Stadi 18
Lukluk Long Ol Man; Mekim Wok Long Autlain
1 Taim yu mekim wanpela tok, sapos yu lukluk long ol man ol bai putim yau long tok bilong yu. Taim yu wokim autlain, olsem bun bilong tok, no ken wokim bikpela autlain tumas; nogut yu wok long lukluk long ol dispela tok yu bin raitim na yu no lukluk long ol man.
2 Lukluk long ol man. Yu ken mekim olsem: Lukluk long wanpela brata na mekim liklik tok, na bihain lukluk long narapela brata na mekim liklik tok. No ken lukluk longtaim tumas long wanpela brata tasol. Yu mas holim gut autlain bambai yu inap lukim kwik ol tok yu bin raitim na lukluk gen long ol man.
3 Taim yu kaunim wanpela manyuskrip, bai yu hatwok long lukluk long ol man. Tasol sapos yu redim gut dispela tok na yu kaunim kaunim, na yu save gut long en, bai yu inap lukluk long ol man long sampela taim.
4 Toktok long ol man i sindaun harim. Yu ken mekim olsem: Yu ken toktok olsem yu toktok long tupela o tripela man tasol. Tasol yu mas was gut long pasin bilong yu long toktok long ol man. Olsem: Sapos yu mekim tok na yu stori long ol man nogut, yu no ken lukluk longtaim long sampela man na bai ol i ting ol yet ol i man nogut.
5 Mekim wok long autlain olsem bun bilong tok. Autlain em bikpela samting. Planti man, taim ol i nupela long mekim tok ol i save raitim olgeta tok ol i laik mekim, na long taim bilong mekim tok ol i kaunim tasol dispela tok. Tasol taim yumi autim tok long ol haus yumi no save raitim ol tok na yumi kaunim, a? Olsem na long Skul tu, yumi inap mekim tasol tok na yumi no kaunim.
6 Planti man ol i laik raitim olgeta tok, nogut ol i lusim sampela. Tasol gutpela sapos yu raitim bun tasol bilong tok na lain long mekim wok long en.
7 Taim yumi wokim bun bilong tok yumi mas wokim liklik tok tasol. Em bilong helpim yu long tingim ol bikpela tok yu laik kamapim. Yu ken raitim nem o as tok bilong tok antap long pepa. Yu ken katim ol bikpela tok na bai em i stap ples klia.
8 Taim yu redim tok, pastaim yu ken wokim bikpela autlain na raitim planti tok. Tasol bihain sotim na wokim liklik autlain. Taim yu wok long redim tok yu ken lukim tupela autlain wantaim, nogut yu lusim sampela tok. Tasol taim yu mekim tok, holim liklik autlain tasol na mekim wok long dispela.