Lukluk Long Ol Man

AI BILONG yumi i save tokaut long tingting na samting yu pilim long bel. Ai inap makim olsem man i kirap nogut o em i pret, na em inap kamapim pasin sori o pasin bilong laikim narapela. Sampela taim ai i soim olsem yumi gat tupela tingting o yumi bel hevi. Wanpela lapun man i stori long ol wanlain bilong em, em ol i bin karim planti hevi, na em i tok: “Mipela i save mekim toktok long ai.”

Sampela bai lukim ai bilong yumi, olsem yumi lukluk we, na ol bai skelim tok yumi mekim na yumi wanem kain man. Long planti ples ol man i save bilip long man i save lukluk long ai bilong ol na em i mekim long pasin pren. Tasol man i save lukluk long lek bilong em o long narapela hap na em i no lukluk long man em i toktok wantaim em, ol man i no inap bilip olsem em i tingim tru ol o em inap mekim gutpela wok. Long sampela ples ol i ting olsem pasin bilong lukluk strong long narapela em i no gutpela pasin, o i makim olsem yu laik daunim o pretim ol. Na ol i pilim olsem dispela pasin i no stret liklik taim man i toktok wantaim meri, o taim yu toktok wantaim wanpela bikman o man i gat namba. Na long sampela hap sapos wanpela yangpela i lukluk stret long ai bilong man i bikpela pinis na toktok long em, dispela i makim olsem em i no daun long em.

Tasol sapos i no gat tambu long mekim olsem, pasin bilong lukluk stret long ai bilong man taim yu kamapim wanpela bikpela tok, dispela i save strongim tok yu mekim. Ol man bai pilim olsem man i mekim tok em i bilip tru long tok em i mekim. Lukim samting Jisas i mekim taim ol disaipel i kirap nogut na tok: “Husat inap kisim laip i stap gut oltaim?” Baibel i tok: “Jisas i lukluk stret long ol, na i tok, ‘Ol man i no inap. Tasol God em inap long mekim olgeta samting.’” (Mt. 19:​25, 26) Baibel i kamapim olsem Pol i lukluk long ol man em i toktok long ol bambai em i ken pilim tingting bilong ol. Long wanpela taim Pol i mekim tok na wanpela man i stap, taim mama i karim em, em i lek nogut. Aposel 14:​9, 10 i tok: “Dispela man i harim Pol i autim tok. Na Pol i lukluk strong long em, na em i lukim olsem dispela man i bilip na em inap long kamap gutpela. Olsem na Pol i tokaut strong olsem, ‘Yu kirap na sanap.’”

Sampela Tok Bilong Helpim Wok Autim Tok. Taim yu autim tok na bungim ol man, mekim pasin pren na pasin olsem yu tingim ol. Taim em i stret long mekim olsem, bilong kirapim tok kamapim sampela askim i save kirapim tingting bilong man long samting yutupela wantaim i gat laik long stori long en. Taim yu mekim olsem, wok long lukluk long ai bilong man​—o lukluk long pes bilong man long pasin i makim olsem yu tingim na laikim em. Ol man i amamas long man i smail na ai bilong em i kamapim olsem bel bilong em i amamas. Ating kain pasin olsem inap tokim man olsem yu wanem kain man na dispela bai helpim bel bilong em i stap isi taim yu toktok wantaim em.

Yu inap kisim tingting bilong man taim yu lukim ai bilong em, na dispela i ken helpim yu long save long samting yu mas mekim. Sapos man i belhat o em i no laik harim tok, ating yu inap lukim dispela long ai bilong em. Sapos em i no klia long tok yu mekim o em i wok long les kwik, yu ken luksave long dispela. Sapos em i laik tru long harim tok, dispela tu bai i stap ples klia. Ai bilong em inap tokaut long yu olsem yu mas senisim spit bilong toktok, kirapim em long insait moa long toktok, pinisim toktok, o soim em long pasin bilong mekim Baibel-stadi.

Maski yu mekim wok autim tok o yu mekim Baibel-stadi wantaim man, wok long lukluk long ai bilong man yu toktok wantaim em. Tasol no ken lukluk strong long em, nogut em i sem. (2 Kin. 8:11) Tasol long pasin pren, na pasin i stret, lukluk long pes bilong man planti taim. Long planti ples, dispela i makim olsem yu tingim tru man yu toktok wantaim em. Taim yu rit long Baibel o narapela buk samting, ai bilong yu bai lukluk long samting yu ritim. Tasol bilong strongim wanpela tok, ating bai yu lukluk stret long man inap sotpela taim tasol. Sapos yu lukluk long em long sampela taim, dispela bai helpim yu long save long tingting bilong em long ol samting yu ritim.

Sapos yu hatwok long lukluk long man, long wanem, yu save sem, no ken les kwik. Sapos yu mekim mekim, pasin bilong lukluk long man bai kamap olsem pasin bilong yu na em bai helpim yu long toktok gut wantaim ol narapela.

Taim Yu Mekim Tok. Baibel i tok taim Jisas i laik kirapim tok bilong em antap long maunten, pastaim em i “lukluk long ol disaipel bilong en.” (Lu. 6:20) Larim pasin bilong em i skulim yu. Sapos yu bai mekim wanpela tok long wanpela lain, orait sanap long pes bilong ol na malolo inap sampela sekon paslain long yu kirap toktok. Lukluk stret long ai bilong sampela. Kain malolo olsem inap helpim yu long daunim liklik pret yu pilim paslain long toktok. Dispela inap larim ol man i kisim save long tingting bilong yu o samting yu pilim long bel, em pes bilong yu i kamapim. Na tu, dispela bai helpim ol man long sindaun gut na stap isi na redi long putim gut yau long tok yu laik mekim.

Taim yu mekim tok, lukluk long ol man. No ken lukim ol olsem wanpela bikpela lain tasol. Lukluk long sampela man wan wan. Em pasin bilong planti ples long man i mekim tok i mas lukluk long ol man.

Pasin bilong lukluk long ol man yu toktok long ol i no olsem yu kirap lukim ol man long han kais na i go long han sut na i kam bek gen long han kais. Nogat. Long stretpela pasin lukluk stret long ai bilong wanpela na sapos i stret long mekim olsem, kolim wanpela sentens olgeta taim yu lukluk long em. Bihain lukluk long narapela na kolim wanpela o tupela sentens long em. No ken lukluk long wanpela inap longpela taim na man i pilim sem, na no ken lukluk long wan wan man tasol. Wok long lukluk long ol man olsem, tasol taim yu toktok long wanpela man, toktok long em wanpela tasol, na lukim olsem em i gat wanem tingting long tok yu mekim, orait nau lukluk long narapela man.

Ol tok yu bin raitim, olsem autlain, i mas i stap antap long tebol, o long han bilong yu, o insait long Baibel bambai yu no gat wok long daunim het bilong lukim, yu inap lukim long ai tasol. Sapos yu mas daunim het bilong lukim tok yu bin raitim, bai yu hatwok long lukluk long ol man. Yu mas tingim hamas taim yu save lukim ol tok yu bin raitim na yu save lukim long wanem taim. Sapos yu wok long lukim ol tok yu bin raitim taim yu laik kamapim wanpela bikpela tok, bai yu no inap lukim olsem ol man i gat wanem tingting long tok yu mekim, na tu bai yu no inap kamapim strong tok yu mekim. Na sapos yu lukluk planti taim tru long ol tok yu bin raitim, bai yu no lukluk long ol man.

Taim yu tromoi wanpela bal long man, yu save lukluk long em bilong save em i kisim o nogat. Ol wan wan tingting yu kamapim i olsem narapela narapela bal yu “tromoi” long ol man i harim tok bilong yu. Sapos ol i meknaisim het liklik, o smail, o pes i makim ol i putim gut yau, i olsem ol i “kisim” tok yu tromoi long ol. Sapos yu lukluk gut long ol, dispela inap helpim yu long save olsem ol i “kisim” o nogat.

Olsem wanem? Sapos ol i makim yu long rit long kongrigesen, yu mas traim long lukluk long ol man taim yu rit? Sapos ol i wok long bihainim tok yu ritim long Baibel, bai ol i no save olsem yu lukluk long ol o nogat. Tasol taim yu lukluk long ol man, dispela i ken helpim yu long givim bel long ritim tok, long wanem, yu save gut olsem dispela tok yu ritim i mekim wanem long ol. Na ol man i no wok long ritim Baibel bilong ol na tingting bilong ol i wokabaut, taim man bilong mekim tok i lukluk long ol, dispela inap kirapim ol long kirap gen long putim yau long tok em i ritim. Tasol yu inap lukluk long man inap sotpela taim tasol, na yu no ken mekim long pasin inap paulim tok yu ritim. Olsem na yu mas holim Baibel long han na apim het bilong yu, na no ken larim het i go daun klostu long bros bilong yu.

Sampela taim ol i makim ol elda long ritim wanpela manuskrip long program bilong wanpela kibung. Bilong mekim gut dispela wok man i mas i gat save long mekim, na redi gut, na traim traim planti taim. Tru, taim yu ritim wanpela manuskrip yu no inap lukluk tumas long ol man. Tasol sapos brata i bin redi gut, ating em inap lukluk long ol man sampela taim na em i no paulim sampela tok. Sapos em i mekim olsem, dispela bai helpim ol man long putim yau long tok em i mekim na ol inap kisim gutpela skul long ol samting bilong spirit em i kamapim.