“Ol Man Bilong Autim Tok Long Bel Isi God i Save Givim” Kibung Distrik Bilong 1996
1 Long 1995 inap 8,038 manmeri i bin kam long ol “Amamas Long Litimapim Nem Bilong God” Kibung Distrik i kamap long Papua Niugini long Disemba 1995 na Janueri 1996, na planti i tok ol i amamas long ol gutpela tok bilong program i bin givim nupela strong bilong spirit long ol. Bel bilong yumi i amamas tru taim yumi lukim 138 man bilong litimapim nem bilong Jehova i kamapim dediket bilong ol long rot bilong kisim baptais long wara. Na yumi amamas long kisim tupela nupela samting, em buklet Jehovah’s Witnesses and Education na buk Save i Bringim Man Long Laip Oltaim. Yumi amamas long ol gutpela tok yumi harim long yia i go pinis, na dispela i mas kirapim yumi long taitim bun bilong i go long “Ol Man Bilong Autim Tok Long Bel Isi God i Save Givim” Kibung Distrik bilong 1996 na harim program ol i redim pinis. Program bilong kibung distrik long dispela yia bai helpim yumi long holimpas yet bel isi God i givim long yumi, na ol tok bai kamapim gut ol wok yumi mas mekim bilong helpim ol narapela long kisim dispela kain bel isi. Olsem na yumi olgeta i mas singautim ol Baibel-stadi bilong yumi i kam, na helpim ol bambai ol i ken stap wantaim yumi long kibung. Ol dispela kibung bai strongim yumi tru na yumi ken amamas yet long mekim wok bilong Jehova long dispela taim bilong las de. Olsem wanem? Yu stretim pinis ol samting bambai yu ken i go long kibung na yu no ken lusim wanpela hap bilong program?
2 Tripela De Kibung: Mipela save yu bai amamas tru long dispela kibung na yu bai go bek long haus wantaim nupela strong. (2 Sto 7:10) Long dispela yia bai i gat ol tripela de kibung i kamap gen long sampela taun. Olsem wanem? Yu bin askim bos long givim taim long yu na bai yu ken i go long kibung long olgeta de? Sampela kibung bai kamap long taim ol pikinini i skul yet. Sapos pikinini bilong yu i save go long skul, long pasin daun yu bin tokim tisa olsem pikinini bai i no inap skul long Fraide, long wanem, em bai skul long wanpela bikpela samting bilong lotu?
3 Wastaua bilong Februeri 15, 1996, i kolim det bilong 8-pela kibung bai kamap long Papua Niugini. Tasol sampela det i senis. Awake! bilong Ogas 22, Kirap! bilong Julai 8, na Noga! bilong Julai-Septemba i kolim stret ol det na ples. Na dispela pepa tu i kolim ol det samting na i toksave long wanem kibung ol i makim yu bilong i go long en. Wanpela program tasol bai kamap long tok Inglis, em long Pot Mosbi, na long dispela kibung ol bai mekim ol tok long han tu bilong helpim ol yaupas. Bai i gat tupela kibung long tok Hiri Motu, tasol ol narapela kibung ol bai mekim long tok Pisin. Long olgeta de program bai kirap long 9:30 a.m. na bai pinis long Sande long 4:00 p.m.
4 Kibung Bai Helpim Yu o Nogat? Wastaua bilong Ogas 15, 1993 i bin kamapim tok bilong Sindaun 27:17, “Ol i save wokim samting long ain bilong sapim ain. Olsem tasol, wanpela man i save helpim tingting bilong narapela man i kamap gutpela,” na bihain Wastaua i tok: “Yumi olsem samting ol i mas sapim long olgeta taim. Yumi mas kamapim bel bilong yumi olsem yumi laikim tru Jehova, na ol samting yumi mekim i mas stret wantaim bilip bilong yumi, olsem na yumi mas wok strong long stap narapela kain long ol man bilong dispela graun.” Olsem wanem yumi ken bihainim dispela tok?
5 Yumi stap narapela kain long ol man bilong dispela graun na yumi mas wok yet long i stap olsem. Bilong i stap olsem oltaim yumi mas taitim bun, na long dispela rot bai yumi wok strong long mekim olgeta kain gutpela pasin. (Ta 2:14) Long dispela as, stori bilong Wastaua yumi kamapim pinis i tok moa olsem: “Sapos yumi bung wantaim man i laikim tru Jehova, ol i ken kirapim yumi long laikim tru Jehova, ol i ken kirapim yumi long laikim narapela na mekim gutpela pasin long em.” Kibung distrik em wanpela samting Jehova i givim long yumi bilong helpim yumi long i stap strong long ol samting bilong spirit. Yumi no ken tru lusim wanpela hap bilong program.
6 Man i Gat Gutpela Tingting Bai Putim Gut Yau: Pasin bilong putim gut yau em wanpela gutpela pasin man i mas wok strong long kisim. Ol i tok, man i save holim long tingting bilong em 50 pesen tasol bilong ol tok em i save harim—maski em i ting em i bin putim gut yau. Dispela taim yumi stap long en i gat planti samting i save pulim nabaut tingting bilong yumi, olsem na ating sampela taim yumi hatwok long putim tingting i go long wanpela samting inap longpela taim. Olsem wanem? Yumi inap traim long putim gut yau longpela taim moa, olsem long taim yumi sindaun wantaim bikpela lain na harim wanpela tok? Taim yu go bek long haus bihain long kibung, sapos wanpela i askim yu long stori gen long ol bikpela tok bilong program bilong wan wan de, bai yu inap mekim olsem o nogat? Olsem wanem yumi olgeta i ken mekim pasin bilong putim gut yau long ol tok bilong olgeta wan wan hap bilong program bilong kibung i kamap gutpela moa?
7 Bikpela samting em yumi mas i gat laik tru long kisim save, long wanem, dispela presen God i givim yumi, em pasin bilong holim gut ol samting long tingting, i no inap wok gut sapos yumi yet i no gat laik long kisim save. Olsem: Sapos man i gat laik tru long kisim save long wanpela samting, bai i no hatwok long em long tingim gut ol bikpela tok bilong wanpela tok o wanpela hap bilong program i stori long dispela samting. Tasol yumi mas putim gut yau moa yet long ol tok yumi harim long ol kibung distrik. Sapos yumi gat laik tru long kisim save na yumi putim gut yau long olgeta wan wan tok i kamap long program bilong kibung, dispela inap helpim i stap bilong yumi long ol samting bilong spirit long nau na long bihain tu. Ol kibung i save skulim yumi long ol pasin bilong Jehova na ol samting yumi ken mekim bilong inapim wok bilong kisim bek ol man. (1 Ti 4:16) Tingim yu yet olsem wanpela sip em biksi i sakim nabaut. Ol tok promis bilong Jehova long ol gutpela samting yumi wetim i olsem strongpela anka. Sapos yumi no save putim gut yau long ol miting Kristen na yumi larim tingting bilong yumi i raun, ating bai yumi lusim sampela bikpela tok bilong stretim na skulim yumi, em ol samting inap helpim yumi long abrusim bagarap long spirit—olsem wanpela sip i bagarap long solwara.—Hi 2:1; 6:19.
8 Long planti hap, ol brata bilong yumi i save lusim bikpela hap strong bilong i go long ol miting. Pasin bilong ol long putim gut yau long ol tok bilong kibung i gutpela tru. Tasol long sampela hap taim program i stap yet, sampela i save wokabaut nating na toktok wantaim na dispela i pulim ai na tingting bilong ol brata i sindaun na harim ol tok bilong kibung. Sampela i save kam bihaintaim. Na sampela ol i sindaun longwe long hap bilong sindaun, na ol i no inap harim gut ol tok bilong program. Long dispela yia Dipatmen Bilong Ol Atendan bai wok long stretim dispela hevi; gutpela sapos yumi olgeta i ken sindaun long taim siaman i singautim yumi long mekim olsem. Mipela bai amamas sapos yupela i bihainim tok na wok gut wantaim ol dispela brata.
9 Yumi ken mekim wanem na bai yumi putim yau moa yet long ol tok bilong kibung na ol dispela tok i ken pas gut long tingting bilong yumi? Mipela i laik kolim gen sampela tok mipela i bin mekim long ol yia i go pinis: (a) Tingim nambawan as na yu go long ples kibung. Em bilong harim tok na kisim save—i no bilong raun na painim amamas. (Lo 31:12) Sapos inap, yu mas slip hariap long nait. Sapos skin i les tru taim yu kam long kibung, ating bai yu hatwok long putim gut tingting long ol tok. (b) Tingting long kirap hariap bilong painim PMV na bai yu ken sindaun paslain long program i kirap. Sapos yu kamap stret long taim program i laik kirap, ating bai yu lusim sampela hap tok. (c) Raitim sampela hap tok tasol bilong ol bikpela tok. Tasol sapos yu wok long raitim planti tok tumas, ating yu no inap putim gut yau long ol tok. Taim yu raitim ol tok long notbuk, was gut yu no lusim sampela bikpela tok, long wanem, tingting bilong yu i pas tumas long ol tok yu raitim. (d) Taim ol i kolim nem bilong wanpela tok bai kamap, yu mas amamas na redim tingting bilong yu long harim dispela tok. Askim yu yet olsem, ‘Dispela tok inap helpim mi olsem wanem long laikim moa Jehova na amamas moa long em? Olsem wanem dispela save mi bai kisim inap helpim mi long kamapim moa ol nupela pasin? Em inap helpim mi olsem wanem long mekim wok bilong mi long autim tok i kamap gutpela moa?’
10 Mekim Ol Pasin i Ken Givim Biknem Long Wok Bilong Yumi: Pol i kirapim Taitus long “mekim ol gutpela pasin tasol, bai ol man i ken lukim pasin bilong [em] na bihainim.” Sapos Taitus i autim tok i stret em inap helpim ol narapela long ‘givim biknem long tok tru bilong God, em Man bilong kisim bek yumi.’ (Ta 2:7, 10) Long olgeta yia, yumi save harim tok olsem i bikpela samting long bihainim gutpela pasin taim yumi go i kam long kibung, na tu, long taim yumi stap long ples slip na long ples kibung yet. Long yia i go pinis mipela i harim wanpela gutpela ekspiriens em mipela i laik kamapim long yupela tu.
11 Het-tisa bilong wanpela komyuniti skul i kirapim lain bilong bosim skul long larim ol Witnes Bilong Jehova i mekim wok long ol klas-rum olsem ples slip—em namba wan taim ol i mekim olsem, maski dispela i no stret wantaim lo bilong skul. Bipo sampela lain i mekim wok long ol klas-rum na hevi i bin kamap, long wanem, ol i bagarapim ol samting bilong klas-rum, olsem na lain bilong bosim skul i no orait moa long ol sampela lain i ken mekim wok long ol klas-rum. Het-tisa i save olsem ol Witnes Bilong Jehova i gat gutnem olsem wanpela klinpela lain, na em i tokim lain bilong bosim skul olsem skul bai kamap klin moa, winim bilong pastaim. Ol brata i bin wok strong tru long klinim ol rum na ol i penim sampela rum tu; ol tisa i kirap nogut tru na amamas long en taim ol i lukim! Ol i laik bai yumi kam bek gen.
12 Tru, long klostu olgeta kibung bai i no gat kaikai moa, tasol yumi mas tromoi yet bikpela hap mani long baim ples kibung na ol narapela samting. Yumi save baim olsem wanem? Yumi baim long rot bilong ol kontribusen yumi olgeta i givim long laik bilong yumi yet. Wanpela sista i gat ol yangpela pikinini i bin kam long kibung, na em i gat liklik mani tasol. Tasol maski olsem, em wantaim ol pikinini i bin givim liklik kontribusen. Em samting bilong yumi wan wan long yumi laik givim hamas, tasol mipela i save olsem yupela amamas long mipela i kirapim tingting bilong yupela long dispela samting.—Ap 20:35; 2 Ko 9:7.
13 Klos Bilong Yumi i Kamapim Yumi Husat: Klos bilong yumi i makim yumi wanem kain man o meri na yumi gat wanem kain tingting long ol narapela. Klostu olgeta yangpela na planti manmeri i save lukim ol narapela long skul o long ples wok i putim ol klos nabaut tasol. Long olgeta yia stail bilong ol klos i go nogut moa, na sampela yumi kirap nogut tru long en. Sapos yumi no was gut, ol wanlain inap pulim yumi long bihainim pasin bilong ol long bilas. Planti pasin bilong bilas i no stret long yumi putim long taim bilong ol miting. Yumi olgeta i laik pasim ol klos i stret long ol wokman Kristen long taim bilong kibung na long taim yumi bung na amamas wantaim bihain long program i pinis. Long olgeta taim i gutpela sapos yumi tingim tok aposel Pol i givim long ol Kristen, em i tok, ol i mas “putim ol gutpela klos samting, inap tasol long ol. Ol i no ken hambak.”—1 Ti 2:9.
14 Em wok bilong husat long skelim wanem kain klos i stret, o i no makim pasin hambak, na i “gutpela klos”? Man i no save hambak, em i “no save bikhet o litimapim nem bilong em yet,” nogat; em i daunim em yet. Na dikseneri i tok, man i gat pasin daun em “i no mekim ol samting bilong pulim ai bilong ol narapela man.” Sosaiti na ol elda i no ken putim sampela lo long samting bilong klos o bilas. Tasol ating i no hatwok tumas long Kristen i ken save wanem kain klos i no stret liklik long putim. (Skelim wantaim Filipai 1:10.) Klos na bilas bilong yumi i no ken pulim tumas ai bilong ol narapela. Bilas bilong yumi i mas gutpela na bai ol narapela i ken amamas long lukim, tasol em i no ken makim klos bilong ol ausaitman na i no ken bagarapim bel bilong narapela. Yumi ol man bilong autim gutnius, olsem na taim yumi pasim klos i stret na yumi bilas gut long taim yumi stap long hap kibung i kamap long en, dispela i litimapim nem bilong Jehova na givim gutnem long oganaisesen. Ol papamama i mas makim gutpela piksa long pikinini bilong ol na tu, ol i mas lukluk long bilas bilong pikinini—em i stret bilong i go long kibung o nogat? Ol elda i mas stap olsem gutpela piksa na sapos ol i mas givim sampela tok long wanpela brata o sista bilong stretim em, ol i mas mekim long gutpela pasin.
15 Ples Slip: Mipela i kamapim pinis stori bilong wanpela komyuniti skul, ol tisa bilong en i bin tok olsem ol i kirap nogut long klinpela pasin bilong ol brata, na ol i bin wok strong long mekim ol samting bilong skul i kamap gutpela, winim bilong pastaim. Long sampela kibung, ol i mekim wok long ol haus slip bilong skul bilong putim ol brata ol i stap longwe long taun. Yumi mas wok yet long kamapim ol dispela pasin Kristen sapos ol i makim yumi bilong i stap long haus slip bilong wanpela skul. Yumi amamas long ol lain bilong bosim ol skul i bin wok gut wantaim Sosaiti na larim yumi i baim ol klas-rum long liklik pe. Na ol brata i no ken kukim kaikai long ol klas-rum; ol i ken mekim wok long haus kuk sapos i gat, o sapos ol i bin stretim gut tok wantaim ol bos bilong skul long wanpela rot bilong redim kaikai bilong ol.
16 Narapela rot bilong helpim ol brata bilong yumi taim ol i kam long kibung, em yumi ken kisim ol i kam stap long haus bilong yumi. Tasol sapos wanpela brata i kisim yumi long haus bilong em, yumi no ken ting dispela gutpela pasin em i mekim i olsem samting nating na yumi stap inap sampela de moa bihain long kibung i pinis; nogut dispela i givim hevi long brata. Ol brata i go slip long haus bilong narapela brata i mas was gut long pasin ol yet na pikinini bilong ol i mekim; ol i mas tingim gut papa bilong haus na no ken bagarapim ol samting bilong em o go insait long sampela hap bilong haus i no stret ol i go insait long en. Sapos i gat sampela hevi olsem i kamap, papa bilong haus i ken toksave long wasman bilong lukautim ol rum slip long kibung.
17 Kamera, Video-Kamera, Redio-Kaset: Mipela i no gat tok long sampela i laik mekim wok long kamera na video-kamera samting, tasol ol i mas tingim gut ol narapela i sindaun harim tok. Sapos yumi wokabaut kisim piksa long taim ol brata i mekim tok, dispela bai pulim ai na tingting bilong ol narapela i laik harim tok, na tu, yumi yet bai lusim sampela hap bilong program. Ating kibung inap helpim yumi moa yet taim yumi putim gut yau long ol tok na raitim sampela liklik tok long notbuk. No ken skruim redio-kaset samting long paua bilong saun, na nogut dispela samting i pasim rot bilong ol man i wokabaut i go i kam.
18 Ples Sindaun: Dispela i no wanpela bikpela hevi, tasol mipela laik kirapim gen tingting bilong yupela olsem: YU KEN KISIM OL SIA BILONG FAMILI BILONG YU TASOL WANTAIM OL MAN I BIN KAM WANTAIM YU LONG KA BILONG YU. Sapos yumi bihainim dispela tok bai yumi amamasim Jehova na lain ‘gutpela wokboi,’ em ol i save givim kaikai bilong spirit long yumi.—Mt 24:45.
19 Sampela brata bilong yumi em hap skin bilong ol i bagarap samting, na ating ol i kam long kibung long wilsia na famili bilong ol i mas lukautim ol. Yumi pilim amamas tru taim yumi lukim ol dispela brata na sista long kibung, em ol i strong long ol i no ken lusim ol kaikai bilong spirit. Namba wan lain i gat wok long lukautim ol brata i gat bikpela sik, em famili bilong ol yet na ol wanblut. Dipatmen Bilong Dokta long kibung i no inap lukautim ol man i gat bikpela sik. Sapos wanpela long famili bilong yu i mas i gat man bilong lukautim em, no ken lusim em—nogut em i stap wanpis na bikpela hevi i kamap. Ol elda i mas tingim gut sapos i gat wanpela long kongrigesen bilong ol em i gat bikpela sik samting, na ol i mas stretim rot paslain long kibung bambai wanpela i ken lukautim em.
20 Kaikai Bilong Yumi Long Taim Bilong Kibung: Long sampela kibung ol i bin wokim liklik kaikai, tasol planti brata i tok amamas long ol gutpela samting pasin bilong kisim kaikai bilong yumi yet i kam long kibung i save kamapim. Wanpela brata i raitim pas na i tok: “Mi ting i gat wanpela bikpela blesing bilong spirit i kamap long dispela pasin, olsem: Nau taim na strong bilong yumi i bilong mekim ol samting bilong spirit tasol. Mi no bin harim wanpela i tok ol i no amamas long dispela samting.” Wanpela sista i raitim pas na i tok: “Yupela ol gutpela brata i makim gutpela pasin long mipela i ken bihainim, na long dispela rot yupela i kirapim mipela ol Kristen wan wan long skelim mipela yet na painim rot long stretim sindaun bilong mipela na kisim tasol ol samting bilong skin mipela i mas kisim, bambai mipela i ken mekim bikpela wok moa bilong Jehova.” Wanpela wasman bilong raun i raitim pas na i stori long pasin bilong bipo long redim kaikai olsem: “Dispela pasin bilong bipo i mekim na planti brata i bin lusim olgeta tok bilong kibung.” Na long pas wanpela elda i stori long kaikai ol brata i kisim i kam long kibung olsem: “Kaikai ol i holim em inap long ol, na ol i no bin sanap na wet long lain bilong kisim.” Na las tru, wanpela sista i raitim pas na i tok: “Taim program i pinis, olgeta i stap isi na i stap amamas.” Yes, olgeta wan wan i kisim kaikai i kam bilong strongim skin inap long taim program bilong apinun i pinis. Planti i tok, ol i gat sampela hap taim moa bilong raun na lukim ol pren.
21 Long dispela yia bai i no gat kaikai long planti kibung distrik. Komiti bilong olgeta wan wan kibung bai toksave long ol kongrigesen sapos ol bai wokim kaikai. Plis lukim gen pepa ol i putim wantaim Wok Kingdom Bilong Yumi bilong Novemba 1995, paragraf 21, bilong kisim sampela tingting long wanem kain kaikai i gutpela na inap long strongim skin, em yupela i ken bringim i kam long kibung. Plis tingim: No ken kisim ol samting ol i wokim long glas o bringim bia i kam long kibung. Na sapos yu mas kisim liklik eski i kam, em i mas inap tasol long putim aninit long sia bilong yu. Gutpela sapos yu tingim dispela samting: Taim bilong belo em inap bilong yumi kaikai na dring. Olsem yumi save mekim long taim bilong ol miting long Haus Kingdom, yumi no save kaikai long taim ol brata i mekim tok long kibung. Long dispela rot yumi kamapim olsem yumi daun long dispela pasin God i putim bilong lotuim em na yumi tingim tru kaikai bilong spirit em i givim long yumi.
22 Klostu nau namba wan bilong “Ol Man Bilong Autim Tok Long Bel Isi God i Save Givim” Kibung Distrik bai kirap. Olsem wanem? Yu stretim pinis ol samting bambai yu ken i go, na yu redi long bung wantaim ol brata sista inap 3-pela de na kisim ol gutpela samting bilong spirit? Mipela i beten askim Jehova long blesim wok yu mekim bilong kam long kibung.
[Blok long pes 6]
Sampela Samting Bilong Kibung Distrik Yumi Mas Tingim
Baptais: Ol bai makim ples sindaun bilong ol man i laik kisim baptais, olsem na gutpela sapos ol man i laik kisim baptais ol i sindaun long ol dispela sia taim program i no kirap yet long Sarere long moningtaim. Mipela i lukim olsem sampela i bin putim klos waswas i no stret long man i kisim baptais. Man i laik kisim baptais, em i mas kisim klos waswas na taul bilong em i kam long kibung. Klos waswas i mas stret long ol Kristen i pasim. Taim ol elda i mekim ol askim wantaim ol man i laik kisim baptais long buk Lo, ol i mas save gut olsem olgeta wan wan i klia gut long ol dispela samting. Taim brata i mekim pinis tok bilong baptais na beten, siaman bilong program bai givim sampela toksave long ol man i laik kisim baptais na bihain bai yumi mekim singsing. Taim yumi mekim pinis laspela hap bilong singsing, ol atendan bai tokim ol man i laik baptais long wanem hap ol i mas i go long en bilong kisim baptais. Baptais i makim olsem man i dediket long Jehova, na em samting bilong em yet wantaim Jehova, olsem na i no stret long man i laik baptais i holim han samting bilong narapela na tupela o tripela i kisim baptais wantaim, nogat; mipela i no save baptaisim ol man long dispela rot.
Kat Bilong Pasim: Taim yumi go i kam long kibung na taim yumi stap long ples kibung, gutpela sapos yumi pasim kat bilong 1996 kibung long klos bilong yumi. Ol man i lukim dispela kat ating bai ol i laik save long kibung bilong yumi, na nau rot i op bilong yumi ken autim tok long ol. Yumi mas kisim dispela kat na karamap plastik bilong en long kongrigesen bilong yumi yet, long wanem, bai yumi no inap kisim long kibung. No ken wet inap sampela de paslain long kibung tasol bilong askim long kisim kat bilong yu yet na famili bilong yu. No ken lusim tingting long karim kat “Advance Medical Directive/Release.” Ol painia na ol brata sista i wok long Betel, ol i mas karim kat wantaim ol, em kat Bilong Toksave Olsem Man i Mekim Wok Painia.
Ol Pikinini: Papamama, oltaim yupela i mas save ol pikinini bilong yupela i stap we, na yupela i mas lainim ol long pasin bilong sindaun gut; dispela em i wok bilong yupela. Taim brata i givim tok, gutpela sapos pikinini i sindaun klostu long yupela, na gutpela tu sapos ol i go long toilet taim program i no kirap yet. Lainim ol olsem, taim ol i go long toilet, ol i mas wasim gut han bilong ol.
Was Gut: Sapos yumi was gut, ating bai yumi no kisim hevi. Planti taim ol raskol i save stilim samting long man i lusim ples bilong em na i go i stap long narapela hap. Yu mas lokim gut ka long olgeta taim, na no ken larim sampela samting i stap ples klia insait long ka; nogut ol man i brukim ka na kisim. Taim planti man i bung wantaim, dispela i save pulim ol stilman i kam. Na tu, sampela man i kam long kibung ol i no Kristen tru. Olsem na no ken lusim sampela samting i stap long sia bilong yu, nogut ol dispela samting i pulim ai bilong ol. LONG OLGETA TAIM YU MAS SAVE, OL PIKININI BILONG YU I STAP WE.
Sapos yu laik save long sampela samting bilong kibung, no ken raitim pas o ringim bos bilong ples kibung. Sapos ol elda i no save, orait, salim pas i go long atres bilong kibung i stap long fail bilong kuskus bilong kongrigesen.