Gutpela Wei Bilong Autim Tok Long Rot

1. Wanem wanpela rot we yumi ken bihainim pasin bilong Jisas?

¹ Taim Jisas i stap long graun, em i autim tok long ol man em i bungim long rot na long ol narapela hap. (Luk 9:​57-61; Jon 4:⁠7) Em i gat gutpela tok bilong autim na em i laik bai planti man i mas harim. Long nau, pasin bilong autim tok long rot em gutpela wei bilong helpim planti man long kisim save long God. (Snd. 1:20) Wok bilong yumi bai karim kaikai sapos yumi yet i go pas long toktok wantaim ol man na yumi bihainim gutpela tingting.

2. Olsem wanem yumi yet inap go pas long toktok wantaim ol man?

² Go Pas Long Toktok: Mobeta yumi yet i go pas long toktok long ol man, na yumi no ken sanap o sindaun tasol long wanpela hap na wetim ol long kam long yumi. Yumi mas lukluk long pes bilong ol na smail, na toktok gut wantaim ol. Sapos yu wok wantaim sampela pablisa, orait taim yu laik toktok long wanpela man, yu wanpela tasol i ken i go na toktok. Sapos i stret, taim yu toktok pinis wantaim man, askim em long olsem wanem yu ken bungim em gen. Sampela pablisa i save tilim nius long wankain ples long olgeta taim, olsem na ol i save toktok wantaim seim lain em ol i save bungim.

3. Olsem wanem yumi ken bihainim gutpela tingting taim yumi autim tok long rot?

³ Bihainim Gutpela Tingting: Bihainim gutpela tingting long makim wanem hap yu bai sanap na husat yu bai toktok long em. I no gat wok long yu toktok long olgeta man. Skelim gut ol man. Sapos man i hariap long i go long wanpela hap, orait mobeta yu larim em i go. Sapos yu tilim nius long fran bilong stua o ofis, bihainim savepasin na bai maneja i no ken kros. Mobeta yu toktok long ol man taim ol i kamaut long stua o ofis, na i no long taim ol i laik i go insait. Taim yu laik toktok long man, no ken mekim long pasin we bai pretim o mekim em i kirap nogut. Na tu, bihainim gutpela tingting taim yu tilim ol nius. Sapos man i no gat bikpela laik long harim tok, orait yu ken tilim liklik nius long em.

4. Olsem wanem wok bilong autim tok long rot em i gutpela wei bilong autim tok na yumi inap kisim amamas long en?

⁴ Pasin bilong autim tok long rot i helpim yumi long planim planti sid bilong tok i tru insait long sotpela haptaim. (Sav. 11:⁠6) Sampela lain yumi bungim long rot, ating em ol lain yumi no bungim taim yumi autim tok long ol haus. I gutpela yu stretim rot long autim tok long rot, em wanpela gutpela wei bilong autim tok na yu bai kisim amamas long en.