Askim

◼ Yupela i mas mekim wanem taim brata bilong mekim pablik-tok i no kam hariap long miting?

Wan wan taim sampela bikpela samting inap kamap na i pasim brata long kam long taim stret bilong mekim tok bilong em. Sapos i gat as na yupela i ting olsem em bai kam liklik taim bihain, ol elda i ken pasim tok long mekim Stadi Wastaua pastaim, na Miting Bilong Pablik-Tok i ken kamap bihain. Olsem wanem sapos yupela i save tru olsem brata hia i no inap kam? Ating wanpela bilong ol elda yet i ken mekim wanpela tok em i redim pinis.

Sapos yupela i stretim gut ol samting paslain ating dispela hevi bai i no inap kamap. Brata i stretim ol pablik-tok i mas toksave gen long ol brata wanpela wik paslain long tok bilong ol. Tokim ol long taim bilong miting, ples na telefon namba bilong Haus Kingdom, na rot bilong painim Haus Kingdom. Brata bilong mekim tok i mas tingim gut ol dispela toksave. Em i mas tingim dispela samting i bikpela samting, na senisim ol samting em i mas mekim bilong inapim dispela wok. Sapos wanpela bikpela samting i kamap na i pasim em long mekim tok, em i mas toksave hariap long brata i lukautim ol pablik-tok bambai em i ken painim senis bilong em. Stretim gut ol samting na bai yupela i no ken senisim ol samting long de bilong miting. Sapos brata bilong mekim tok bai kamap sampela minit bihain, em i mas tokim ol narapela long ringim ol brata long Haus Kingdom na bai ol i ken tingting long ol samting ol i laik mekim.

Pasin bilong tingim gut wok bilong mekim pablik-tok, redim gut olgeta samting paslain, na mekim toksave gen long ol brata, na stretim gut ol wok bilong pablik-tok, ol dispela samting bai mekim na kongrigesen bai amamas long harim gutpela pablik-tok long olgeta wik.