Askim

◼ Siaman bilong pablik-miting i mas bihainim wanem pasin?

Wok bilong siaman bilong pablik-miting em long mekim tok welkam na tok amamas long odiens, na long helpim miting i ron gut. Em i mas redi gut paslain long taim bilong miting na bai ol tok bilong em i ken mekim olsem. Bikpela samting em i mas mekim ol sotpela sotpela tok tasol. Taim em i tok welkam pinis long odiens, ol i mekim wanpela singsing, na beten. I stret siaman i mekim beten, tasol narapela brata tu inap mekim beten, na i gutpela sapos ol i bin makim em paslain yet. Orait nau siaman i kolim het-tok bilong pablik-tok na toksave long odiens long husat bai mekim tok. Odiens i save olsem dispela i wanpela bung bilong lotu, na wanpela Witnes Bilong Jehova​—⁠wanpela wokman bilong God⁠—bai mekim tok, olsem na i stret siaman i kolim man bilong mekim tok olsem “Brata ———.” Sapos em i bilong narapela kongrigesen, siaman i ken kolim nem bilong kongrigesen bilong em. I no gat wok long tokaut long ol mak samting dispela brata i winim, o hamas minit em bai mekim tok. Tasol siaman i mas kolim klia het-tok bilong pablik-tok na bai odiens i ken save gut long en.

Bihain long tok, siaman i mas mekim sotpela tok tasol. Em i ken toksave long het-tok bilong pablik-tok bilong wik antap, na singautim olgeta long i kam harim. Sapos stadi bilong “Wastaua” bai kamap bihain long pablik-tok, siaman i ken kolim het-tok bilong stadi, na singautim odiens long i stap yet na amamas long en.

Taim siaman i mekim sotpela tok tasol, em bai i no mekim tok i pulim tingting bilong odiens na ol i no tingim tok brata i bin mekim, na tu, em i no inap kolim gen wankain tok brata i bin kamapim long kirap o long pinis bilong pablik-tok. Odiens bai harim stret tok ol i bin kam bilong harim, em pablik-tok, na siaman bai i no inap pulim taim na mekim miting i abrusim taim.