Askim

◼ Husat i mas kolim singsing bilong kirapim Skul Tiokratik Bilong Autim Tok, Miting Bilong Wok, Pablik Miting, na Stadi Wastaua, na ol i mas mekim olsem wanem?

Namel pepa bilong Wok Kingdom bilong Oktoba em Sediul Bilong Skul Tiokratik Bilong Autim Tok. Long dispela sediul ol i makim namba wan singsing bilong Skul Tiokratik Bilong Autim Tok bilong olgeta wan wan wik. Singsing bilong kirapim na pinisim Miting Bilong Wok long olgeta wik, i stap long pes 2 bilong Wok Kingdom Bilong Yumi. Na ol namba bilong singsing bilong Stadi Wastaua i stap long pes 2 bilong olgeta Wastaua. Brata i lukautim miting i mas kolim namba wan singsing, long wanem, singsing em i hap bilong dispela miting. Siaman bilong miting i bin kamap paslain, em i no ken kolim namba wan singsing.

Olsem: Wasman bilong Skul Tiokratik Bilong Autim Tok bai tok welkam long ol brata, kolim namba bilong singsing i kirapim miting, lukautim skul, na bihain singautim brata i mekim namba wan hap bilong Miting Bilong Wok i kam long pletfom. Brata i mekim namba wan hap bilong Miting Bilong Wok, em i mas kolim namba bilong singsing i kirapim Miting Bilong Wok.

Na olsem tasol, wanpela siaman bai kirapim Pablik Miting. Em bai tok welkam long olgeta man i kam bung na i singautim ol long mekim namba wan singsing em brata i mekim pablik tok i bin makim. Siaman (o narapela brata i winim mak na ol i makim em long beten) bai kirapim miting long rot bilong beten. Em bai kolim nem bilong brata i mekim tok na kolim het tok bilong tok. Taim tok i pinis, siaman bai tok tenkyu long ol gutpela tok brata i bin kamapim, tasol em bai no kolim gen ol bikpela tok bilong tok brata i bin mekim. Siaman bai toksave long het tok bilong pablik tok bai kamap long wik antap, na em bai singautim olgeta long stap bilong mekim Stadi Wastaua. I no gat wok long siaman i askim odiens long salim pasin laikim na gude bilong ol i go long kongrigesen bilong brata i mekim pablik tok. Nau siaman bai singautim brata i lukautim Stadi Wastaua i kam long pletfom.

Brata i lukautim Stadi Wastaua bai i kolim namba wan singsing bilong stadi. Em bai lukautim stadi long pasin i stret wantaim ol tok ol elda i bin kisim long pasin bilong lukautim stadi, na toksave long namba bilong laspela singsing. Brata i lukautim Stadi Wastaua bai singautim brata husat i bin mekim pablik tok long mekim beten bilong pinisim miting.

Pasin bilong bihainim ol dispela tok bai helpim yumi long mekim ol miting bilong kongrigesen long wankain pasin.