Ol Yangpela i Laik Save . . .

Hau Bai Mi Kisim Gut Pasin Bilong Mekim Toktok Long Pablik?

“Mi pilim olsem ol man i lukim olgeta liklik pasin kranki na pret bilong mi. Mi no inap tingting gut long ol tok mi laik kamapim. Mi pilim olsem ol i lukim mi na lap long mi long bel bilong ol.”​—⁠Sandy.a

HAP bilong wokim asembli long skul i pulap. Long saun sistem yu harim ol i kolim nem bilong yu, na wantu olgeta manmeri i lukluk long yu. Yu pilim olsem liklik hap yu mas wokabaut long en bilong kamap long pletfom em i longwe olsem wanpela mail. Tuhat i kamap long han, lek i no gat strong, na maus bilong yu i drai olgeta. Na paslain long yu inap rausim, traipela tuhat i ran i go daun long pes bilong yu. Yu pilim sem nogut tru! Ol man i no inap sutim yu long gan olsem ol i mekim long ol man nogut, tasol yu pilim ol bai mekim olsem long yu.

Tru tumas, planti bilong yumi i pret long mekim toktok long ai bilong ol arapela. (Jeremaia 1:​5, 6) Sampela i tok ol i pret moa long toktok long pablik winim pret bilong ol long indai! Maski yu pilim olsem wanem long dispela, i gat sampela gutpela as na yumi laik tingim pasin bilong yumi long mekim toktok long pablik. Yumi ken skelim sampela bilong ol dispela as, na tingting long hau yu inap kisim gut pasin bilong toktok long pablik.

Singautim Yu Long Mekim Toktok

“Pasin bilong mekim toktok long pablik em wanpela samting olgeta manmeri i mas save long mekim.” Dispela em tok i stap long edvetaismen bilong wanpela kos long mekim toktok long pablik. Ating bihain, yu tu i mas sanap na mekim tok long wanpela odiens. Planti skul long nau ol i laik kirapim ol stiuden long mekim toktok long pablik. Wanpela yangpela meri, nem bilong em Tatiana, i tok: “I gat planti taim mi mas mekim toktok long ai bilong ol klasmeit bilong mi long skul.” Ol stiuden i mas redi long mekim toktok taim ol i mas sanap na givim ol ripot samting o ol i insait long paitim toktok i go i kam long klas.

Bihain taim yu kirap mekim wok mani, ol inap askim yu long skulim sampela wanwok, o kamapim tingting bilong kampani long wanpela kastama, o stori gut long ripot bilong ol akaun long ol bosman bilong kampani. Pasin bilong mekim gut toktok inap helpim man i holim kain kain wok olsem wok maneja, niusman, pablik rilesens, na wok selsman.

Tasol olsem wanem sapos yu laik wok olsem wanpela leba o kuskus? Pasin bilong toktok gut taim yu laik painim wok inap mekim na ol i kisim yu long wok o nogat. Pasin bilong mekim gut toktok inap helpim yu long taim yu mekim wok mani. Taim em i pinisim skul, Corrine i bin wok long wanpela haus kai inap 3-pela yia. Em i tok: “Sapos yu inap toktok gut, ol man bai pilim olsem long tingting yu bikpela pinis na yu inap lukautim sampela wok moa. Em inap mekim na yu kisim wanpela wok i gutpela moa, o kisim bikpela pe moa, na tu, ol man bai rispek moa long yu.”

Na tu, ol yangpela Kristen i save mekim toktok long ai bilong ol arapela man taim ol i mekim lotu. (Hibru 10:23) Taneisha i tok: “Em i bikpela samting long kamapim klia toktok yu laik mekim. Yumi gat gutpela wok long autim gutnius bilong Kingdom Bilong God.” (Matyu 24:14; 28:​19, 20) Insait long kongrigesen na long taim ol i autim tok, ol yangpela Kristen i ‘no inap pasim maus. Ol i mas autim tok long olgeta samting ol i bin lukim na harim.’​—⁠Aposel 4:20; Hibru 13:⁠15.

Olsem na taim yu lain long mekim gut pasin bilong toktok dispela inap helpim yu long kain kain rot. Tasol maski yu lain, ating bai yu pret na guria liklik taim yu tingting long mekim toktok long ai bilong ol man. Olsem wanem? I gat samting inap helpim yu na yu no pret? Yes, i gat.

Daunim Pasin Bilong Pret

Dokta Morton C. Orman, wanpela saveman long pasin bilong pret na mekim toktok long pablik, i tok: “Bilong toktok bilong yu i kamap gutpela i no olsem yu mas stap olsem saveman o mekim toktok i gutpela olgeta. Long mekim toktok long pablik bikpela samting i olsem: toktok long odiens long samting em inap helpim ol.” Olsem na tingting long tok yu laik bai odiens i kisim, no ken tingting long yu yet o long pret yu pilim. Sampela man long taim bilong ol aposel i ting aposel Pol i no save tumas long mekim gutpela toktok, tasol long olgeta taim em i toktok em i save toktok long ol samting bilong helpim man, olsem na toktok bilong em i karim kaikai. (2 Korin 11:⁠6) Wankain olsem, sapos yu kamapim tok i gat bikpela mining na yu bilip tru long en, pasin bilong pret bai pinis hariap.

Ron Sathoff, narapela man i gat nem long mekim toktok na skulim ol man, i tok: No ken ting toktok yu mekim i kain olsem yu insait long wanpela so. Nogat. Mekim olsem yu toktok wantaim wanpela man. Yes, traim toktok wantaim odiens olsem yu toktok wantaim ol wan wan man, i no olgeta wantaim. Kamapim ol tok i soim olsem yu tingim tru odiens bilong yu, na mekim toktok long wankain pasin olsem yu save mekim taim yu toktok wantaim ol man long olgeta de. (Filipai 2:​3, 4) Taim yu mekim toktok olsem yu toktok wantaim narapela man, dispela bai daunim pret na bai yu stap isi moa.

Narapela samting i mekim man i tingting planti em sapos em i pret em bai mekim sampela tok i semim em o em i ting odiens bai skelim skelim ol samting em i mekim. Lenny Laskowski, wanpela saveman bilong mekim toktok na skulim man, i tok olsem ol odiens i save gat gutpela tingting long ol tok ol man bai mekim. Em i tok: “Ol i laik bai yu mekim gut.” Olsem na yu tu i mas ting olsem yu bai mekim gut. Sapos yu inap, paslain long yu mekim tok, bungim na tok gude long sampela man husat i kam bilong harim tok bilong yu. Tingim ol olsem ol pren bilong yu, no ken ting ol i birua bilong yu.

Na tu tingim, pasin bilong pret liklik i no nogut olgeta. Wanpela saveman i tok: “Pasin bilong pret liklik em i gutpela. Em bai helpim yu na toktok yu laik kamapim.” Wai na i olsem? Bikos taim man i pret liklik dispela i soim olsem em i gat pasin daun, na dispela bai helpim yu long no ken bilip tumas long yu yet. (Sindaun 11:⁠2) Planti ol man bilong spot, mekim musik, na ol ekta i pilim olsem sapos ol i pret liklik dispela i strongim ol na samting ol i mekim i kamap gutpela moa. Na i wankain long ol man i mekim toktok long pablik.

Bilong Mekim Gut

Sampela yangpela Kristen i bihainim pinis ol dispela tok na long dispela rot ol i bin mekim gutpela wok taim ol i mekim toktok long skul, ples wok, na long kongrigesen bilong ol. Skelim, ating sampela bilong ol dispela tok inap helpim yu.

Jade: “Ol samting yu laik stori long en, kamapim long tok bilong yu yet. Yu yet i mas bilip olsem dispela tok inap helpim man. Sapos yu pilim olsem tok yu kamapim em i bikpela samting, orait odiens bai i gat wankain tingting.”

Rochelle: “Mi save rekodim mi yet long vidio, dispela i helpim mi. Ol popaia i stap ples klia. Na tu, taim yu makim samting yu bai stori long en, makim samting yu laikim. Long toktok yu mekim ol man inap luksave olsem yu yet yu laikim dispela tok yu mekim.”

Margrett: “Mi luksave olsem taim mi yusim wanpela autlain, dispela i winim pasin bilong raitim olgeta tok mi bai mekim. Autlain i mekim na mi mekim toktok long pasin bilong mi yet na olsem mi toktok wantaim narapela man. Na tu, bilong mekim bel bilong mi i stap isi mi save pulim bikpela win paslain long mi kirap toktok.”

Corrine: “Lap long sampela popaia bilong yu. Yumi olgeta i save popaia. Yu mas traim bes bilong yu, em tasol.”

Long olgeta samting yu laik mekim, olsem ol spot, at, o musik, yu mas mekim mekim planti taim. Tatiana i tok i gutpela long redim tok bilong yu paslain tru long taim bilong mekim na bai yu gat planti taim long prektisim. Na tu, no ken givap. Em i tok: “Taim yu mekim toktok long ai bilong ol man planti taim dispela bai helpim yu long stap isi taim yu mekim tok.” I gat wanpela rot moa long kisim helpim, na yumi no ken lusim tingting long dispela rot, moa yet taim ol i singautim yu long mekim toktok long samting bilong lotu i tru.

Helpim i Kam Long Bikpela Man Bilong Givim Ol Tok

Taim Devit i yangpela na em i no kamap king bilong Israel yet, em i gat nem pinis olsem “man bilong mekim gutpela tok.” (1 Samuel 16:18) Wai na i olsem? Bikos taim em i yangpela na em i wok planti aua long lukautim ol sipsip, Devit i bin pas gut wantaim Bikpela Man Bilong Givim Ol Tok, em God Jehova, long rot bilong beten. (Song 65:⁠2) Pasin bilong em long pas gut wantaim God i redim em long mekim tok i klia, strong, na inap pulim tingting bilong man long taim bilong hevi.​—⁠1 Samuel 17:​34-37, 45-47.

Yu ken bilip tru olsem taim yu wok long lotu, God bai helpim yu long mekim tok i pulim tingting bilong man, olsem em i bin helpim Devit. Em bai helpim yu long kisim “gutpela pasin bilong toktok.” (Aisaia 50:4; Matyu 10:​18-20) Yes, sapos yu wok nau long mekim ol samting bilong helpim yu long kamapim gut ol toktok yu mekim, orait bihain yu inap mekim gut toktok long pablik!

[Futnot]

[Blok long pes 24]

Kisim Trening Long Mekim Toktok Long Pablik

Long olgeta wik long ol kongrigesen bilong ol Witnes Bilong Jehova long olgeta hap, i gat wanpela program em Baibel i as bilong en ol i kolim Skul Tiokratik Bilong Autim Tok. I gat hap bilong program we ol stiuden i save insait long bekim sampela tok, mekim ol tok long ai bilong kongrigesen, na ol i kisim tok i helpim ol long mekim gut moa wok bilong ol. Olsem wanem? Dispela program i save wok? Larim Chris, em i gat 19 krismas, i stori long ekspiriens bilong em.

Chris i tok: “Paslain long mi joinim skul, mi save sem taim mi stap wantaim ol narapela. Mi pilim olsem mi no inap sanap long pletfom long ai bilong ol man. Tasol sampela long kongrigesen i bin strongim mi, na ol i tok maski sapos mi sanap na maus i guria long kolim ol tok, ol bai amamas long mi mekim bikos ol bai save olsem i hatwok tru long mi long mekim olsem. Bihain long mi mekim ol tok ol i save tok amamas long mi. Dispela i helpim mi tru.”

Long nau, faipela yia bihain long em i joinim skul, Chris i wok long redim namba wan 45 minit pablik tok bilong em. Olsem wanem? Yu save insait long Skul Tiokratik Bilong Autim Tok?

[Ol Piksa long pes 22, 23]

Pasin bilong mekim gut toktok inap helpim yu long planti samting yu laik mekim