na yumi mas i go klostu long Strongpela Wasman taim em i wok long redim yumi long wetim dispela taim bilong “bikpela hevi tru” klostu nau bai kamap.—Mt. 24:21, 45; Hi. 13:20, 21; KTH 7:14.
[Askim Bilong Stadi]
1, 2. Wanem ol senis bai kamap long ol miting kirap long Janueri 2009?
3. Ol kongrigesen bai mekim 5-pela miting long wanpela de, ol i mas bihainim wanem sediul?
4. Bai yumi mekim Baibel Stadi Bilong Kongrigesen olsem wanem?
5. Miting Bilong Wok bai senis olsem wanem?
6. Bai yumi bihainim wanem sediul long wik bilong wasman sekit?
7. Wanem wok bilong wasman bilong grup?
8. Yumi ken ting wanem gutpela samting bai kamap long nupela sediul bilong miting bilong kongrigesen?
9. Olsem wanem pasin bilong yumi wan wan long redim gut miting bai helpim yumi yet na ol narapela?
10. Yumi mas tingting strong long mekim wanem samting? Bilong wanem yumi mas mekim olsem?