Stadi 27
No Ken Pret; Mekim Gut Skin
1 Yumi no ken pret long mekim tok. Yumi inap mekim. Sampela man i save gut long mekim tok, na maus bilong ol i no hevi liklik na ol i no pret. Tasol nogut ol i hambak long save bilong ol. Ol nupela man bilong mekim tok ol i save pret liklik. Olsem na ol i mas lain long mekim gut tok bambai ol i no ken pret moa.
2 Olsem wanem na sampela man bilong mekim tok ol i save pret? I gat as bilong dispela samting, olsem: (1) Ol i no redim gut tok, o (2) ol i ting ol i no inap mekim gut tok.
3 Wanem samting bai helpim yu bambai yu ken sanap gut na mekim tok na yu no ken pret? Yu mas tokim skin bilong yu yet: Mi inap mekim. Taim yu mekim namba wan tok, ating yu bai pret liklik; tasol taim yu mekim pinis planti tok, yu no pret moa; yu save yu inap mekim.
4 Yu mas redim gut tok. Sapos yu save gut long ol tok yu laik mekim, bai yu no ken pret long mekim. Redim gut ol bikpela tok yu laik kamapim, na traim traim planti taim long haus, na taim yu sanap bilong autim dispela tok bai yu tingim tok tasol, na yu no ken tingim skin bilong yu yet. Yumi no ken tingim ol man na yumi pret long ol; yumi mas tingim Jehova; yumi laik bai Jehova i amamas long yumi. (Ga 1:10; Kis 4:10-12; Jer 1:8) Yumi laik mekim laik bilong Jehova.
5 Sapos nek i no strong na skin i guria, ol man bai save yu pret. Tasol sapos yu save gut long ol tok yu laik mekim, bai yu sanap gut na yu no guria na pret.
6 I gat sampela samting i makim man i pret, olsem: Em i holim strong tebol, o em i putim han i go insait long bak bilong trasis na em i kamautim gen na putim na kamautim gen, o em i pulim kwik win.
7 Sapos yu wok strong yu inap daunim ol dispela kain pasin na yu no ken pret moa. No ken tingting tumas long ol man bilong harim; tingim ol tok yu laik mekim. Taim yu go antap long pletfom, maski kirap kwik long toktok. Kisim win pastaim.
8 Sapos nek bilong yu i go antap tumas, o yu wok long kus samting, ol man bai save yu pret. Taim yu wokabaut i go antap long pletfom, no ken wokabaut hariap; taim yu toktok, daunim nek liklik na tok isi isi. Ol dispela samting bai helpim yu bambai yu no ken pret.
9 Mekim gut skin. Taim yu sanap bilong mekim tok, yu mas mekim gut skin. Sapos nogat, ol man bai wok long lukim skin bilong yu na bai ol i no ken harim tok bilong yu. Ol Kristen i mas mekim gut skin. Ol i mas putim klinpela klos. Ol meri Kristen i no ken bihainim pasin bilong ol meri bilong ausait na pasim ol klos i sotpela tumas o i pas tumas long skin. Ol i mas tingim tok bilong Pol long 1 Timoti 2:9.
10 Ol man bilong ol narapela narapela ples ol i save pasim ol narapela narapela kain klos. Yumi mas pasim gutpela klos bambai ol man bilong ples bilong yumi i no gat tok long dispela. Sapos man i laik mekim wanpela tok, em i mas waswas pastaim na sev na komim gut gras.
11 Sapos brata bilong mekim tok em i no mekim gut skin na wasman bilong Skul i laik tokim em long dispela samting, ating gutpela sapos wasman i tokim em taim miting i pinis; no ken tokim em insait long miting. Sapos brata i mekim gut skin, wasman i ken givim gutpela tok long em insait long miting.
12 Taim man i sanap long ai bilong ol man, em i mas sanap gut. Nogut em i sanap nogut na baksait i krungut, o narapela lek i stap longwe long narapela, o em i sanap long wanpela lek tasol na narapela lek i tanim nabaut. Man i mas redi gut na bai em inap sanap gut.
13 Man bilong mekim tok i mas i gat klinpela Baibel. Nogut ol pepa i pulap long en. Nogut lip bilong en i bruk o i gat doti. No ken pulimapim ol pen pensil samting long poket bilong siot, nogut ol man i wok long lukluk long dispela.
14 Pes i mas stret long tok. Taim yu toktok long i dai o long man i bagarap, yu no ken lap na amamas, yu mas mekim pes i stret long tok; pes i mas hevi liklik. Tasol taim yu toktok long gutpela samting, olsem nupela pasin samting, pes i no ken tudak; yu mas lap na amamas. Pes bilong yu i mas stret long dispela tok yu laik mekim.