Bosim Gut Bel, Stap Isi

PLANTI man i save pret liklik taim ol i sanap long mekim wanpela tok, na ol bai pret moa yet sapos ol i no save mekim ol tok klostu klostu. Taim pablisa i mekim wok autim tok, ating em bai pret liklik taim em i autim tok long namba wan na namba tu man em i bungim. Taim God i makim Jeremaia long stap olsem profet, em i tok: “Mi yangpela tumas na mi no save long pasin bilong autim tok.” (Jer. 1:​5, 6) Jehova i bin helpim Jeremaia, na em bai helpim yu tu. Isi isi yu inap kisim pasin bilong bosim gut bel na stap isi.

Taim man bilong mekim tok i bosim gut bel, em i save stap isi. Dispela i save kamap klia long pasin bilong em long sanap. Em i save sanap olsem em i stap isi tasol, na i stret wantaim samting em i laik mekim. Pasin bilong em long tromoi han i gat mining bilong en​—em i no mekim nating tasol. Nek bilong em i kamapim tru tingting bilong bel na em i bosim gut krai bilong nek.

Maski yu pilim olsem dispela tok i no makim yu, yu inap kisim dispela pasin. Bai yu mekim olsem wanem? Bai yumi skelim as na man i mekim tok em i save pret liklik na guria. Ating as bilong en em samting i save kamap long skin.

Taim yu mas mekim wanpela samting i hatwok long mekim na yu laik mekim gut, tasol yu no save yu inap mekim o nogat, yu save tingting planti na bel hevi. Olsem na kru bilong yu i kirapim skin long wokim sampela marasin ol i kolim adrenalin. Dispela marasin bai mekim klok bilong yu i ran hariap liklik, na bai yu pulim win hariap hariap, na bai yu tuhat moa, o han na skru bilong lek bai guria na taim yu toktok nek tu bai guria. Bodi bilong yu i laik helpim yu long winim dispela hevi, olsem na em i wokim dispela marasin bilong givim strong long yu. Wok bilong yu em bilong painim rot bilong yusim dispela strong bilong kamapim tingting em inap helpim yu na bilong givim bel moa yet long mekim tok.

Bilong Daunim Pasin Bilong Tingting Planti. Tingim: Yumi olgeta i save tingting planti liklik. Tasol bilong sanap olsem bel i stap isi yu mas daunim pasin bilong tingting planti, na long ol samting yu mekim yu mas stap isi na mekim long gutpela pasin. Bai yu mekim olsem wanem?

Redi gut tru. Tromoi sampela taim bilong redim tok. Yu mas save gut long mining bilong samting yu bai stori long en. Sapos em i wok bilong yu long makim ol tok yu bai kamapim, orait tingim ol man yu bai givim tok long ol, ol i save pinis long wanem samting, na yu laik bai tok bilong yu i mekim wanem long ol. Dispela bai helpim yu long makim ol tok em inap helpim tru ol. Sapos yu pilim olsem dispela i hatwok, orait toktok wantaim man i gat save long mekim tok. Em inap helpim yu long skelim gut ol samting yu laik stori long en na tingim ol man yu bai toktok long ol. Taim yu pilim olsem tok yu laik mekim bai helpim ol man na dispela tok i pas gut long tingting bilong yu, orait laik bilong kamapim ol dispela tok bai daunim pasin bilong yu long tingting planti long mekim.

Wok strong long kamapim gut kirap bilong tok. Save gut long tok yu bai mekim bilong kirapim tok. Taim yu kirap pinis long mekim tok, ating pret bilong yu bai pinis isi isi.

Em i wankain tu long taim yu redi long mekim wok autim tok. Tingting long tok yu laik mekim na yu bai toktok wantaim wanem kain manmeri. Tingim gut ol tok yu bai mekim bilong kirapim tok. Larim save bilong ol pablisa i save gut long autim tok i helpim yu.

Ating yu pilim olsem yu no inap pret tumas sapos yu raitim olgeta tok yu laik mekim taim yu givim wanpela tok long wanpela lain. Tasol dispela inap mekim na bai yu tingting planti moa yet long olgeta taim yu mekim wanpela tok. Tru, sampela i save raitim planti tok, tasol sampela ol i save raitim liklik tok tasol. Ol tok yu raitim long wanpela hap pepa i no inap daunim pasin bilong tingting planti. Nogat. Tasol sapos yu bilip tru long bel olsem ol tok yu redim bai helpim tru ol man, dispela bai daunim pasin bilong tingting planti.

Kolim kolim long maus ol tok yu bai mekim. Taim yu mekim olsem, dispela i strongim bilip bilong yu olsem yu inap mekim ol tok i kamapim tingting bilong yu. Taim yu traim traim wanpela tok, dispela tok i pas long tingting, na taim yu mekim dispela tok em i stap pinis long tingting bilong yu na em i isi long kamapim. Taim yu mekim traim, mekim olsem tru tru yu givim dispela tok long ol man. Long tingting lukim ol man i harim tok bilong yu. Mekim long wankain pasin olsem yu bai mekim taim yu givim dispela tok, olsem sindaun long tebol o sanap.

Beten askim Jehova long helpim yu. Olsem wanem? Em bai bekim kain beten olsem? “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi.” (1 Jo. 5:14) Sapos yu laik givim biknem long God na helpim ol man long kisim helpim long Tok Bilong Em, em bai harim ol beten bilong yu. Dispela promis inap strongim yu long inapim asainmen bilong yu. Na tu, taim yu wok long kisim ol pasin spirit holi i save kamapim​—laikim tru narapela, amamas, bel isi, stap isi, na daunim laik bilong olpela bel​—bai yu kisim stretpela tingting i helpim yu na bai yu bosim gut bel na stap isi.​—Ga. 5:​22, 23.

Wok long kisim save. Taim yu mekim wok autim tok planti taim, pasin bilong pret liklik bai wok long pinis. Taim yu wok long bekim tok long ol miting bilong kongrigesen, em bai isi moa long mekim tok long ai bilong ol narapela. Taim yu mekim pinis planti tok long kongrigesen, pasin bilong yu long tingting planti bai i no bikpela olsem long pastaim. Olsem wanem? Yu laik mekim sampela tok moa long skul? Orait volantia long mekim tok taim sampela i no inap mekim tok bilong ol.

Taim yu mekim ol samting yumi stori pinis long en, em bai helpim yu sapos yu skelim ol samting i makim olsem bel bilong yu i no stap isi. Sapos yu luksave long ol dispela mak na lain long stretim, dispela bai helpim yu long mekim tok olsem yu bosim gut bel na stap isi. Ol mak inap kamap long skin o long nek.

Ol Mak Bilong Skin. Pasin bilong yu long sanap samting na wokim han, em inap makim olsem yu bosim gut bel o yu pret. Yumi ken stori pastaim long han. Ol dispela samting hia inap makim olsem man i pret liklik: Holim tupela han bilong yu long baksait, o tupela han i hangamap strong tru long sait sait, o tupela han i holim strong tebol; putim han insait long poket na pulim i kam ausait na mekim mekim olsem, o han i holim nating wasket, nus, na aiglas; mekim nabaut long hanwas, pensil, ring, o ol pepa; kirap long wokim han, tasol kwiktaim yu pulim han i kam daun gen.

Ol narapela samting tu i makim olsem yu pret liklik, olsem: tromoi lek i go i kam, meknaisim bodi, sanap stret tru olsem pos, no sanap gut, tang i wetim lips planti taim, mekim olsem yu daunim spet planti taim, pulim win hariap na i no pulim strong.

Sapos yu wok strong yu inap daunim ol dispela pasin. Wok long daunim wanpela pasin pastaim. Luksave long hevi bilong yu na tingting gut pastaim, wanem samting yu mas mekim bilong abrusim dispela. Sapos yu traim stretim, orait pasin bilong yu long sanap samting na wokim han bai soim olsem yu bosim gut bel na stap isi.

Ol Mak Bilong Nek. Nek i go antap o nek i guria i makim olsem man i pret liklik. Ating yu kus planti taim o yu toktok hariap tumas. Sapos yu wok strong yu inap bosim gut nek bilong yu na winim ol dispela hevi.

Sapos yu pilim pret liklik, orait taim yu laik go antap long pletfom, malolo liklik na pulim bikpela win tupela o tripela taim. Wok long mekim bodi olgeta i stap isi. No ken tingting long pasin bilong yu long pret, nogat, tingting long as na yu laik kamapim ol dispela tok yu bin redim. Paslain long yu kirap toktok, lukluk long ol man, makim wanpela man pes bilong em i lait, na smail long em. Toktok isi isi long kirap bilong tok, na bihain tingting tasol long ol tok yu laik kamapim.

Samting Em Bai Painim Yu. Yu no ken ting pasin bilong pret liklik bai pinis olgeta. Planti man ol i bin mekim ol tok long pletfom inap planti yia na ol i save pret liklik paslain long ol i sanap long ai bilong ol man. Tasol ol i lain pinis long bosim dispela pret.

Sapos yu givim bel long pinisim ol pasin i makim olsem yu pret liklik, ol man bai ting yu save gut long mekim tok. Ating liklik pret bai stap yet, tasol ol man i no inap save long dispela.

Tingim, dispela marasin adrenalin bodi i wokim i as bilong ol pasin i makim olsem man i pret, tasol tu dispela marasin i save givim sampela strong long bodi. Yusim dispela strong bilong mekim tok i kamapim samting yu pilim long bel.

Yu no ken wetim taim yu sanap long pletfom long traim mekim ol dispela samting. Lain long bosim gut bel na stap isi taim yu toktok wantaim ol man long olgeta de na mekim long pasin olsem yu pilim tru long bel. Dispela em i bikpela samting bilong helpim tok yu mekim taim yu sanap long pletfom na long taim yu autim tok.