Tingim Gut Man—Lukluk Long Ai
1 Taim yumi autim tok long rot na ol haus, planti taim yumi save lukluk long ai bilong man pastaim na bihain yumi toktok. Long dispela sotpela haptaim yumi lukluk long ai bilong man, yumi inap luksave ol i gat wanem kain tingting long yumi na ol i amamas o nogat. Na tu, ol inap luksave long tingting bilong yumi. Wanpela meri i tok long wanpela Witnes i bin kam lukim em olsem: “Samting mi tingim long dispela meri em smail bilong em i soim olsem em i stap bel isi. Mi laik save, em bai tok wanem.” Dispela i opim rot bilong dispela meri long putim yau long tok bilong gutnius.
2 Pasin bilong lukluk long ai bilong man em i gutpela rot bilong kirap autim tok long rot o long ol ples i gat planti man. Wanpela brata i save lukluk long ai bilong ol man i wokabaut i kam long em. Taim em i lukluk long ai bilong ol, em i save smail na bihain soim ol nius long ol. Long dispela rot em i save toktok gut wantaim planti man na tilim planti buk na nius.
3 Luksave Long Tingting Bilong Man: Taim yumi lukluk long ai bilong ol man, dispela bai helpim yumi long luksave long tingting bilong ol. Olsem, sapos wanpela man i no kliagut o i no wanbel long tok yumi mekim, pes bilong em bai kamapim klia dispela samting. Sapos em i bisi o em i no laik moa long harim tok, yumi inap luksave long dispela long pes bilong em. Yumi ken senisim o sotim tok bilong yumi. Pasin bilong luksave long tingting bilong ol narapela i gutpela rot bilong soim olsem yumi tingim ol.
4 Tingim Man na Pilim Tru Tok: Long planti ples, taim yu lukluk long ai bilong man taim yu toktok wantaim em, dispela i makim olsem yu tingim em. Tingim tok Jisas i mekim taim ol disaipel bilong em i askim em: “Husat inap kisim laip i stap gut oltaim?” Baibel i tok: “Jisas i lukluk stret long ol, na i tok, ‘Ol man i no inap. Tasol God em inap long mekim olgeta samting.’ ” (Mt. 19:25, 26) Tru tumas, pasin bilong Jisas long lukluk long ol i strongim tok bilong em. Olsem tasol, pasin bilong lukluk long ai bilong man bai helpim yumi long kamapim tok bilong Kingdom long pasin i soim olsem yumi tingim man na yumi pilim tru tok yumi mekim.—2 Ko. 2:17; 1 Te. 1:5.