Mipela i Amamas Long Singautim Yu Long Kam

ATING yu bin abrusim wanpela Haus Kingdom bilong ol Witnes Bilong Jehova long ples bilong yu na tingting olsem ol i save mekim wanem samting long dispela hap. Olsem wanem? Yu save olsem olgeta man i ken kam long ol miting bilong ol Witnes we i save kamap long olgeta wik? Ol i amamas long tok welkam long ol man i kam.

Tasol ating bai yu gat sampela askim. Bilong wanem na ol Witnes Bilong Jehova i save bung wantaim? Wanem samting i save kamap long ol dispela miting? Na ol manmeri husat i no wanpela Witnes Bilong Jehova i tok wanem long ol dispela miting?

“Singautim Olgeta Man”

Kirap long bipo yet, ol manmeri i save bung wantaim bilong mekim lotu na kisim save long God. Klostu 3,500 yia i go pinis, ol Israel i kisim dispela toksave, olsem: “Singautim olgeta man wantaim meri na pikinini na ol man bilong arapela kantri i stap long ol taun bilong yupela, bai olgeta i ken kam na harim dispela tok. Ol i ken harim na i stap aninit long God, Bikpela bilong yumi, na bihainim gut olgeta tok bilong em.” (Lo 31:12) Olsem na long Israel, ol bikpela man wantaim ol liklik pikinini tu, ol i bin lain long pasin bilong lotuim God Jehova na bihainim ol lo bilong em.

Inap olsem 1,500 yia bihain, taim ol i kirapim kongrigesen Kristen, ol miting i stap yet olsem wanpela bikpela samting bilong lotu i tru. Aposel Pol i tok: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, olsem sampela man i save mekim. Nogat. . . . Yumi wan wan i mas wok strong moa long strongim bel bilong ol arapela.” (Hibru 10:​24, 25) Taim famili i bung, dispela i save strongim pasin laikim namel long ol yet, na olsem tasol, taim ol Kristen i bung wantaim bilong lotu, dispela i save strongim pasin laikim namel long ol lain i laik lotuim God.

Olsem ol dispela skripsa i kamapim, ol Witnes Bilong Jehova i save bung wantaim long Haus Kingdom bilong ol 2-pela taim long olgeta wik. Ol dispela miting i helpim ol lain i kam bung long pilim tru, na kliagut, na bihainim ol stiatok bilong Baibel. Program bilong ol miting i wankain long olgeta hap bilong graun. Na olgeta wan wan miting i gat wok bilong en. Long kirap na pinis long miting, ol manmeri i kam bung i “strongim bel” bilong narapela narapela long rot bilong toktok gut wantaim. (Rom 1:​12) Wanem samting i kamap long olgeta wan wan miting?

Tok Bilong Baibel

Namba wan miting planti man i save kam long en em Tok Bilong Baibel, em bilong helpim olgeta manmeri, na planti taim ol i mekim dispela miting long wiken. Planti taim Jisas Krais i mekim tok bilong Baibel​​—wanpela bilong ol em dispela Bikpela Tok Long Maunten. (Matyu 5:1; 7:​28, 29) Aposel Pol i toktok long ol man bilong Atens. (Aposel 17:​22-​34) Olsem Jisas na Pol i bin mekim, dispela miting bilong ol Witnes Bilong Jehova i save kamapim wanpela tok i stret long olgeta manmeri, na ating em i namba wan taim bilong sampela long odiens long kam long dispela miting.

Dispela miting i kirap wantaim wanpela singsing i stap long buk Mekim Singsing Long Jehova.a Na olgeta husat i amamas long sanap na insait long singsing i ken mekim olsem. Bihain long beten, wanpela man em inap tru long mekim tok, bai mekim wanpela tok inap 30 minit. (Lukim blok “Ol Tok Bilong Baibel.”) Ol as tok em i kamapim i kam long Baibel. Na planti taim em i askim ol odiens long lukim ol skripsa na bihainim em taim em i ritim ol ves. Olsem na yu ken kisim Baibel bilong yu yet i kam, o paslain long miting yu ken askim wanpela Witnes Bilong Jehova long wanpela Baibel.

Stadi Wastaua

Long planti kongrigesen bilong ol Witnes Bilong Jehova, ol i save mekim Stadi Wastaua bihain long Tok Bilong Baibel, insait long 1-pela aua ol i kamapim ol askim na bekim long wanpela hap tok bilong Baibel. Dispela miting i strongim ol odiens long bihainim gutpela piksa bilong ol Beria long taim bilong Pol. Ol i “harim tok bilong Pol, na ol i laikim tru. Na long olgeta de ol i save ritim na skelim tok i stap long buk bilong God.”​—Aposel 17:11.

Ol i save mekim wanpela singsing bilong kirapim Stadi Wastaua. Man i lukautim stadi i kamapim ol tok na ol askim i stap insait long Wastaua bilong stadi. Yu ken kisim wanpela Wastaua bilong stadi long wanpela Witnes Bilong Jehova. I no longtaim i go pinis ol i bin skelim ol dispela stori: “Ol Papamama​​—Long Pasin Laikim Skulim Pikinini Bilong Yu,” “No Ken Bekim Pasin Nogut,” na “As na Klostu Nau Olgeta Pen na Hevi Bai Pinis.” Man i lukautim dispela hap bilong miting i mekim long rot bilong askim na bekim, na long laik bilong ol odiens yet ol i bekim ol askim. Planti taim bekim i save kam long ol lain husat i bin redi na tingting pinis long ol tok i stap long dispela stori wantaim ol skripsa i strongim dispela tok. Dispela miting i pinis long rot bilong wanpela singsing na beten.​​—Matyu 26:30; Efesus 5:​19.

Baibel Stadi Bilong Kongrigesen

Long wanpela nait long olgeta wik, ol Witnes Bilong Jehova i save bung gen long Haus Kingdom bilong insait long 3-pela hap program inap 1 aua na 45 minit. Namba wan hap, em Baibel Stadi Bilong Kongrigesen, ol i mekim inap 25 minit. Dispela miting i helpim odiens long kisim save moa long Baibel, na stretim tingting na pasin bilong ol, na kamap gutpela disaipel bilong Krais. (2 Timoti 3:​16, 17) Dispela miting i wankain olsem Stadi Wastaua, ol i stori long wanpela tok bilong Baibel na kamapim ol askim na bekim. Ol i bekim tok long laik bilong ol yet. Taim ol i mekim Baibel Stadi Bilong Kongrigesen, ol i mekim wok long wanpela buk ol Witnes Bilong Jehova i bin wokim.

Long dispela miting, bilong wanem ol i mekim wok long ol buk em Baibel i as bilong en? Long taim ol i raitim Baibel, pasin bilong ritim tasol Tok Bilong God, em i no inap. “Esra i ritim lo . . . bilong ol manmeri i ken save gut. Na tu ol Livai i autim as bilong lo long ol.” (Nehemia 8:8) Long sampela yia i go pinis, ol buk i stori long ol tok bilong Aisaia, Daniel, na Kamapim Tok Hait i bin helpim ol odiens husat i kam long dispela miting long kliagut long ol dispela hap bilong Baibel.

Skul Tiokratik Bilong Autim Tok

Skul Tiokratik Bilong Autim Tok i kamap bihain long Baibel Stadi Bilong Kongrigesen. Dispela miting bilong 30 minit em i bilong helpim ol Kristen long kisim pasin bilong ‘skulim gut’ ol man. (2 Timoti 4:2) Olsem wanem? I bin i gat wanpela taim na pikinini bilong yu o poroman bilong yu i kamapim askim long yu long God o long Baibel, na yu hatwok long givim wanpela gutpela bekim bilong dispela askim? Skul Tiokratik Bilong Autim Tok inap helpim yu long kamapim ol gutpela tok i kam long Baibel bilong bekim ol askim i hatwok long bekim. Long dispela rot yumi ken kamapim wankain tok olsem Aisaia, em i tok: “God, Bikpela i bin skulim mi long gutpela pasin bilong toktok, olsem na mi inap mekim gutpela tok bilong strongim bel bilong ol manmeri i no gat strong.”​—Aisaia 50:4.

Skul Tiokratik Bilong Autim Tok i kirap wantaim wanpela tok i kam long wanpela hap bilong Baibel, em ol i bin askim ol man i harim tok long ritim namel bilong wik. Long pinis bilong dispela tok, man i mekim tok bai askim ol odiens long kamapim ol sotpela tok long gutpela samting ol i bin painim taim ol i ritim dispela hap bilong Baibel. Bihain long dispela tok, ol sumatin em ol i insait long skul bai mekim tok em ol i bin makim bilong ol long mekim.

Ol i makim ol sumatin long ritim wanpela hap bilong Baibel long pletfom o long mekim soim long olsem wanem ol i ken skulim narapela man long wanpela tok bilong Baibel. Bihain long wan wan tok, wanpela man i gat save long givim gutpela tingting bai givim tok amamas long sumatin long samting em i mekim i stret​—ol tok em i givim long sumatin i kam long buk Skul Bilong Autim Tok. Bihain, taim em na sumatin tasol i stap, em i ken givim sampela tok long sumatin bambai sumatin i ken mekim gut moa tok bilong em.

Dispela hap bilong miting i helpim ol sumatin na ol odiens em ol i gat laik long kamap gutpela moa long pasin bilong rit, toktok, na skulim ol man. Long pinis bilong Skul Tiokratik Bilong Autim Tok, ol i mekim wanpela singsing em as tok bilong en i kam long wanpela hap bilong Baibel, na kirapim Miting Bilong Wok Autim Tok.

Miting Bilong Wok Autim Tok

Laspela hap bilong program, em Miting Bilong Wok Autim Tok. Long rot bilong ol tok, ol soim, man i go pas long miting i toktok long narapela, na ol askim na bekim, ol lain i stap long odiens i kisim skul long pasin bilong lainim gut ol man long tok i tru bilong Baibel. Paslain long Jisas i salim ol disaipel bilong em long go autim tok, em i skulim ol long pasin bilong autim tok. (Luk 10:​1-​16) Ol i bin mekim gutpela wok taim ol i redi gut long mekim wok autim tok. Bihain, ol disaipel bilong Jisas i givim ripot long em. (Luk 10:17) Planti taim ol disaipel i stori long ol gutpela wok bilong ol long ol wanbilip.​​—Aposel 4:​23; 15:4.

Dispela 35 minit program bilong Miting Bilong Wok Autim Tok i stap long wanpela nius ol i kolim Wok Kingdom Bilong Yumi, em ol i save wokim long olgeta mun. I no longtaim i go pinis ol i stori long ol dispela tok: “Famili i Bung Wantaim Bilong Lotuim Jehova,” “As na Yumi Save Go Bek Planti Taim,” na “Bihainim Pasin Bilong Krais Long Wok Autim Tok.” Program i pinis wantaim wanpela singsing na wanpela man ol i makim long kongrigesen bai mekim laspela beten.

Tok Em Ol Man i Kam Long Miting i Mekim

Ol kongrigesen i laik bai olgeta manmeri i bung i ken stap isi na amamas. Olsem, Andrew i bin harim planti stori nogut bilong ol Witnes Bilong Jehova. Tasol taim em i go long namba wan miting, em i kirap nogut long pasin bilong ol long tok welkam long em. Andrew i tok, “Mi amamas long stap long dispela ples. Mi kirap nogut long pasin pren bilong ol, na ol i gat laik long toktok wantaim mi.” Ashel, wanpela yangpela long Kanada, i tok: “Dispela miting i gutpela tru! I no hatwok long kisimgut ol tok i kamap.”

José, i sindaun long Brasil. Em i gat nem long ples bilong em olsem man i gat hatpela pasin. Maski em i gat dispela pasin, ol i singautim em long i go long wanpela miting long Haus Kingdom i stap long ples bilong em. Na em i tok olsem: “Ol lain long Haus Kingdom i amamas long tok welkam long mi, maski ol i save long hatpela pasin bilong mi.” Atsushi i stap long Japan, em i tok: “Mi mas tokaut stret olsem, long namba wan miting bilong ol Witnes Bilong Jehova mi go long en, mi pilim olsem mi narapela kain. Maski i olsem, mi luksave olsem ol i wankain olsem yumi ol narapela manmeri. Na ol i traim long mekim mi stap bel isi.”

Ol i Amamas Long Yu Kam

Olsem toktok ol i bin kamapim, bai yu kisim gutpela samting taim yu go long ol miting long Haus Kingdom. Bai yu kisim save long God, na long rot bilong ol tok yu harim i kam long Baibel, God Jehova bai skulim yu long olsem wanem yu inap long “stap gut.”​​—Aisaia 48:​17.

I no gat pe bilong ol miting bilong ol Witnes Bilong Jehova, na ol i no save singaut long mani. Olsem wanem? Yu laik go long wanpela miting long wanpela Haus Kingdom i stap klostu long yu? Mipela i amamas long yu mekim olsem.

[Futnot]

[Blok long pes 21]

Ol Tok Bilong Baibel

Ol Tok Bilong Baibel i kam long 170 narapela narapela tok em Baibel i as bilong en, na sampela bilong ol em:

◼ Man i Kamap Olsem Wanem​​—Samting Yu Bilip Long En i Bikpela Samting o Nogat?

◼ Bihainim Tingting Bilong God Long Marit na Maritpasin

◼ God Bai Bekim Pe Nogut Long Ol Man i Bagarapim Graun

◼ Rot Bilong Karim Ol Hevi Bilong Nau

◼ Yumi Bilong i Stap Nau Tasol?

[Piksa long pes 21]

Tok bilong Baibel

[Piksa long pes 21]

Stadi “Wastaua”

[Piksa long pes 22]

Baibel Stadi Bilong Kongrigesen

[Piksa long pes 22]

Skul Tiokratik Bilong Wok Autim Tok

[Piksa long pes 23]

Miting Bilong Wok Autim Tok